WPL 2024 : ਦੀਪਤੀ ਸ਼ਰਮਾ ਦੀ ਜੁਝਾਰੂ ਪਾਰੀ ਵੀ ਨਹੀਂ ਦਿਵਾ ਸਕੀ UP ਨੂੰ ਜਿੱਤ, GG ਨੇ 8 ਦੌੜਾਂ ਨਾਲ ਮਾਰੀ ਬਾਜ਼ੀ
03/12/2024 2:59:22 AM
ਸਪੋਰਟਸ ਡੈਸਕ– ਕਪਤਾਨ ਬੇਥ ਮੂਨੀ ਦੇ ਅਜੇਤੂ ਅਰਧ ਸੈਂਕੜੇ ਤੋਂ ਬਾਅਦ ਸ਼ਬਨਮ ਸ਼ਕੀਲ ਦੀ ਤੂਫਾਨੀ ਗੇਂਦਬਾਜ਼ੀ ਨਾਲ ਗੁਜਰਾਤ ਜਾਇੰਟਸ ਨੇ ਮਹਿਲਾ ਪ੍ਰੀਮੀਅਰ ਲੀਗ-2024 ਦੇ ਮੈਚ ਵਿਚ ਸੋਮਵਾਰ ਨੂੰ ਇਥੇ ਯੂ.ਪੀ. ਵਾਰੀਅਰਸ ਨੂੰ 8 ਦੌੜਾਂ ਨਾਲ ਹਰਾ ਦਿੱਤਾ। ਗੁਜਰਾਤ ਦੀਆਂ 153 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਯੂ.ਪੀ. ਵਾਰੀਅਰਸ ਨੇ 35 ਦੌੜਾਂ ’ਤੇ ਹੀ 5 ਵਿਕਟਾਂ ਗੁਆ ਦਿੱਤੀਆਂ ਸਨ।
ਇਸ ਤੋਂ ਬਾਅਦ ਦੀਪਤੀ ਸ਼ਰਮਾ (60 ਗੇਂਦਾਂ ’ਤੇ ਅਜੇਤੂ 88 ਦੌੜਾਂ, 9 ਚੌਕੇ ਤੇ 4 ਛੱਕੇ) ਨੇ ਅਜੇਤੂ ਅਰਧ ਸੈਂਕੜਾ ਲਾਉਣ ਤੋਂ ਇਲਾਵਾ ਪੂਨਮ ਖੇਮਨਾਰ (36 ਗੇਂਦਾਂ ’ਤੇ ਅਜੇਤੂ 36 ਦੌੜਾਂ, 3 ਚੌਕੇ ਤੇ 1 ਛੱਕਾ) ਨਾਲ 6ਵੀਂ ਵਿਕਟ ਲਈ 109 ਦੌੜਾਂ ਦੀ ਅਜੇਤੂ ਸਾਂਝੇਦਾਰੀ ਕੀਤੀ ਪਰ ਇਸ ਦੇ ਬਾਵਜੂਦ ਵਾਰੀਅਰਸ ਦੀ ਟੀਮ 5 ਵਿਕਟਾਂ ’ਤੇ 144 ਦੌੜਾਂ ਹੀ ਬਣਾ ਸਕੀ। ਗੁਜਰਾਤ ਵੱਲੋਂ ਤੇਜ਼ ਗੇਂਦਬਾਜ਼ ਸ਼ਬਨਮ ਨੇ 11 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ।
ਮੂਨੀ ਨੇ ਇਸ ਤੋਂ ਪਹਿਲਾਂ 52 ਗੇਂਦਾਂ ’ਚ 10 ਚੌਕਿਆਂ ਤੇ 1 ਛੱਕੇ ਦੀ ਮਦਦ ਨਾਲ ਅਜੇਤੂ 74 ਦੌੜਾਂ ਦੀ ਪਾਰੀ ਖੇਡਣ ਤੋਂ ਇਲਾਵਾ ਲੌਰਾ ਵੋਲਵਾਰਟ (43) ਨਾਲ ਪਹਿਲੀ ਵਿਕਟ ਲਈ 60 ਦੌੜਾਂ ਜੋੜ ਕੇ ਗੁਜਰਾਤ ਨੂੰ 8 ਵਿਕਟਾਂ ’ਤੇ 152 ਦੌੜਾਂ ਤਕ ਪਹੁੰਚਾਇਆ। ਇਨ੍ਹਾਂ ਦੋਵਾਂ ਤੋਂ ਇਲਾਵਾ ਟੀਮ ਦੀ ਹੋਰ ਕੋਈ ਬੱਲੇਬਾਜ਼ 20 ਦੌੜਾਂ ਤਕ ਵੀ ਨਹੀਂ ਪਹੁੰਚ ਸਕੀ।
ਟੀਚੇ ਦਾ ਪਿੱਛਾ ਕਰਨ ਉਤਰੀ ਯੂ.ਪੀ. ਵਾਰੀਅਰਸ ਦੀ ਸ਼ੁਰੂਆਤ ਬੇਹੱਦ ਖ਼ਰਾਬ ਰਹੀ ਤੇ ਟੀਮ ਨੇ ਚੌਥੇ ਓਵਰ ’ਚ 16 ਦੌੜਾਂ ਤਕ ਹੀ ਚਾਰ ਵਿਕਟਾਂ ਗੁਆ ਦਿੱਤੀਆਂ। ਸ਼ਬਨਮ ਨੇ ਪਹਿਲੇ ਓਵਰ ਦੀ ਤੀਜੀ ਗੇਂਦ ’ਤੇ ਹੀ ਐਲਿਸਾ ਹੀਲੀ (4) ਨੂੰ ਮੰਨਤ ਕਸ਼ਯਪ ਦੇ ਹੱਥੋਂ ਕੈਚ ਕਰਵਾਉਣ ਦੇ ਦੋ ਗੇਂਦਾਂ ਬਾਅਦ ਹੀ ਚਾਮਰੀ ਅੱਟਾਪਟੂ (0) ਨੂੰ ਵੀ ਐਸ਼ਲੇ ਗਾਰਡਨਰ ਦੇ ਹੱਥੋਂ ਕੈਚ ਕਰਵਾ ਦਿੱਤਾ।
ਕੈਥਰੀਨ ਬ੍ਰਾਇਸ ਨੇ ਸਲਾਮੀ ਬੱਲੇਬਾਜ਼ ਕਿਰਣ ਨਵਗਿਰੇ (0) ਨੂੰ ਮੰਨਤ ਦੇ ਹੱਥੋਂ ਕੈਚ ਕਰਵਾਇਆ ਜਦਕਿ ਐਸ਼ਲੇ ਨੇ ਗ੍ਰੇਸ ਹੈਰਿਸ (1) ਨੂੰ ਭਾਰਤੀ ਫੁਲਮਾਲੀ ਦੇ ਹੱਥੋਂ ਕੈਚ ਕਰਵਾ ਕੇ ਯੂ.ਪੀ. ਵਾਰੀਅਰਸ ਨੂੰ ਚੌਥਾ ਝਟਕਾ ਦਿੱਤਾ। ਦੀਪਤੀ ਸ਼ੁਰੂ ਤੋਂ ਚੰਗੀ ਲੈਅ ’ਚ ਦਿਸੀ। ਉਸ ਨੇ ਕੈਥਰੀਨ ’ਤੇ 2 ਚੌਕੇ ਲਾਏ, ਜਿਸ ਨਾਲ ਟੀਮ ਨੇ ਪਾਵਰਪਲੇਅ ’ਚ 4 ਵਿਕਟਾਂ ’ਤੇ 30 ਦੌੜਾਂ ਬਣਾਈਆਂ।
