ਅਜਬ-ਗਜ਼ਬ:ਇਹ ਕੀ ਕਰ ਰਹੇ ਹੋ, ਇਹ ਕੀ ਹੋ ਰਿਹਾ ਹੈ!

ਅੱਜ ਹਰ ਜਗ੍ਹਾ ਹਫੜਾ-ਦਫੜੀ ਜਿਹੀ ਮਚੀ ਹੋਈ ਹੈ। ਕਿਤੇ ਬੰਬ ਧਮਾਕੇ, ਕਿਤੇ ਸਿਆਸੀ ਚੁੱਕ-ਥੱਲ ਤਾਂ ਕਿਤੇ ਵੱਖ-ਵੱਖ ਕਿਸਮ ਦੇ ਅਪਰਾਧ। ਅਜਿਹੇ ’ਚ ਪਾਠਕਾਂ ਲਈ ਅੱਜ ਅਸੀਂ ਕੁਝ ‘ਅਜਬ-ਗਜ਼ਬ’ ਸਮਾਚਾਰ ਇੱਥੇ ਹੇਠਾਂ ਦਰਜ ਕਰ ਰਹੇ ਹਾਂ ਜੋ ਤੁਹਾਨੂੰ ਦੱਸਣਗੇ ਕਿ ਉਪਰ ਲਿਖੀਆਂ ਗੱਲਾਂ ਤੋਂ ਇਲਾਵਾ ਵੀ ਕਿਹੋ ਜਿਹੇ ਘਟਨਾਚੱਕਰ ਹੋ ਰਹੇ ਹਨ :

* 12 ਮਾਰਚ ਨੂੰ ‘ਗਾਜ਼ੀਆਬਾਦ’ (ਉੱਤਰ ਪ੍ਰਦੇਸ਼) ’ਚ ਫਾਰੁਖਾਬਾਦ ਦੇ ਰਹਿਣ ਵਾਲੇ ਪਿਊਸ਼ ਅਤੇ ਨੀਸ਼ਾ ਨਾਂ ਦੇ ਕਪਲ ਦੀਆਂ ਲਾਸ਼ਾਂ ਬਰਾਮਦ ਹੋਈਆਂ। ਜੋ ਰਿਸ਼ਤੇ ’ਚ ਭਰਾ-ਭੈਣ ਲੱਗਦੇ ਸਨ। ਦੋਵਾਂ ਨੇ 17 ਫਰਵਰੀ ਨੂੰ ਕੋਰਟ ਮੈਰਿਜ ਕੀਤੀ ਸੀ ਅਤੇ ਗਾਜ਼ੀਆਬਾਦ ’ਚ ਆ ਕੇ ਕਿਰਾਏ ਦੇ ਮਕਾਨ ’ਤੇ ਰਹਿ ਰਹੇ ਸਨ। ਦੋਸ਼ ਹੈ ਕਿ ਨਿਸ਼ਾ ਦੇ ਤਿੰਨ ਵੱਡੇ ਭਰਾ ਅਤੇ ਪਿਤਾ ਉਨ੍ਹਾਂ ਨੂੰ ਧਮਕੀਆਂ ਦੇ ਰਹੇ ਸਨ। ਲਿਹਾਜ਼ਾ ਦੋਵਾਂ ਨੇ ਆਤਮ-ਹੱਤਿਆ ਕਰ ਲਈ।

