ਪੰਜਾਬੀਆਂ ਲਈ ਵੱਡੀ ਖੁਸ਼ਖਬਰੀ! ਹਲਵਾਰਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਟੈਸਟ ਉਡਾਣ ਸਫਲ

ਹਲਵਾਰਾ (ਲਾਡੀ) : ਲੁਧਿਆਣਾ ਜ਼ਿਲ੍ਹੇ ਦੇ ਬਹੁਚਰਚਿਤ ਹਲਵਾਰਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਟੈਸਟ ਉਡਾਣ ਸਫਲ ਰਹੀ ਹੈ। ਦਿੱਲੀ ਤੋਂ ਆਏ ਸਫੈਦ ਰੰਗ ਦੇ ਪ੍ਰਾਈਵੇਟ ਜਹਾਜ਼ ਨੇ ਜਦੋਂ ਰਨਵੇ ’ਤੇ ਸੁਚੱਜੀ ਲੈਂਡਿੰਗ ਕੀਤੀ ਤਾਂ ਏਅਰਪੋਰਟ ਪ੍ਰਬੰਧਨ ਨਾਲ ਜੁੜੇ ਅਧਿਕਾਰੀਆਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ। ਟੇਕਆਫ਼ ਵੀ ਬਿਨਾਂ ਕਿਸੇ ਤਕਨੀਕੀ ਰੁਕਾਵਟ ਦੇ ਹੋਇਆ, ਜਿਸ ਨਾਲ ਏਅਰਪੋਰਟ ਦੀ ਤਕਨੀਕੀ ਤਿਆਰੀ ਨੂੰ ਹਰੀ ਝੰਡੀ ਮਿਲ ਗਈ ਹੈ।

ਭਰੋਸੇਯੋਗ ਸਰੋਤਾਂ ਅਨੁਸਾਰ ਇਹ ਟੈਸਟ ਉਡਾਣ ਪੂਰੀ ਤਰ੍ਹਾਂ ਗੁਪਤ ਰੱਖੀ ਗਈ ਸੀ। ਜਦੋਂ ਪਹਿਲੀ ਵਾਰ ਵੱਡੇ ਜਹਾਜ਼ ਨੂੰ ਹਲਵਾਰਾ ਦੇ ਆਸਮਾਨ ਵਿੱਚ ਉਡਦਿਆਂ ਅਤੇ ਫਿਰ ਰਨਵੇ ’ਤੇ ਉਤਰਦਿਆਂ ਦੇਖਿਆ ਗਿਆ ਤਾਂ ਨੇੜਲੇ ਪਿੰਡਾਂ ਅਤੇ ਕਸਬਿਆਂ ਦੇ ਲੋਕ ਘਰਾਂ ਦੀਆਂ ਛੱਤਾਂ ’ਤੇ ਚੜ੍ਹ ਗਏ। ਕਈ ਲੋਕਾਂ ਨੇ ਇਸ ਇਤਿਹਾਸਕ ਪਲ ਨੂੰ ਆਪਣੇ ਮੋਬਾਈਲ ਫੋਨਾਂ ਵਿੱਚ ਕੈਦ ਕੀਤਾ।

ਜਾਣਕਾਰੀ ਮੁਤਾਬਕ ਟੈਸਟ ਉਡਾਣ ਦੌਰਾਨ ਲਗਭਗ 25 ਤੋਂ ਵੱਧ ਅਧਿਕਾਰੀ ਦਿੱਲੀ ਤੋਂ ਹਲਵਾਰਾ ਪਹੁੰਚੇ। ਇਨ੍ਹਾਂ ਵਿੱਚ ਮਿਨਿਸਟਰੀ ਆਫ ਸਿਵਿਲ ਐਵੀਏਸ਼ਨ ਏਅਰਪੋਰਟ ਅਥੋਰਟੀ ਆਫ ਇੰਡੀਆ ਅਤੇ ਹੋਰ ਸੰਬੰਧਤ ਵਿਭਾਗਾਂ ਦੇ ਨੁਮਾਇੰਦੇ ਸ਼ਾਮਲ ਸਨ। ਉਡਾਣ ਬੋਇੰਗ 737 ਜਹਾਜ਼ ਰਾਹੀਂ ਕੀਤੀ ਗਈ, ਜਿਸ ਨੇ ਏਅਰ ਫੋਰਸ ਸਟੇਸ਼ਨ ਹਲਵਾਰਾ ਦੇ ਰਨਵੇ ’ਤੇ ਲੈਂਡਿੰਗ ਕੀਤੀ। ਹਲਵਾਰਾ ਤੋਂ ਕੁਝ ਸਥਾਨਕ ਅਧਿਕਾਰੀਆਂ ਨੂੰ ਨਾਲ ਲੈ ਕੇ ਜਹਾਜ਼ ਮੁੜ ਦਿੱਲੀ ਲਈ ਰਵਾਨਾ ਹੋ ਗਿਆ।

