ਸਾਵਧਾਨ! Phone ਦੀ ਇਹ ਸੈਟਿੰਗ ਕਰ ਸਕਦੀ ਹੈ ਤੁਹਾਡਾ ਬੈਂਕ ਖਾਤਾ ਖਾਲੀ! ਜਾਣੋ ਬਚਣ ਦਾ ਤਰੀਕਾ

ਗੈਜੇਟ ਡੈਸਕ - ਅੱਜ-ਕੱਲ੍ਹ ਦੇ ਡਿਜੀਟਲ ਯੁੱਗ 'ਚ ਠੱਗਾਂ ਨੇ ਲੋਕਾਂ ਨੂੰ ਲੁੱਟਣ ਲਈ ਨਵੇਂ ਅਤੇ ਬੇਹੱਦ ਚਲਾਕ ਤਰੀਕੇ ਲੱਭ ਲਏ ਹਨ। ਹੁਣ ਤੁਹਾਨੂੰ ਲੁੱਟਣ ਲਈ ਠੱਗਾਂ ਨੂੰ ਤੁਹਾਡੇ OTP ਜਾਂ ਬੈਂਕ ਖਾਤੇ ਦੀ ਜਾਣਕਾਰੀ ਦੀ ਲੋੜ ਨਹੀਂ ਹੈ। ਸਿਰਫ਼ ਇਕ ਛੋਟਾ ਜਿਹਾ ਕੋਡ ਡਾਇਲ ਕਰਵਾ ਕੇ ਠੱਗ ਤੁਹਾਡੇ ਫੋਨ ਦਾ ਪੂਰਾ ਕੰਟਰੋਲ ਆਪਣੇ ਹੱਥਾਂ ਵਿਚ ਲੈ ਸਕਦੇ ਹਨ।

ਕਿਵੇਂ ਹੁੰਦੀ ਹੈ ਇਹ ਠੱਗੀ?
ਸਰੋਤਾਂ ਅਨੁਸਾਰ, ਇਸ ਨਵੇਂ ਸਕੈਮ 'ਚ ਠੱਗ ਆਪਣੇ ਆਪ ਨੂੰ ਡਿਲਿਵਰੀ ਬੁਆਏ, ਕਸਟਮਰ ਕੇਅਰ ਐਗਜ਼ੀਕਿਊਟਿਵ ਜਾਂ ਬੈਂਕ ਕਰਮਚਾਰੀ ਦੱਸ ਕੇ ਫੋਨ ਕਰਦੇ ਹਨ। ਉਹ ਕਿਸੇ ਨਾ ਕਿਸੇ ਬਹਾਨੇ ਤੁਹਾਨੂੰ ਆਪਣੇ ਫੋਨ ਤੋਂ ਇਕ ਖਾਸ ਕੋਡ ਡਾਇਲ ਕਰਨ ਲਈ ਕਹਿੰਦੇ ਹਨ। ਜਿਵੇਂ ਹੀ ਤੁਸੀਂ ਉਹ ਕੋਡ ਡਾਇਲ ਕਰਦੇ ਹੋ, ਤੁਹਾਡੇ ਫੋਨ ਦੀ ‘ਕਾਲ ਫਾਰਵਰਡਿੰਗ’ ਸੈਟਿੰਗ ਚਾਲੂ ਹੋ ਜਾਂਦੀ ਹੈ।

