ਯੂਕੇ : ਹਜ਼ਾਰਾਂ ਲੋਕਾਂ ਨੇ ਆਪਣੇ ਘਰਾਂ ''ਚ ਯੂਕ੍ਰੇਨੀ ਸ਼ਰਨਾਰਥੀਆਂ ਨੂੰ ਰੱਖਣ ਲਈ ਭਰੀ ਹਾਮੀ
03/15/2022 3:44:45 PM
ਗਲਾਸਗੋ/ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ): ਯੂਕੇ ਸਰਕਾਰ ਦੁਆਰਾ ਯੂਕ੍ਰੇਨ ਦੇ ਸ਼ਰਨਾਰਥੀਆਂ ਲਈ ਹੋਮ ਸਕੀਮ ਸ਼ੁਰੂ ਕਰਨ ਤੋਂ ਬਾਅਦ ਲਗਭਗ 44,000 ਲੋਕਾਂ ਨੇ ਆਪਣੇ ਘਰਾਂ ਵਿੱਚ ਇੱਕ ਸ਼ਰਨਾਰਥੀ ਦੀ ਮੇਜ਼ਬਾਨੀ ਕਰਨ ਲਈ ਸਾਈਨ ਅੱਪ ਕੀਤਾ ਹੈ। ਸੋਮਵਾਰ ਨੂੰ ਕਮਿਊਨਿਟੀਜ਼ ਸੈਕਟਰੀ ਮਾਈਕਲ ਗੋਵ ਨੇ ਹਾਊਸ ਆਫ ਕਾਮਨਜ਼ ਵਿੱਚ ਇਹ ਸਕੀਮ ਰੱਖੀ, ਜਿਸ ਵਿੱਚ ਸ਼ਰਨਾਰਥੀਆਂ ਨੂੰ ਘੱਟੋ-ਘੱਟ ਛੇ ਮਹੀਨਿਆਂ ਲਈ ਰਿਹਾਇਸ਼ ਪ੍ਰਦਾਨ ਕੀਤੀ ਜਾਵੇਗੀ। ਇਸ ਸਕੀਮ ਤਹਿਤ ਸਪਾਂਸਰ ਕੀਤੇ ਯੂਕ੍ਰੇਨੀਅਨਾਂ ਨੂੰ ਕੰਮ ਕਰਨ ਅਤੇ ਜਨਤਕ ਸੇਵਾਵਾਂ ਤੱਕ ਪਹੁੰਚ ਕਰਨ ਦੇ ਹੱਕ ਦੇ ਨਾਲ, ਯੂਕੇ ਵਿੱਚ ਰਹਿਣ ਲਈ ਤਿੰਨ ਸਾਲਾਂ ਦੀ ਆਗਿਆ ਦਿੱਤੀ ਜਾਵੇਗੀ।
ਪੜ੍ਹੋ ਇਹ ਅਹਿਮ ਖ਼ਬਰ- ਯੂਕ੍ਰੇਨੀ ਸ਼ਰਨਾਰਥੀਆਂ ਲਈ ਸਹਾਰਾ ਬਣੇਗਾ ਨਿਊਜ਼ੀਲੈਂਡ, ਦੋ ਸਾਲ ਦੇ ਵਿਸ਼ੇਸ਼ ਵੀਜ਼ੇ ਦੀ ਕੀਤੀ ਪੇਸ਼ਕਸ਼
ਯੂਕੇ ਸਰਕਾਰ ਹਰੇਕ ਪਰਿਵਾਰ ਲਈ ਸਪਾਂਸਰਾਂ ਨੂੰ 350 ਪੌਂਡ ਦਾ ਮਹੀਨਾਵਾਰ ਭੁਗਤਾਨ ਪ੍ਰਦਾਨ ਕਰੇਗੀ ਜਿਸਦੀ ਉਹ ਦੇਖਭਾਲ ਕਰਦੇ ਹਨ, ਹਾਲਾਂਕਿ ਸਪਾਂਸਰ ਉਹਨਾਂ ਲਈ ਭੋਜਨ ਜਾਂ ਰਹਿਣ-ਸਹਿਣ ਦੇ ਖਰਚੇ ਪ੍ਰਦਾਨ ਕਰਨ ਲਈ ਜ਼ਿੰਮੇਵਾਰ ਨਹੀਂ ਹਨ। ਇਹ ਭੁਗਤਾਨ ਟੈਕਸ-ਮੁਕਤ ਹੋਣਗੇ ਅਤੇ ਲਾਭ, ਅਧਿਕਾਰ ਜਾਂ ਕੌਂਸਲ ਟੈਕਸ ਸਥਿਤੀ ਨੂੰ ਪ੍ਰਭਾਵਿਤ ਨਹੀਂ ਕਰਨਗੇ। ਇਸਦੇ ਇਲਾਵਾ ਸਕਾਟਲੈਂਡ ਦੀ ਫ਼ਸਟ ਮਨਿਸਟਰ ਨਿਕੋਲਾ ਸਟਰਜਨ ਨੇ ਕਿਹਾ ਕਿ ਸਕਾਟਿਸ਼ ਸਰਕਾਰ ਸ਼ਰਨਾਰਥੀਆਂ ਲਈ "ਸੁਪਰ ਸਪਾਂਸਰ" ਬਣਨ ਲਈ ਤਿਆਰ ਹੈ ਅਤੇ 3000 ਯੂਕ੍ਰੇਨੀਅਨਾਂ ਦਾ ਤੁਰੰਤ ਸਵਾਗਤ ਕਰ ਸਕਦੀ ਹੈ।
