ਫ਼ਿਲਮ ਦੀ ਪ੍ਰਮੋਸ਼ਨ 'ਚ ਲੱਗੇ ਐਕਟਰ ਈਸ਼ਾਨ ਖੱਟਰ ਅਤੇ ਸਿਧਾਂਤ ਚਤੁਰਵੇਦੀ ਨਾਲ ਖ਼ਾਸ ਗੱਲਬਾਤ

ਅਭਿਨੇਤਾ ਈਸ਼ਾਨ ਖੱਟਰ ਅਤੇ ਸਿਧਾਂਤ ਚਤੁਰਵੇਦੀ ਭੂਤ ਭਜਾਉਣ ਵਾਲੇ ਘੋਸਟ ਬਸਟਰ ਦੇ ਕਿਰਦਾਰ ਵਿਚ ਹੋਣਗੇ। ਦੋਵੇਂ ਕਲਾਕਾਰਾਂ ਦਾ ਸਾਹਮਣਾ ਦੇਸ਼ ਦੇ ਕੋਨੇ-ਕੋਨੇ ਦੀਆਂ ਚੁੜੇਲਆਂ, ਡਾਇਣਾਂ ਨਾਲ ਹੋਵੇਗਾ, ਪਰ ਕਹਾਣੀ ਵਿਚ ਅਸਲ ਟਵਿਸਟ ਭੂਤ ਦੇ ਕਿਰਦਾਰ ਵਾਲੀ ਕੈਟਰੀਨਾ ਕੈਫ਼ ਨਾਲ ਆਵੇਗਾ। ਡਾਇਲਾਗ ਡਿਲੀਵਰੀ ਹਾਸੇ ਨਾਲ ਲੋਟਪੋਟ ਕਰੇਗੀ, ਜਿਸ ਨਾਲ ਦਰਸ਼ਕਾਂ ਨੂੰ ਇਹ ਫ਼ਿਲਮ ਘੋਸਟ ਬਸਟਰ ਨਹੀਂ ਬਲਕਿ ਸਟ੍ਰੈੱਸ ਬਸਟਰ ਦਾ ਅਹਿਸਾਸ ਕਰਵਾਏਗੀ। ਖੁਦ ਅਦਾਕਾਰ ਈਸ਼ਾਨ ਅਤੇ ਸਿਧਾਂਤ ਦਾ ਵੀ ਕਹਿਣਾ ਹੈ ਕਿ ਇਹ ਫ਼ਿਲਮ ਦਰਸ਼ਕਾਂ ਦਾ 100 ਫੀਸਦੀ ਮਨੋਰੰਜਨ ਕਰੇਗੀ। ਫ਼ਿਲਮ ਦੇ ਕੁਝ ਅਨੁਭਵ, ਕਹਾਣੀ ਬਾਰੇ ਦੋਵੇਂ ਕਲਾਕਾਰਾਂ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ਜਗ ਬਾਣੀ/ਹਿੰਦ ਸਮਾਚਾਰ ਨਾਲ ਵਿਸ਼ੇਸ਼ ਗੱਲਬਾਤ ਕੀਤੀ।

ਫੋਨ ਭੂਤ, ਨਾਮ ਤੋਂ ਹੀ ਜ਼ਾਹਿਰ ਹੈ ਕਿ ਇਹ ਇਕ ਹਾਰਰ ਫ਼ਿਲਮ ਹੈ। ਇਸ ਫ਼ਿਲਮ ਵਿਚ ਕਿਹੜੀ ਨਵੀਂ ਕਹਾਣੀ ਹੈ, ਜੋ ਦਰਸ਼ਕਾਂ ਨੂੰ ਸਿਨੇਮਾਘਰਾਂ ਤੱਕ ਖਿੱਚੇਗੀ?