* 4 ਜੂਨ ਨੂੰ ‘ਸ਼ਾਹਜਹਾਂਪੁਰ’ (ਉੱਤਰ ਪ੍ਰਦੇਸ਼) ’ਚ 4 ਬੱਚਿਆਂ ਦੀ ਇਕ ਵਿਧਵਾ ਮਾਂ ਨੇ, ਜਿਸ ਦੇ ਪਤੀ ਦਾ ਤਿੰਨ ਸਾਲ ਪਹਿਲਾਂ ਦਿਹਾਂਤ ਹੋ ਗਿਆ ਸੀ, ਆਪਣੇ ਤੋਂ 23 ਸਾਲ ਛੋਟੇ ਨੌਜਵਾਨ ਨਾਲ ਵਿਆਹ ਕਰ ਲਿਆ, ਜਿਸ ਨੂੰ ਉਸ ਨੇ ਆਪਣੀ ਬੇਟੀ ਦੇ ਲਈ ਪਸੰਦ ਕੀਤਾ ਸੀ। ਮਹਿਲਾ ਦੀ ਫੋਨ ’ਤੇ ਆਪਣੇ ਭਵਿੱਖ ਦੇ ਦਿਮਾਗ ਨਾਲ ਗੱਲਬਾਤ ਹੁੰਦੀ ਰਹਿੰਦੀ ਸੀ, ਜੋ ਜਲਦੀ ਹੀ ਪਿਆਰ ’ਚ ਬਦਲ ਗਈ ਅਤੇ ਦੋਵਾਂ ਨੇ ਮੰਦਰ ’ਚ 7 ਫੇਰੇ ਲੈ ਲਏ।

* 9 ਜੂਨ ਨੂੰ ‘ਬਦਾਯੂੰ’ (ਉੱਤਰ ਪ੍ਰਦੇਸ਼) ’ਚ ਇਕ ਲੜਕੀ ਵਿਆਹ ਤੋਂ ਇਕ ਦਿਨ ਪਹਿਲਾਂ ਆਪਣੇ ਪ੍ਰੇਮੀ ਦੇ ਨਾਲ ਘਰੋਂ ਫਰਾਰ ਹੋ ਗਈ, ਬਦਨਾਮੀ ਦੇ ਡਰੋਂ ਲੜਕੀ ਦੇ ਘਰਵਾਲਿਆਂ ਨੇ ਵਰ ਪੱਖ ਨੂੰ ਪੂਰੀ ਗੱਲ ਦੱਸੀ ਅਤੇ ਲੜਕੀ ਦੀ ਛੋਟੀ ਭੈਣ ਨਾਲ ਨੌਜਵਾਨ ਦਾ ਵਿਆਹ ਕਰਵਾ ਦਿੱਤਾ। ਵਰਣਨਯੋਗ ਹੈ ਕਿ ਇਧਰ ਛੋਟੀ ਭੈਣ ਵਿਦਾ ਹੋਈ ਅਤੇ ਉਧਰ ਪੁਲਸ ਨੇ ਵੱਡੀ ਭੈਣ ਨੂੰ ਵੀ ਉਸਦੇ ਪ੍ਰੇਮੀ ਦੇ ਨਾਲ ਲੱਭ ਲਿਆ।

* 18 ਅਗਸਤ ਨੂੰ ‘ਮੁਜ਼ੱਫਰ ਨਗਰ’ (ਉੱਤਰ ਪ੍ਰਦੇਸ਼) ’ਚ ਦੋ ਭੈਣਾਂ ‘ਦੀਪਾਂਸ਼ੀ’ ਅਤੇ ‘ਨੀਕਿਤਾ’ ਨੇ ਆਪਸ ’ਚ ਵਿਆਹ ਕਰਵਾ ਲਿਆ ਅਤੇ ਹੁਣ ਪਤੀ-ਪਤਨੀ ਵਾਂਗ ਇਕੱਠੀਆਂ ਰਹਿ ਰਹੀਆਂ ਹਨ। ਦੋਵੇਂ ਇਕ ਪ੍ਰਾਈਵੇਟ ਫੈਕਟਰੀ ’ਚ ਨੌਕਰੀ ਕਰਦੀਆਂ ਹਨ।

* 23 ਅਗਸਤ ਨੂੰ ‘ਧੁਲੇ’ (ਮਹਾਰਾਸ਼ਟਰ) ਦੇ ‘ਬਲਦੇ’ ਪਿੰਡ ’ਚ ਇਕ ਬਾਂਦਰ ’ਤੇ ਆਵਾਰਾ ਕੁੱਤਿਆਂ ਨੇ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਹ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਿਆ ਅਤੇ ਸਮੇਂ ਸਿਰ ਇਲਾਜ ਨਾ ਮਿਲਣ ਕਾਰਨ ਉਸਦੀ ਮੌਤ ਹੋ ਗਈ।

