ਹੁਣ ਬਠਿੰਡਾ ਨਗਰ ਨਿਗਮ ਦਾ ਹਰ ਕੰਮ ਹੋਵੇਗਾ ਆਨਲਾਈਨ, ਫਾਈਲਾਂ ਨਹੀਂ ਗੁੰਮਣਗੀਆਂ

ਬਠਿੰਡਾ (ਵਿਜੈ ਵਰਮਾ) : ਬਠਿੰਡਾ ਨਗਰ ਨਿਗਮ ਨੇ ਸ਼ਹਿਰ ਦੀ ਪ੍ਰਸ਼ਾਸਨਿਕ ਕਾਰਗੁਜ਼ਾਰੀ ’ਚ ਵੱਡਾ ਬਦਲਾਅ ਕਰਦਿਆਂ ਈ-ਆਫਿਸ ਸਿਸਟਮ ਲਾਗੂ ਕਰ ਦਿੱਤਾ ਹੈ। ਹੁਣ ਨਿਗਮ ਦੀ ਹਰ ਸ਼ਾਖਾ ’ਚ ਫਾਈਲਾਂ ਪੇਪਰ ਦੀ ਥਾਂ ਡਿਜ਼ੀਟਲ ਰੂਪ ’ਚ ਤਿਆਰ ਹੋਣਗੀਆਂ ਅਤੇ ਮਨਜ਼ੂਰੀ ਦੀ ਪ੍ਰਕਿਰਿਆ ਵੀ ਪੂਰੀ ਤਰ੍ਹਾਂ ਆਨਲਾਈਨ ਹੋਵੇਗੀ। ਕਮਿਸ਼ਨਰ ਕੰਚਨ ਦੇ ਹੁਕਮਾਂ ’ਤੇ ਨਗਰ ਨਿਗਮ ਨੇ ਸਾਰੀਆਂ ਸ਼ਾਖਾਵਾਂ ਨੂੰ ਹਦਾਇਤਾਂ ਜਾਰੀ ਕਰ ਦਿੱਤੀਆਂ ਹਨ ਕਿ ਹੁਣ ਕੋਈ ਵੀ ਕੰਮ ਆਫਲਾਈਨ ਫਾਈਲ ਰਾਹੀਂ ਅੱਗੇ ਨਹੀਂ ਵਧੇਗਾ। ਈ-ਆਫਿਸ ਸਿਸਟਮ ਦੇ ਲਾਗੂ ਹੋਣ ਨਾਲ ਕੰਮ ’ਚ ਤੇਜ਼ੀ ਆਵੇਗੀ, ਪਾਰਦਰਸ਼ਤਾ ਵਧੇਗੀ ਅਤੇ ਭ੍ਰਿਸ਼ਟਾਚਾਰ ’ਤੇ ਰੋਕ ਲੱਗੇਗੀ। ਹੁਣ ਫਾਈਲਾਂ ਗੁੰਮਣ ਜਾਂ ਰਿਕਾਰਡ ’ਚ ਛੇੜਛਾੜ ਦੀ ਸੰਭਾਵਨਾ ਖ਼ਤਮ ਹੋ ਜਾਵੇਗੀ। ਹਰ ਫਾਈਲ ਦਾ ਹਰ ਪੜਾਅ ਸਿਸਟਮ ਵਿਚ ਦਰਜ ਹੋਵੇਗਾ ਅਤੇ ਕੋਈ ਵੀ ਅਧਿਕਾਰੀ ਜਾਂ ਕਰਮਚਾਰੀ ਇਸਨੂੰ ਆਪਣੇ ਪੱਧਰ ’ਤੇ ਰੋਕ ਨਹੀਂ ਸਕੇਗਾ।
ਸਾਫਟਵੇਅਰ ਕਰੇਗਾ ਸਾਰਾ ਕੰਮ
ਨਗਰ ਨਿਗਮ ਨੇ ਨੈਸ਼ਨਲ ਇਨਫਾਰਮੈਟਿਕਸ ਸੈਂਟਰ ਵੱਲੋਂ ਤਿਆਰ ਕੀਤਾ ਸਾਫਟਵੇਅਰ ਅਪਣਾਇਆ ਹੈ, ਜੋ ਪਹਿਲਾਂ ਹੀ ਪੰਜਾਬ ਸਰਕਾਰ ਦੇ ਕਈ ਵਿਭਾਗਾਂ ’ਚ ਸਫ਼ਲਤਾ ਪੂਰਵਕ ਚੱਲ ਰਿਹਾ ਹੈ। ਹੁਣ ਸਾਰੀਆਂ ਫਾਈਲਾਂ ਈਮੇਲ ਅਤੇ ਪੋਰਟਲ ਰਾਹੀਂ ਹੀ ਅੱਗੇ ਵਧਣਗੀਆਂ। ਕਾਗਜ਼ੀ ਪ੍ਰਕਿਰਿਆ ਪੂਰੀ ਤਰ੍ਹਾਂ ਖ਼ਤਮ ਕਰ ਦਿੱਤੀ ਗਈ ਹੈ।
