ICC ਰੈਂਕਿੰਗ : ਨਬੀ ਨੇ ਸ਼ਾਕਿਬ ਦਾ ਦਬਦਬਾ ਕੀਤਾ ਖਤਮ, ਚੋਟੀ ਦਾ ਆਲਰਾਊਂਡਰ ਖਿਡਾਰੀ ਬਣਿਆ

ਦੁਬਈ : ਅਫਗਾਨਿਸਤਾਨ ਦੇ ਮੁਹੰਮਦ ਨਬੀ ਨੇ ਬੁੱਧਵਾਰ ਨੂੰ ਜਾਰੀ ਆਈ. ਸੀ. ਸੀ. (ਅੰਤਰਰਾਸ਼ਟਰੀ ਕ੍ਰਿਕਟ ਪਰਿਸ਼ਦ) ਦੀ ਤਾਜ਼ਾ ਵਨਡੇ ਰੈਂਕਿੰਗ ਵਿੱਚ ਬੰਗਲਾਦੇਸ਼ ਦੇ ਸ਼ਾਕਿਬ ਅਲ ਹਸਨ ਦੇ ਲੰਬੇ ਸਮੇਂ ਤੋਂ ਚੱਲੇ ਆ ਰਹੇ ਦਬਦਬੇ ਨੂੰ ਖਤਮ ਕਰਦੇ ਹੋਏ ਚੋਟੀ ਦੇ ਆਲਰਾਊਂਡਰ ਬਣ ਗਏ। ਹਾਲਾਂਕਿ ਟੈਸਟ ਰੈਂਕਿੰਗ ਦੇ ਸਿਖਰਲੇ ਸਥਾਨ 'ਤੇ ਕੋਈ ਖਾਸ ਬਦਲਾਅ ਨਹੀਂ ਹੋਇਆ ਹੈ।

ਗੇਂਦਬਾਜ਼ਾਂ ਦੀ ਸੂਚੀ 'ਚ ਜਸਪ੍ਰੀਤ ਬੁਮਰਾਹ ਅਤੇ ਸੱਟ ਕਾਰਨ ਇੰਗਲੈਂਡ ਖਿਲਾਫ ਦੂਜੇ ਟੈਸਟ ਤੋਂ ਬਾਹਰ ਹੋਣ ਤੋਂ ਬਾਅਦ ਤੀਜੇ ਟੈਸਟ 'ਚ ਟੀਮ 'ਚ ਵਾਪਸੀ ਲਈ ਤਿਆਰ ਰਵਿੰਦਰ ਜਡੇਜਾ ਚੋਟੀ ਦੇ ਹਰਫਨਮੌਲਾ ਬਣੇ ਹੋਏ ਹਨ। ਸ਼੍ਰੀਲੰਕਾ ਖਿਲਾਫ ਚੱਲ ਰਹੀ ਵਨਡੇ ਸੀਰੀਜ਼ ਦੇ ਪਹਿਲੇ ਮੈਚ 'ਚ 136 ਦੌੜਾਂ ਦੀ ਯਾਦਗਾਰ ਪਾਰੀ ਖੇਡਣ ਤੋਂ ਬਾਅਦ ਨਬੀ ਰੈਂਕਿੰਗ 'ਚ ਚੋਟੀ 'ਤੇ ਪਹੁੰਚ ਗਿਆ ਹੈ। ਉਸ ਨੇ ਇਸ ਮੈਚ ਵਿੱਚ ਇੱਕ ਵਿਕਟ ਵੀ ਲਈ, ਜਿਸ ਨਾਲ ਉਹ ਵਨਡੇ ਗੇਂਦਬਾਜ਼ਾਂ ਦੀ ਰੈਂਕਿੰਗ ਵਿੱਚ ਇੱਕ ਸਥਾਨ ਦੇ ਸੁਧਾਰ ਨਾਲ ਸੱਤਵੇਂ ਸਥਾਨ 'ਤੇ ਪਹੁੰਚ ਗਿਆ।

ਨਬੀ (39 ਸਾਲ ਅਤੇ ਇੱਕ ਮਹੀਨਾ) ਆਲਰਾਊਂਡਰਾਂ ਦੀ ਰੈਂਕਿੰਗ ਵਿੱਚ ਸਿਖਰ 'ਤੇ ਰਹਿਣ ਵਾਲਾ ਸਭ ਤੋਂ ਵੱਧ ਉਮਰ ਦਾ ਆਲਰਾਊਂਡਰ ਬਣ ਗਿਆ ਹੈ। ਉਸ ਤੋਂ ਪਹਿਲਾਂ ਇਹ ਰਿਕਾਰਡ ਸ਼੍ਰੀਲੰਕਾ ਦੇ ਤਿਲਕਰਤਨੇ ਦਿਲਸ਼ਾਨ ਦੇ ਨਾਂ ਸੀ, ਜੋ ਜੂਨ 2015 'ਚ 38 ਸਾਲ 8 ਮਹੀਨੇ ਦੀ ਉਮਰ 'ਚ ਚੋਟੀ ਦੀ ਰੈਂਕਿੰਗ 'ਤੇ ਪਹੁੰਚੇ ਸਨ। ਸ਼ਾਕਿਬ 7 ਮਈ, 2019 ਤੋਂ 9 ਫਰਵਰੀ, 2024 ਤੱਕ ਰਿਕਾਰਡ 1739 ਦਿਨਾਂ ਤੱਕ ਵਨਡੇ ਆਲਰਾਊਂਡਰ ਰੈਂਕਿੰਗ ਦੇ ਸਿਖਰ 'ਤੇ ਰਿਹਾ।

ਸ਼ਾਕਿਬ ਸੱਟ ਕਾਰਨ ਕੁਝ ਸਮੇਂ ਲਈ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਦੂਰ ਹਨ ਅਤੇ ਇਸ ਦੌਰਾਨ ਨਬੀ ਆਪਣੀ ਦਮਦਾਰ ਖੇਡ ਨਾਲ ਚੋਟੀ ਦੇ ਸਥਾਨ 'ਤੇ ਪਹੁੰਚਣ 'ਚ ਸਫਲ ਰਹੇ। ਵਨਡੇ ਗੇਂਦਬਾਜ਼ਾਂ ਦੀ ਸੂਚੀ 'ਚ ਦੱਖਣੀ ਅਫਰੀਕਾ ਦੇ ਕੇਸ਼ਵ ਮਹਾਰਾਜ ਚੋਟੀ 'ਤੇ ਬਰਕਰਾਰ ਹਨ, ਜਦਕਿ ਸ਼੍ਰੀਲੰਕਾ ਦਾ ਵਾਨਿੰਦੂ ਹਸਾਰੰਗਾ (14 ਸਥਾਨ ਚੜ੍ਹ ਕੇ 26ਵੇਂ ਸਥਾਨ 'ਤੇ) ਅਤੇ ਦਿਲਸ਼ਾਨ ਮਦੁਸ਼ੰਕਾ (ਚਾਰ ਸਥਾਨ ਦੇ ਫਾਇਦੇ ਨਾਲ 33ਵੇਂ ਸਥਾਨ 'ਤੇ) ਅਫਗਾਨਿਸਤਾਨ ਖਿਲਾਫ ਸੀਰੀਜ਼ 'ਚ ਜ਼ਬਰਦਸਤ ਖੇਡ ਨਾਲ ਆਪਣੀ ਰੈਂਕਿੰਗ 'ਚ ਸੁਧਾਰ ਕਰਨ 'ਚ ਸਫਲ ਰਹੇ।