‘ਪਾਕਿ ਦੀ ਹੋ ਰਹੀ ਲਗਾਤਾਰ ਕਿਰਕਿਰੀ’ ਪਰ ਸ਼ਰਮ ਇਸ ਨੂੰ ਨਹੀਂ ਆਉਂਦੀ!

ਕੂਟਨੀਤੀ ਅਤੇ ਖੇਡ ਦੇ ਮੈਦਾਨ ਦੋਵਾਂ ’ਚ ਹੀ ਭਾਰਤ ਦੇ ਹੱਥੋਂ ਵਾਰ-ਵਾਰ ਮੂੰਹ ਦੀ ਖਾਣ ਦੇ ਬਾਵਜੂਦ ਪਾਕਿਸਤਾਨ ਦੇ ਸ਼ਾਸਕ ਹੋਂਦ ’ਚ ਆਉਣ ਦੇ ਸਮੇਂ ਤੋਂ ਹੀ ਭਾਰਤ ਵਿਰੋਧੀ ਏਜੰਡੇ ਨਾਲ ਚਿੰਬੜੇ ਰਹਿ ਕੇ ਦੇਸ਼-ਵਿਦੇਸ਼ ’ਚ ਆਪਣੀ ਕਿਰਕਿਰੀ ਕਰਵਾ ਰਹੇ ਹਨ ਪਰ ਉਨ੍ਹਾਂ ਨੂੰ ਸ਼ਰਮ ਨਹੀਂ ਆਉਂਦੀ।

15 ਫਰਵਰੀ ਨੂੰ ‘ਮਿਊਨਿਖ’ (ਜਰਮਨੀ) ’ਚ ਆਯੋਜਿਤ ‘ਮਿਊਨਿਖ ਸਕਿਓਰਿਟੀ ਕਾਨਫਰੰਸ’ ’ਚ ਹਿੱਸਾ ਲੈਣ ਗਏ ਪਾਕਿਸਤਾਨ ਦੇ ਫੀਲਡ ਮਾਰਸ਼ਲ ‘ਆਸੀਮ ਮੁਨੀਰ’ ਨੂੰ ਸਭਾਸਥਲ ਦੇ ਗੇਟ ’ਤੇ ਖੜ੍ਹੇ ਸੁਰੱਖਿਆ ਕਰਮਚਾਰੀ ਨੇ ਅੰਦਰ ਜਾਣ ਤੋਂ ਰੋਕ ਦਿੱਤਾ ਅਤੇ ਆਪਣਾ ਪਛਾਣ ਪੱਤਰ ਦਿਖਾਉਣ ਦੇ ਬਾਅਦ ਹੀ ਅੰਦਰ ਜਾਣ ਦੀ ਇੱਜਾਜ਼ਤ ਦਿੱਤੀ ਗਈ।

ਕੁਝ ਦਿਨ ਪਹਿਲਾਂ ਤੱਕ ਪਾਕਿਸਤਾਨ ਦੇ ਕ੍ਰਿਕਟ ਆਕਾ ਭਾਰਤ ਦੇ ਨਾਲ ਟੀ-20 ਵਿਸ਼ਵ ਕੱਪ ਦੇ ਮੈਚ ਨਾ ਖੇਡਣ ’ਤੇ ਅੜੇ ਹੋਏ ਸਨ ਪਰ ਆਈ. ਸੀ. ਸੀ., ਪੀ. ਸੀ. ਬੀ. ਅਤੇ ਹੋਰ ਕ੍ਰਿਕਟ ਸੰਗਠਨਾਂ ਦੇ ਪ੍ਰਤੀਨਿਧੀਆਂ ਦੀ ਲਾਹੌਰ ’ਚ ਹੋਈ ਬੈਠਕ ’ਚ ਿਦੱਤੀ ਗਈ ਬਾਈਕਾਟ ਅਤੇ ਗੰਭੀਰ ਨਤੀਜਿਆਂ ਦੀ ਧਮਕੀ ਦੇ ਅੱਗੇ ਝੁਕ ਕੇ ਪਾਕਿਸਤਾਨ ਨੇ ਭਾਰਤ ਵਿਰੁੱਧ ਮੈਚ ਖੇਡਣਾ ਸਵੀਕਾਰ ਕਰ ਲਿਆ।

