'Book My Show' 'ਤੇ 1.2 ਕਰੋੜ ਟਿਕਟਾਂ ਦੀ ਵਿਕਰੀ ਕਰਨ ਵਾਲੀ ਪਹਿਲੀ ਹਿੰਦੀ ਫਿਲਮ ਬਣੀ 'ਛਾਵਾ'

ਨਵੀਂ ਦਿੱਲੀ (ਏਜੰਸੀ)- ਵਿੱਕੀ ਕੌਸ਼ਲ ਦੀ ਫਿਲਮ "ਛਾਵਾ" ਬੁੱਕ ਮਾਈ ਸ਼ੋਅ 'ਤੇ 1.2 ਕਰੋੜ ਟਿਕਟਾਂ ਦੀ ਵਿਕਰੀ ਦਰਜ ਕਰਨ ਵਾਲੀ ਪਹਿਲੀ ਹਿੰਦੀ ਫਿਲਮ ਬਣ ਗਈ ਹੈ, ਟਿਕਟਿੰਗ ਪਲੇਟਫਾਰਮ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਲਕਸ਼ਮਣ ਉਤੇਕਰ ਦੁਆਰਾ ਨਿਰਦੇਸ਼ਤ ਇਹ ਫਿਲਮ 14 ਫਰਵਰੀ ਨੂੰ ਰਿਲੀਜ਼ ਹੋਈ ਸੀ। ਇਹ ਫਿਲਮ ਮਰਾਠਾ ਸਾਮਰਾਜ ਦੇ ਸੰਸਥਾਪਕ ਛਤਰਪਤੀ ਸ਼ਿਵਾਜੀ ਮਹਾਰਾਜ ਦੇ ਪੁੱਤਰ ਛਤਰਪਤੀ ਸੰਭਾਜੀ ਮਹਾਰਾਜ ਦੇ ਜੀਵਨ 'ਤੇ ਆਧਾਰਿਤ ਹੈ। ਇਸ ਵਿੱਚ ਕੌਸ਼ਲ ਮੁੱਖ ਭੂਮਿਕਾ ਵਿੱਚ ਹਨ, ਜਦੋਂ ਕਿ ਅਦਾਕਾਰਾ ਰਸ਼ਮਿਕਾ ਮੰਦਾਨਾ ਉਨ੍ਹਾਂ ਦੀ ਪਤਨੀ ਯੇਸੂਬਾਈ ਦੀ ਭੂਮਿਕਾ ਨਿਭਾ ਰਹੀ ਹੈ।

'ਮੈਡੌਕ ਫਿਲਮਜ਼' ਦੁਆਰਾ ਨਿਰਮਿਤ, ਇਸ ਫਿਲਮ ਨੇ ਘਰੇਲੂ ਬਾਕਸ ਆਫਿਸ 'ਤੇ 550 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕੀਤੀ ਹੈ। ਬੁੱਕ ਮਾਈ ਸ਼ੋਅ ਦੇ ਸੀਓਓ (ਸਿਨੇਮਾ) ਆਸ਼ੀਸ਼ ਸਕਸੈਨਾ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਫਿਲਮ ਦੀ ਟਿਕਟ ਵਿਕਰੀ ਨੇ ਰਾਜਕੁਮਾਰ ਰਾਓ ਅਤੇ ਸ਼ਰਧਾ ਕਪੂਰ ਅਭਿਨੀਤ 2024 ਦੀ ਫਿਲਮ 'ਸਤ੍ਰੀ 2' ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ। ਸਕਸੈਨਾ ਨੇ ਕਿਹਾ, “ਇਕ ਇਤਿਹਾਸਕ ਉਪਲੱਬਧੀ, ਜਿਸ ਨੇ ਭਾਰਤੀ ਸਿਨੇਮਾ ਦੇ ਦ੍ਰਿਸ਼ ਨੂੰ ਮੁੜ ਪਰਿਭਾਸ਼ਿਤ ਕੀਤਾ ਹੈ। 'ਛਾਵਾ' ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਦਿੱਤੇ ਹਨ ਅਤੇ ਬੁੱਕ ਮਾਈ ਸ਼ੋਅ 'ਤੇ 1.2 ਕਰੋੜ ਟਿਕਟਾਂ ਦੀ ਵਿਕਰੀ ਦੇ ਇਤਿਹਾਸਕ ਅੰਕੜੇ ਨੂੰ ਪਾਰ ਕਰਨ ਵਾਲੀ ਪਹਿਲੀ ਹਿੰਦੀ ਫਿਲਮ ਬਣ ਗਈ ਹੈ। ਫਿਲਮ 'ਛਾਵਾ' ਵਿੱਚ ਅਕਸ਼ੈ ਖੰਨਾ, ਡਾਇਨਾ ਪੈਂਟੀ, ਨੀਲ ਭੂਪਾਲਮ, ਆਸ਼ੂਤੋਸ਼ ਰਾਣਾ, ਦਿਵਿਆ ਦੱਤਾ ਅਤੇ ਵਿਨੀਤ ਕੁਮਾਰ ਸਿੰਘ ਵੀ ਹਨ।