ਕਾਰਗੋ ਜਹਾਜ਼ਾਂ ਦੀ ਟੈਸਟਿੰਗ ਵੀ ਜਲਦ
ਸੂਤਰਾਂ ਅਨੁਸਾਰ ਯਾਤਰੀ ਜਹਾਜ਼ ਦੀ ਸਫਲ ਟੈਸਟਿੰਗ ਤੋਂ ਬਾਅਦ ਹੁਣ ਕਾਰਗੋ ਜਹਾਜ਼ਾਂ ਦੀ ਪਰਖੀ ਉਡਾਣਾਂ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਯੋਜਨਾ ਅਨੁਸਾਰ ਤਿੰਨ ਵੱਡੇ ਕਾਰਗੋ ਜਹਾਜ਼ ਰਨਵੇ ’ਤੇ ਕੁੱਲ 10 ਵਾਰ ਲੈਂਡਿੰਗ ਅਤੇ ਟੇਕਆਫ਼ ਕਰਨਗੇ। ਇਸ ਤਹਿਤ ਕੁੱਲ 30 ਟੈਸਟ ਉਡਾਣਾਂ ਕਰਵਾਈਆਂ ਜਾਣਗੀਆਂ ਤਾਂ ਜੋ ਭਵਿੱਖ ਵਿੱਚ ਵਪਾਰਕ ਕਾਰਗੋ ਸੇਵਾਵਾਂ ਸੁਚਾਰੂ ਢੰਗ ਨਾਲ ਚਲ ਸਕਣ।

ਹਾਲਾਂਕਿ ਕਾਰਗੋ ਕੰਪਨੀਆਂ ਵੱਲੋਂ ਏਅਰਪੋਰਟ ਨੂੰ ਜਾਣ ਵਾਲੀ ਐਪ੍ਰੋਚ ਸੜਕ ਦੀ ਚੌੜਾਈ ’ਤੇ ਚਿੰਤਾ ਜਤਾਈ ਗਈ ਹੈ। ਇਸ ਵੇਲੇ ਲੁਧਿਆਣਾ-ਬਠਿੰਡਾ ਹਾਈਵੇ ਨਾਲ ਜੋੜਦੀ ਲਗਭਗ 20 ਫੁੱਟ ਚੌੜੀ ਇਕੱਲੀ ਸੜਕ ਹੀ ਏਅਰਪੋਰਟ ਤੱਕ ਪਹੁੰਚ ਦਾ ਸਾਧਨ ਹੈ। ਕੰਪਨੀਆਂ ਦਾ ਕਹਿਣਾ ਹੈ ਕਿ ਜੇਕਰ ਸੜਕ ਦਾ ਵਿਸਥਾਰ ਨਹੀਂ ਕੀਤਾ ਗਿਆ ਤਾਂ ਭਾਰੀ ਕਾਰਗੋ ਆਵਾਜਾਈ ਮੁਸ਼ਕਿਲ ਹੋ ਸਕਦੀ ਹੈ।

ਉਨ੍ਹਾਂ ਵੱਲੋਂ ਲੁਧਿਆਣਾ-ਬਠਿੰਡਾ ਗ੍ਰੀਨ ਫੀਲਡ ਐਕਸਪ੍ਰੈਸ-ਵੇ ਪ੍ਰੋਜੈਕਟ ਨੂੰ ਜਲਦੀ ਪੂਰਾ ਕਰਕੇ ਏਅਰਪੋਰਟ ਨਾਲ ਜੋੜਨ ਦੀ ਮੰਗ ਕੀਤੀ ਗਈ ਹੈ, ਤਾਂ ਜੋ ਆਉਣ ਵਾਲੇ ਸਮੇਂ ਵਿੱਚ ਹਲਵਾਰਾ ਏਅਰਪੋਰਟ ਉੱਤਰ ਭਾਰਤ ਦਾ ਮਹੱਤਵਪੂਰਨ ਕਾਰਗੋ ਕੇਂਦਰ ਬਣ ਸਕੇ।

ਕੇਂਦਰ ਸਰਕਾਰ ਵੱਲੋਂ ਸੰਕੇਤ ਮਿਲ ਰਹੇ ਹਨ ਕਿ ਘਰੇਲੂ ਉਡਾਣਾਂ ਦੀ ਸ਼ੁਰੂਆਤ ਤੋਂ ਬਾਅਦ ਇੱਥੋਂ ਅੰਤਰਰਾਸ਼ਟਰੀ ਉਡਾਣਾਂ ਦਾ ਵੀ ਵਿਸਥਾਰ ਕੀਤਾ ਜਾਵੇਗਾ। ਟੈਸਟ ਉਡਾਣ ਦੀ ਕਾਮਯਾਬੀ ਨਾਲ ਹੁਣ ਲੁਧਿਆਣਾ ਖੇਤਰ ਦੇ ਲੋਕਾਂ ਦੀਆਂ ਉਮੀਦਾਂ ਹੋਰ ਵੀ ਮਜ਼ਬੂਤ ਹੋ ਗਈਆਂ ਹਨ ਅਤੇ ਜਲਦ ਹੀ ਨਿਯਮਿਤ ਉਡਾਣਾਂ ਦੀ ਸ਼ੁਰੂਆਤ ਦੀ ਸੰਭਾਵਨਾ ਪ੍ਰਬਲ ਹੋ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e