ਗੈਜੇਟ ਡੈਸਕ - ਭਾਰਤੀ ਐਪ ਮਾਰਕੀਟ 'ਚ ਇਨੀਂ ਦਿਨੀਂ ਇਕ ਵੱਡਾ ਉਲਟਫੇਰ ਦੇਖਣ ਨੂੰ ਮਿਲ ਰਿਹਾ ਹੈ। ਦੁਨੀਆ ਭਰ 'ਚ ਆਪਣੀ AI ਤਾਕਤ ਦਾ ਲੋਹਾ ਮਨਵਾਉਣ ਵਾਲਾ ChatGPT ਭਾਰਤ ਦੇ ਇਕ ਸਰਕਾਰੀ ਐਪ ਦੇ ਸਾਹਮਣੇ ਫਿੱਕਾ ਪੈ ਗਿਆ ਹੈ। ਦੇਸ਼ ਦੇ ਕਈ ਹਿੱਸਿਆਂ 'ਚ LPG ਸਿਲੰਡਰ ਦੀ ਸਪਲਾਈ ਵਿੱਚ ਦੇਰੀ ਦੀਆਂ ਅਫਵਾਹਾਂ ਕਾਰਨ ਗੂਗਲ ਪਲੇ ਸਟੋਰ ਦੇ ਸਮੀਕਰਨ ਪੂਰੀ ਤਰ੍ਹਾਂ ਬਦਲ ਗਏ ਹਨ।

ਤਾਜ਼ਾ ਅੰਕੜਿਆਂ ਅਨੁਸਾਰ, ਇੰਡੀਅਨ ਆਇਲ ਕਾਰਪੋਰੇਸ਼ਨ ਦੀ IndianOil ONE ਐਪ ਗੂਗਲ ਪਲੇ ਸਟੋਰ ਦੇ 'Top Free Apps' ਚਾਰਟ 'ਚ ਪਹਿਲੇ ਨੰਬਰ 'ਤੇ ਪਹੁੰਚ ਗਈ ਹੈ। ਦੂਜੇ ਪਾਸੇ, ਹਮੇਸ਼ਾ ਚਰਚਾ 'ਚ ਰਹਿਣ ਵਾਲਾ ChatGPT ਹੁਣ ਦੂਜੇ ਸਥਾਨ 'ਤੇ ਖਿਸਕ ਗਿਆ ਹੈ। ਭਾਵੇਂ ChatGPT ਦੀ ਰੇਟਿੰਗ 4.6 ਹੈ ਅਤੇ IndianOil ONE ਦੀ 4.4 ਹੈ, ਪਰ ਡਾਊਨਲੋਡਾਂ ਦੀ ਵਧਦੀ ਗਿਣਤੀ ਕਾਰਨ ਸਰਕਾਰੀ ਐਪ ਨੇ ਨੰਬਰ-1 ਦੀ ਪੁਜ਼ੀਸ਼ਨ ਹਾਸਲ ਕਰ ਲਈ ਹੈ।

ਕਿਉਂ ਵਧੀ ਡਿਮਾਂਡ?

ਰਿਪੋਰਟਾਂ ਅਨੁਸਾਰ, ਪਿਛਲੇ ਕੁਝ ਦਿਨਾਂ ਤੋਂ ਦੇਸ਼ ਦੇ ਕਈ ਹਿੱਸਿਆਂ 'ਚ LPG ਸਿਲੰਡਰ ਦੀ ਰਿਫਿਲਿੰਗ 'ਚ ਦੇਰੀ ਹੋਣ ਦੀਆਂ ਅਫਵਾਹਾਂ ਉੱਡ ਰਹੀਆਂ ਹਨ। ਮਿਡਲ ਈਸਟ 'ਚ ਚੱਲ ਰਹੇ ਸੰਘਰਸ਼ ਨੂੰ ਵੀ ਇਸ ਦਾ ਇਕ ਕਾਰਨ ਮੰਨਿਆ ਜਾ ਰਿਹਾ ਹੈ। ਲੋਕ ਜਲਦੀ ਬੁਕਿੰਗ ਕਰਨ ਅਤੇ ਡਿਲੀਵਰੀ ਦੀ ਜਾਣਕਾਰੀ ਲੈਣ ਲਈ ਤੇਜ਼ੀ ਨਾਲ ਇਸ ਐਪ ਨੂੰ ਡਾਊਨਲੋਡ ਕਰ ਰਹੇ ਹਨ।

ਐਪ 'ਚ ਮਿਲਣਗੀਆਂ ਇਹ ਸਹੂਲਤਾਂ

IndianOil ONE ਐਪ ਰਾਹੀਂ ਗਾਹਕ ਕਈ ਕੰਮ ਘਰ ਬੈਠੇ ਹੀ ਕਰ ਸਕਦੇ ਹਨ, ਜਿਵੇਂ ਕਿ :-

LPG ਸਿਲੰਡਰ ਬੁੱਕ ਕਰਨਾ।
ਬੁਕਿੰਗ ਹਿਸਟਰੀ ਚੈੱਕ ਕਰਨਾ।
ਨੇੜਲੇ ਡਿਸਟ੍ਰੀਬਿਊਟਰ ਦੀ ਖੋਜ ਕਰਨਾ।
LPG ਕਨੈਕਸ਼ਨ ਨੂੰ ਮੈਨੇਜ ਕਰਨਾ ਅਤੇ ਸਰਵਿਸ ਰਿਕਵੈਸਟ ਭੇਜਣਾ।

ਸਰਕਾਰ ਨੇ ਦਿੱਤੀ ਸਫਾਈ

ਇਸ ਦੌਰਾਨ, ਸਰਕਾਰ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਫਵਾਹਾਂ 'ਤੇ ਧਿਆਨ ਨਾ ਦੇਣ। ਪੈਟਰੋਲੀਅਮ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਹੈ ਕਿ ਦੇਸ਼ 'ਚ LPG ਸਿਲੰਡਰ ਦੀ ਕੋਈ ਕਮੀ ਨਹੀਂ ਹੈ ਅਤੇ ਘਰੇਲੂ ਉਤਪਾਦਨ 'ਚ ਵੀ 30 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ।