‘ਕੁਝ ਅਧਿਆਪਕ-ਅਧਿਆਪਿਕਾਵਾਂ ਵੱਲੋਂ’ ਵਿਦਿਆਰਥੀ-ਵਿਦਿਆਰਥਣਾਂ ’ਤੇ ਜ਼ੁਲਮ!

ਜੀਵਨ ’ਚ ਮਾਤਾ-ਪਿਤਾ ਤੋਂ ਬਾਅਦ ਅਧਿਆਪਕ ਦਾ ਹੀ ਸਰਬਉੱਚ ਸਥਾਨ ਮੰਨਿਆ ਗਿਆ ਹੈ। ਉਹੀ ਬੱਚਿਆਂ ਨੂੰ ਸਹੀ ਸਿੱਖਿਆ ਦੇ ਕੇ ਅਗਿਆਨੀ ਤੋਂ ਗਿਆਨਵਾਨ ਬਣਾਉਂਦੇ ਹਨ ਪਰ ਅੱਜ ਕੁਝ ਅਧਿਆਪਕ-ਅਧਿਆਪਿਕਾਵਾਂ ਆਪਣੇ ਆਦਰਸ਼ਾਂ ਨੂੰ ਭੁੱਲ ਕੇ ਛੋਟੀ ਉਮਰ ਤੋਂ ਲੈ ਕੇ ਵੱਡੀ ਉਮਰ ਤੱਕ ਦੇ ਵਿਦਿਆਰਥੀ-ਵਿਦਿਆਰਥਣਾਂ ’ਤੇ ਗੈਰ-ਮਨੁੱਖੀ ਜ਼ੁਲਮ ਕਰ ਰਹੇ ਹਨ, ਜਿਸ ਦੀਆਂ ਪਿਛਲੇ 5 ਮਹੀਨਿਆਂ ’ਚ ਸਾਹਮਣੇ ਆਈਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :

* 21 ਅਕਤੂਬਰ, 2025 ਨੂੰ ‘ਚਿੱਤਰਦੁਰਗ’ (ਕਰਨਾਟਕ) ’ਚ ਇਕ ਸਰਕਾਰੀ ਰਿਹਾਇਸ਼ੀ ਸਕੂਲ ’ਚ ਇਕ ਵਿਦਿਆਰਥੀ ਨੂੰ ਆਪਣੇ ਘਰ ਫੋਨ ਕਰਨ ’ਤੇ ਬੁਰੀ ਤਰ੍ਹਾਂ ਕੁੱਟਣ ਅਤੇ ਲੱਤਾਂ ਮਾਰਨ ਦੇ ਦੋਸ਼ ਹੇਠ ਪੁਲਸ ਨੇ ਇਕ ਅਧਿਆਪਕ ਨੂੰ ਗ੍ਰਿਫਤਾਰ ਕੀਤਾ।

* 11 ਨਵੰਬਰ, 2025 ਨੂੰ ‘ਰੀਵਾ’ (ਮੱਧ ਪ੍ਰਦੇਸ਼) ਸਥਿਤ ‘ਜੇਂਟਲ ਸ਼ੇਫਰਡ ਹਾਇਰ ਸੈਕੰਡਰੀ ਸਕੂਲ’ ’ਚ ਬੀਮਾਰ ਹੋਣ ਕਾਰਨ ਪੂਰਾ ਹੋਮਵਰਕ ਨਾ ਕਰ ਸਕਣ ’ਤੇ ਨਾਰਾਜ਼ ਅਧਿਆਪਿਕਾ ‘ਅਨਾਮਿਕਾ’ ਨੇ ਚੌਥੀ ਜਮਾਤ ਦੀ ਵਿਦਿਆਰਥਣ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ, ਜਿਸ ਨਾਲ ਉਸ ਦੀ ਇਕ ਅੱਖ ਸੁਜ ਗਈ ਅਤੇ ਸਿਰ ’ਤੇ ਗੰਭੀਰ ਸੱਟਾਂ ਲੱਗੀਆਂ।

