ਟਰੰਪ ਦੀ ਦਾਦਾਗਿਰੀ ਨੂੰ ਕੰਟਰੋਲ ਕਰਨਾ ਜ਼ਰੂਰੀ

ਸੰਸਾਰ ਦੀ ਸਰਵਉੱਚ ਸੰਸਦ ਸੰਯੁਕਤ ਰਾਸ਼ਟਰ ਦੀ ਮਹਾਸਭਾ ਦੇ 81ਵੇਂ ਇਜਲਾਸ ’ਚ ਸ਼ਾਂਤੀ, ਸੁਰੱਖਿਆ ਅਤੇ ਵਿਕਾਸ ਲਈ ਵੱਖ-ਵੱਖ ਦੇਸ਼ਾਂ ਦੇ ਰਾਸ਼ਟਰ ਮੁਖੀ, ਵਿਦੇਸ਼ ਮੰਤਰੀ ਅਤੇ ਪ੍ਰਤੀਨਿਧ ਆਪਣੇ ਭਾਸ਼ਣਾਂ ਰਾਹੀਂ ਸੁਨੇਹਾ ਦੇ ਰਹੇ ਹਨ। ਸ਼ਕਤੀਸ਼ਾਲੀ ਰਾਸ਼ਟਰਪਤੀ ਅਤਿ ਮਹੱਤਵਪੂਰਨ ਸਥਾਨ ਰੱਖਦੇ ਹਨ ਅਤੇ ਉਨ੍ਹਾਂ ਦੇ ਭਾਸ਼ਣ ਹੀ ਭਵਿੱਖ ਦੀ ਦਸ਼ਾ ਅਤੇ ਦਿਸ਼ਾ ਤੈਅ ਕਰਦੇ ਹਨ। ਇਸ ਸਮੇਂ ਪ੍ਰਤੱਖ ਅਤੇ ਅਪ੍ਰਤੱਖ ਤੌਰ ’ਤੇ 90 ਦੇਸ਼ ਯੁੱਧ ਗ੍ਰਸਤ ਹਨ। ਰਾਸ਼ਟਰਪਤੀ ਟਰੰਪ ਨੇ ਵਿਸ਼ਵ ਦੇ ਦੇਸ਼ਾਂ ਦੀਆਂ ਪੇਸ਼ ਆ ਰਹੀਆਂ ਗੰਭੀਰ ਸਮੱਸਿਆਵਾਂ ਅਤੇ ਸੰਕਟ ਪੈਦਾ ਕਰਨ ਵਾਲੀਆਂ ਚੁਣੌਤੀਆਂ ਨੂੰ ਦੇਖ ਕੇ ਵੀ ਨਜ਼ਰਅੰਦਾਜ਼ ਕੀਤਾ ਅਤੇ ਆਪਣੇ ਭਾਸ਼ਣ ’ਚ ਈਰਾਨ ਨੂੰ ਅੱਤਵਾਦੀ ਦੇਸ਼ ਕਿਹਾ ਅਤੇ ਇਹ ਧਮਕੀ ਦਿੱਤੀ ਕਿ ਉਹ ਨਵੇਂ ਸਿਰੇ ਤੋਂ ਅਮਰੀਕਾ ਨਾਲ ਸਮਝੌਤਾ ਕਰੇ ਜਾਂ ਤਬਾਹੀ ਲਈ ਤਿਆਰ ਹੋ ਜਾਵੇ ਅਤੇ ਆਪਣੇ ਨਿੱਜੀ ਕਾਰਨਾਮਿਆਂ ਦੀ ਖੂਬ ਚਰਚਾ ਕੀਤੀ।