ਇਹ ਖਬਰ ਸੁਣ ਕੇ ਸਾਰੇ ਪਿੰਡ ’ਚ ਸੋਗ ਦੀ ਲਹਿਰ ਦੌੜ ਗਈ, ਪਿੰਡ ਵਾਲਿਆਂ ਨੇ ਇਸ ਬਾਂਦਰ ਨੂੰ ਪਰਿਵਾਰ ਦਾ ਮੈਂਬਰ ਮੰਨ ਕੇ ਵਿਧੀਪੂਵਰਕ ਉਸ ਦਾ ਅੰਤਿਮ ਸੰਸਕਾਰ ਕੀਤਾ। ਪੂਰੇ ਪਿੰਡ ਨੇ 5 ਦਿਨਾਂ ਤੱਕ ਸੋਗ ਮਨਾਇਆ, ਸਾਰੇ ਪਿੰਡ ਦੇ ਮਰਦਾਂ ਨੇ ਆਪਣਾ ਮੁੰਡਨ ਕਰਵਾਇਆ ਅਤੇ ਬਾਂਦਰ ਦੇ ਲਈ ਹਨੂੰਮਾਨ ਮੰਦਰ ’ਚ ਅਨੁਸ਼ਠਾਨ ਕਰਵਾਇਆ।

* 9 ਸਤੰਬਰ ‘ਬਰੇਲੀ’ (ਉੱਤਰ ਪ੍ਰਦੇਸ਼) ਦੇ ‘ਕਮਾਲੂਪੁਰ’ ’ਚ 2 ਬੱਚਿਆਂ ਦਾ ਬਾਪ ਆਪਣੀ ਪਤਨੀ ਨੂੰ ਛੱਡ ਕੇ ਸਾਲੀ ਨੂੰ ਦੌੜਾਅ ਕੇ ਲੈ ਗਿਆ ਅਤੇ ਉਸਦੇ ਅਗਲੇ ਹੀ ਦਿਨ ਉਸਦਾ ਸਾਲਾ ਆਪਣੇ ਨਵੇਂ ਬਣੇ ‘ਜੀਜਾ ਜੀ’ ਦੀ ਭੈਣ ਨੂੰ ਲੈ ਕੇ ਫਰਾਰ ਹੋ ਗਿਆ।

* 20 ਸਤੰਬਰ ਨੂੰ ‘ਹਰਿਆਣਾ’ ਦੀ ਇਕ ਪ੍ਰਾਈਵੇਟ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਨੂੰ ਦਿੱਲੀ ਸਥਿਤ ‘ਨੈਸ਼ਨਲ ਮਿਊਜ਼ੀਅਮ’ ਤੋਂ ਸਿੰਧੂ ਘਾਟੀ ਦੇ ਜ਼ਮਾਨੇ ਦੀ 4500 ਸਾਲ ਪੁਰਾਣੀ ਮੂਰਤੀ ‘ਡਾਂਸਿੰਗ ਗਰਲ’ ਦੀ ਪ੍ਰਤੀਕ੍ਰਿਤੀ ਚੋਰੀ ਕਰਨ ਦੇ ਦੋਸ਼ ’ਚ ਗ੍ਰਿਫਤਾਰ ਕੀਤਾ ਿਗਆ।

* 22 ਸਤੰਬਰ ਨੂੰ ਮੰੁਬਈ ’ਚ ਕਾਂਗਰਸ ਵਰਕਰ ‘ਪ੍ਰਕਾਸ਼ ਮਾਮਾ ਪਗਾਰੇ’ (73) ਨੇ ਸੋਸ਼ਲ ਮੀਡੀਆ ’ਤੇ ਪੀ. ਐੱਮ. ਮੋਦੀ ਦੀ ਇਕ ‘ਮਾਰਫਡ’ (ਕੰਪਿਊਟਰ ਰਾਹੀਂ ਛੇੜਛਾੜ ਕਰ ਕੇ ਬਣਾਈ ਗਈ) ਫੋਟੋ ਸ਼ੇਅਰ ਕਰ ਦਿੱਤੀ ਜਿਸ ’ਚ ਉਹ ਸਾੜ੍ਹੀ ’ਚ ਨਜ਼ਰ ਆ ਰਹੇ ਸਨ। ਇਸ ਪੋਸਟ ਦੇ ਸਾਹਮਣੇ ਆਉਂਦੇ ਹੀ ਭਾਜਪਾ ਨੇਤਾਵਾਂ ਦਾ ਗੁੱਸਾ ਭੜਕ ਪਿਆ ਅਤੇ ਉਨ੍ਹਾਂ ਨੇ ‘ਪ੍ਰਕਾਸ਼ ਮਾਮਾ ਪਗਾਰੇ’ ਨੂੰ ਬੁਲਾ ਕੇ ਉਸ ਨੂੰ ਸਾੜ੍ਹੀ ਪਹਿਨਾ ਦਿੱਤੀ।

