ਕੀ ਮਾਇਆਵਤੀ ਯੂ. ਪੀ. ਦੀ ਸਿਆਸਤ ’ਚ ਵਾਪਸੀ ਕਰ ਸਕੇਗੀ ?

ਉੱਤਰ ਪ੍ਰਦੇਸ਼ ਦੀ ਸਿਆਸੀ ਸਥਿਤੀ ਬੜੀ ਬਦਲ ਰਹੀ ਹੈ। ਬਹੁਜਨ ਸਮਾਜ ਪਾਰਟੀ ਦੀ ਆਗੂ ਅਤੇ ਸੂਬੇ ਦੀ ਸਾਬਕੀ ਮੁੱਖ ਮੰਤਰੀ ਮਾਇਆਵਤੀ ਸਰਗਰਮ ਸਿਆਸਤ ਤੋਂ 5 ਸਾਲਾਂ ਦੀ ਬ੍ਰੇਕ ਦੇ ਬਾਅਦ ਵਾਪਸੀ ਦੀ ਆਸ ਕਰ ਰਹੀ ਹੈ। ਹਾਲਾਂਕਿ ਉਹ ਪੂਰਾ ਕੰਟਰੋਲ ਹਾਸਲ ਕਰਨ ਦੀ ਕੋਸ਼ਿਸ਼ ਨਾ ਵੀ ਕਰਨ, ਫਿਰ ਵੀ ਉਨ੍ਹਾਂ ਦੀ ਮੌਜੂਦਗੀ ਆਪਣੇ ਵਿਰੋਧੀਆਂ ਦੀਆਂ ਵੋਟਾਂ ਕੱਟ ਕੇ ਚੋਣਾਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ।

ਬਸਪਾ ਦਾ ਕਦੇ ਯੂ. ਪੀ., ਪੰਜਾਬ ਅਤੇ ਉੱਤਰਾਖੰਡ ਵਿਚ ਪ੍ਰਭਾਵ ਹੁੰਦਾ ਸੀ। ਮਾਇਆਵਤੀ ਦੇ ਸਾਹਮਣੇ ਕਈ ਨਵੀਆਂ ਚੁਣੌਤੀਆਂ ਹਨ, ਜਿਨ੍ਹਾਂ ਵਿਚ ਨੌਜਵਾਨ ਵੋਟਰਾਂ ਵਿਚ ਵਧਦੀ ਸਿਆਸੀ ਜਾਗਰੂਕਤਾ, ਵਿਰੋਧੀ ਧਿਰਾਂ ਨਾਲ ਵਧਦੀ ਮੁਕਾਬਲੇਬਾਜ਼ੀ ਅਤੇ ਪਰਿਵਾਰਵਾਦੀ ਸਿਆਸਤ ਦਾ ਲਗਾਤਾਰ ਦਬਦਬਾ ਸ਼ਾਮਲ ਹੈ।

ਆਉਣ ਵਾਲੀਆਂ ਚੋਣਾਂ ਲਈ ਉਨ੍ਹਾਂ ਦੀ ਰਣਨੀਤੀ ਵਿਚ ਅਤੀਤ ਦੀਆਂ ਪ੍ਰਾਪਤੀਆਂ ਨੂੰ ਮੰਨਣਾ, ਅੱਜ ਦੇ ਸਿਆਸਤ ਦ੍ਰਿਸ਼ ਵਿਚ ਪ੍ਰਾਸੰਗਿਕ ਬਣੇ ਰਹਿਣਾ ਅਤੇ ਸਥਾਨਕ ਭਾਈਚਾਰਿਆਂ ਨਾਲ ਸਰਗਰਮੀ ਨਾਲ ਜੁੜਨਾ ਸ਼ਾਮਲ ਹੈ। ਇਸ ਨਜ਼ਰੀਏ ਦਾ ਉਦੇਸ਼ ਬਸਪਾ ਦੇ ਭਵਿੱਖ ਨੂੰ ਨਵੀਂ ਜ਼ਿੰਦਗੀ ਦੇਣਾ ਅਤੇ ਆਪਣੇ ਕੇਡਰ ਆਧਾਰ ਨਾਲ ਦੁਬਾਰਾ ਜੁੜਨਾ ਹੈ।