-ਈਸ਼ਾਨ : ਇਹ ਇਕ ਹਾਰਰ ਕਾਮੇਡੀ ਫ਼ਿਲਮ ਹੈ, ਜਿਸ ਵਿਚ ਹਾਰਰ ਘੱਟ ਕਮੇਡੀ ਜ਼ਿਆਦਾ ਹੈ। ਹਾਰਰ ਨੂੰ ਲੈ ਕੇ ਫ਼ਿਲਮ ਵਿਚ ਅਜਿਹੀ ਖੇਡ ਖੇਡੀ ਗਈ ਹੈ ਕਿ ਹਾਰਰ ਵੀ ਪੂਰੀ ਤਰ੍ਹਾਂ ਕਾਮੇਡੀ ਬਣ ਗਈ ਹੈ। ਇਹ ਇਕ ਬਹੁਤ ਹੀ ਹਲਕੀ ਮਜ਼ੇਦਾਰ ਫ਼ਿਲਮ ਹੈ ਜਿਸ ਵਿਚ ਬਹੁਤ ਸਾਰੀਆਂ ਡਰਾਉਣੀਆਂ ਚੀਜਾਂ ਨਹੀਂ ਹਨ, ਜਿਵੇਂ ਕਿ ਇਹ ਡਰਾਉਣੀਆਂ ਫ਼ਿਲਮਾਂ ਵਿਚ ਹੁੰਦੀਆਂ ਹਨ।
-ਸਿਧਾਂਤ : ਇਸ ਫ਼ਿਲਮ ਵਿਚ ਭਾਰਤ ਦੇ ਹਰ ਕੋਨੇ ਤੋਂ ਭੂਤ ਹਨ। ਚੁੜੈਲ ਹੈ, ਡਾਇਣ ਵੀ। ਡਾਇਣ ਪੰਜਾਬੀ ਹੈ, ਚੁੜੇਲ ਬੰਗਾਲੀ ਹੈ। ਹਾਲਾਂਕਿ ਇਹ ਜੌਂਬੀਜ਼ ਵਰਗਾ ਕੁਝ ਨਹੀਂ ਹੈ। ਸਿਰਫ਼ ਕਿੱਸੇ ਕਹਾਣੀਆਂ ਵਿਚ ਸੁਣਾਈਆਂ ਜਾਣ ਵਾਲੀਆਂ ਚੁਣੈਲਾਂ, ਡਾਇਣਾਂ ਹਨ। ਇੰਝ ਕਹੋ ਕਿ ਦੇਸੀ ਭੂਤ ਹਨ, ਜਿਸ ਵਿਚ ਕਾਮੇਡੀ ਦਾ ਤੜਕਾ ਲਗਾਇਆ ਗਿਆ ਹੈ।

ਭੂਲ-ਭੁਲੱਈਆਂ ਪਾਰਟ-2 ਨੂੰ ਛੱਡ ਕੇ ਪਿਛਲੇ ਸਮੇਂ ਵਿਚ ਆਈਆਂ ਹਾਰਰ ਕਾਮੇਡੀ ਫ਼ਿਲਮਾਂ ਦਰਸ਼ਕਾਂ ਨੂੰ ਬਹੁਤਾ ਲੁਭਾਉਣ ਵਿਚ ਕਾਮਯਾਬ ਨਹੀਂ ਹੋ ਸਕੀਆਂ। ਤਾਂ ਤੁਸੀਂ ਇਸ ਫ਼ਿਲਮ ਤੋਂ ਕੀ ਉਮੀਦ ਕਰਦੇ ਹੋ?
-ਈਸ਼ਾਨ : ਅਜਿਹਾ ਨਹੀਂ ਹੈ। ਫ਼ਿਲਮ ਇਕ ਤਰ੍ਹਾਂ ਇਕ ਮੀਲ ਪੱਥਰ ਰਹੀ ਹੈ, ਜਿਸ ਵਿਚ ਕਾਮੇਡੀ ਅਤੇ ਹਾਰਰ ਦਾ ਮਿਸ਼ਰਣ ਸੀ। ਸਾਡੀ ਫ਼ਿਲਮ ਥੋੜੀ ਵੱਖਰੀ ਹੈ, ਬਿਲਕੁਲ ਨਵੇਂ ਕਿਰਦਾਰਾਂ ਨਾਲ। ਸਿਧਾਂਤ ਅਤੇ ਮੈਂ ਦੋਸਤਾਂ ਦੀ ਭੂਮਿਕਾ ਨਿਭਾਅ ਰਹੇ ਹਾਂ। ਉਸ ਤਰ੍ਹਾਂ ਨਾਲ ਵੱਡੀ ਫ਼ਿਲਮ ਵੀ ਹੈ। ‘ਜਾਨੇ ਭੀ ਦੋ ਯਾਰੋ’, ‘ਅੰਦਾਜ਼ ਅਪਨਾ ਅਪਨਾ’ ਵਰਗੀਆਂ ਫ਼ਿਲਮਾਂ, ਜੋ ਲੰਬੇ ਸਮੇਂ ਤੋਂ ਨਜ਼ਰ ਨਹੀਂ ਆਈਆਂ ਹਨ, ਉਹੋ ਜਿਹਾ ਹੀ ਟੋਨ ਇਸ ਫ਼ਿਲਮ ਵਿਚ ਵੀ ਹੈ। ਉਸ ਦਾ ਇਸ ਫ਼ਿਲਮ ਵਿਚ ਫਲੇਵਰ ਹੈ।
-ਸਿਧਾਂਤ : ਇਸ ਫ਼ਿਲਮ ਵਿਚ ਹਾਰਰ ਦੇ ਐਲੀਮੈਂਟ ਹਨ ਪਰ ਕਾਮੇਡੀ ਜ਼ਿਆਦਾ ਹੈ, ਜਿਸ ਵਿਚ ਦੋ ਦੋਸਤ ਸਫ਼ਰ ’ਤੇ ਨਿਕਲਦੇ ਹਨ ਤੇ ਉਨ੍ਹਾਂ ਦੇ ਨਾਲ ਜੋ ਕੁਝ ਹੁੰਦਾ ਹੈ, ਉਹ ਉਸ ਨਾਲ ਕਿੰਝ ਡੀਲ ਕਰਦੇ ਹਨ, ਉਹ ਚੀਜ਼ਾਂ ਨੂੰ ਸੁਧਾਰਦੇ ਵੀ ਹਨ ਪਰ ਅਣਜਾਣੇ ਵਿਚ ਸੁਧਾਰਦੇ ਹਨ। ਅਜਿਹਾ ਨਹੀਂ ਹੈ ਕਿ ਦੋਵੇਂ ਦੋਸਤ ਬੜੇ ਬਮਾਰਟ ਹਨ, ਹੀਰੋਇਕ ਹਨ, ਸਗੋਂ ਦੋਵੇਂ ਹੀ ਬੜੇ ਬੇਵਕੂਫ਼ ਹਨ, ਜਿਨ੍ਹਾਂ ਨੂੰ ਪਤਾ ਨਹੀਂ ਹੈ ਕਿ ਜ਼ਿੰਦਗੀ ਵਿਚ ਕੀ ਕਰਨਾ ਹੈ ਪਰ ਇਹ ਹਾਰਰ ਫ਼ਿਲਮਾਂ ਦੇ ਬੜੇ ਫੈਨ ਹਨ, ਜਿਨ੍ਹਾਂ ਨੂੰ ਇਹ ਚੀਜ਼ਾਂ ਆਪਣੇ ਵੱਲ ਖਿੱਚਦੀਆਂ ਹਨ। ਇਸ ਲਈ ਇਕ ਯਾਤਰਾ ’ਤੇ ਨਿਕਲਦੇ ਹਨ ਤੇ ਦੇਖਦੇ ਹਨ ਕਿ ਕਿਹੋ ਜਿਹੀਆਂ ਚੁਣੌਤੀਆਂ ਹਨ। ਫ਼ਿਲਮ ਵਿਚ ਜੈਕੀ ਸ਼ਰਾਫ਼ ਇਕ ਤਾਂਤਰਿਕ ਦਾ ਰੋਲ ਪਲੇਅ ਕਰ ਰਹੇ ਹਨ ਤੇ ਇਨ੍ਹਾਂ ਨਾਲ ਹੀ ਲੜਨ ਦੀ ਅਸਲ ਯਾਤਰਾ ਹੈ। ਕੈਟਰੀਨਾ ਰਾਗਿਨੀ ਦਾ ਰੋਲ ਪਲੇਅ ਕਰ ਰਹੇ ਹਨ, ਜੋ ਇਕ ਭੂਤ ਹੈ ਤੇ ਕੈਟਰੀਨਾ ਕੈਫ਼ ਹੀ ਕਹਾਣੀ ਵਿਚ ਟਵਿਸਟ ਲੈ ਕੇ ਆਉਂਦੀ ਹੈ।

ਓ. ਟੀ. ਟੀ. ਦਾ ਦਾਇਰਾ ਤੇਜ਼ੀ ਨਾਲ ਵਧ ਰਿਹਾ ਹੈ। ਇਸੇ ਵਿਚ ਫ਼ਿਲਮ ਨਿਰਮਾਣ ਤੋਂ ਲੈ ਕੇ ਸਿਨੇਮਾ ਘਰਾਂ ਵਿਚ ਫ਼ਿਲਮ ਰਿਲੀਜ਼ ਕਰਨਾ ਕਿੰਨਾ ਚੁਣੌਤੀਪੂਰਣ ਹੋ ਗਿਆ ਹੈ?