* 22 ਸਤੰਬਰ ਨੂੰ ਹੀ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਆਪਣੇ ਕੱਟੜ ਸਮਰਥਕ ‘ਚਾਰਲੀ ਕਿਰਕ’ ਜਿਸ ਦੀ ਹਾਲ ਹੀ ’ਚ ਹੱਤਿਆ ਕਰ ਦਿੱਤੀ ਗਈ ਸੀ, ਦੀ ਸ਼ੋਕ ਸਭਾ ’ਚ ਗਏ। ਮਾਹੌਲ ਕਾਫੀ ਗੰਭੀਰ ਸੀ ਪਰ ਇਸੇ ਦੌਰਾਨ ‘ਟਰੰਪ’ ਨੂੰ ਪਤਾ ਨਹੀਂ ਕੀ ਸੂਝਿਆ ਕਿ ਉਨ੍ਹਾਂ ਨੇ ਖੜ੍ਹੇ ਹੋ ਕੇ ਨੱਚਣਾ ਸ਼ੁਰੂ ਕਰ ਦਿੱਤਾ, ਜਿਸ ਨੂੰ ਦੇਖ ਕੇ ਉੱਥੇ ਮੌਜੂਦ ਲੋਕ ਹੈਰਾਨ ਰਹਿ ਗਏ।

* 23 ਸਤੰਬਰ ਨੂੰ ‘ਜਲੰਧਰ’ (ਪੰਜਾਬ) ’ਚ ਘਰ ’ਚ ਬਲੱਡ ਸੈਂਪਲ ਲੈਣ ਆਏ ਨਿੱਜੀ ਲੈਬ ਦੇ ਕਰਮਚਾਰੀ ਨੇ ਘਰ ਦੇ ਬਾਥਰੂਮ ’ਚ ਨਹਾ ਰਹੀ ਔਰਤ ਦਾ ਨਿਊਡ ਵੀਡੀਓ ਬਣਾ ਲਿਆ। ਇਹ ਦੇਖ ਕੇ ਨਹਾ ਰਹੀ ਔਰਤ ਨੇ ਰੌਲਾ ਪਾ ਦਿੱਤਾ, ਜਿਸ ’ਤੇ ਘਰ ’ਚ ਮੌਜੂਦ ਲੋਕਾਂ ਨੇ ਉਕਤ ਨੌਜਵਾਨ ਦਾ ਖੂਬ ਕੁਟਾਪਾ ਚਾੜ੍ਹਨ ਤੋਂ ਬਾਅਦ ਉਸ ਨੂੰ ਪੁਲਸ ਦੇ ਹਵਾਲੇ ਕਰ ਦਿੱਤਾ।

ਅਸੀਂ ਆਸ ਕਰਦੇ ਹਾਂ ਕਿ ਉਕਤ ਸਮਾਚਾਰ ਪੜ੍ਹ ਕੇ ਪਾਠਕਾਂ ਨੂੰ ਥੋੜ੍ਹਾ ਜਿਹਾ ਮਹਿਸੂਸ ਹੋਇਆ ਹੋਵੇਗਾ ਕਿ ਅੱਜ ਰਾਜਨੀਤੀ ਤੋਂ ਇਲਾਵਾ ਦੁਨੀਆ ’ਚ ਹੋਰ ਵੀ ਬਹੁਤ ਕੁਝ ‘ਅਜਬ-ਗਜ਼ਬ’ ਹੋ ਰਿਹਾ ਹੈ।

–ਵਿਜੇ ਕੁਮਾਰ