ਬਿਨਾਂ OTP ਦੇ ਉੱਡ ਜਾਂਦੇ ਹਨ ਪੈਸੇ
ਇਸ ਫਰਾਡ ਦੀ ਸਭ ਤੋਂ ਖ਼ਤਰਨਾਕ ਗੱਲ ਇਹ ਹੈ ਕਿ ਇਸ 'ਚ ਤੁਹਾਨੂੰ ਕੋਈ ਲਿੰਕ ਕਲਿੱਕ ਕਰਨ ਜਾਂ ਕੋਈ ਐਪ ਡਾਊਨਲੋਡ ਕਰਨ ਦੀ ਲੋੜ ਨਹੀਂ ਪੈਂਦੀ। ਕਾਲ ਫਾਰਵਰਡਿੰਗ ਚਾਲੂ ਹੋਣ ਤੋਂ ਬਾਅਦ, ਤੁਹਾਡੇ ਨੰਬਰ 'ਤੇ ਆਉਣ ਵਾਲੇ ਸਾਰੇ ਕਾਲ ਅਤੇ ਬੈਂਕ ਨਾਲ ਸਬੰਧਤ OTP ਸਿੱਧਾ ਠੱਗਾਂ ਦੇ ਫੋਨ 'ਤੇ ਜਾਣ ਲੱਗਦੇ ਹਨ। ਇਸ ਤਰ੍ਹਾਂ ਉਹ ਬੜੀ ਆਸਾਨੀ ਨਾਲ ਤੁਹਾਡੇ ਖਾਤੇ 'ਚੋਂ ਪੈਸੇ ਚੋਰੀ ਕਰ ਲੈਂਦੇ ਹਨ ਅਤੇ ਤੁਹਾਨੂੰ ਪਤਾ ਵੀ ਨਹੀਂ ਲੱਗਦਾ।

ਆਪਣੇ ਆਪ ਨੂੰ ਕਿਵੇਂ ਰੱਖੀਏ ਸੁਰੱਖਿਅਤ?

•  ਤੁਰੰਤ ਆਪਣੇ ਫੋਨ ਦੀ ਕਾਲ ਸੈਟਿੰਗ 'ਚ ਜਾ ਕੇ ‘ਕਾਲ ਫਾਰਵਰਡਿੰਗ’ ਵਿਕਲਪ ਦੀ ਜਾਂਚ ਕਰੋ। ਜੇਕਰ ਉੱਥੇ ਕੋਈ ਅਣਜਾਣ ਨੰਬਰ ਦਿਖਾਈ ਦੇਵੇ, ਤਾਂ ਉਸ ਨੂੰ ਤੁਰੰਤ ਹਟਾ ਦਿਓ।
•  ਜੇਕਰ ਤੁਹਾਨੂੰ ਸ਼ੱਕ ਹੈ ਕਿ ਤੁਹਾਡੀ ਕਾਲ ਫਾਰਵਰਡਿੰਗ ਚਾਲੂ ਹੈ, ਤਾਂ ਆਪਣੇ ਫੋਨ ਤੋਂ ##002# ਡਾਇਲ ਕਰੋ। ਇਹ ਕੋਡ ਤੁਹਾਡੇ ਫੋਨ ਦੀਆਂ ਸਾਰੀਆਂ ਕਾਲ ਫਾਰਵਰਡਿੰਗ ਸੈਟਿੰਗਾਂ ਨੂੰ ਇੱਕੋ ਵਾਰ ਬੰਦ ਕਰ ਦਿੰਦਾ ਹੈ।
•  ਕਿਸੇ ਵੀ ਅਣਜਾਣ ਵਿਅਕਤੀ ਦੇ ਕਹਿਣ 'ਤੇ ਆਪਣੇ ਫੋਨ ਤੋਂ ਕੋਈ ਵੀ ਕੋਡ ਡਾਇਲ ਨਾ ਕਰੋ।

ਜੇਕਰ ਤੁਸੀਂ ਕਿਸੇ ਵੀ ਤਰ੍ਹਾਂ ਦੀ ਸਾਈਬਰ ਠੱਗੀ ਦਾ ਸ਼ਿਕਾਰ ਹੁੰਦੇ ਹੋ, ਤਾਂ ਤੁਰੰਤ 1930 ਹੈਲਪਲਾਈਨ ਨੰਬਰ 'ਤੇ ਕਾਲ ਕਰੋ ਜਾਂ ਸਾਈਬਰ ਕ੍ਰਾਈਮ ਦੀ ਵੈੱਬਸਾਈਟ 'ਤੇ ਸ਼ਿਕਾਇਤ ਦਰਜ ਕਰਵਾਓ।