‘ਏਅਰਪੋਰਟਸ ’ਤੇ ਵਧ ਰਹੇ’ ਨਸ਼ੇ ਅਤੇ ਸੋਨੇ ਦੀ ਸਮੱਗਲਿੰਗ ਦੇ ਮਾਮਲੇ!

ਦੇਸ਼ ਅਤੇ ਵਿਦੇਸ਼ ’ਚ ਆਸਾਨੀ ਨਾਲ ਅਤੇ ਜਲਦੀ ਆਉਣ-ਜਾਣ ਲਈ ਆਮ ਤੌਰ ’ਤੇ ਜਹਾਜ਼ ਸੇਵਾਵਾਂ ਦੀ ਵਰਤੋਂ ਹੁੰਦੀ ਹੈ ਪਰ ਸਮੱਗਲਰਾਂ ਨੇ ਇਸ ਸਹੂਲਤ ਦੀ ਵਰਤੋਂ ਨਸ਼ਿਆਂ ਅਤੇ ਸੋਨੇ ਦੀ ਸਮੱਗਲਿੰਗ ਲਈ ਸ਼ੁਰੂ ਕਰ ਦਿੱਤੀ ਹੈ।

ਇਹ ਸਮੱਗਲਰ ਸੋਨੇ ਅਤੇ ਨਸ਼ੇ ਦੀ ਸਮੱਗਲਿੰਗ ਦੇ ਨਵੇਂ-ਨਵੇਂ ਤਰੀਕੇ ਅਪਣਾ ਰਹੇ ਹਨ। ਪਿਛਲੇ ਦੋ ਮਹੀਨਿਆਂ ’ਚ ਹੀ ਦੇਸ਼ ਦੇ ਵੱਡੇ ਏਅਰਪੋਰਟਸ ’ਤੇ ਫੜੇ ਗਏ ਨਸ਼ੇ ਅਤੇ ਸੋਨੇ ਦੀ ਸਮੱਗਲਿੰਗ ਦੇ ਮਾਮਲੇ ਹੇਠਾਂ ਦਰਜ ਹਨ :

* 14 ਜਨਵਰੀ, 2026 ਨੂੰ ਦਿੱਲੀ ਦੇ ਇੰਦਰਾ ਗਾਂਧੀ ਇੰਟਰਨੈਸ਼ਨਲ ਏਅਰਪੋਰਟ ’ਤੇ ਮਿਆਂਮਾਰ ਤੋਂ ਆਏ 3 ਯਾਤਰੀਆਂ ਨੂੰ 2.9 ਕਰੋੜ ਰੁਪਏ ਕੀਮਤ ਦੀਆਂ 2.1 ਕਿਲੋਗ੍ਰਾਮ ਸੋਨੇ ਦੀਆਂ ਛੜਾਂ ਨਾਲ ਫੜਿਆ ਗਿਆ।

* 21 ਜਨਵਰੀ ਨੂੰ ਬੈਂਗਲੁਰੂ ਏਅਰਪੋਰਟ ’ਤੇ (ਸਾਓ ਪਾਓਲੋ) ਬ੍ਰਾਜ਼ੀਲ ਤੋਂ ਆਏ ਇਕ ਯਾਤਰੀ ਤੋਂ 38.60 ਕਰੋੜ ਰੁਪਏ ਮੁੱਲ ਦੀ 7.72 ਕਿਲੋਗ੍ਰਾਮ ਕੋਕੀਨ ਬਰਾਮਦ ਹੋਈ, ਜਿਸ ਨੂੰ ਬੱਚਿਆਂ ਦੀਆਂ ‘ਫੇਅਰੀ ਟੇਲ’ ਕਿਤਾਬਾਂ ’ਚ ਲੁਕਾਇਆ ਗਿਆ ਸੀ।

* 28 ਜਨਵਰੀ ਨੂੰ ਬੈਂਗਲੁਰੂ ਏਅਰਪੋਰਟ ’ਤੇ ਕਸਟਮ ਵਿਭਾਗ ਨੇ ਸਮੱਗਲਰਾਂ ਦੇ ਕਬਜ਼ੇ ’ਚੋਂ ਵਿਦੇਸ਼ੀ ਕਰੰਸੀ ਅਤੇ ਹੀਰੇ ਜ਼ਬਤ ਕੀਤੇ।

* 30 ਜਨਵਰੀ ਨੂੰ ਮੁੰਬਈ ਏਅਰਪੋਰਟ ’ਤੇ ਦੁਬਈ ਤੋਂ ਆਏ ਇਕ ਯਾਤਰੀ ਤੋਂ ਪੇਸਟ ਦੇ ਰੂਪ ’ਚ ਸਮੱਗਲਿੰਗ ਕਰਕੇ ਲਿਆਂਦਾ ਗਿਆ ਸੋਨਾ ਬਰਾਮਦ ਕੀਤਾ ਗਿਆ!

* 5 ਫਰਵਰੀ ਨੂੰ ਅਹਿਮਦਾਬਾਦ ਏਅਰਪੋਰਟ ’ਤੇ ਦੁਬਈ ਤੋਂ ਆਏ ਯਾਤਰੀ ਦੇ ਅੰਡਰਗਾਰਮੈਂਟਸ ਵਿਚੋਂ 600 ਗ੍ਰਾਮ ਸੋਨਾ ਬਰਾਮਦ ਕੀਤਾ ਗਿਆ ਜਿਸ ਦੀ ਕੀਮਤ 96 ਲੱਖ ਰੁਪਏ ਸੀ।

* 11 ਫਰਵਰੀ ਨੂੰ ਪੁਣੇ ਏਅਰਪੋਰਟ ’ਤੇ ਬੈਂਕਾਕ ਤੋਂ ਆਏ ਯਾਤਰੀ ਤੋਂ ਖਿਡੌਣਿਆਂ ਦੇ ਬਕਸੇ ’ਚ ਲੁਕੋ ਕੇ ਲਿਆਂਦੀ ਗਈ 5.4 ਕਿਲੋਗ੍ਰਾਮ ਹਾਈਡ੍ਰੋਪੋਨਿਕ ਵੀਡ ਬਰਾਮਦ ਕੀਤੀ ਗਈ ਜਿਸ ਦੀ ਕੀਮਤ 5.4 ਕਰੋੜ ਰੁਪਏ ਸੀ।

* 20 ਫਰਵਰੀ ਨੂੰ ਅਹਿਮਦਾਬਾਦ ਏਅਰਪੋਰਟ ’ਤੇ ਅਾਬੂਧਾਬੀ ਤੋਂ ਆਏ ‘ਸ਼ਾਹਰੁਖ’ ਨਾਂ ਦੇ ਯਾਤਰੀ ਤੋਂ 135 ਗ੍ਰਾਮ ਸੋਨੇ ਦੇ ਕੈਪਸੂਲ ਬਰਾਮਦ ਕੀਤੇ ਗਏ। ਸਮੱਗਲਰ ਇਨ੍ਹਾਂ ਕੈਪਸੂਲਾਂ ਨੂੰ ਨਿਗਲ ਕੇ ਲਿਆਇਆ ਸੀ। ਮੈਡੀਕਲ ਜਾਂਚ ਤੋਂ ਬਾਅਦ ਉਨ੍ਹਾਂ ਨੂੰ ਪੇਟ ’ਚੋਂ ਕੱਢਿਆ ਗਿਆ।

* 17 ਤੋਂ 24 ਫਰਵਰੀ ਦੇ ਦਰਮਿਆਨ ਮੁੰਬਈ ਏਅਰਪੋਰਟ ’ਤੇ ਕਸਟਮਜ਼ ਅਧਿਕਾਰੀਆਂ ਨੇ 23.59 ਕਰੋੜ ਰੁਪਏ ਕੀਮਤ ਦੀ ਕੁੱਲ 23.59 ਕਿਲੋਗ੍ਰਾਮ ਹਾਈਡ੍ਰੋਪੋਨਿਕ ਵੀਡ ਅਤੇ ਸੋਨਾ ਜ਼ਬਤ ਕੀਤਾ।

