ਕਿਡਨੀ ਲਈ ਜਾਨਲੇਵਾ ਹਨ ਇਹ ਚੀਜ਼ਾਂ, ਅੱਜ ਹੀ ਸੁਧਾਰ ਲਵੋ ਆਪਣੀਆਂ ਆਦਤਾਂ

ਹੈਲਥ ਡੈਸਕ- ਕਿਡਨੀ ਸਾਡੇ ਸਰੀਰ ਦਾ ਬਹੁਤ ਮਹੱਤਵਪੂਰਨ ਅੰਗ ਹੈ। ਇਹ ਖੂਨ ਨੂੰ ਫਿਲਟਰ ਕਰਨ, ਸਰੀਰ 'ਚ ਪਾਣੀ ਦਾ ਸੰਤੁਲਨ ਬਣਾਈ ਰੱਖਣ ਅਤੇ ਬਲੱਡ ਪ੍ਰੈਸ਼ਰ ਨੂੰ ਕੰਟਰੋਲ ਕਰਨ ਵਰਗੇ ਅਹਿਮ ਕੰਮ ਕਰਦੀ ਹੈ। ਪਰ ਕਈ ਵਾਰ ਅਸੀਂ ਜਾਣੇ-ਅਣਜਾਣ 'ਚ ਕੁਝ ਆਦਤਾਂ ਅਪਣਾ ਲੈਂਦੇ ਹਾਂ ਜੋ ਹੌਲੀ-ਹੌਲੀ ਕਿਡਨੀ ਨੂੰ ਕਮਜ਼ੋਰ ਕਰਦੀਆਂ ਹਨ। ਰਿਪੋਰਟਾਂ ਅਨੁਸਾਰ, ਜੇ ਇਹ ਆਦਤਾਂ ਸਮੇਂ 'ਤੇ ਨਾ ਛੱਡੀਆਂ ਜਾਣ ਤਾਂ ਲੰਮੇ ਸਮੇਂ 'ਚ ਕਿਡਨੀ ਫੇਲੀਅਰ ਜਾਂ ਹੋਰ ਗੰਭੀਰ ਬੀਮਾਰੀਆਂ ਦਾ ਖਤਰਾ ਵੱਧ ਸਕਦਾ ਹੈ। ਆਓ ਜਾਣੀਏ ਉਹ ਆਦਤਾਂ ਜੋ ਚੁੱਪ-ਚਾਪ ਕਿਡਨੀ ਨੂੰ ਨੁਕਸਾਨ ਪਹੁੰਚਾ ਰਹੀਆਂ ਹਨ:

ਖੰਡ ਵੱਧ ਖਾਣਾ

ਬਹੁਤ ਜ਼ਿਆਦਾ ਖੰਡ ਸਿਰਫ਼ ਬਲੱਡ ਸ਼ੂਗਰ ਹੀ ਨਹੀਂ ਵਧਾਉਂਦੀ, ਸਗੋਂ ਕਿਡਨੀ 'ਤੇ ਵੀ ਦਬਾਅ ਪਾਂਦੀ ਹੈ। ਕਿਡਨੀ ਨੂੰ ਖੂਨ ਤੋਂ ਵਾਧੂ ਸ਼ੂਗਰ ਫਿਲਟਰ ਕਰਨੀ ਪੈਂਦੀ ਹੈ ਜਿਸ ਨਾਲ ਉਨ੍ਹਾਂ ਦੀ ਕੰਮ ਕਰਨ ਦੀ ਸਮਰੱਥਾ ਘਟਣ ਲੱਗਦੀ ਹੈ। ਮਠਿਆਈ, ਪ੍ਰੋਸੈਸਡ ਫੂਡ ਅਤੇ ਰਿਫਾਈਂਡ ਕਾਰਬਸ ਵਰਗੀਆਂ ਚੀਜ਼ਾਂ ਤੋਂ ਬਚੋ।

ਪਾਣੀ ਘੱਟ ਪੀਣਾ

ਪਾਣੀ ਕਿਡਨੀ ਨੂੰ ਸਰੀਰ ਤੋਂ ਟਾਕਸਿਨਸ ਬਾਹਰ ਕੱਢਣ 'ਚ ਮਦਦ ਕਰਦਾ ਹੈ। ਪਾਣੀ ਘੱਟ ਪੀਣ ਨਾਲ ਕਿਡਨੀ ਸਟੋਨ ਅਤੇ ਯੂਰਿਨਰੀ ਇਨਫੈਕਸ਼ਨ ਦਾ ਖਤਰਾ ਵੱਧ ਜਾਂਦਾ ਹੈ। ਦਿਨ ਭਰ ਵਧੀਆ ਮਾਤਰਾ 'ਚ ਪਾਣੀ ਪੀਣਾ ਕਿਡਨੀ ਲਈ ਲਾਭਦਾਇਕ ਹੈ।