-ਈਸ਼ਾਨ : ਬੇਹੱਦ ਸਿੰਪਲ ਹੈ, ਫ਼ਿਲਮ ਜ਼ਿਆਦਾ ਰੋਮਾਂਚਕਾਰੀ, ਅਨੋਖੀ ਤੇ ਧਮਾਕੇਦਾਰ ਹੋਣੀ ਚਾਹੀਦੀ ਹੈ ਤਾਂ ਕਿ ਉਹ ਦਰਸ਼ਕਾਂ ਨੂੰ ਸਿਨੇਮਾ ਘਰਾਂ ਤੱਕ ਖਿੱਚ ਕੇ ਲੈ ਆਵੇ। ਸਿਨੇਮਾ ਦਾ ਅਨੁਭਵ ਇਕ ਭਾਈਚਾਰਕ ਅਨੁਭਵ ਹੈ, ਜੋ ਇਕੱਲੇ ਘਰ ਵਿਚ ਬੈਠ ਕੇ ਲਏ ਗਏ ਅਨੁਭਵ ਤੋਂ ਬੇਹੱਦ ਵੱਖ ਹੈ। ਸਿਨੇਮਾ ’ਚ ਤੁਸੀਂ ਹਮੇਸ਼ਾ ਕੁਝ ਸਿੱਖਦੇ ਹੋ। ਕਾਮੇਡੀ ਫ਼ਿਲਮ ਵਿਚ ਸਿਨੇਮਾ ਘਰਾਂ ਦੇ ਅੰਦਰ ਇਕੱਠੇ ਹੱਸਣ ਦਾ ਭਾਈਚਾਰਕ ਅਨੁਭਵ ਹੁੰਦਾ ਹੈ। ਇਸ ਲਈ ਮੇਰੇ ਹਿਸਾਬ ਲਾਲ ਸਿਨੇਮਾ ਕਦੇ ਪੁਰਾਣਾ ਨਹੀਂ ਹੋਵੇਗਾ ਤੇ ਇਸ ਦੀ ਕਿਸੇ ਨਾਲ ਤੁਲਨਾ ਨਹੀਂ ਕੀਤੀ ਜਾ ਸਕਦੀ ਹੈ।
-ਸਿਧਾਂਤ : ਓ. ਟੀ. ਟੀ. ਤੇ ਸਿਨੇਮਾ ਘਰਾਂ ਬਾਰੇ ਮੇਰਾ ਕਹਿਣਾ ਹੈ ਕਿ ਅੱਜ ਆਨਲਾਈਨ ਸ਼ਾਪਿੰਗ ਹੈ ਪਰ ਵਿਆਹ ਹੁੰਦਾ ਹੈ ਤਾਂ ਸ਼ੇਰਵਾਨੀ ਖਰੀਦਨ ਲਈ ਦੁਕਾਨ ’ਤੇ ਜਾਣਾ ਪਵੇਗਾ, ਤਾਂ ਕਿ ਸਹੀ ਨਾਪ ਦਿੱਤਾ ਜਾ ਸਕੇ। ਜਿਵੇਂ ਵਿਆਹ ਦਾ ਈਵੈਂਟ ਹੈ, ਉਂਝ ਹੀ ਸਿਨੇਮਾ ਇਕ ਈਵੈਂਟ ਹੋਣਾ ਚਾਹੀਦਾ ਹੈ, ਜਿਸ ਵਿਚ ਜਾ ਕੇ ਹੀ ਸ਼ੇਰਵਾਨੀ ਦਾ ਅਨੁਭਵ ਕੀਤਾ ਜਾ ਸਕੇ। ਸਾਡੀ ਫ਼ਿਲਮ ਵੀ ਸ਼ੇਰਵਾਨੀ ਹੈ, ਜੋ ਚਮਕ ਰਹੀ ਹੈ। ਉਸ ’ਤੇ ਕੈਟਰੀਨਾ ਕੈਫ਼ ਹਨ, ਜਿਨ੍ਹਾਂ ਨੂੰ ਹਰ ਕੋਈ ਵੱਡੇ ਪਰਦੇ ’ਤੇ ਦੇਖਣਾ ਚਾਹੇਗਾ। ਈਸ਼ਾਨ ਨੂੰ ਡਾਂਸ ਕਰਦੇ ਹੋਏ ਦੇਖੋਗੇ।

ਸਾਊਥ ਇੰਡੀਅਨ ਫ਼ਿਲਮ ਇੰਡਸਟਰੀ ਤੇ ਹਿੰਦੀ ਫ਼ਿਲਮ ਇੰਡਸਟਰੀ ਨੂੰ ਤੁਸੀਂ ਕਿੰਝ ਦੇਖਦੇ ਹੋ?