ਬਸਪਾ ਦਾ ਹਾਲੀਆ ਚੋਣ ਪ੍ਰਦਰਸ਼ਨ ਨਿਰਾਸ਼ਾਜਨਕ ਰਿਹਾ ਹੈ, ਜਿਸ ਵਿਚ ਪਾਰਟੀ 403 ਵਿਚੋਂ ਸਿਰਫ਼ 1 ਸੀਟ ਹੀ ਹਾਸਲ ਕਰ ਸਕੀ। ਇਸ ਝਟਕੇ ਤੋਂ ਬਾਅਦ, ਮਾਇਆਵਤੀ ਅਤੇ ਉਨ੍ਹਾਂ ਦੀ ਪਾਰਟੀ ਇਕ ਮਹੱਤਵਪੂਰਨ ਮੋੜ ਦਾ ਸਾਹਮਣਾ ਕਰ ਰਹੀ ਹੈ। ਆਪਣੀ ਪ੍ਰਾਸੰਗਿਕਤਾ ਅਤੇ ਪ੍ਰਭਾਵ ਵਾਪਸ ਪਾਉਣ ਲਈ, ਉਨ੍ਹਾਂ ਨੂੰ ਇਕ ਅਜਿਹੀ ਮੁਕਾਬਲੇਬਾਜ਼ੀ ਵਾਲੇ ਮਾਹੌਲ ਵਿਚ ਪ੍ਰਭਾਵਸ਼ਾਲੀ ਢੰਗ ਨਾਲ ਅੱਗੇ ਵਧਣਾ ਪਵੇਗਾ, ਜਿੱਥੇ ਭਾਜਪਾ ਅਤੇ ਸਪਾ ਦੋਵੇਂ ਦਲਿਤਾਂ ਅਤੇ ਪੱਛੜੇ ਵਰਗਾਂ ਤੱਕ ਸਰਗਰਮੀ ਨਾਲ ਪਹੁੰਚ ਬਣਾ ਰਹੇ ਹਨ।

ਬਸਪਾ ਨੇ ਚੋਣਾਂ ਤੋਂ ਕੋਈ ਵੀ ਗੱਠਜੋੜ ਕਰਨ ਤੋਂ ਇਨਕਾਰ ਕੀਤਾ ਹੈ ਅਤੇ ਆਉਣ ਵਾਲੀਆਂ 2027 ਦੀਆਂ ਚੋਣਾਂ ਆਜ਼ਾਦ ਤੌਰ ’ਤੇ ਲੜਨ ਦੀ ਯੋਜਨਾ ਬਣਾਈ ਹੈ। ਮਾਇਆਵਤੀ ਆਪਣੇ ਕੋਰ ਦਲਿਤ ਸਮਰਥਕਾਂ ਦੇ ਨਾਲ ਬ੍ਰਾਹਮਣ ਅਤੇ ਉੱਚ ਜਾਤੀਆਂ ਦੇ ਵੱਧ ਉਮੀਦਵਾਰਾਂ ਨੂੰ ਮੈਦਾਨ ਵਿਚ ਉਤਾਰ ਕੇ 2007 ਦੇ ਸਫਲ ਦਲਿਤ-ਬ੍ਰਾਹਮਣ ਗੱਠਜੋੜ ਨੂੰ ਦੁਬਾਰਾ ਦੁਹਰਾਉਣ ਦਾ ਟੀਚਾ ਰੱਖਦੀ ਹੈ।

2027 ਦੀਆਂ ਚੋਣਾਂ ਲਈ ਮਾਇਆਵਤੀ ਦੀਆਂ ਮੁਢਲੀਆਂ ਰਣਨੀਤੀਆਂ ਵਿਚੋਂ ਇਕ ਦਲਿਤ ਭਾਈਚਾਰੇ ਅਤੇ ਸਮਾਜ ਦੇ ਹੋਰ ਪੱਛੜੇ ਵਰਗਾਂ ਪ੍ਰਤੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਉਣਾ ਹੋਵੇਗਾ। ਉਹ ਚੋਣਾਂ ਤੋਂ ਪਹਿਲਾਂ ਉੱਤਰ ਪ੍ਰਦੇਸ਼ ਵਿਚ ਬਦਲਦੇ ਸਿਆਸੀ ਦ੍ਰਿਸ਼ ਦੇ ਵਿਚਕਾਰ ਇਕ ਮਜ਼ਬੂਤ ਸਮਰਥਨ ਆਧਾਰ ਸਥਾਪਤ ਕਰਨ ਦੇ ਮਹੱਤਵ ਨੂੰ ਪਛਾਣਦੀ ਹੈ। ਉਸ ਦਾ ਦ੍ਰਿਸ਼ਟੀਕੋਣ ਬਸਪਾ ਦੀਆਂ ਸੰਭਾਵਨਾਵਾਂ ਨੂੰ ਵਧਾਉਣ ਲਈ ਇਤਿਹਾਸਕ ਜਾਗਰੂਕਤਾ, ਸਮਕਾਲੀ ਪ੍ਰਾਸੰਗਿਕਤਾ ਬਣਾਏ ਰੱਖਣ ਅਤੇ ਜ਼ਮੀਨੀ ਪੱਧਰ ’ਤੇ ਭਾਈਚਾਰਕ ਭਾਈਬਾਲੀ ਨੂੰ ਜੋੜਦਾ ਹੈ।