ਸੜਕ ਨਿਰਮਾਣ ਸਮੇਤ ਸਾਰੇ ਕੰਮ ਹੋਣਗੇ ਡਿਜ਼ੀਟਲ
ਉਦਾਹਰਣ ਵਜੋਂ ਜੇਕਰ ਕਿਸੇ ਸੜਕ ਦਾ ਨਿਰਮਾਣ ਕਰਨਾ ਹੈ, ਤਾਂ ਪੂਰਾ ਅਨੁਮਾਨ ਤੇ ਇਸਦੀ ਮਨਜ਼ੂਰੀ ਦੀ ਪ੍ਰਕਿਰਿਆ ਆਨਲਾਈਨ ਹੋਵੇਗੀ। ਜੂਨੀਅਰ ਇੰਜੀਨੀਅਰ ਅਨੁਮਾਨ ਤਿਆਰ ਕਰਕੇ ਐੱਸ. ਡੀ. ਓ. ਨੂੰ ਭੇਜੇਗਾ। ਫਿਰ ਐੱਸ. ਡੀ. ਓ. ਤੋਂ ਈ. ਐਕਸ. ਈ. ਐੱਨ., ਐੱਸ. ਈ., ਜੁਆਇੰਟ ਕਮਿਸ਼ਨਰ ਤੇ ਕਮਿਸ਼ਨਰ ਤਕ ਫਾਈਲ ਡਿਜ਼ੀਟਲ ਤੌਰ ’ਤੇ ਪਹੁੰਚੇਗੀ। ਵੱਡੇ ਕੰਮਾਂ ਲਈ ਫਾਈਲ ਸਿੱਧੀ ਚੰਡੀਗੜ੍ਹ ਸਥਿਤ ਉੱਚ ਅਧਿਕਾਰੀਆਂ ਤੱਕ ਆਨਲਾਈਨ ਜਾਵੇਗੀ। ਇਸ ਤਰ੍ਹਾਂ ਕਿਸੇ ਵੀ ਪੱਧਰ ’ਤੇ ਫਾਈਲ ਰੋਕਣਾ ਜਾਂ ਬਦਲਣਾ ਸੰਭਵ ਨਹੀਂ ਰਹੇਗਾ।
ਹੁਣ ਠੇਕੇਦਾਰਾਂ ਅਤੇ ਕੌਂਸਲਰਾਂ ਤੱਕ ਨਹੀਂ ਜਾਵੇਗੀ ਫਾਈਲ
ਅੱਜ ਤਕ ਨਗਰ ਨਿਗਮ ਦੀਆਂ ਕਈ ਫਾਈਲਾਂ ਠੇਕੇਦਾਰਾਂ ਅਤੇ ਕੌਂਸਲਰਾਂ ਦੇ ਹੱਥਾਂ ’ਚ ਘੁੰਮਦੀਆਂ ਰਹਿੰਦੀਆਂ ਸਨ, ਕਈ ਵਾਰ ਟੈਂਡਰ ਜਾਂ ਭੁਗਤਾਨ ਨਾਲ ਸਬੰਧਿਤ ਦਸਤਾਵੇਜ਼ ਗਾਇਬ ਵੀ ਹੋ ਜਾਂਦੇ ਸਨ। ਹੁਣ ਸਾਰਾ ਪ੍ਰਕਿਰਿਆ ਆਨਲਾਈਨ ਹੋਣ ਨਾਲ ਨਾ ਠੇਕੇਦਾਰ ਅਤੇ ਨਾ ਹੀ ਕੌਂਸਲਰ ਕਿਸੇ ਫਾਈਲ ਤੱਕ ਸਿੱਧੀ ਪਹੁੰਚ ਕਰ ਸਕਣਗੇ। ਇਸ ਨਾਲ ਭ੍ਰਿਸ਼ਟਾਚਾਰ ਦੀ ਸੰਭਾਵਨਾ ਕਰੀਬ ਖ਼ਤਮ ਹੋ ਜਾਵੇਗੀ ਅਤੇ ਨਿਗਮ ਦਾ ਰਿਕਾਰਡ ਪੂਰੀ ਤਰ੍ਹਾਂ ਸੁਰੱਖਿਅਤ ਰਹੇਗਾ। ਨਵੇਂ ਸਿਸਟਮ ਨਾਲ ਕੰਮ ਕਰਨ ਲਈ ਨਗਰ ਨਿਗਮ ਦੇ ਕਰਮਚਾਰੀਆਂ ਨੂੰ ਡਿਜ਼ੀਟਲ ਸਿਖਲਾਈ ਦਿੱਤੀ ਜਾਵੇਗੀ। ਕਈ ਕਰਮਚਾਰੀ ਕੰਪਿਊਟਰ ਦਾ ਸੀਮਤ ਗਿਆਨ ਰੱਖਦੇ ਹਨ, ਇਸ ਲਈ ਉਨ੍ਹਾਂ ਨੂੰ ਈ-ਆਫਿਸ ਸਿਸਟਮ ਦੀ ਵਰਤੋਂ ਲਈ ਟ੍ਰੇਨਿੰਗ ਦਿੱਤੀ ਜਾ ਰਹੀ ਹੈ। ਨਾਲ ਹੀ ਨਿਗਮ ਵਿਚ ਕੰਪਿਊਟਰ ਨੈਟਵਰਕਿੰਗ ਅਤੇ ਇੰਟਰਨੈੱਟ ਕਨੈਕਟਿਵਿਟੀ ਨੂੰ ਮਜ਼ਬੂਤ ਕੀਤਾ ਜਾ ਰਿਹਾ ਹੈ।
ਨਗਰ ਨਿਗਮ ਦਾ ਹਰ ਕੰਮ ਆਨਲਾਈਨ ਟਰੈਕ : ਕਮਿਸ਼ਨਰ
ਈ-ਆਫਿਸ ਸਿਸਟਮ ਲਾਗੂ ਹੋਣ ਤੋਂ ਬਾਅਦ ਨਗਰ ਨਿਗਮ ਦਾ ਹਰ ਕੰਮ ਆਨਲਾਈਨ ਟਰੈਕ ਹੋ ਸਕੇਗਾ। ਇਸ ਨਾਲ ਅਧਿਕਾਰੀਆਂ ਦੀ ਜ਼ਿੰਮੇਵਾਰੀ ਤੈਅ ਹੋਵੇਗੀ ਅਤੇ ਨਾਗਰਿਕਾਂ ਨੂੰ ਆਪਣੇ ਕੰਮ ਦੀ ਸਥਿਤੀ ਦੀ ਜਾਣਕਾਰੀ ਤੁਰੰਤ ਮਿਲ ਸਕੇਗੀ। ਇਹ ਬਠਿੰਡਾ ਨੂੰ ਪੂਰੀ ਤਰ੍ਹਾਂ ਡਿਜ਼ੀਟਲ ਨਗਰ ਨਿਗਮ ਬਣਾਉਣ ਵੱਲ ਵੱਡਾ ਕਦਮ ਹੈ। ਬਠਿੰਡਾ ਨਗਰ ਨਿਗਮ ਨੇ ਇਸ ਨਵੀਂ ਪ੍ਰਣਾਲੀ ਨਾਲ ਇਕ ਵਾਰ ਫਿਰ ਸਾਬਤ ਕੀਤਾ ਹੈ ਕਿ ਸਰਕਾਰੀ ਵਿਭਾਗ ਵੀ ਤਕਨਾਲੌਜੀ ਦੀ ਮਦਦ ਨਾਲ ਪਾਰਦਰਸ਼ਤਾ ਤੇ ਕਾਰਗੁਜ਼ਾਰੀ ਦੋਵੇਂ ਹਾਸਲ ਕਰ ਸਕਦੇ ਹਨ। ਹੁਣ ਸ਼ਹਿਰ ਵਾਸੀ ਇਹ ਭਰੋਸਾ ਕਰ ਸਕਦੇ ਹਨ ਕਿ ਉਨ੍ਹਾਂ ਦਾ ਹਰ ਕੰਮ ਤੇਜ਼ੀ ਨਾਲ ਅਤੇ ਪੂਰੀ ਤਰ੍ਹਾਂ ਸੁਰੱਖਿਅਤ ਤਰੀਕੇ ਨਾਲ ਹੋਵੇਗਾ।