* 21 ਨਵੰਬਰ, 2025 ਨੂੰ ‘ਸੇਮਰੀਆ’ (ਬਿਹਾਰ) ’ਚ ਇਕ ਸਕੂਲ ਦੀ 11ਵੀਂ ਜਮਾਤ ਦੀ ਵਿਦਿਆਰਥਣ ਨੇ ਇਕ ਅਧਿਆਪਕ ਵੱਲੋਂ ਉਸ ਦੇ ਸਰੀਰਕ ਅਤੇ ਮਾਨਸਿਕ ਸ਼ੋਸ਼ਣ ਤੋਂ ਦੁਖੀ ਹੋ ਕੇ ਖੁਦਕੁਸ਼ੀ ਕਰ ਲਈ। ਅਧਿਆਪਕ ਉਸ ਦੀਆਂ ਉਂਗਲਾਂ ਦੇ ਵਿਚਾਲੇ ਪੈੱਨ ਦਬਾ ਕੇ ਅਤੇ ਹੱਥ ਫੜ ਕੇ ਉਸ ਨਾਲ ਗੈਰ-ਮਨੁੱਖੀ ਵਿਵਹਾਰ ਕਰਦਾ ਸੀ।

* 20 ਦਸੰਬਰ, 2025 ਨੂੰ ਬੈਕੁੰਠਪੁਰ (ਛੱਤੀਸਗੜ੍ਹ) ਦੇ ਇਕ ਸਕੂਲ ’ਚ ਹੋਮਵਰਕ ਪੂਰਾ ਨਾ ਕਰਨ ’ਤੇ ਇਕ ਅਧਿਆਪਿਕਾ ‘ਮਨੀਸ਼ਾ ਵਿਸ਼ਵਕਰਮਾ’ ਨੇ ਪੰਜਵੀਂ ਜਮਾਤ ਦੇ ਵਿਦਿਆਰਥੀ ਦੇ ਸਿਰ ’ਤੇ ਪਾਣੀ ਨਾਲ ਭਰੀ ਸਟੀਲ ਦੀ ਬੋਤਲ ਮਾਰ ਕੇ ਉਸ ਦਾ ਸਿਰ ਪਾੜ ਦਿੱਤਾ।

* 4 ਫਰਵਰੀ, 2026 ਨੂੰ ‘ਗਾਂਧੀਨਗਰ’ (ਗੁਜਰਾਤ) ਦੇ ਇਕ ਸਕੂਲ ਦੀ ਅਧਿਆਪਿਕਾ ਨੇ ਹੋਮਵਰਕ ਪੂਰਾ ਨਾ ਕਰਨ ’ਤੇ ਇਕ 14 ਸਾਲਾ ਵਿਦਿਆਰਥਣ ਨੂੰ ਇੰਨੀ ਜ਼ੋਰ ਨਾਲ ਥੱਪੜ ਮਾਰਿਆ ਕਿ ਵਿਦਿਆਰਥਣ ਦੇ ਕੰਨ ਦਾ ਪਰਦਾ ਫਟ ਗਿਆ ਅਤੇ ਉਹ ਸਦੀਵੀ ਤੌਰ ’ਤੇ ਬੋਲ਼ੀ ਹੋ ਗਈ।

* 19 ਫਰਵਰੀ, 2026 ਨੂੰ ‘ਨਵੀ ਮੁੰਬਈ’ (ਮਹਾਰਾਸ਼ਟਰ) ’ਚ ਟਿਊਸ਼ਨ ਟੀਚਰ ਨੇ ਅੱਠਵੀਂ ਦੀ ਇਕ ਵਿਦਿਆਰਥਣ ਨੂੰ ਪਹਾੜੇ (Tables) ਯਾਦ ਨਾ ਕਰਨ ’ਤੇ 40 ਡੰਡੇ ਮਾਰੇ।