ਨੌਜਵਾਨ ਵੋਟਰ, ਜੋ ਆਪਣੇ ਅਧਿਕਾਰਾਂ ਅਤੇ ਮੁੱਦਿਆਂ ਪ੍ਰਤੀ ਤੇਜ਼ੀ ਨਾਲ ਜਾਗਰੂਕ ਹੋ ਰਹੇ ਹਨ, ਸਿਆਸੀ ਦ੍ਰਿਸ਼ ਨੂੰ ਆਕਾਰ ਦੇ ਰਹੇ ਹਨ, ਜਿਵੇਂ ਕਿ ਹਾਲ ਹੀ ਵਿਚ ਉੱਭਰੀ ‘ਕੋਕਰੋਚ ਜਨਤਾ ਪਾਰਟੀ’ ਨਾਲ ਦੇਖਿਆ ਗਿਆ ਹੈ। ਮਾਇਆਵਤੀ ਦੀ ਪਾਰਟੀ ਨੂੰ ਇਨ੍ਹਾਂ ਵੋਟਰਾਂ ਨੂੰ ਆਕਰਸ਼ਿਤ ਕਰਨ ਦੀ ਕੋਸ਼ਿਸ਼ ਕਰ ਰਹੀਆਂ ਹੋਰ ਧਿਰਾਂ ਤੋਂ ਵੀ ਮੁਕਾਬਲੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਪਾਰੀ ਦੀ ਨਵੀਂ ਸ਼ੁਰੂਆਤ ਕਰਨ ਲਈ, ਉਨ੍ਹਾਂ ਨੇ ਹਾਲ ਹੀ ਵਿਚ ਆਪਣੇ ਭਤੀਜੇ ਤੋਂ ਦੂਰੀ ਬਣਾ ਲਈ, ਜਿਸ ਦਾ ਉਨ੍ਹਾਂ ਨੇ ਕਦੇ ਸਮਰਥਨ ਕੀਤਾ ਸੀ, ਜਿਸ ਨਾਲ ਪਾਰਟੀ ਦੇ ਅੰਦਰ ਤਣਾਅ ਪੈਦਾ ਹੋ ਗਿਆ। ਜਦੋਂ ਕਿ ਉਹ ਬਸਪਾ ਨਾਲ ਜੁੜੇ ਹੋਏ ਹਨ, ਮਾਇਆਵਤੀ ਨੇ ਜ਼ੋਰ ਦਿੱਤਾ ਕਿ ਮਹੱਤਵਪੂਰਨ ਜ਼ਿੰਮੇਵਾਰੀਆਂ ਸੰਭਾਲਣ ਤੋਂ ਪਹਿਲਾਂ ਉਨ੍ਹਾਂ ਨੂੰ ਹੋਰ ਸਿਆਸੀ ਪਰਿਪੱਕਤਾ ਵਿਕਸਤ ਕਰਨ ਦੀ ਲੋੜ ਹੈ।