ਤੇਜ਼ ਗੇਂਦਬਾਜ਼ ਸ਼ਬਨਮ ਨੇ ਸ਼ਵੇਤਾ ਸਹਿਰਾਵਤ (08) ਨੂੰ ਬੋਲਡ ਕਰਕੇ ਯੂ.ਪੀ. ਵਾਰੀਅਰਸ ਨੂੰ 5ਵਾਂ ਝਟਕਾ ਦਿੱਤਾ। ਦੀਪਤੀ ਨੇ ਪੂਨਮ ਨਾਲ ਮਿਲ ਕੇ ਪਾਰੀ ਨੂੰ ਅੱਗੇ ਵਧਾਇਆ ਪਰ ਸ਼ੁਰੂਆਤ ’ਚ ਰਨ ਰੇਟ ’ਚ ਵਾਧਾ ਕਰਨ ’ਚ ਅਸਫਲ ਰਹੀ। ਟੀਮ 13 ਓਵਰਾਂ ’ਚ 5 ਵਿਕਟਾਂ ’ਤੇ 63 ਦੌੜਾਂ ਹੀ ਬਣਾ ਸਕੀ। ਐਸ਼ਲੇ ਦੇ 14ਵੇਂ ਓਵਰ ’ਚ ਦੀਪਤੀ ਨੇ ਛੱਕਾ ਜਦਕਿ ਪੂਨਮ ਨੇ ਚੌਕਾ ਮਾਰਿਆ।
ਦੀਪਤੀ ਨੇ ਤਨੁਜਾ ’ਤੇ ਚੌਕੇ ਨਾਲ 44 ਗੇਂਦਾਂ ’ਚ ਲਗਾਤਾਰ ਤੀਜਾ ਅਰਧ ਸੈਂਕੜਾ ਪੂਰਾ ਕੀਤਾ। ਵਾਰੀਅਰਸ ਨੂੰ ਆਖਰੀ 5 ਓਵਰਾਂ ’ਚ 67 ਦੌੜਾਂ ਦੀ ਲੋੜ ਸੀ। ਦੀਪਤੀ ਨੇ ਕੈਥਰੀਨ ਜਦਕਿ ਪੂਨਮ ਨੇ ਮੰਨਤ ’ਤੇ ਛੱਕੇ ਲਾ ਕੇ ਰਨ ਰੇਟ ’ਚ ਵਾਧਾ ਕਰਨ ਦੀ ਕੋਸ਼ਿਸ਼ ਕੀਤੀ। ਮੇਘਨਾ ਸਿੰਘ ਦੇ 18ਵੇਂ ਓਵਰ ’ਚ ਹਾਲਾਂਕਿ ਸਿਰਫ 3 ਦੌੜਾਂ ਬਣੀਆਂ।
ਵਾਰੀਅਰਸ ਨੂੰ ਆਖਰੀ 2 ਓਵਰਾਂ ’ਚ 40 ਦੌੜਾਂ ਦੀ ਲੋੜ ਸੀ। ਤਨੁਜਾ ਦੇ 19ਵੇਂ ਓਵਰ ’ਚ 14 ਦੌੜਾਂ ਬਣੀਆਂ। ਦੀਪਤੀ ਨੇ ਆਖਰੀ ਓਵਰ ’ਚ ਮੇਘਨਾ ’ਤੇ 2 ਛੱਕੇ ਮਾਰੇ ਪਰ ਇਸ ਦੇ ਬਾਵਜੂਦ ਇਸ ਨਾਲ ਇਸ ਓਵਰ ’ਚ 17 ਦੌੜਾਂ ਹੀ ਬਣਾ ਸਕੀ।
ਇਸ ਮੈਚ 'ਚ ਸ਼ਾਨਦਾਰ ਗੇਂਦਬਾਜ਼ ਕਰਨ ਵਾਲੀ ਗੁਜਰਾਤ ਦੀ ਸ਼ਬਨਮ ਸ਼ਕੀਲ ਨੂੰ ਪਲੇਅਰ ਆਫ਼ ਦਿ ਮੈਚ ਚੁਣਿਆ ਗਿਆ। ਉਸ ਨੇ ਆਪਣੇ ਸਪੈੱਲ ਦੇ 4 ਓਵਰਾਂ 'ਚ 11 ਦੌੜਾਂ ਦੇ ਕੇ ਯੂ.ਪੀ. ਦੀਆਂ 3 ਬੱਲੇਬਾਜ਼ਾਂ ਨੂੰ ਆਊਟ ਕੀਤਾ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e