ਡੋਕਲਾਮ ਵਿਵਾਦ ''ਤੇ ਡੋਭਾਲ ਦੀ ਚੀਨੀ ਹਮਅਹੁਦਾ ਨਾਲ ਹੋਈ ਗੱਲਬਾਤ

ਬੀਜਿੰਗ— ਕੌਮੀ ਸੁਰੱਖਿਆ ਸਲਾਹਕਾਰ ਅਜੀਤ ਡੋਭਾਲ ਅਤੇ ਉਨ੍ਹਾਂ ਦੇ ਚੀਨੀ ਹਮ-ਅਹੁਦਾ  ਸਟੇਟ ਕੌਂਸਲਰ ਯਾਂਗ ਦਰਮਿਆਨ ਡੋਕਲਾਮ ਖੇਤਰ ਵਿਚ ਦੋਹਾਂ ਦੇਸ਼ਾਂ ਦੀਆਂ ਫੌਜਾਂ ਵਿਚਾਲੇ ਜਾਰੀ ਅੜਿੱਕੇ ਨੂੰ ਲੈ ਕੇ ਵੀਰਵਾਰ ਇਥੇ ਦੋਪਾਸੜ ਗੱਲਬਾਤ ਹੋਈ। ਡੋਭਾਲ ਬ੍ਰਾਜ਼ੀਲ, ਰੂਸ, ਭਾਰਤ, ਚੀਨ ਅਤੇ ਦੱਖਣੀ ਅਫਰੀਕਾ (ਬ੍ਰਿਕਸ) ਦੇ ਕੌਮੀ ਸੁਰੱਖਿਆ ਸਲਾਹਕਾਰਾਂ ਦੀ ਦੋ ਦਿਨਾਂ ਬੈਠਕ ਵਿਚ ਹਿੱਸਾ ਲੈਣ ਲਈ ਇਥੇ ਆਏ ਹੋਏ ਹਨ। ਯਾਂਗ ਨੇ ਦੱਖਣੀ ਅਫਰੀਕਾ, ਬ੍ਰਾਜ਼ੀਲ ਅਤੇ  ਭਾਰਤ ਦੇ ਸੀਨੀਅਰ ਸੁਰੱਖਿਆ ਅਧਿਕਾਰੀਆਂ ਨਾਲ ਵੱਖਰੇ ਤੌਰ 'ਤੇ ਵੀ ਮੁਲਾਕਾਤ ਕੀਤੀ। ਯਾਂਗ ਨੇ ਇਨ੍ਹਾਂ ਸੀਨੀਅਰ ਸੁਰੱਖਿਆ ਪ੍ਰਤੀਨਿਧੀਆਂ ਨਾਲ ਦੋਪਾਸੜ ਸੰਬੰਧਾਂ, ਕੌਮਾਂਤਰੀ ਤੇ ਖੇਤਰੀ ਮੁੱਦਿਆਂ ਅਤੇ ਬਹੁਪੱਖੀ ਮਾਮਲਿਆਂ 'ਤੇ ਵੀ ਚਰਚਾ ਕੀਤੀ। ਨਾਲ ਹੀ ਵੱਡੀਆਂ ਸਮੱਸਿਆਵਾਂ 'ਤੇ ਚੀਨ ਦਾ ਰੁੱਖ ਪੇਸ਼ ਕੀਤਾ।  ਫੌਜ ਹਟਾਉਣ ਦਾ ਚੀਨੀ ਪ੍ਰਸਤਾਵ ਭਾਰਤ ਨੇ ਕੀਤਾ ਰੱਦ-ਭਾਰਤ ਨੇ ਚੀਨ ਨੇ ਵਿਦੇਸ਼ ਮੰਤਰੀ ਦੀ ਉਸ ਦਲੀਲ ਨੂੰ ਨਿਮਰਤਾ ਸਹਿਤ ਰੱਦ ਕਰ ਦਿੱਤਾ  ਹੈ ਜਿਸ ਵਿਚ ਦੋਹਾਂ ਦੇਸ਼ਾਂ ਦਰਮਿਆਨ ਉਸਾਰੂ ਗੱਲਬਾਤ ਲਈ ਡੋਕਲਾਮ ਖੇਤਰ ਤੋਂ ਭਾਰਤੀ ਫੌਜ ਨੂੰ ਬਿਨਾਂ ਸ਼ਰਤ ਪਿੱਛੇ ਹਟਣ ਲਈ ਕਿਹਾ ਗਿਆ ਸੀ।
ਆਹਮੋ-ਸਾਹਮਣੇ ਹੈ ਭਾਰਤ ਤੇ ਚੀਨ ਦੀ ਫੌਜ
ਭਾਰਤੀ ਫੌਜ ਨੇ ਭਾਰਤ-ਭੂਟਾਨ-ਚੀਨ ਦੀ ਸਰਹੱਦ 'ਤੇ ਚੀਨੀ ਫੌਜ ਨੂੰ ਸੜਕ ਬਣਾਉਣ ਤੋਂ ਰੋਕ ਦਿੱਤਾ ਸੀ, ਜਿਸ ਪਿੱਛੋਂ ਇਕ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਚੀਨ ਅਤੇ ਭਾਰਤ ਦੀਆਂ ਫੌਜਾਂ ਆਹਮੋ-ਸਾਹਮਣੇ ਹਨ।  ਚੀਨੀ ਰਾਸ਼ਟਰਪਤੀ ਨੂੰ ਵੀ ਮਿਲਣਗੇ ਡੋਭਾਲ-ਅਧਿਕਾਰਤ ਪ੍ਰੋਗਰਾਮ ਮੁਤਾਬਕ ਡੋਭਾਲ ਬ੍ਰਿਕਸ ਦੇਸ਼ਾਂ ਦੇ ਚੋਟੀ ਦੇ ਸੁਰੱਖਿਆ ਅਧਿਕਾਰੀਆਂ ਨਾਲ ਸ਼ੁੱਕਰਵਾਰ ਨੂੰ ਚੀਨ ਦੇ ਰਾਸ਼ਟਰਪਤੀ ਜਿਨ-ਪਿੰਗ ਨਾਲ ਵੀ ਮੁਲਾਕਾਤ ਕਰਨਗੇ।