-ਸਿਧਾਂਤ : ਅਸੀਂ ਖੁਸ਼ਕਿਸਮਤ ਹਾਂ ਕਿ ਅਜਿਹਾ ਸਮਾਂ ਆ ਗਿਆ ਹੈ ਕਿ ਦੇਸ਼ ਦੇ ਵੱਖ-ਵੱਖ ਕੋਨਿਆਂ ਤੋਂ ਚੰਗੀਆਂ ਫ਼ਿਲਮਾਂ ਦੇਖਣ ਨੂੰ ਮਿਲ ਰਹੀਆਂ ਹਨ। ਇਸ ਸਮੇਂ ਸਿਨੇਮਾ ਵਧ ਰਿਹਾ ਹੈ। ਇਸ ਵਿਚ ਕੌਣ ਘੱਟ, ਕੌਣ ਜ਼ਿਆਦਾ ਹੈ, ਇਹ ਤਾਂ ਬਿਜ਼ਨੈੱਸ ਹੈ। ਕੁਝ ਫ਼ਿਲਮਾਂ ਚੱਲਦੀਆਂ ਹਨ, ਕੁਝ ਨਹੀਂ ਚੱਲਦੀਆਂ। ਇਕ ਦਰਸ਼ਕ ਦੇ ਲਿਹਾਜ ਨਾਲ ਵਧੀਆ ਗੱਲ ਇਹ ਹੈ ਕਿ ਦੇਸ਼ ਦੇ ਕੋਨੇ-ਕੋਨੇ ਤੋਂ ਵੱਖ-ਵੱਖ ਕਹਾਣੀਆਂ ਦੇਖਣ ਨੂੰ ਮਿਲ ਰਹੀਆਂ ਹਨ। ਬਾਲੀਵੁੱਡ ਦੇ ਪੱਧਰ ’ਤੇ ਪਿਛਲੇ ਸਮੇਂ ਵਿਚ ਕਾਫ਼ੀ ਚੰਗੀਆਂ ਫ਼ਿਲਮਾਂ ਬਣੀਆਂ ਹਨ। ਇਸ ਵਿਚ ਘੱਟ ਜਾਂ ਜ਼ਿਆਦਾ ਦਾ ਸਵਾਲ ਨਹੀਂ ਹੈ। ਸਟਾਕ ਮਾਰਕੀਟ ਦੀ ਤਰ੍ਹਾਂ ਉਤਾਰ ਚੜ੍ਹਾਅ ਹੈ।
-ਈਸ਼ਾਨ : ਸਿਨੇਮਾ ਦਾ ਕੰਮ ਜੋੜਨ ਦਾ ਹੈ। ਸਾਊਥ ਇੰਡੀਅਨ ਸਿਨੇਮਾ ਜਾਂ ਨਾਰਥ ਇੰਡੀਅਨ ਸਿਨੇਮਾ ਦੀ ਬਜਾਏ ਅੱਜ ਭਾਰਤੀ ਸਿਨੇਮਾ ਕਹਿਣਾ ਸਹੀ ਗੱਲ ਹੋਵੇਗੀ। ਹਾਂ ਇਹੀ ਸਹੀ ਹੈ ਕਿ ਦੋਵੇਂ ਸਿਨੇਮਾ ਇੰਡਸਟਰੀ ਅਲੱਗ ਹਨ। ਸਾਊਥ ਇੰਡੀਅਨ ਇੰਡਸਟਰੀ ਸ਼ਾਨਦਾਰ ਫ਼ਿਲਮਾਂ ਬਣਾ ਰਹੀ ਹੈ ਤੇ ਬਿਹਤਰੀਨ ਬਿਜ਼ਨੈੱਸ ਵੀ ਕਰ ਰਹੀ ਹੈ। ਇਹ ਹਿੰਦੀ ਫ਼ਿਲਮ ਇਡਸਟਰੀ ਲਈ ਪ੍ਰੇਰਣਾ ਹੈ। ਇਕ ਬਿਹਤਰੀਨ ਮਿਸਾਲ ਹੈ, ਜਿਸ ਵਿਚ ਮਾਯੂਸ ਹੋਣ ਦੀ ਲੋੜ ਨਹੀਂ ਹੈ। ਜੇਕਰ ਹਿੰਦੀ ਫ਼ਿਲਮ ਇਡਸਟਰੀ ਇਸ ਤੋਂ ਪ੍ਰੇਰਣਾ ਲਵੇਗੀ ਤਾਂ ਸਿਨੇਮਾ ਦਾ ਸਟੈਂਡਰਡ ਵਧੇਗਾ।

ਈਸ਼ਾਨ ਤੁਹਾਡੇ ਮੁਤਾਬਿਕ ਅੱਜ ਫ਼ਿਲਮਾਂ ਜ਼ਿਆਦਾ ਰੋਮਾਂਚਕਾਰੀ, ਮੀਨਿੰਗਫੁਲ ਹੋਣੀਆਂ ਚਾਹੀਦੀਆਂ ਹਨ ਤਾਂ ਤੁਸੀਂ ਇਸ ਤਰ੍ਹਾਂ ਦੀਆਂ ਫ਼ਿਲਮਾਂ ਦੀ ਚੋਣ ਕਿੰਝ ਕਰਦੇ ਹੋ? ਕੀ ਚੰਗਾ ਸਬਜੈਕਟ ਸਿਲੈਕਟ ਕਰਨਾ ਚੁਣੌਤੀਪੂਰਣ ਹੈ?