ਹਾਈ ਬਲੱਡ ਪ੍ਰੈਸ਼ਰ ਨੂੰ ਨਜ਼ਰਅੰਦਾਜ਼ ਕਰਨਾ

ਲਗਾਤਾਰ ਵੱਧ ਬਲੱਡ ਪ੍ਰੈਸ਼ਰ ਕਿਡਨੀ ਦੀਆਂ ਬਲੱਡ ਵੈਸਲਜ਼ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ। ਇਸ ਨਾਲ ਕਿਡਨੀ ਦੀ ਫਿਲਟਰਿੰਗ ਪ੍ਰਕਿਰਿਆ ਬਹੁਤ ਪ੍ਰਭਾਵਿਤ ਹੁੰਦੀ ਹੈ। ਇਸ ਲਈ ਰੋਜ਼ਾਨਾ ਬਲੱਡ ਪ੍ਰੈਸ਼ਰ ਚੈਕ ਕਰੋ ਅਤੇ ਸਿਹਤਮੰਦ ਜੀਵਨਸ਼ੈਲੀ ਅਪਣਾਓ।

ਘੱਟ ਨੀਂਦ ਲੈਣਾ

ਨੀਂਦ ਪੂਰੀ ਨਾ ਹੋਣ ਨਾਲ ਹਾਰਮੋਨ ਦਾ ਸੰਤੁਲਨ ਖਰਾਬ ਹੁੰਦਾ ਹੈ, ਜਿਸ ਨਾਲ ਬਲੱਡ ਪ੍ਰੈਸ਼ਰ ਵੱਧਦਾ ਹੈ ਅਤੇ ਕਿਡਨੀ 'ਤੇ ਅਸਰ ਪੈਂਦਾ ਹੈ। ਹਰ ਰਾਤ 7 ਤੋਂ 9 ਘੰਟੇ ਦੀ ਪੂਰੀ ਨੀਂਦ ਲਾਜ਼ਮੀ ਹੈ।

ਵੱਧ ਲੂਣ ਖਾਣਾ

ਜ਼ਿਆਦਾ ਲੂਣ ਬਲੱਡ ਪ੍ਰੈਸ਼ਰ ਵਧਾਉਂਦਾ ਹੈ ਜੋ ਕਿਡਨੀ 'ਤੇ ਸਿੱਧਾ ਦਬਾਅ ਪਾਂਦਾ ਹੈ। ਪੈਕਡ ਫੂਡ ਅਤੇ ਜ਼ਿਆਦਾ ਨਮਕੀਨ ਖਾਣਿਆਂ ਤੋਂ ਬਚੋ। ਘੱਟ ਨਮਕ ਨਾ ਸਿਰਫ਼ ਕਿਡਨੀ ਲਈ ਸਗੋਂ ਦਿਲ ਦੀ ਸਿਹਤ ਲਈ ਵੀ ਫਾਇਦੇਮੰਦ ਹੈ।

ਕਸਰਤ ਨਾ ਕਰਨਾ

ਲਗਾਤਾਰ ਬੈਠੇ ਰਹਿਣ ਨਾਲ ਸਰੀਰ ਅਤੇ ਕਿਡਨੀ ਦੋਵਾਂ ਪ੍ਰਭਾਵਿਤ ਹੁੰਦੇ ਹਨ। ਹਲਕੀ-ਫੁਲਕੀ ਕਸਰਤ ਜਿਵੇਂ ਵਾਕਿੰਗ, ਜੌਗਿੰਗ ਜਾਂ ਤੈਰਨਾ ਕਿਡਨੀ ਨੂੰ ਸਿਹਤਮੰਦ ਰੱਖਦੀ ਹੈ।

ਕਿਡਨੀ ਨੂੰ ਸਿਹਤਮੰਦ ਰੱਖਣ ਲਈ ਸੁਝਾਅ

• ਖੰਡ ਅਤੇ ਲੂਣ ਦੀ ਮਾਤਰਾ ਘੱਟ ਕਰੋ
• ਦਿਨ ਭਰ ਵਧੀਆ ਮਾਤਰਾ 'ਚ ਪਾਣੀ ਪੀਓ
• ਬਲੱਡ ਪ੍ਰੈਸ਼ਰ ਰੈਗੂਲਰ ਚੈਕ ਕਰੋ
• ਪੂਰੀ ਨੀਂਦ ਲਵੋ
• ਹਲਕੀ-ਫੁਲਕੀ ਕਸਰਤ ਰੋਜ਼ ਕਰੋ

ਨੋਟ– ਇਹ ਆਰਟੀਕਲ ਸਿਰਫ਼ ਆਮ ਜਾਣਕਾਰੀ ਲਈ ਹੈ। ਆਪਣੀ ਖੁਰਾਕ ਵਿੱਚ ਕੋਈ ਬਦਲਾਅ ਕਰਨ, ਕਿਸੇ ਵੀ ਬਿਮਾਰੀ ਨਾਲ ਸਬੰਧਤ ਕੋਈ ਵੀ ਉਪਾਅ ਕਰਨ ਜਾਂ ਕੋਈ ਵੀ ਘਰੇਲੂ ਨੁਸਖਾ ਅਪਣਾਉਣ ਤੋਂ ਪਹਿਲਾਂ ਆਪਣੇ ਡਾਕਟਰ ਦੀ ਸਲਾਹ ਜ਼ਰੂਰ ਲਓ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8