ਆਪਣੀ ਪਾਰਟੀ ਦੀ ਪ੍ਰਾਸੰਗਿਕਤਾ ਵਾਪਸ ਹਾਸਲ ਕਰਨ ਲਈ, ਮਾਇਆਵਤੀ ਨੂੰ ਇਸ ਮੁਕਾਬਲੇਬਾਜ਼ ਸਿਆਸੀ ਮਾਹੌਲ ਵਿਚ ਨਿਪੰੁਨਤਾ ਨਾਲ ਅੱਗੇ ਵਧਣਾ ਪਵੇਗਾ, ਵਿਸ਼ੇਸ਼ ਤੌਰ ’ਤੇ ਅਜਿਹੇ ਸਮੇਂ ਵਿਚ, ਜਦੋਂ ਭਾਜਪਾ ਅਤੇ ਸਪਾ ਦੋਵੇਂ ਭਾਈਚਾਰਿਆਂ ਨਾਲ ਜੁੜਨ ਲਈ ਸਖ਼ਤ ਮਿਹਨਤ ਕਰ ਰਹੀਆਂ ਹਨ। ਉਨ੍ਹਾਂ ਤੋਂ ਆਪਣੇ ਰਵਾਇਤੀ ਵੋਟਰ ਆਧਾਰ ਨਾਲ ਦੁਬਾਰਾ ਜੁੜਨ ਲਈ ਲੋਕ ਸੰਪਰਕ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਉਮੀਦ ਹੈ, ਜੋ ਹਾਲ ਹੀ ਦੇ ਸਾਲਾਂ ਵਿਚ ਕਾਫ਼ੀ ਘੱਟ ਹੋਇਆ ਹੈ।

ਆਪਣੀ ਪਾਰਟੀ ਦੇ ਅੰਦਰ ਪਰਿਵਾਰਵਾਦੀ ਸਿਆਸਤ ਨਾਲ ਨਜਿੱਠਣ ਲਈ, ਮਾਇਆਵਤੀ ਬਸਪਾ ਦੇ ਅੰਦਰੂਨੀ ਢਾਂਚੇ ਨੂੰ ਨਵਾਂ ਰੂਪ ਦੇਣ ’ਤੇ ਕੰਮ ਕਰ ਰਹੀ ਹੈ। ਇਸ ਚੁਣੌਤੀ ਨਾਲ ਨਜਿੱਠਣ ਲਈ, ਉਨ੍ਹਾਂ ਨੂੰ ਕੁਝ ਚੋਣਵੇਂ ਪਾਰਟੀ ਨੇਤਾਵਾਂ ਦੁਆਰਾ ਨਿਯੁਕਤੀਆਂ ਦੀ ਬਜਾਏ ਜ਼ਮੀਨੀ ਪੱਧਰ ਦੀਆਂ ਚੋਣਾਂ ਰਾਹੀਂ ਲੀਡਰਸ਼ਿਪ ਦੇ ਅਹੁਦਿਆਂ ਨੂੰ ਭਰ ਕੇ ਇਕ ਹੋਰ ਲੋਕਤੰਤਰੀ ਪ੍ਰਕਿਰਿਆ ਨੂੰ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ। ਇਹ ਬਦਲਾਅ ਇਕ ਵੱਧ ਸਮਾਵੇਸ਼ੀ ਪਾਰਟੀ ਸੱਭਿਆਚਾਰ ਨੂੰ ਉਤਸ਼ਾਹਿਤ ਕਰ ਸਕਦਾ ਹੈ ਅਤੇ ਮੈਂਬਰਾਂ ਦੇ ਵਿਸ਼ਵਾਸ ਨੂੰ ਬਹਾਲ ਕਰ ਸਕਦਾ ਹੈ।

ਪਾਰਟੀ ਦੇ ਨੌਜਵਾਨ ਮੈਂਬਰਾਂ ਨੂੰ ਸ਼ਾਮਲ ਕਰਨਾ ਅਤੇ ਮੁੱਖ ਭੂਮਿਕਾਵਾਂ ਵਿਚ ਭਵਿੱਖ ਦੇ ਨੇਤਾਵਾਂ ਨੂੰ ਤਿਆਰ ਕਰਨਾ ਬਸਪਾ ਨੂੰ ਸੁਰਜੀਤ ਕਰਨ ਲਈ ਜ਼ਰੂਰੀ ਹੈ। ਮਾਇਆਵਤੀ ਲੀਡਰਸ਼ਿਪ-ਵਿਕਾਸ ਪਹਿਲਕਦਮੀਆਂ ਸ਼ੁਰੂ ਕਰ ਸਕਦੀ ਹੈ, ਇਹ ਯਕੀਨੀ ਬਣਾਉਂਦੇ ਹੋਏ ਕਿ ਨਵੇਂ ਨੇਤਾ ਨੌਜਵਾਨ ਵੋਟਰਾਂ ਦੇ ਹਿੱਤਾਂ ਅਤੇ ਚਿੰਤਾਵਾਂ ਦੀ ਨੁਮਾਇੰਦਗੀ ਕਰਨ ਅਤੇ ਨਾਲ ਹੀ ਉਨ੍ਹਾਂ ਨੂੰ ਫੈਸਲੇ ਲੈਣ ਵਿਚ ਵੀ ਸ਼ਾਮਲ ਕਰਨ।

ਉੱਤਰ ਪ੍ਰਦੇਸ਼ ਵਿਚ ਭਾਜਪਾ ਦਾ ਪ੍ਰਭਾਵ ਵਿਸ਼ੇਸ਼ ਤੌਰ ’ਤੇ ਉੱਚ ਜਾਤੀ ਅਤੇ ਹਿੰਦੂ ਵੋਟਰਾਂ ਦੇ ਵਿਚਕਾਰ ਕਾਫ਼ੀ ਮਜ਼ਬੂਤ ਹੈ, ਜਦੋਂ ਕਿ ਸਪਾ ਯਾਦਵਾਂ ਅਤੇ ਮੁਸਲਮਾਨਾਂ ਦੇ ਵਿਚਕਾਰ ਆਪਣੀ ਸਥਿਤੀ ਮਜ਼ਬੂਤ ਕਰਨਾ ਜਾਰੀ ਰੱਖੇ ਹੋਏ ਹੈ। ਆਪਣੇ ਵਿਰੋਧੀਆਂ ਦੀ ਧਰੁਵੀਕਰਨ ਦੀ ਰਣਨੀਤੀ ਦਾ ਮੁਕਾਬਲਾ ਕਰਨ ਲਈ, ਮਾਇਆਵਤੀ ਉਨ੍ਹਾਂ ਖੇਤਰੀ ਪਾਰਟੀਆਂ ਅਤੇ ਸੰਗਠਨਾਂ ਨਾਲ ਰਣਨੀਤਕ ਗਠਜੋੜ ਦੀ ਭਾਲ ਕਰ ਸਕਦੇ ਹਨ, ਜੋ ਸਮਾਜਿਕ ਨਿਆਂ ਦੇ ਉਨ੍ਹਾਂ ਦੇ ਦ੍ਰਿਸ਼ਟੀਕੋਣ ਨੂੰ ਸਾਂਝਾ ਕਰਦੇ ਹਨ।

ਬਸਪਾ ਦਲਿਤਾਂ ਦੇ ਨਾਲ-ਨਾਲ ਹੋਰ ਪੱਛੜੇ ਵਰਗਾਂ (ਓ.ਬੀ.ਸੀ.) ਨੂੰ ਇਕਜੁੱਟ ਕਰਨ ’ਤੇ ਧਿਆਨ ਕੇਂਦਰਿਤ ਕਰ ਰਹੀ ਹੈ, ਜੋ ਮੁਸਲਮਾਨਾਂ ਦੀ ਤੁਲਨਾ ਵਿਚ ਇਕ ਵੱਡਾ ਵੋਟ ਬੈਂਕ ਬਣਾ ਸਕਦਾ ਹੈ। ਸੂਬੇ ਦੀ ਆਬਾਦੀ ਵਿਚ ਓ.ਬੀ.ਸੀ. ਦਾ ਹਿੱਸਾ ਲਗਭਗ 40 ਫੀਸਦੀ ਹੈ, ਜਦੋਂ ਕਿ ਦਲਿਤ 20 ਫੀਸਦੀ ਤੋਂ ਵੱਧ ਦੀ ਨੁਮਾਇੰਦਗੀ ਕਰਦੇ ਹਨ। ਮੁਸਲਿਮ ਭਾਈਚਾਰਾ ਆਬਾਦੀ ਦਾ ਲਗਭਗ 20 ਫੀਸਦੀ ਹੈ।

