‘ਦੇਸ਼ ’ਚ ਫਰਜ਼ੀ ਦਾ ਬੋਲਬਾਲਾ’ ਫੜੇ ਜਾ ਰਹੇ ਨਕਲੀ ਅਧਿਕਾਰੀ!

ਦੇਸ਼ ’ਚ ਨਕਲੀ ਖ਼ੁਰਾਕੀ ਪਦਾਰਥਾਂ, ਦਵਾਈਆਂ, ਖਾਦਾਂ, ਕੀਟਨਾਸ਼ਕਾਂ, ਕਰੰਸੀ ਆਦਿ ਦੀਆਂ ਗੱਲਾਂ ਤਾਂ ਸੁਣੀਆਂ ਜਾਂਦੀਆਂ ਸਨ, ਪਰ ਹੁਣ ਇਹ ਬੀਮਾਰੀ ਨਕਲੀ ਅਧਿਕਾਰੀਆਂ ਅਤੇ ਨਕਲੀ ਫ਼ੌਜੀ ਅਧਿਕਾਰੀਆਂ ਤੱਕ ਵੀ ਪਹੁੰਚ ਗਈ ਹੈ, ਜਿਸ ਦੀਆਂ ਪਿਛਲੇ ਡੇਢ ਮਹੀਨੇ ’ਚ ਸਾਹਮਣੇ ਆਈਆਂ ਘਟਨਾਵਾਂ ਹੇਠਾਂ ਦਰਜ ਹਨ :

* 1 ਮਈ ਨੂੰ ‘ਹੈਦਰਾਬਾਦ’ (ਤੇਲੰਗਾਨਾ) ’ਚ ਖ਼ੁਦ ਨੂੰ ਪੁਲਸ ਅਧਿਕਾਰੀ ਅਤੇ ਰਾਜ ਦੇ ਮੁੱਖ ਮੰਤਰੀ ਦਾ ਨਜ਼ਦੀਕੀ ਦੱਸ ਕੇ, ਉਨ੍ਹਾਂ ਨਾਲ ਮਿਲਵਾਉਣ ਦਾ ਦਾਅਵਾ ਕਰਕੇ ਲੋਕਾਂ ਨੂੰ ਠੱਗਣ ਦੇ ਦੋਸ਼ ’ਚ ‘ਤਾਤੂਰੀ ਰਵੀ’ ਉਰਫ਼ ‘ਚਰਨ ਯਾਦਵ’ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।

ਪੁਲਸ ਨੇ ਉਸ ਦੇ ਕਬਜ਼ੇ ’ਚੋਂ ਵਰਦੀ, ਕੈਪ, ਨੇਮ ਪਲੇਟ ਅਤੇ ਮੋਬਾਈਲ ਫ਼ੋਨ ਜ਼ਬਤ ਕੀਤਾ। ਪੁਲਸ ਅਨੁਸਾਰ ਬਚਪਨ ਤੋਂ ਹੀ ਉਸ ’ਤੇ ਪੁਲਸ ਅਧਿਕਾਰੀ ਬਣਨ ਦਾ ਜਨੂੰਨ ਸਵਾਰ ਸੀ ਅਤੇ ਜਦੋਂ ਉਹ ਅਸਲੀ ਪੁਲਸ ਅਧਿਕਾਰੀ ਨਾ ਬਣ ਸਕਿਆ ਤਾਂ ਨਕਲੀ ਪੁਲਸ ਅਧਿਕਾਰੀ ਬਣ ਕੇ ਲੋਕਾਂ ਨੂੰ ਠੱਗਣ ਲੱਗਾ।

