ਲੱਖ ਕੋਸ਼ਿਸ਼ਾਂ ਦੇ ਬਾਵਜੂਦ ਬਿਨਾਂ ਡਰ ਦੇ ਲੱਗ ਰਿਹੈ ਮੰਜਾ ਬਾਜ਼ਾਰ
02/12/2018 1:04:02 AM
ਰੂਪਨਗਰ, (ਕੈਲਾਸ਼)- ਜ਼ਿਲਾ ਪ੍ਰਸ਼ਾਸਨ ਅਤੇ ਟ੍ਰੈਫਿਕ ਪੁਲਸ ਦੀ ਸਖ਼ਤੀ ਦੇ ਬਾਵਜੂਦ ਸ਼ਹਿਰ ਦੇ ਤੰਗ ਅਤੇ ਮੇਨ ਬਾਜ਼ਾਰ ਵਿਚ ਲੱਗਣ ਵਾਲਾ ਮੰਜਾ ਬਾਜ਼ਾਰ ਬੇਕਾਬੂ ਹੁੰਦਾ ਜਾ ਰਿਹਾ ਹੈ। ਹਰ ਐਤਵਾਰ ਨੂੰ ਦੁਕਾਨਾਂ ਅੱਗੇ ਲੱਗਣ ਵਾਲਾ ਮੰਜਾ ਬਾਜ਼ਾਰ ਜਿਥੇ ਟ੍ਰੈਫਿਕ ਵਿਚ ਸਮੱਸਿਆ ਪੈਦਾ ਕਰਦਾ ਹੈ, ਉਥੇ ਇਹ ਲੜਾਈ-ਝਗੜੇ ਦਾ ਕਾਰਨ ਵੀ ਬਣਿਆ ਰਹਿੰਦਾ ਹੈ।
ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਮੇਨ ਬਾਜ਼ਾਰ ਦੇ ਦੁਕਾਨਦਾਰਾਂ ਅਤੇ ਸ਼ਹਿਰ ਦੇ ਦੂਸਰੇ ਸਮਾਜਸੇਵੀਆਂ ਨੇ ਦੱਸਿਆ ਕਿ ਹਰ ਐਤਵਾਰ ਨੂੰ ਸ਼ਹਿਰ ਦਾ ਮੇਨ ਬਾਜ਼ਾਰ ਜੋ ਕਾਫੀ ਤੰਗ ਹੈ ਅਤੇ ਉਸ ਵਿਚੋਂ ਦੋਪਹੀਆ ਵਾਹਨ ਵੀ ਇਕ ਸਮੇਂ 'ਤੇ ਨਹੀਂ ਲੰਘ ਸਕਦੇ ਦੁਕਾਨਾਂ ਅੱਗੇ ਮੰਜਿਆਂ 'ਤੇ ਕੁੱਝ ਲੋਕ ਸਾਮਾਨ ਵੇਚਣਾ ਸ਼ੁਰੂ ਕਰ ਦਿੰਦੇ ਹਨ। ਭਲੇ ਹੀ ਉਕਤ ਮੰਜਾ ਬਾਜ਼ਾਰ ਨੂੰ ਨਾ ਲਾਉਣ ਬਾਰੇ ਨਗਰ ਕੌਂਸਲ ਦੇ ਪ੍ਰਧਾਨ ਪਰਮਜੀਤ ਸਿੰਘ ਮਾਕੜ ਅਤੇ ਕੌਂਸਲ ਦੇ ਈ. ਓ. ਭਾਰਤ ਭੂਸ਼ਨ ਕਈ ਵਾਰ ਚਿਤਾਵਨੀ ਦੇ ਚੁੱਕੇ ਹਨ।
ਇਸ ਤੋਂ ਇਲਾਵਾ ਟ੍ਰੈਫਿਕ ਪੁਲਸ ਵੀ ਮੰਜਾ ਬਾਜ਼ਾਰ ਨੂੰ ਟ੍ਰੈਫਿਕ ਵਿਚ ਸਮੱਸਿਆ ਸਮਝਦੇ ਹੋਏ ਇਸ ਨੂੰ ਹਟਾਉਣ ਲਈ ਕੋਸ਼ਿਸ਼ ਵਿਚ ਰਹਿੰਦੀ ਹੈ ਪਰ ਲੋਕਾਂ ਅਨੁਸਾਰ ਟ੍ਰੈਫਿਕ ਪੁਲਸ ਦੀ ਭਿਣਕ ਪੈਂਦੇ ਹੀ ਮੰਜਾ ਬਾਜ਼ਾਰ ਲਾਉਣ ਵਾਲੇ ਲੋਕ ਆਪਣਾ ਸਾਮਾਨ ਸਮੇਟ ਲੈਂਦੇ ਹਨ ਅਤੇ ਜਿਉਂ ਹੀ ਟ੍ਰੈਫਿਕ ਪੁਲਸ ਦੀ ਟੁਕੜੀ ਉਥੋਂ ਨਿਕਲ ਜਾਂਦੀ ਹੈ ਤਾਂ ਮੰਜਾ ਬਾਜ਼ਾਰ ਪਹਿਲਾਂ ਦੀ ਤਰ੍ਹਾਂ ਸਜਣ ਲੱਗ ਜਾਂਦਾ ਹੈ। ਇਸ ਮੌਕੇ ਲੋਕਾਂ ਨੇ ਜ਼ਿਲਾ ਪ੍ਰਸ਼ਾਸਨ ਅਤੇ ਟ੍ਰੈਫਿਕ ਪੁਲਸ ਦੇ ਨਿਯਮਤ ਰੂਪ ਵਿਚ ਸਖਤੀ ਵਰਤਣ ਦੀ ਅਪੀਲ ਕੀਤੀ ਹੈ।