15 ਫਰਵਰੀ ਨੂੰ ਭਾਰਤੀ ਟੀਮ ਨੇ ਕੰਲੋਬੋ (ਸ਼੍ਰੀਲੰਕਾ) ’ਚ ਖੇਡੇ ਗਏ ਟੀ-20 ਵਿਸ਼ਵ ਕੱਪ ਦੇ ਮੈਚ ’ਚ ਪਾਕਿਸਤਾਨ ਨੂੰ 61 ਦੌੜਾਂ ਨਾਲ ਹਰਾ ਕਿ ਪਾਕਿਸਤਾਨ ਦੀਆਂ ਸ਼ਰਮਨਾਕ ਹਾਰਾਂ ’ਚ ਇਕ ਹੋਰ ਹਾਰ ਜੋੜ ਦਿੱਤੀ।

ਇਸ ਨਾਲ ਪਾਕਿਸਤਾਨ ’ਚ ਹਾਹਾਕਾਰ ਮਚ ਗਈ ਅਤੇ ਲੋਕਾਂ ਨੇ ਗੁੱਸੇ ’ਚ ਆ ਕੇ ਵੱਡੀ ਗਿਣਤੀ ’ਚ ਟੀ.ਵੀ. ਸੈੱਟ ਤੋੜ ਦਿੱਤੇ। ਪਾਕਿਸਤਾਨ ’ਚ ਹਮੇਸ਼ਾ ਇਹੀ ਹੁੰਦਾ ਹੈ। ਪਾਕਿਸਤਾਨ ਦੀ ਗੇਂਦਬਾਜ਼ੀ ਅਤੇ ਬੱਲੇਬਾਜ਼ੀ ਇੰਨੀ ਖਰਾਬ ਸੀ ਕਿ ਉਸਦੀਆਂ ਲਗਾਤਾਰ ਵਿਕਟਾਂ ਡਿੱਗਦੀਆਂ ਦੇਖ ਕੇ ‘ਪਾਕਿਸਤਾਨ ਕ੍ਰਿਕਟਰ ਬੋਰਡ’ ਦਾ ਮੁਖੀ ‘ਮੋਹਸਿਨ ਨਕਵੀ’ ਅਤੇ ਪਾਕਿਸਤਾਨ ਕ੍ਰਿਕਟ ਪ੍ਰੇਮੀ ਮੈਚ ਖਤਮ ਹੋਣ ਤੋਂ ਪਹਿਲਾਂ ਹੀ ਉੱਠ ਕੇ ਚਲੇ ਗਏ।

15 ਫਰਵਰੀ ਨੂੰ ਹੀ ‘ਬੈਂਕਾਕ’ ’ਚ ‘ਮਹਿਲਾ ਏਸ਼ੀਆ ਕੱਪ 2026-ਰਾਈਜ਼ਿੰਗ ਸਟਾਰਸ’ ਦੇ ਮੈਚ ’ਚ ਭਾਰਤ ਦੀ ‘ਏ-ਮਹਿਲਾ ਟੀਮ’ ਨੇ ਪਾਕਿਸਤਾਨ ਦੀਆਂ ਮਹਿਲਾਂ ਖਿਡਾਰਨਾਂ ਨੂੰ ਅੱਠ ਵਿਕਟਾਂ ਨਾਲ ਹਰਾ ਕਿ ਉਨ੍ਹਾਂ ਦੇ ਜ਼ਖਮਾਂ ’ਤੇ ਲੂਣ ਛਿੜਕ ਦਿੱਤਾ।

ਇਸ ਦੌਰਾਨ ਪਾਕਿਸਤਾਨ ਦੇ ਅਸ਼ਾਂਤ ਬਲੋਚਿਸਤਾਨ ਪ੍ਰਾਂਤ ’ਚ ਪਾਕਿਸਤਾਨ ਦੇ ਸ਼ਾਸਕਾਂ ਵਲੋਂ ਸੋਮਿਆਂ ਦੀ ਲੁੱਟ, ਆਰਥਿਕ ਅਸਮਾਨਤਾ ਅਤੇ ਪਾਕਿਸਤਾਨ ’ਚ ਜਬਰੀ ਵਿਲੀਨਤਾ ਦੇ ਵਿਰੁੱਧ 1948 ਤੋਂ ਜਾਰੀ ਅੰਦੋਲਨ 2003 ਤੋਂ ਤੇਜ਼ ਹੋ ਕੇ ਹਿੰਸਕ ਵੱਖਵਾਦੀ ਅੰਦੋਲਨ ’ਚ ਬਦਲ ਗਿਆ ਹੈ।