* 30 ਮਈ ਨੂੰ ‘ਬਲਰਾਮਪੁਰ’ (ਛੱਤੀਸਗੜ੍ਹ) ’ਚ ਪੁਲਸ ਨੇ ਅਧਿਕਾਰੀਆਂ ਦੇ ਜਾਅਲੀ ਦਸਤਖ਼ਤ ਅਤੇ ਜਾਅਲੀ ਦਸਤਾਵੇਜ਼ਾਂ ਦੇ ਜ਼ਰੀਏ 4 ਲੱਖ ਰੁਪਏ ’ਚ ‘ਫਰਜ਼ੀ ਨਿਵਾਸ ਪ੍ਰਮਾਣ ਪੱਤਰ’ ਬਣਾਉਣ ਵਾਲੇ ਗਿਰੋਹ ਦੇ ਸਰਗਣੇ ਸਮੇਤ 3 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ।

* 31 ਮਈ ਨੂੰ ‘ਨਜੀਬਾਬਾਦ’ (ਉੱਤਰ ਪ੍ਰਦੇਸ਼) ’ਚ ਖ਼ੁਦ ਨੂੰ ਰੇਲਵੇ ਦਾ ਵਿਜੀਲੈਂਸ ਇੰਸਪੈਕਟਰ ਦੱਸ ਕੇ ਰੇਲ ਗੱਡੀਆਂ ਦੇ ਏ. ਸੀ. ਕੋਚਾਂ ’ਚ ਯਾਤਰਾ ਕਰਨ, ਟਿਕਟ ਚੈੱਕਰ ਸਟਾਫ਼ ਨੂੰ ਧਮਕਾਉਣ ਅਤੇ ਰੇਲਵੇ ਸਟੇਸ਼ਨਾਂ ’ਤੇ ਠਹਿਰਨ ਦੀਆਂ ਵੀ. ਆਈ. ਪੀ. ਸਹੂਲਤਾਂ ਲੈਣ ਦੇ ਦੋਸ਼ ’ਚ ‘ਜਾਵੇਦ ਅਲੀ’ ਨਾਂ ਦੇ ਸ਼ਾਤਿਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।

* 9 ਜੂਨ ਨੂੰ ‘ਜ਼ੀਰਕਪੁਰ’ (ਪੰਜਾਬ) ’ਚ ਖ਼ੁਦ ਨੂੰ ਸੀ. ਆਈ. ਏ. ਸਟਾਫ਼ ਦਾ ਅਧਿਕਾਰੀ ਦੱਸ ਕੇ ਇਕ ਸੁਨਿਆਰੇ ਨੂੰ ਅਗਵਾ ਕਰਨ ਅਤੇ ਉਸ ਨੂੰ ਡਰਾ ਕੇ ਲੱਖਾਂ ਰੁਪਏ ਦੀ ਵਸੂਲੀ ਕਰਨ ਦੇ ਮਾਮਲੇ ’ਚ ਜ਼ੀਰਕਪੁਰ ਪੁਲਸ ਨੇ 3 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ ਦੇ ਕਬਜ਼ੇ ’ਚੋਂ 2 ਕਾਰਾਂ ਅਤੇ 2.30 ਲੱਖ ਰੁਪਏ ਨਕਦ ਬਰਾਮਦ ਕੀਤੇ।

* 11 ਜੂਨ ਨੂੰ ‘ਦੇਵਘਰ’ (ਬਿਹਾਰ) ’ਚ ਖ਼ੁਦ ਨੂੰ ਬੈਂਕ ਅਧਿਕਾਰੀ ਅਤੇ ‘ਗਾਹਕ ਸੇਵਾ ਪ੍ਰਤੀਨਿਧੀ’ ਦੱਸ ਕੇ ਲੋਕਾਂ ਨੂੰ ਠੱਗਣ ਵਾਲੇ 3 ਵੱਡੇ ਸਾਈਬਰ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਇਹ ਲੋਕ ਖ਼ੁਦ ਨੂੰ ਸਰਕਾਰੀ ਯੋਜਨਾਵਾਂ ਦੇ ਏਜੰਟ ਦੱਸ ਕੇ ਲੋਕਾਂ ਨੂੰ ਆਨਲਾਈਨ ਠੱਗੀ ਦਾ ਸ਼ਿਕਾਰ ਬਣਾਉਂਦੇ ਸਨ।