* 21 ਫਰਵਰੀ, 2026 ਨੂੰ ‘ਲਾਤੂਰ’ (ਮਹਾਰਾਸ਼ਟਰ) ਦੇ ਇਕ ਸਕੂਲ ’ਚ ਆਪਣੀ ਮੋਟਰਸਾਈਕਲ ਨੂੰ ਨੁਕਸਾਨ ਪਹੁੰਚਾਉਣ ਦੇ ਸ਼ੱਕ ’ਚ ਇਕ ਅਧਿਆਪਕ ਨੇ 32 ਵਿਦਿਆਰਥੀਆਂ ਨੂੰ ਬੁਰੀ ਤਰ੍ਹਾਂ ਕੁੱਟਿਆ, ਜਿਸ ਨਾਲ ਕਈ ਵਿਦਿਆਰਥੀ ਜ਼ਖਮੀ ਅਤੇ ਬੇਹੋਸ਼ ਹੋ ਗਏ।

* 19 ਮਾਰਚ, 2026 ਨੂੰ ‘ਹਿਸਾਰ’ (ਹਰਿਆਣਾ) ਦੇ ਇਕ ਸਰਕਾਰੀ ਸਕੂਲ ’ਚ ਵਿਦਿਆਰਥਣਾਂ ਨੂੰ ਮੁਰਗਾ ਬਣਾਉਣ ਵਰਗੀ ਗੈਰ-ਮਨੁੱਖੀ ਸਜ਼ਾ ਦੇਣ ਦਾ ਮਾਮਲਾ ਸਾਹਮਣੇ ਆਇਆ।

* 24 ਮਾਰਚ, 2026 ਨੂੰ ‘ਉਜੈਨ’ (ਮੱਧ ਪ੍ਰਦੇਸ਼) ’ਚ ਇਕ ਰਿਹਾਇਸ਼ੀ ਸਕੂਲ ’ਚ ਇਕ ਵਿਦਿਆਰਥੀ ਨੂੰ ਬੈਂਤ ਨਾਲ ਬੁਰੀ ਤਰ੍ਹਾਂ ਕੁੱਟਣ ਦੇ ਦੋਸ਼ ਹੇਠ ਅਧਿਆਪਕ ‘ਦੱਤਾਦਾਸ ਰਘੁਨਾਥ ਸ਼ੇਵੜੇ’ ਨੂੰ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ।

* 9 ਅਪ੍ਰੈਲ, 2026 ਨੂੰ ‘ਏਟਾ’ (ਉੱਤਰ ਪ੍ਰਦੇਸ਼) ’ਚ ਦੇਰ ਨਾਲ ਆਉਣ ’ਤੇ ਅਧਿਆਪਕ ‘ਸੰਤੋਸ਼’ ਨੇ ਤੀਜੀ ਜਮਾਤ ਦੀ ਵਿਦਿਆਰਥਣ ‘ਨਿੱਤਿਆ’ ਨੂੰ ਬੁਰੀ ਤਰ੍ਹਾਂ ਕੱੁਟਿਆ ਅਤੇ ਉਸ ਦੇ ਵਾਲ ਖਿੱਚੇ।

* 12 ਅਪ੍ਰੈਲ, 2026 ਨੂੰ ‘ਕੰਨੂਰ’ (ਕੇਰਲ) ’ਚ ਇਕ ਦਲਿਤ ਡੈਂਟਲ ਵਿਦਿਆਰਥੀ ‘ਨਿਤਿਨ ਰਾਜ’ ਨੇ ਫੈਕਲਟੀ ਵੱਲੋਂ ਜਾਤੀ ਨੂੰ ਲੈ ਕੇ ਵਿਤਕਰੇ ਅਤੇ ਮਾਨਸਿਕ ਸ਼ੋਸ਼ਣ ਤੋਂ ਪ੍ਰੇਸ਼ਾਨ ਹੋ ਕੇ ਖੁਦਕੁਸ਼ੀ ਕਰ ਲਈ।

* 14 ਅਪ੍ਰੈਲ, 2026 ਨੂੰ ‘ਸੋਪੋਰ’ (ਜੰਮੂ-ਕਸ਼ਮੀਰ) ’ਚ ਇਕ ਲੈਕਚਰਾਰ ‘ਗੁਲਾਮ ਹਸਨ ਮੀਰ’ ਨੂੰ ਇਕ ਵਿਦਿਆਰਥਣ ਦੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਹੇਠ ਪੁਲਸ ਨੇ ਗ੍ਰਿਫਤਾਰ ਕੀਤਾ।