‘ਬਲੋਚ ਲਿਬਰੇਸ਼ਨ ਆਰਮੀ’ ਆਜ਼ਾਦੀ ਦੀ ਆਪਣੀ ਮੰਗ ’ਤੇ ਜ਼ੋਰ ਦੇਣ ਦੇ ਲਈ ਪਾਕਿਸਤਾਨ ਦੀ ਸੈਨਾ ਅਤੇ ‘ਚੀਨ- ਪਾਕਿਸਤਾਨ ਆਰਥਿਕ ਗਲਿਆਰੇ’ (ਸੀ.ਪੀ.ਈ.ਸੀ.) ’ਤੇ ਹਮਲੇ ਕਰਦੇ ਆ ਰਹੀ ਹੈ।

‘ਬਲੋਚ ਲਿਬਰੇਸ਼ਨ ਆਰਮੀ’ ਦੇ ਬੁਲਾਰੇ ‘ਜਿਆਂਦ ਬਲੋਚ’ ਦੇ ਅਨੁਸਾਰ ‘ਆਪ੍ਰੇਸ਼ਨ ਹੇਰਾਫ’ ਦੇ ਦੂਜੇ ਪੜਾਅ ਦੇ ਦੌਰਾਨ ਉਨ੍ਹਾਂ ਨੇ ਬੰਦੀ ਬਣਾਏ ਗਏ ਪਾਕਿਸਤਾਨੀ ਫੌਜ ਦੇ 17 ਮੈਂਬਰਾਂ ’ਚੋਂ 10 ਨੂੰ ਰਿਹਾਅ ਕਰ ਦਿੱਤਾ ਹੈ ਜਦਕਿ 7 ਨੂੰ ਆਪਣੀ ਹਿਰਾਸਤ ’ਚ ਰੱਖਿਆ ਹੋਇਆ ਹੈ। ਉਨ੍ਹਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਸਲਾਮਾਬਾਦ ਨੇ 7 ਦਿਨਾਂ ਦੇ ਅੰਦਰ ਜੰਗੀ ਬੰਦੀਆਂ ਦੀ ਅਦਲਾ-ਬਦਲੀ ’ਤੇ ਸਹਿਮਤੀ ਦਿਖਾਈ ਤਾਂ ਠੀਕ ਹੈ ਨਹੀਂ ਤਾਂ ਉਹ ਇਨ੍ਹਾਂ ਬੰਦੀਆਂ ਦੇ ਨਾਲ ਕੁਝ ਵੀ ਕਰ ਸਕਦੇ ਹਨ।

ਇਕ ਹੋਰ ਘਟਨਾ ਚੱਕਰ ’ਚ 5 ਅਗਸਤ, 2024 ਨੂੰ ਬੰਗਲਾਦੇਸ਼ ’ਚ ਤਖਤਾਪਲਟ ਤੋਂ ਬਾਅਦ ਪਾਕਿਸਤਾਨ ਸਮਰਥਕ ‘ਮੁਹੰਮਦ ਯੂਨੁਸ’ ਦੀ ਅਗਵਾਈ ’ਚ ਬਣੀ ਅੰਤਰਿਮ ਸਰਕਾਰ ਨੂੰ ਲੈ ਕੇ ਪਾਕਿਸਤਾਨ ਦੇ ਸਾਸ਼ਕਾਂ ’ਚ ਬੜਾ ਉਤਸ਼ਾਹ ਪਾਇਆ ਜਾ ਰਿਹਾ ਸੀ ਅਤੇ ਦੋਵਾਂ ਦੇਸ਼ਾਂ ਵਿਚਾਲੇ ਸਬੰਧਾਂ ’ਚ ਤੇਜ਼ੀ ਨਾਲ ਸੁਧਾਰ ਆਉਣ ਵਰਗੀਆਂ ਗੱਲਾਂ ਕਹੀਆਂ ਜਾ ਰਹੀਆਂ ਸਨ।

