ਆਇਆ ਵਿਸਾਖੀ ਦਾ ਤਿਉਹਾਰ

ਸ਼ਾਵਾ ਵਿਸਾਖੀ ਆਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਕਣਕਾਂ ਨੇ ਰੰਗ ਵਟਾਇਆ ਹੈ ।
ਸੋਨੇ ਦਾ ਰੰਗ ਚੜ੍ਹਾਇਆ ਹੈ ।
ਇਹ ਸਿੱਟੇ ਲੈਣ ਹੁਲਾਰੇ ਨੇ ।
ਇਹ ਹਿੱਲ-ਹਿੱਲ ਕਰਨ ਇਸ਼ਾਰੇ ਨੇ।
ਉਪਰ ਕਸੀਰਾਂ ਨੇ ਝਾਲਰ ਲਾਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਰਲ ਬੈਠਾਂ ਗੇ ਠੰਢੀਆਂ ਛਾਵਾਂ ਵਿਚ ।
ਸਜਣਾਂ ਦੇ ਆਉਣ ਦੇ ਚਾਵਾਂ ਵਿਚ ।
ਭੰਗੜੇ ਪਾ ਕੇ ਜਸ਼ਨ ਮਨਾਵਾਂਗੇ। ਨਾਲੇ ਗੀਤ ਖ਼ੁਸ਼ੀ ਦੇ
ਗਾਵਾਂਗੇ।
ਸਧਰਾਂ ਦੀ ਮਸਤੀ ਛਾਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਖੇਤਾਂ ਦੇ ਵੱਲ ਵੀ ਜਾਵਾਂ ਗੇ।
ਮਿੱਠੀਆਂ ਗੋਲਾਂ ਤੋੜ ਲਿਆਵਾਂਗੇ।
ਠੰਢੀਆਂ-ਤੱਤੀਆਂ 'ਵਾਵਾਂ ਦੇ ਵਿਚ ।
ਮਸਤ ਤੇ ਸ਼ੋਖ ਅਦਾਵਾਂ ਦੇ ਵਿਚ ।
ਸਾਰਾ ਮੌਸਮ ਚਾਈਂ-ਚਾਈਂ ਏ।
ਸ਼ਾਵਾ ਵਿਸਾਖੀ ਆਈ ਏ।

ਮੇਲੇ ਦੇ ਵਿਚ ਜਾਵਾਂਗੇ ।
ਲੱਡੂ-ਜਲੇਬੀਆਂ ਵੀ ਖਾਵਾਂਗੇ ।
ਉਹ ਵੱਡੇ ਭੰਗੂੜੇ ਝੂਟਾਂਗੇ।
ਉਹ ਸਭ ਨਜ਼ਾਰੇ ਲੁਟਾਂਗੇ।
ਚਿਹਰੇ 'ਤੇ ਰੌਣਕ ਆਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਅੰਬਾਂ ਨੂੰ ਅੰਬੀਆਂ ਲੱਗੀਆਂ ਨੇ।
ਇਹ ਪੱਤਿਆਂ ਦੇ ਵਿਚ ਸਜੀਆਂ ਨੇ।
ਬਾਗਾਂ ਦੇ ਵਿਚ ਕੋਇਲ ਗਾਉਂਦੀ ਏ।
ਮਿੱਠੀ ਕੂਕ ਸੁਣਾਉਂਦੀ ਏ।
ਇਹ ਵੱਖਰੀ ਰੌਣਕ ਲਾਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਹੋਇਆ ਸਜਣਾਂ ਦੇ ਨਾਲ ਮੇਲ ਜਿਹਾ ।
ਇਹ ਰੱਬ ਦਾ ਹੀ ਹੈ ਖੇਲ ਜਿਹਾ।
ਨਾ ਗਿਲੇ-ਸ਼ਿਕਵੇ ਰਹਿ ਗਏ ਨੇ।
ਪੇਚ ਮੁਹੱਬਤਾਂ ਵਾਲੇ ਪੈ ਗਏ ਨੇ।
ਸੱਜਣਾਂ ਨੇ ਫੇਰੀ ਪਾਈ ਏ।
ਸ਼ਾਵਾ ਵਿਸਾਖੀ ਆਈ ਏ।

ਉਹ ਕਿਰਸਾਨ ਵੀ ਭੰਗੜਾ ਪਾਉਂਦਾ ਏ।
ਇਹ ਨੱਚਦਾ-ਟੱਪਦਾ ਆਉਂਦਾ ਏ।
ਫ਼ਸਲਾਂ ਦੀ ਖ਼ੁਮਾਰੀ ਚੜ੍ਹ ਗਈ ਏ।
ਮੁੱਛ ਗਭਰੂ ਦੀ ਵੀ ਖੜ੍ਹ ਗਈ ਏ।
'ਘੇਸਲ' ਮਿਹਨਤ ਰੰਗ ਲਿਆਈ ਏ।
ਸ਼ਾਵਾ ਵਿਸਾਖੀ ਆਈ ਏ।
ਕਸ਼ਮੀਰ ਘੇਸਲ
905/43,ਚੰਡੀਗੜ੍ਹ ।
ਮੋ: 9463656047