ਮਾਇਆਵਤੀ ਨੂੰ ਆਪਣੇ ਚੋਣ ਪ੍ਰਚਾਰ ਦੇ ਯਤਨਾਂ ਵਿਚ ਤਕਨਾਲੋਜੀ ਦੀ ਨਿਪੁੰਨਤਾ ਨਾਲ ਵਰਤੋਂ ਕਰਨੀ ਚਾਹੀਦੀ ਹੈ। ਪ੍ਰਚਾਰ, ਲੋਕ ਸੰਪਰਕ ਅਤੇ ਵੋਟਰਾਂ ਨਾਲ ਜੁੜਨ ਲਈ ਡਿਜੀਟਲ ਰਣਨੀਤੀਆਂ ਨੂੰ ਅਪਣਾਉਣਾ ਮਹੱਤਵਪੂਰਨ ਹੈ। ਸੋਸ਼ਲ ਮੀਡੀਆ ਪਲੇਟਫਾਰਮ ਨੌਜਵਾਨਾਂ ਨਾਲ ਪ੍ਰਭਾਵਸ਼ਾਲੀ ਢੰਗ ਨਾਲ ਜੁੜ ਸਕਦੇ ਹਨ, ਜਿਸ ਨਾਲ ਉਹ ਆਪਣੀਆਂ ਚਿੰਤਾਵਾਂ ਨੂੰ ਹੱਲ ਕਰਦੇ ਹੋਏ ਪ੍ਰਾਸੰਗਿਕ ਅਤੇ ਆਕਰਸ਼ਕ ਸਮੱਗਰੀ ਤੱਕ ਪਹੁੰਚ ਪ੍ਰਾਪਤ ਕਰ ਸਕਦੇ ਹਨ।

ਇਸ ਤੋਂ ਇਲਾਵਾ, ਮਾਇਆਵਤੀ ਨੂੰ ਸੰਭਾਵੀ ਵੋਟਰਾਂ ਨੂੰ ਉਨ੍ਹਾਂ ਦੇ ਅਧਿਕਾਰਾਂ ਅਤੇ ਸਿਆਸੀ ਪ੍ਰਕਿਰਿਆ ਬਾਰੇ ਜਾਗਰੂਕ ਕਰਨ ਲਈ ਆਨਲਾਈਨ ਅਤੇ ਆਫਲਾਈਨ ਪ੍ਰੋਗਰਾਮ ਵਿਕਸਤ ਕਰਨੇ ਚਾਹੀਦੇ ਹਨ। ਇਹ ਲੋਕ ਸੰਪਰਕ ਪੱਛੜੇ ਵਰਗਾਂ ਨੂੰ ਸ਼ਕਤੀਸ਼ਾਲੀ ਬਣਾ ਸਕਦਾ ਹੈ।

ਅੰਤ ਵਿਚ, ਮਾਇਆਵਤੀ ਨੂੰ ਆਪਣੀਆਂ ਪਿਛਲੀਆਂ ਸ਼ਾਸਨ ਨੀਤੀਆਂ ਦਾ ਮੁਲਾਂਕਣ ਕਰਨ ਦੀ ਲੋੜ ਹੈ, ਤਾਂ ਜੋ ਉਨ੍ਹਾਂ ਨੂੰ ਮੌਜੂਦਾ ਉਮੀਦਾਂ ਦੇ ਅਨੁਕੂਲ ਬਣਾਇਆ ਜਾ ਸਕੇ। ਪ੍ਰਭਾਵਸ਼ਾਲੀ ਰਣਨੀਤੀਆਂ ਲਾਗੂ ਕਰ ਕੇ ਅਤੇ ਵੋਟਰਾਂ ਨਾਲ ਜੁੜਨ ਲਈ ਤਕਨੀਕ ਦੀ ਵਰਤੋਂ ਕਰ ਕੇ, ਉਹ ਆਉਣ ਵਾਲੀਆਂ ਚੋਣਾਂ ਵਿਚ ਬਸਪਾ ਦੇ ਪ੍ਰਭਾਵ ਲਈ ਇਕ ਮਜ਼ਬੂਤ ਨੀਂਹ ਬਣਾਉਣ ਵਿਚ ਮਦਦ ਕਰ ਸਕਦੀ ਹੈ। ਸਵਾਲ ਇਹ ਹੈ ਕਿ ਕੀ ਉਹ ਵਾਪਸ ਆਏਗੀ ਜਾਂ ਅੱਗੇ ਹੋਰ ਫਿੱਕੀ ਪੈ ਜਾਵੇਗੀ?

-ਕਲਿਆਣੀ ਸ਼ੰਕਰ