ਪਰ 12 ਫਰਵਰੀ ਨੂੰ ਉਥੇ ਹੋਈਆਂ ਚੋਣਾਂ ’ਚ ਸਾਬਕਾ ਪ੍ਰਧਾਨ ਮੰਤਰੀ ‘ਖਾਲਿਦਾ ਜੀਆ’ ਦੀ ਪਾਰਟੀ ‘ਬੀ. ਐੱਨ. ਪੀ.’ ਦੀ ਭਾਰੀ ਸਫਲਤਾ ਅਤੇ ‘ਤਾਰਿਕ ਰਹਿਮਾਨ’ ਦੇ ਸਲਾਹਕਾਰ ‘ਹਮਾਯੂੰ ਕਬੀਰ’ ਨੇ ਭਾਰਤ ਦੇ ਨਾਲ ਆਪਣੇ ਵਿਗੜਦੇ ਰਿਸ਼ਤਿਆਂ ਨੂੰ ‘ਰੀ ਸੈੱਟ’ ਕਰਨ ਅਤੇ ਮਜ਼ਬੂਤ ਕਰਨ ਦੀ ਇੱਛਾ ਜਤਾ ਕੇ ਪਾਕਿਸਤਾਨ ਦਾ ਉਤਸ਼ਾਹ ਠੰਡਾ ਕਰ ਦਿੱਤਾ ਹੈ।

ਇਸ ਦੌਰਾਨ ਪਾਕਿਸਤਾਨ ’ਚ ਧਮਾਕੇ ਵੀ ਲਗਾਤਾਰ ਜਾਰੀ ਹਨ ਅਤੇ 16 ਫਰਵਰੀ ਨੂੰ ਵਜ਼ੀਰਿਸਤਾਨ ’ਚ ਹੋਏ ਇਕ ਧਮਾਕੇ ’ਚ ਦੋ ਲੋਕਾਂ ਦੀ ਮੌਤ ਹੋ ਗਈ।

ਇਨ੍ਹਾਂ ਦੇ ਇਲਾਵਾ ਵੀ ਪਾਕਿਸਤਾਨ ’ਚ ਵੀ ਸ਼ਹਿਬਾਜ਼ ਸ਼ਰੀਫ ਦੀ ਸਰਕਾਰ ਨੂੰ ਕਈ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸਾਬਕਾ ਪ੍ਰਧਾਨ ਮੰਤਰੀ ‘ਇਮਰਾਨ ਖਾਨ’ ਦੀ ਗ੍ਰਿਫਤਾਰੀ ਤੋਂ ਬਾਅਦ ਉਨ੍ਹਾਂ ਦੀ ਵਿਗੜਦੀ ਸਿਹਤ ਅਤੇ ਜਾ ਰਹੀ ਅੱਖਾਂ ਦੀ ਰੌਸ਼ਨੀ ਦੇ ਕਾਰਨ ਇਮਰਾਨ ਸਮਰਥਕਾਂ ’ਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ ਅਤੇ ‘ਇਮਰਾਨ ਖਾਨ’ ਦੇ ਨਾਲ ਕੋਈ ਮੰਦਭਾਗੀ ਘਟਨਾ ਹੋਣ ’ਤੇ ਪਾਕਿਸਤਾਨ ਸਰਕਾਰ ਦਾ ਸੰਕਟ ਵਧ ਸਕਦਾ ਹੈ ਅਤੇ ਉੱਥੇ ਇਕ ਵਾਰ ਫਿਰ ਸਿਆਸੀ ਅਸਥਿਰਤਾ ਆ ਸਕਦੀ ਹੈ।

ਇਸੇ ਦੌਰਾਨ ਅਮਰੀਕਾ ਨੇ ਵੀ ਭਾਰਤ ਨਾਲ ਟ੍ਰੇਡ ਡੀਲ ਕਰ ਕੇ ਪਾਕਿਸਤਾਨ ਨੂੰ ਝਟਕਾ ਦੇ ਦਿੱਤਾ ਅਤੇ ਉਸ ਦੇ ਰੱਖਿਆ ਮੰਤਰੀ ਖਵਾਜ਼ਾ ਆਸਿਫ ਨੇ ਕਿਹਾ ਕਿ ਅਮਰੀਕਾ ਨੇ ਪਾਕਿਸਤਾਨ ਨੂੰ ‘ਟਾਇਲਟ ਪੇਪਰ’ ਵਾਂਗ ਵਰਤਿਆ ਹੈ।

-ਵਿਜੇ ਕੁਮਾਰ