* 1 ਮਾਰਚ ਨੂੰ ਦਿੱਲੀ ਦੇ ਇੰਦਰਾ ਗਾਂਧੀ ਇੰਟਰਨੈਸ਼ਨਲ ਏਅਰਪੋਰਟ ’ਤੇ ਕਸਟਮ ਅਧਿਕਾਰੀਆਂ ਨੇ ਦੋ ਵੱਖ-ਵੱਖ ਮਾਮਲਿਆਂ ’ਚ 3 ਕਿਲੋ ਤੋਂ ਵੱਧ ਸੋਨੇ ਦੇ ਨਾਲ 3 ਵਿਦੇਸ਼ੀ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਫੜੇ ਗਏ ਸੋਨੇ ਦੀ ਕੀਮਤ 4 ਕਰੋੜ ਰੁਪਏ ਤੋਂ ਵੱਧ ਦੱਸੀ ਗਈ।

* 1 ਮਾਰਚ ਨੂੰ ਹੀ ਚੇਨਈ ਏਅਰਪੋਰਟ ’ਤੇ ਸਿੰਗਾਪੁਰ ਤੋਂ ਆਏ ਯਾਤਰੀ ਤੋਂ 1.14 ਕਰੋੜ ਰੁਪਏ ਮੁੱਲ ਦੀ 750 ਗ੍ਰਾਮ ਗੋਲਡ ਪੇਸਟ ਬਰਾਮਦ ਕੀਤੀ ਗਈ।

* 2-3 ਮਾਰਚ ਦੀ ਦਰਮਿਆਨੀ ਰਾਤ ਨੂੰ ਕੋਝੀਕੋਡ (ਕਾਲੀਕਟ) ਏਅਰਪੋਰਟ ’ਤੇ ਡਾਇਰੈਕਟੋਰੇਟ ਆਫ਼ ਰੈਵੇਨਿਊ ਇੰਟੈਲੀਜੈਂਸ ਨੇ ਮਸਕਟ ਤੋਂ ਆਏ ਯਾਤਰੀ ਤੋਂ 1.9 ਕਿਲੋਗ੍ਰਾਮ ਕ੍ਰਿਸਟਲ ਮੇਥ ਜ਼ਬਤ ਕੀਤੀ। ਅੰਤਰਰਾਸ਼ਟਰੀ ਬਾਜ਼ਾਰ ’ਚ ਇਸ ਦੀ ਕੀਮਤ 3.86 ਕਰੋੜ ਰੁਪਏ ਹੈ।

* 3 ਮਾਰਚ ਨੂੰ ਪੁਣੇ ਏਅਰਪੋਰਟ ’ਤੇ ਬੈਂਕਾਕ ਤੋਂ ਆਈ ਏਅਰ ਇੰਡੀਆ ਐਕਸਪ੍ਰੈੱਸ ਦੀ ਫਲਾਈਟ ’ਚ ਟਿਸ਼ੂ ਕੈਬਨਿਟ ’ਚ ਲੁਕੋਇਆ ਗਿਆ 745 ਗ੍ਰਾਮ ‘ਹਾਈਡ੍ਰੋਪੋਨਿਕ ਵੀਡ’ (ਗਾਂਜਾ) ਬਰਾਮਦ ਕੀਤਾ ਗਿਆ।

