ਮੁੰਬਈ ਦੇ ਅੰਤਰਰਾਸ਼ਟਰੀ ਖਿਡਾਰੀਆਂ ਖਿਲਾਫ ਵਿਦਰਭ ਦੀ ਯੋਜਨਾ ਹੈ : ਕਪਤਾਨ ਵਾਡਕਰ

ਮੁੰਬਈ, (ਭਾਸ਼ਾ) ਮੁੰਬਈ ਦੀ ਟੀਮ ਰਣਜੀ ਟਰਾਫੀ ਦੇ ਫਾਈਨਲ ਵਿਚ ਕੁਝ ਭਾਰਤੀ ਸਟਾਰ ਖਿਡਾਰੀਆਂ ਨਾਲ ਮੈਦਾਨ ਵਿਚ ਉਤਰੇਗੀ ਪਰ ਵਿਦਰਭ ਦੇ ਕਪਤਾਨ ਅਕਸ਼ੈ ਵਾਡਕਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਟੀਮ ਨੇ ਉਹਨਾਂ ਨੂੰ ਕੰਟਰੋਲ ਕਰਨ ਲਈ ਇਕ ਯੋਜਨਾ ਬਣਾਈ ਹੈ। ਅਜਿੰਕਿਆ ਰਹਾਣੇ, ਸ਼੍ਰੇਅਸ ਅਈਅਰ, ਸ਼ਾਰਦੁਲ ਠਾਕੁਰ ਅਤੇ ਪ੍ਰਿਥਵੀ ਸ਼ਾਅ ਦੀ ਮੌਜੂਦਗੀ ਨਾਲ ਮੁੰਬਈ ਦਾ ਬੱਲੇਬਾਜ਼ੀ ਕ੍ਰਮ ਮਜ਼ਬੂਤ ਹੋਇਆ ਹੈ। ਦਰਅਸਲ ਠਾਕੁਰ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਬਦੌਲਤ ਮੁੰਬਈ ਨੇ ਸੈਮੀਫਾਈਨਲ 'ਚ ਤਾਮਿਲਨਾਡੂ ਨੂੰ ਹਰਾ ਕੇ ਫਾਈਨਲ 'ਚ ਪ੍ਰਵੇਸ਼ ਕੀਤਾ। 

ਵਾਡਕਰ ਨੇ ਫਾਈਨਲ ਦੀ ਪੂਰਵ ਸੰਧਿਆ 'ਤੇ ਇੱਥੇ ਮੀਡੀਆ ਨੂੰ ਕਿਹਾ, 'ਤੁਸੀਂ ਇਹ ਨਹੀਂ ਕਹਿ ਸਕਦੇ ਕਿ ਕਿਹੜਾ ਖਿਡਾਰੀ ਵਧੀਆ ਪ੍ਰਦਰਸ਼ਨ ਕਰੇਗਾ ਕਿਉਂਕਿ ਇਹ ਫਾਈਨਲ ਹੈ। ਨਿਸ਼ਚਿਤ ਤੌਰ 'ਤੇ ਅਸੀਂ ਮੁੰਬਈ ਦੇ ਅੰਤਰਰਾਸ਼ਟਰੀ ਖਿਡਾਰੀਆਂ ਖਾਸ ਕਰਕੇ ਪ੍ਰਿਥਵੀ, ਸ਼੍ਰੇਅਸ, ਸ਼ਾਰਦੁਲ ਅਤੇ ਅਜਿੰਕਿਆ ਦੇ ਖਿਲਾਫ ਰਣਨੀਤੀ ਤਿਆਰ ਕੀਤੀ ਹੈ। ਪਰ ਅਸੀਂ ਉਨ੍ਹਾਂ ਦੇ ਹਰੇਕ ਖਿਡਾਰੀ ਲਈ ਇੱਕ ਜਾਂ ਦੋ ਯੋਜਨਾਵਾਂ ਤਿਆਰ ਕੀਤੀਆਂ ਹਨ। ''ਉਸ ਨੇ ਕਿਹਾ,''ਇਹ ਫਾਈਨਲ ਮੈਚ ਹੈ ਅਤੇ ਸਾਰੇ ਖਿਡਾਰੀ ਖਤਰਨਾਕ ਹਨ। ਤੁਸੀਂ ਕਿਸੇ ਵੀ ਖਿਡਾਰੀ ਨੂੰ ਨਹੀਂ ਛੱਡ ਸਕਦੇ। 

ਵਾਡਕਰ ਨੇ ਕਿਹਾ ਕਿ ਲਗਾਤਾਰ ਦੋ ਸੀਜ਼ਨਾਂ (2017-18, 2018-19) ਵਿੱਚ ਰਣਜੀ ਟਰਾਫੀ ਜਿੱਤਣ ਨਾਲ ਨੌਜਵਾਨ ਖਿਡਾਰੀਆਂ ਦੇ ਆਤਮਵਿਸ਼ਵਾਸ ਵਿੱਚ ਬਹੁਤ ਵਾਧਾ ਹੋਇਆ ਹੈ। ਉਸਨੇ ਕਿਹਾ, “ਜਦੋਂ ਤੁਸੀਂ ਦੋ ਵਾਰ ਰਣਜੀ ਟਰਾਫੀ ਜਿੱਤਦੇ ਹੋ, ਤਾਂ ਸਾਰੇ ਖਿਡਾਰੀਆਂ ਦਾ ਆਤਮਵਿਸ਼ਵਾਸ ਵਧਦਾ ਹੈ। ਸਾਨੂੰ ਭਰੋਸਾ ਹੈ ਕਿ ਅਸੀਂ ਕਿਸੇ ਵੀ ਸਥਿਤੀ ਵਿੱਚ ਕਿਸੇ ਵੀ ਪੜਾਅ 'ਤੇ ਚੰਗਾ ਪ੍ਰਦਰਸ਼ਨ ਕਰ ਸਕਦੇ ਹਾਂ ਅਤੇ ਕੋਈ ਵੀ ਟੂਰਨਾਮੈਂਟ ਜਿੱਤ ਸਕਦੇ ਹਾਂ। ਵਾਡਕਰ ਨੇ ਕਿਹਾ, ''ਇਹ ਸਾਡੇ ਲਈ ਖਾਸ ਮੈਚ ਹੈ। ਕੋਈ ਵੀ ਫਾਈਨਲ ਖਾਸ ਹੁੰਦਾ ਹੈ, ਖਾਸ ਕਰਕੇ ਰਣਜੀ ਟਰਾਫੀ ਦਾ ਫਾਈਨਲ। ਅਤੇ ਉਹ ਵੀ ਉਦੋਂ ਜਦੋਂ ਤੁਹਾਡੇ ਸਾਹਮਣੇ 41 ਵਾਰ ਦਾ ਚੈਂਪੀਅਨ ਹੋਵੇ। ਸਾਡੇ ਕੋਲ ਵੱਡੀ ਟੀਮ ਨੂੰ ਹਰਾਉਣ ਦਾ ਇਹ ਚੰਗਾ ਮੌਕਾ ਹੈ। ''