* 11 ਜੂਨ ਨੂੰ ਹੀ ‘ਜੈਪੁਰ’ (ਰਾਜਸਥਾਨ) ’ਚ ‘ਸਪੈਸ਼ਲ ਆਪ੍ਰੇਸ਼ਨ ਗਰੁੱਪ’ (ਐੱਸ. ਓ. ਜੀ.) ਦੇ ਅਧਿਕਾਰੀਆਂ ਨੇ ਐੱਮ. ਟੈੱਕ. ਦੀ ਫਰਜ਼ੀ ਡਿਗਰੀ ਦੀ ਵਰਤੋਂ ਕਰਕੇ ਜਲ ਸਪਲਾਈ ਵਿਭਾਗ ’ਚ ਜੂਨੀਅਰ ਇੰਜੀਨੀਅਰ ਦੀ ਨੌਕਰੀ ਹਾਸਲ ਕਰਨ ਵਾਲੇ ਜਾਅਲਸਾਜ਼ ਨੂੰ ਗ੍ਰਿਫ਼ਤਾਰ ਕੀਤਾ।

* 11 ਜੂਨ ਨੂੰ ਹੀ ‘ਦਤੀਆ’ (ਮੱਧ ਪ੍ਰਦੇਸ਼) ’ਚ ਖ਼ੁਦ ਨੂੰ ‘ਐਂਟੀ ਕਰੱਪਸ਼ਨ ਅਧਿਕਾਰੀ’ ਦੱਸ ਕੇ ਇਕ ਵਿਅਕਤੀ ਤੋਂ 29 ਲੱਖ 50 ਹਜ਼ਾਰ ਰੁਪਏ ਠੱਗਣ ਦੇ ਦੋਸ਼ ’ਚ ‘ਮਨੀਸ਼ ਗੁਬਰੇਲੇ’ ਨਾਂ ਦੇ ਸ਼ਾਤਿਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਮੁਲਜ਼ਮ ਕੋਲੋਂ ਇਕ ਕਾਰ, 3 ਸਟਾਰ ਲੱਗੀ ਵਰਦੀ ਅਤੇ ਲੈਟਰ ਪੈਡ ਵੀ ਜ਼ਬਤ ਕੀਤੇ ਗਏ।

* 12 ਜੂਨ ਨੂੰ ‘ਕਠੂਆ’ (ਜੰਮੂ-ਕਸ਼ਮੀਰ) ਪੁਲਸ ਨੇ ਨਕਲੀ ਪਛਾਣ ਪੱਤਰ ਦੇ ਸਹਾਰੇ ਖ਼ੁਦ ਨੂੰ ਇੰਟੈਲੀਜੈਂਸ ਦਾ ਅਧਿਕਾਰੀ ਦੱਸ ਕੇ ਲੋਕਾਂ ਨੂੰ ਠੱਗਣ ਵਾਲੇ ‘ਅੰਕੁਸ਼ ਸ਼ਰਮਾ’ ਨਾਂ ਦੇ ਇਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ।

* 12 ਜੂਨ ਨੂੰ ਹੀ ‘ਭਿਵੰਡੀ’ (ਮਹਾਰਾਸ਼ਟਰ) ’ਚ ਖ਼ੁਦ ਨੂੰ ਖ਼ੁਰਾਕ ਵਿਭਾਗ ਦੇ ਅਧਿਕਾਰੀ ਦੱਸ ਕੇ ਦੁਕਾਨਦਾਰਾਂ ਤੋਂ ਜ਼ਬਰਦਸਤੀ ਵਸੂਲੀ ਕਰਨ ਦੇ ਦੋਸ਼ ’ਚ ਪੁਲਸ ਨੇ 3 ਔਰਤਾਂ ਅਤੇ ਇਕ ਮਰਦ ਨੂੰ ਗ੍ਰਿਫ਼ਤਾਰ ਕੀਤਾ।