* 4 ਮਾਰਚ ਨੂੰ ਕੋਝੀਕੋਡ ਏਅਰਪੋਰਟ ’ਤੇ ਮਸਕਟ ਤੋਂ ਆਏ ਇਕ ਯਾਤਰੀ ਤੋਂ 1.9 ਕਿਲੋਗ੍ਰਾਮ ਕ੍ਰਿਸਟਲ ਮੈਥਾਮਫੇਟਾਮਾਈਨ ਬਰਾਮਦ ਕੀਤੀ ਗਈ। ਇਹ ਡਰੱਗ ਖਾਣ ਦੇ ਪੈਕੇਟਾਂ ’ਚ ਲੁਕੋ ਕੇ ਲਿਆਂਦੀ ਗਈ ਸੀ। ਇਸ ਦੀ ਕੀਮਤ 3 ਕਰੋੜ ਰੁਪਏ ਹੈ।

ਦੇਸ਼ ਦੇ ਏਅਰਪੋਰਟਸ ਦੇ ਜ਼ਰੀਏ ਹੋ ਰਹੀ ਨਸ਼ੇ ਅਤੇ ਸੋਨੇ ਦੀ ਸਮੱਗਲਿੰਗ ਨੂੰ ਰੋਕਣ ਦਾ ਕੰਮ ਮੁੱਖ ਤੌਰ ’ਤੇ ਕਸਟਮ ਵਿਭਾਗ ਅਤੇ ਸੁਰੱਖਿਆ ਏਜੰਸੀਆਂ ਦਾ ਹੈ। ਇਹ ਏਜੰਸੀਆਂ ਕੁਝ ਹੱਦ ਤੱਕ ਇਸ ਕੰਮ ’ਚ ਕਾਮਯਾਬ ਵੀ ਹੋ ਰਹੀਆਂ ਹਨ ਪਰ ਜਿਸ ਤਰੀਕੇ ਨਾਲ ਵਿਦੇਸ਼ਾਂ ਤੋਂ ਆਉਣ ਵਾਲੇ ਯਾਤਰੀ ਜਹਾਜ਼ ਤੱਕ ਨਸ਼ੇ ਅਤੇ ਸੋਨਾ ਲਿਆਉਣ ’ਚ ਕਾਮਯਾਬ ਹੋ ਰਹੇ ਹਨ, ਉਨ੍ਹਾਂ ਨੂੰ ਦੇਖਦੇ ਹੋਏ ਦੇਸ਼ ਦੇ ਸਾਰੇ ਵੱਡੇ-ਛੋਟੇ ਹਵਾਈ ਅੱਡਿਆਂ ’ਤੇ ਸੁਰੱਖਿਆ ਅਤੇ ਨਿਗਰਾਨੀ ਤੰਤਰ ਹੋਰ ਸਖਤ ਕਰਨ ਦੀ ਲੋੜ ਹੈ।

ਇਸ ਦੇ ਨਾਲ ਹੀ ਨਸ਼ਾ ਸਮੱਗਲਰਾਂ ਨੂੰ ਫੜਨ ਵਾਲੇ ਸੁਰੱਖਿਆ ਬਲਾਂ ਅਤੇ ਕਸਟਮ ਅਧਿਕਾਰੀਆਂ ਨੂੰ ਵਿਸ਼ੇਸ਼ ਤੌਰ ’ਤੇ ਪੁਰਸਕਾਰ ਤੇ ਸਨਮਾਨ ਦਿੱਤਾ ਜਾਣਾ ਚਾਹੀਦਾ ਹੈ ਤਾਂ ਜੋ ਇਸ ਤਰ੍ਹਾਂ ਦੇ ਮਾਮਲੇ ਜ਼ਿਆਦਾ ਤੋਂ ਜ਼ਿਆਦਾ ਫੜੇ ਜਾ ਸਕਣ ਅਤੇ ਇਸ ਤਰ੍ਹਾਂ ਦੀਆਂ ਗੈਰ-ਕਾਨੂੰਨੀ ਸਰਗਰਮੀਅਾਂ ’ਤੇ ਪੂਰੀ ਤਰ੍ਹਾਂ ਰੋਕ ਲੱਗ ਸਕੇ।

—ਵਿਜੇ ਕੁਮਾਰ