ਚੁਣੌਤੀ ਤਾਂ ਹਰ ਫੇਜ਼ ਵਿਚ ਹੁੰਦੀ ਹੈ ਪਰ ਮੇਰਾ ਮੰਨਣਾ ਹੈ ਕਿ ਆਪਣੇ ਫੈਸਲੇ ਇਸ ਗੱਲ ਨੂੰ ਧਿਆਨ ਵਿਚ ਰੱਖ ਕੇ ਲੈਣੇ ਚਾਹੀਦੇ ਹਨ ਕਿ ਦਰਸ਼ਕ ਕਿਸ ਤਰ੍ਹਾਂ ਦੀਆਂ ਫ਼ਿਲਮਾਂ ਦੇਖਣਾ ਚਾਹੁੰਦੇ ਹਨ। ਅੱਜ ਦਰਸ਼ਕ ਮਨੋਰੰਜਕ ਫ਼ਿਲਮਾਂ ਦੇਖਣਾ ਚਾਹੁੰਦੇ ਹਨ, ਕਿਉਂਕਿ ਅਸੀਂ ਇਕ ਪੈਨਡੈਮਿਕ ਕੋਵਿਡ ਦੇ ਦੌਰ ’ਚੋਂ ਗੁਜ਼ਰੇ ਹਾਂ। ਅੱਜ ਹਰ ਕੋਈ ਚਾਹੁੰਦਾ ਹੈ ਕਿ ਜਿਆਦਾ ਦਬਾਅ ਨਾ ਹੋਵੇ, ਮਨੋਰੰਜਨ ਹੋਵੇ। ਸਾਡੀ ਫ਼ਿਲਮ ਉਸ ’ਤੇ ਆਧਾਰਿਤ ਹੈ। ਇੰਝ ਵੀ ਕਹਿ ਸਕਦੇ ਹੋ ਕਿ ਇਹ ਘੋਸਟ ਬਸਟਰ ਫ਼ਿਲਮ ਨਹੀਂ, ਸਗੋਂ ਸਟ੍ਰੈੱਸ ਬਸਟਰ ਫ਼ਿਲਮ ਹੈ।

ਕੈਟਰੀਨਾ ਕੈਫ਼ ਫ਼ਿਲਮ ਵਿਚ ਟਵਿਸਟ ਦੇ ਨਾਲ ਨਾਲ ਇਕ ਬਿਜ਼ਨੈੱਸ ਮਾਡਲ ਵੀ ਲੈ ਕੇ ਆਉਂਦੇ ਹਨ। ਆਖਰ ਕੀ ਉਨ੍ਹਾਂ ਦਾ ਬਿਜ਼ਨੈੱਸ ਮਾਡਲ ਹੈ?
-ਈਸ਼ਾਨ : ਰਾਗਿਨੀ ਦੇ ਕਿਰਦਾਰ ਵਿਚ ਕੈਟੀਰਨਾ ਕੈਫ ਦਾ ਏਜੰਡਾ ਇਕ ਰਹੱਸ ਹੈ, ਜੋ ਫ਼ਿਲਮ ਦੇਖਣ ’ਤੇ ਹੀ ਸਮਝ ਆ ਸਕਦਾ ਹੈ। ਹਾਲਾਂਕਿ ਇਹ ਸਾਫ਼ ਹੈ ਕਿ ਭੂਤ ਹੋਣ ਦੇ ਕਾਰਨ ਰਾਗਿਨੀ ਦਾ ਬਿਜ਼ਨੈੱਸ ਮਾਡਲ ਮਟੀਰੀਲੀਅਸਟਿਕ ਨਹੀਂ ਹੈ। ਉਨ੍ਹਾਂ ਦਾ ਟੀਚਾ ਅਲੱਗ ਹੈ। ਇਹੀ ਇਕ ਰਹੱਸ ਹੈ, ਜੋ ਦਰਸ਼ਕ ਫ਼ਿਮਲ ਦੇਖਣ ’ਤੇ ਹੀ ਸਮਝ ਸਕਣਗੇ।

ਈਸ਼ਾਨ ਤੁਹਾਡੇ ਆਉਣ ਵਾਲੇ ਇਕ ਪ੍ਰਾਜੈਕਟ ‘ਨੇਚਰ ਫਾਰ ਨੇਚਰ’ ਨੂੰ ਲੈ ਕੇ ਕਾਫ਼ੀ ਚਰਚਾ ਹੈ? ਤੁਸੀਂ ਇਸ ਬਾਰੇ ਕੁੱਝ ਦੱਸੋ?