* 14 ਅਪ੍ਰੈਲ, 2026 ਨੂੰ ਹੀ ‘ਜੈਪੁਰ’ (ਰਾਜਸਥਾਨ) ਦੇ ‘ਨੀਰਜਾ ਮੋਦੀ ਸਕੂਲ’ ਦੀ 9 ਸਾਲਾ ਵਿਦਿਆਰਥਣ ਨੂੰ ਸਰੀਰਕ ਸਜ਼ਾ ਦੇਣ ਦੇ ਨਤੀਜੇ ਵਜੋਂ ਉਸ ਦੀ ਮੌਤ ਦਾ ਮਾਮਲਾ ਸਾਹਮਣੇ ਆਇਆ। ਇਕ ਸਾਧਾਰਨ ਸਵਾਲ ਪੁੱਛਣ ’ਤੇ ਉਸ ਨੂੰ ਸਖਤ ਸਜ਼ਾ ਦਿੱਤੀ ਗਈ ਸੀ।

* 18 ਅਪ੍ਰੈਲ, 2026 ਨੂੰ ‘ਆਜ਼ਮਗੜ੍ਹ’ (ਉੱਤਰ ਪ੍ਰਦੇਸ਼) ਦੇ ‘ਐਡਿਲਪੁਰ ਪ੍ਰਾਇਮਰੀ ਸਕੂਲ’ ’ਚ ਛੁੱਟੀ ਤੋਂ ਬਾਅਦ ਇਕ ਅਧਿਆਪਕ ਤੀਜੀ ਜਮਾਤ ਦੇ ਇਕ ਵਿਦਿਆਰਥੀ ਨੂੰ ਗਲਤੀ ਨਾਲ ਕਲਾਸ ’ਚ ਬੰਦ ਕਰ ਕੇ ਘਰ ਚਲਾ ਗਿਆ। ਕਈ ਘੰਟਿਆਂ ਤੱਕ ਡਰ ਦੇ ਮਾਰੇ ਚੀਕਦੇ ਬੱਚੇ ਦੀ ਆਵਾਜ਼ ਸੁਣ ਕੇ ਪਿੰਡ ਵਾਸੀਆਂ ਨੇ ਆ ਕੇ ਉਸ ਨੂੰ ਬਾਹਰ ਕੱਢਿਆ।

ਅਧਿਆਪਕਾਂ ਵੱਲੋਂ ਵਿਦਿਆਰਥੀ-ਵਿਦਿਆਰਥਣਾਂ ਦਾ ਸ਼ੋਸ਼ਣ ਅਤੇ ਜਿਨਸੀ ਸ਼ੋਸ਼ਣ ਇਸ ਆਦਰਸ਼ ਕਿੱਤੇ ’ਤੇ ਘਿਨੌਣਾ ਧੱਬਾ ਹੈ। ਇਸ ਲਈ ਅਜਿਹਾ ਕਰਨ ਵਾਲੇ ਅਧਿਆਪਕਾਂ ਨੂੰ ਤੁਰੰਤ ਸਖਤ ਤੋਂ ਸਖਤ ਸਿੱਖਿਆਦਾਇਕ ਸਜ਼ਾ ਦਿੱਤੀ ਜਾਣੀ ਚਾਹੀਦੀ ਹੈ ਤਾਂ ਕਿ ਇਹ ਦੁਸ਼ਚੱਕਰ ਰੁਕੇ ਅਤੇ ਵਿਦਿਆਰਥੀ-ਵਿਦਿਆਰਥਣਾਂ ਦੀ ਜਾਨ ਅਤੇ ਇੱਜ਼ਤ ਸੁਰੱਖਿਅਤ ਰਹਿ ਸਕੇ।

-ਵਿਜੇ ਕੁਮਾਰ