ਅਸਲ ’ਚ ਉਨ੍ਹਾਂ ਦਾ ਭਾਸ਼ਣ ਹਮਲਾਵਰਤਾ, ਨਕਾਰਾਤਮਕਤਾ ਅਤੇ ਵਿਨਾਸ਼ਕਾਰੀ ਵੱਲ ਇਸ਼ਾਰਾ ਕਰਦਾ ਹੈ। ਟਰੰਪ ਨੇ ਮਹਾਸਭਾ ’ਚ ਖੁਦ ਨੂੰ ਸ਼ਾਂਤੀ ਦਾ ਮਸੀਹਾ ਹੋਣ ਦਾ ਦਾਅਵਾ ਕੀਤਾ ਕਿ ਉਸ ਨੇ 8 ਯੁੱਧ ਗ੍ਰਸਤ ਦੇਸ਼ਾਂ ਨੂੰ ਆਪਣੀ ਟੈਰਿਫ ਨੀਤੀ ਤੋਂ ਬਚਾਅ ਲਿਆ ਹੈ ਅਤੇ ਜੇਕਰ ਉਹ ਅਜਿਹਾ ਨਾ ਕਰਦੇ ਤਾਂ ਇਨ੍ਹਾਂ ਦੇਸ਼ਾਂ ’ਚ 30 ਕਰੋੜ ਤੋਂ ਵੱਧ ਲੋਕ ਆਪਣੀਆਂ ਜਾਨਾਂ ਗੁਆ ਬੈਠਦੇ। ਜਦੋਂ ਕਿ ਹਕੀਕਤ ਇਹ ਹੈ ਕਿ ਉਹ ਨਾ ਤਾਂ ਰੂਸ ਅਤੇ ਯੂਕ੍ਰੇਨ ਦਾ ਯੁੱਧ ਬੰਦ ਕਰਵਾ ਸਕੇ, ਜੋ ਪਿਛਲੇ 4 ਸਾਲਾਂ ਤੋਂ ਭਾਰੀ ਜਾਨੀ-ਮਾਲੀ ਨੁਕਸਾਨ ਨਾਲ ਲਗਾਤਾਰ ਜਾਰੀ ਹੈ ਅਤੇ ਨਾ ਹੀ ਇਜ਼ਰਾਈਲ ਅਤੇ ਹਮਾਸ ’ਚ ਯੁੱਧਬੰਦੀ ਸਮੇਂ ਸਿਰ ਕਰਵਾ ਸਕੇ, ਜਿਸ ਕਾਰਨ ਗਾਜ਼ਾ ਪੱਟੀ ’ਚ ਰਹਿਣ ਵਾਲੇ 70,000 ਤੋਂ ਵੱਧ ਲੋਕ ਮਾਰੇ ਗਏ। ਦੂਜੇ ਦੇਸ਼ਾਂ ਦੇ ਯੁੱਧ ਬੰਦ ਕਰਵਾਉਣ ਵਿਚ ਤਾਂ ਕਾਮਯਾਬ ਨਹੀਂ ਹੋਏ, ਸਗੋਂ ਅਮਰੀਕਾ ਨੇ ਖੁਦ ਹੀ ਇਜ਼ਰਾਈਲ ਦੇ ਨਾਲ ਮਿਲ ਕੇ ਈਰਾਨ ’ਤੇ ਖੁੱਲ੍ਹੀ ਬੰਬਾਰੀ ਕੀਤੀ, ਜਿਸ ’ਚ ਹਜ਼ਾਰਾਂ ਲੋਕ ਮਾਰੇ ਗਏ। 1,31,000 ਇਮਾਰਤਾਂ ਢਹਿ-ਢੇਰੀ ਹੋ ਗਈਆਂ।

ਰਾਸ਼ਟਰਪਤੀ ਟਰੰਪ ਦਾ ਇਹ ਸ਼ੇਖ਼ੀ ਮਾਰਨਾ ਕਿ ਉਨ੍ਹਾਂ ਕੋਲ ਗੋਲਾ-ਬਾਰੂਦ ਦਾ ਇੰਨਾ ਭੰਡਾਰ ਹੈ, ਜਿਸ ਨਾਲ ਉਹ ਸਾਲਾਂ ਤੱਕ ਲੜਾਈ ਲੜ ਸਕਦੇ ਹਨ ਅਤੇ ਉਨ੍ਹਾਂ ਨੂੰ ਨਵੇਂ ਹਥਿਆਰਾਂ ਦੇ ਨਿਰਮਾਣ ਦੀ ਲੋੜ ਨਹੀਂ ਹੈ। ਜਦੋਂ ਕਿ ਉਨ੍ਹਾਂ ਦੀ ਆਪਣੀ ਪੈਂਟਾਗਨ ਦੀ ਅਗਸਤ ਮਹੀਨੇ ਦੀ ਰਿਪੋਰਟ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਅਮਰੀਕਾ ’ਚ ਹਥਿਆਰਾਂ ਅਤੇ ਗੋਲਾ-ਬਾਰੂਦ ਦੀ ਕਮੀ ਦਾ ਸੰਕਟ ਪੈਦਾ ਹੋ ਗਿਆ ਹੈ। ਉਨ੍ਹਾਂ ਕੋਲ ਕਰੂਜ਼ ਮਿਜ਼ਾਈਲ, ਇੰਟਰਸੈਪਟਰ ਮਿਜ਼ਾਈਲ ਅਤੇ ਹੋਰ ਹਥਿਆਰਾਂ ਦੀ ਜ਼ਬਰਦਸਤ ਕਮੀ ਹੋ ਗਈ ਹੈ। ਮੀਡੀਆ ਅਨੁਸਾਰ ਇਸ ਕਮੀ ਕਾਰਨ ਅਮਰੀਕਾ ਨੇ ਈਰਾਨ ਨਾਲ ਯੁੱਧ ਬੰਦ ਕੀਤਾ ਹੈ ਅਤੇ ਇਸੇ ਕਾਰਨ ਨਾਟੋ ਦੇਸ਼ ਵੀ ਯੂਕ੍ਰੇਨ ਦੀ ਸਹਾਇਤਾ ਕਰਨ ’ਚ ਅਸਮਰੱਥ ਹੋ ਜਾਣਗੇ, ਜਿਸ ਦਾ ਫਾਇਦਾ ਰੂਸ ਉਠਾਉਣ ’ਚ ਨਹੀਂ ਖੁੰਝੇਗਾ।

ਡੋਨਾਲਡ ਟਰੰਪ ਨੇ ਅਮਰੀਕਾ ਅਤੇ ਵੈਨੇਜ਼ੁਏਲਾ ਦੇ ਤੇਲ ਨੂੰ ਮਿਲਾ ਕੇ ਵਿਸ਼ਵ ਦਾ 60 ਫੀਸਦੀ ਤੇਲ ਦੇ ਮਾਲਕ ਹੋਣ ਦਾ ਦਾਅਵਾ ਕੀਤਾ ਹੈ, ਜਦੋਂ ਕਿ ਸਰਵੇਖਣ ਅਨੁਸਾਰ ਦੋਵਾਂ ਦੇਸ਼ਾਂ ਕੋਲ ਸਿਰਫ 22 ਫੀਸਦੀ ਤੇਲ ਹੈ। ਸਾਰਾ ਵਿਸ਼ਵ ਜਾਣਦਾ ਹੈ ਕਿ ਵੈਨੇਜ਼ੁਏਲਾ ਅਮਰੀਕਾ ਦਾ ਨਾ ਤਾਂ ਕੋਈ ਪ੍ਰਦੇਸ਼ ਹੈ ਅਤੇ ਨਾ ਹੀ ਇਸ ’ਤੇ ਕੋਈ ਸੰਵਿਧਾਨਕ ਅਤੇ ਕਾਨੂੰਨੀ ਅਧਿਕਾਰ ਹੈ। ਸਗੋਂ ਵੈਨੇਜ਼ੁਏਲਾ ਇਕ ਪ੍ਰਭੂਸੱਤਾ ਸੰਪੰਨ ਰਾਸ਼ਟਰ ਹੈ ਅਤੇ ਅਮਰੀਕਾ ਨੇ ਉਸ ਦੇ ਰਾਸ਼ਟਰਪਤੀ ਨੂੰ ਆਪਣੇ ਕੋਲ ਬੰਦੀ ਬਣਾ ਰੱਖਿਆ ਹੈ ਅਤੇ ਉਸ ਦੀਅਾਂ ਤੇਲ ਕੰਪਨੀਆਂ ਤੋਂ ਅਮਰੀਕੀ ਤੇਲ ਕੰਪਨੀਆਂ ਤੇਲ ਖਰੀਦ ਕੇ ਦੂਜੇ ਦੇਸ਼ਾਂ ਨੂੰ ਵੇਚ ਰਹੀਆਂ ਹਨ। ਵੈਨੇਜ਼ੁਏਲਾ ਸਰਕਾਰ ਕਿਸੇ ਵੀ ਸਮੇਂ ਬਗਾਵਤ ਕਰ ਸਕਦੀ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਹੋਰ ਸ਼ਕਤੀਸ਼ਾਲੀ ਦੇਸ਼ ਨਾ ਤਾਂ ਬਾਹਰੋਂ ਅਤੇ ਨਾ ਹੀ ਯੂ.ਐੱਨ. ’ਚ ਵੈਨੇਜ਼ੁਏਲਾ ਦੀ ਪ੍ਰਭੂਸੱਤਾ ਦੇ ਹਕ ’ਚ ਖੁੱਲ੍ਹ ਕੇ ਸਮਰਥਨ ਕਰ ਰਹੇ ਹਨ।

ਭਾਰੀ ਟੈਰਿਫ ਨਾਲ ਅਮਰੀਕਾ ’ਚ ਮਹਿੰਗਾਈ ਤੇਜ਼ੀ ਨਾਲ ਵਧ ਰਹੀ ਹੈ। ਜਿਸ ਨਾਲ ਟਰੰਪ ਦੀ ਹਰਮਨਪਿਆਰਤਾ ’ਚ ਕਮੀ ਆ ਰਹੀ ਹੈ। ਗਲੋਬਲ ਵਾਰਮਿੰਗ ਕਾਰਨ ਜਲਵਾਯੂ ਪਰਿਵਰਤਨ ਨਾਲ ਵੱਡੇ-ਵੱਡੇ ਬਰਫ ਦੇ ਤੋਦੇ ਤੇਜ਼ੀ ਨਾਲ ਪਿਘਲ ਰਹੇ ਹਨ। ਜੇਕਰ ਗਲੋਬਲ ਵਾਰਮਿੰਗ ’ਤੇ ਕੰਟਰੋਲ ਨਾ ਕੀਤਾ ਗਿਆ ਤਾਂ ਭਵਿੱਖ ’ਚ ਨਦੀਆਂ ਦੇ ਜਲ ’ਚ ਬਹੁਤ ਜ਼ਿਆਦਾ ਕਮੀ ਆ ਜਾਵੇਗੀ। ਇਸ ਮਸਲੇ ਨੂੰ ਟਰੰਪ ਨੇ ਪੂਰੀ ਤਰ੍ਹਾਂ ਨਜ਼ਰਅੰਦਾਜ਼ ਕਰ ਦਿੱਤਾ ਹੈ।

ਭਾਰਤ ਨੂੰ ਭਵਿੱਖ ’ਚ ਵਧੇਰੇ ਚੌਕਸ ਰਹਿਣ ਦੀ ਲੋੜ ਹੈ, ਕਿਉਂਕਿ ਇਸ ਵਾਰ ਯੂ.ਐੱਨ. ’ਚ ਕਸ਼ਮੀਰ ’ਤੇ ਪਹਿਲਾਂ ਤੁਰਕੀ ਨੇ ਅਤੇ ਫਿਰ ਪਾਕਿਸਤਾਨ ਨੇ ਰਾਗ ਅਲਾਪਿਆ ਹੈ। ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਨੇ ਅਮਰੀਕਾ ਦੀ ਕਠਪੁਤਲੀ ਬਣ ਕੇ ਟਰੰਪ ਦੀ ਖੂਬ ਸ਼ਲਾਘਾ ਕੀਤੀ ਹੈ ਅਤੇ ਟ੍ਰੰਪ ਨੇ ਵੀ ਪਾਕਿ ਪ੍ਰਧਾਨ ਮੰਤਰੀ ਨੂੰ ਸ਼ਾਬਾਸ਼ੀ ਦਿੱਤੀ ਹੈ। ਦੂਜੇ ਪਾਸੇ ਤੁਰਕੀ, ਪਾਕਿਸਤਾਨ ਅਤੇ ਸਾਊਦੀ ਅਰਬ ਨੇ ਮੱਕਾ ਸਮਝੌਤਾ ਕੀਤਾ ਹੈ, ਜਿਸ ਨੂੰ ਇਸਲਾਮਿਕ ਨਾਟੋ ਦਾ ਨਾਂ ਦਿੱਤਾ ਗਿਆ ਹੈ। ਅਮਰੀਕਾ ਨੇ ਹੀ ਪਾਕਿਸਤਾਨ ਨੂੰ ਪਹਿਲਾਂ ਹਥਿਆਰਾਂ ਨਾਲ ਲੈਸ ਕੀਤਾ ਅਤੇ ਫਿਰ ਅੱਤਵਾਦ ਦਾ ਪਾਲਣ-ਪੋਸ਼ਣ ਕਰਨ ਲਈ ਹਥਿਆਰ ਵੀ ਦਿੱਤੇ ਅਤੇ ਡਾਲਰਾਂ ਦੀ ਵਰਖਾ ਵੀ ਕੀਤੀ।

ਸੁਰੱਖਿਆ ਕੌਂਸਲ 5 ਦੇਸ਼ਾਂ ਦੀ ਪ੍ਰਾਈਵੇਟ ਲਿਮਟਿਡ ਕੰਪਨੀ ਬਣ ਕੇ ਰਹਿ ਗਈ ਹੈ। ਭਾਰਤ ਦੀ ਸਕਾਰਾਤਮਕ, ਸਿਰਜਣਾਤਮਕ ਅਤੇ ਰਚਨਾਤਮਕ ਭੂਮਿਕਾ ਨੂੰ ਦੇਖਦੇ ਹੋਏ ਇਸ ਨੂੰ ਸੁਰੱਖਿਆ ਕੌਂਸਲ ਦਾ ਮੈਂਬਰ ਬਣਾਇਆ ਜਾਵੇ ਅਤੇ ਟ੍ਰੰਪ ਦੀ ਦਾਦਾਗਿਰੀ ਨੂੰ ਕੰਟਰੋਲ ਕਰਨਾ ਲਾਜ਼ਮੀ ਹੈ, ਨਹੀਂ ਤਾਂ ਵਿਸ਼ਵ ਦੇ ਕਈ ਦੇਸ਼ਾਂ ’ਚ ਖੁਰਾਕ ਪਦਾਰਥਾਂ ਦੀ ਭਾਰੀ ਕਿੱਲਤ, ਤੇਲ ਅਤੇ ਗੈਸ ਦੀ ਕਮੀ ਅਤੇ ਅਸਮਾਨ ਨੂੰ ਛੂੰਹਦੀ ਮਹਿੰਗਾਈ ਮੌਜੂਦਾ ਵਿਵਸਥਾ ’ਚ ਅਰਾਜਕਤਾ ਫੈਲਾ ਦੇਵੇਗੀ।

—ਪ੍ਰੋ. ਦਰਬਾਰੀ ਲਾਲ