-ਈਸ਼ਾਨ : ‘ਨੇਚਰ ਫਾਰ ਨੇਚਰ’ ਫ਼ਿਲਮ ਨਹੀਂ ਹੈ। ਇਹ ਅਲੱਗ ਤਰ੍ਹਾਂ ਦਾ ਪ੍ਰਾਜੈਕਟ ਹੈ। ਜਿਸ ਬਾਰੇ ਜਲਦੀ ਹੀ ਦੱਸਿਆ ਜਾਵੇਗਾ। ਇਸ ਤੋਂ ਇਲਾਵਾ ‘ਫ਼ੋਨ ਭੂਤ’ ਤੋਂ ਬਾਅਦ ਹੀ ਜਲਦੀ ਹੀ ‘ਪੀਪਾ’ ਫ਼ਿਲਮ ਰਿਲੀਜ਼ ਹੋਣ ਵਾਲੀ ਹੈ। ਇਹ ਇਕ ਵਾਰ ਡ੍ਰਾਮਾ ਹੈ। 1971 ਦੀ ਜੰਗ ’ਤੇ ਆਧਾਰਿਤ ਇਹ ਇਕ ਆਰਮੀ ਫ਼ਿਲਮ ਹੈ।

‘ਗਹਿਰਾਈਆਂ’ ਫ਼ਿਲਮ ਨੇ ਤੁਹਾਨੂੰ ਇਕ ਅਲੱਗ ਪਛਾਣ ਦਿੱਤੀ ਹੈ। ਉਸ ਤੋਂ ਬਾਅਦ ਲਾਈਫ਼ ਕਿੰਝ ਬਦਲੀ, ਇਸ ਬਾਰੇ ਦੱਸੋ?
-ਸਿਧਾਂਤ: ਮੇਰਾ ਹਮੇਸ਼ਾ ਮੰਨਣਾ ਹੈ ਕਿ ਜੋ ਕਰਾਂ, ਅਲੱਗ ਕਰਾਂ। ਇਸ ਤੋਂ ਬਾਅਦ ਦੋ ਫ਼ਿਲਮਾਂ ਆਉਣ ਵਾਲੀਆਂ ਹਨ, ਪਹਿਲੀ ‘ਖੋ ਗਏ ਹਮ ਕਹਾਂ’ ਤੇ ਦੂਸਰੀ ਇਕ ਐਕਸ਼ਨ ਫ਼ਿਲਮ ਹੈ, ਜਿਸ ਦਾ ਨਾਮ ‘ਯੁੱਧਦਰਾ’ ਹੈ। ਇਹ ਫਰਹਾਨ ਅਖ਼ਤਰ ਤੇ ਸ਼੍ਰੀਧਰ ਰਾਘਵਨ ਨੇ ਲਿਖੀ ਹੈ। ਮੇਰੀ ਕੋਸ਼ਿਸ਼ ਧਰਾਤਲ ਨਾ ਜੁੜੀ ਫ਼ਿਲਮ ਕਰਨ ਦੀ ਹੈ।

ਫ਼ਿਲਮ ਵਿਚ ਤੁਸੀਂ ਇਕ ਘੋਸਟ ਬਸਟਰ ਹੋ? ਪਹਿਲਾਂ ਵੀ ਕਈ ਅਭਿਨੇਤਾ ਅਜਿਹੇ ਕਿਰਦਾਰ ਨਿਭਾਅ ਚੁੱਕੇ ਹਨ। ਤੁਹਾਡੇ ਕਿਰਦਾਰ ਵਿਚ ਕੀ ਨਵਾਂ ਹੈ?
-ਸਿਧਾਂਤ : ਪਹਿਲਾਂ ਜਿਨ੍ਹਾਂ ਨੇ ਵੀ ਇਹ ਕਿਰਦਾਰ ਨਿਭਾਏ ਹਨ, ਉਹ ਕਾਫੀ ਟੈਲੇਂਟਡ ਸਨ। ਮੇਰਾ ਕਿਰਦਾਰ ਬਿਲਕੁਲ ਵੀ ਟੈਲੇਂਟਡ ਨਹੀਂ ਹੈ। ਉਹ ਜਿਸ ਸਫ਼ਰ ’ਤੇ ਨਿਕਲਦਾ ਹੈ, ਚੀਜ਼ਾਂ ਖੁਦ ਬ-ਖੁਦ ਹੋਣ ਲੱਗੀਦੀਆਂ ਹਨ। ਮੇਰੇ ਕਿਰਦਾਰ ਦੇ ਕੋਲ ਕੋਈ ਸ਼ਕਤੀ ਨਹੀਂ ਹੈ, ਸਿਰਫ਼ ਮਾਸੂਮੀਅਤ ਹੈ। ਸਾਡੇ ਨਾਲ ਕਿਸਮਤ ਹੈ, ਜੋ ਕਰਦੇ ਹਾਂ ਉਹ ਸਹੀ ਹੋ ਜਾਂਦਾ ਹੈ।