* ਅਤੇ ਹੁਣ 13 ਜੂਨ ਨੂੰ ‘ਸ਼ਾਹਜਹਾਂਪੁਰ’ (ਉੱਤਰ ਪ੍ਰਦੇਸ਼) ’ਚ ਖ਼ੁਦ ਨੂੰ ਫ਼ੌਜ ’ਚ ਬ੍ਰਿਗੇਡੀਅਰ ਦੱਸ ਕੇ ਲੋਕਾਂ ਨੂੰ ਠੱਗਣ ਵਾਲੇ ‘ਆਇਨ ਵਰਮਾ’ ਨਾਂ ਦੇ ਜਾਅਲਸਾਜ਼ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਮੁਲਜ਼ਮ ਆਰਮੀ ਦਾ ਸਟਾਰ ਫਲੈਗ ਲੱਗੀ ਆਪਣੀ ਐੱਸ. ਯੂ. ਵੀ. ਕਾਰ ’ਚ ਫ਼ੌਜ ਦੀ ਵਰਦੀ ਤੇ ਮੈਡਲ ਪਹਿਨ ਕੇ ਘੁੰਮਦਾ ਸੀ ਅਤੇ ਆਪਣੇ ਨਾਲ 2 ਬਾਊਂਸਰਾਂ ਨੂੰ ਕਮਾਂਡੋ ਦੱਸ ਕੇ ਰੱਖਦਾ ਸੀ।

ਉਪਰੋਕਤ ਉਦਾਹਰਣਾਂ ਤੋਂ ਸਪੱਸ਼ਟ ਹੈ ਕਿ ਦੇਸ਼ ’ਚ ਕੁਝ ਸਮਾਜ ਵਿਰੋਧੀ ਅਨਸਰਾਂ ਵੱਲੋਂ ਖ਼ੁਦ ਨੂੰ ਅਧਿਕਾਰੀ ਦੱਸ ਕੇ ਲੋਕਾਂ ਨੂੰ ਠੱਗਣ ਦੀ ਬੀਮਾਰੀ ਕਿਸ ਕਦਰ ਵਧਦੀ ਜਾ ਰਹੀ ਹੈ। ਇਸ ਲਈ ਅਜਿਹੇ ਸਮਾਜ ਵਿਰੋਧੀ ਅਨਸਰਾਂ ਦੇ ਵਿਰੁੱਧ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕਰਨ ਦੀ ਲੋੜ ਹੈ, ਤਾਂ ਜੋ ਉਹ ਦੇਸ਼ ਅਤੇ ਸਮਾਜ ਨਾਲ ਧੋਖਾ ਨਾ ਕਰ ਸਕਣ ਅਤੇ ਉਨ੍ਹਾਂ ਦੇ ਹਸ਼ਰ ਤੋਂ ਦੂਜਿਆਂ ਨੂੰ ਵੀ ਨਸੀਹਤ ਮਿਲੇ।

ਇਸ ਦੇ ਨਾਲ ਹੀ ਆਮ ਲੋਕਾਂ ਨੂੰ ਅਜਿਹੇ ਫਰਜ਼ੀ ਅਧਿਕਾਰੀਆਂ ਤੋਂ ਸਾਵਧਾਨ ਰਹਿਣਾ ਚਾਹੀਦਾ ਹੈ ਅਤੇ ਬਿਨਾਂ ਜਾਂਚ-ਪੜਤਾਲ ਕੀਤੇ ਕਿਸੇ ਵੀ ਵਿਅਕਤੀ ਨੂੰ ਕਿਸੇ ਵੀ ਤਰ੍ਹਾਂ ਦੀ ਨਕਦ ਅਦਾਇਗੀ ਕਰਨ ਤੋਂ ਬਚਣਾ ਚਾਹੀਦਾ ਹੈ।

—ਵਿਜੇ ਕੁਮਾਰ