ਕੀ ਧਰਮਿੰਦਰ ਨੇ ਟੈਂਕੀ ਵਾਲੇ ਸੀਨ ਦੌਰਾਨ ਸੱਚੀਂ ਪੀਤੀ ਸੀ ਸ਼ਰਾਬ ? 'ਸ਼ੋਲੇ' ਦੇ ਡਾਇਰੈਕਟਰ ਨੇ ਚੁੱਕਿਆ ਰਾਜ਼ ਤੋਂ ਪਰਦਾ

ਮੁੰਬਈ- ਬਾਲੀਵੁੱਡ ਦੀ ਸਭ ਤੋਂ ਮਸ਼ਹੂਰ ਫਿਲਮ 'ਸ਼ੋਲੇ' ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹੈ। ਇਸ ਫਿਲਮ ਨੂੰ ਮੇਕਰਸ ਨੇ 4K ਵਰਜ਼ਨ ਵਿੱਚ ਸਿਨੇਮਾਘਰਾਂ ਵਿੱਚ ਮੁੜ ਤੋਂ ਰਿਲੀਜ਼ ਕੀਤਾ ਹੈ, ਜਿਸ ਵਿੱਚ 1975 ਵਿੱਚ ਹਟਾਇਆ ਗਿਆ ਅਸਲੀ ਕਲਾਈਮੈਕਸ ਵੀ ਸ਼ਾਮਲ ਹੈ। ਫਿਲਮ ਦੇ ਨਿਰਦੇਸ਼ਕ ਰਮੇਸ਼ ਸਿੱਪੀ ਇਸ ਰੀ-ਰਿਲੀਜ਼ ਨੂੰ ਜ਼ੋਰ-ਸ਼ੋਰ ਨਾਲ ਪ੍ਰਮੋਟ ਕਰ ਰਹੇ ਹਨ ਅਤੇ ਇਸ ਦੌਰਾਨ ਉਨ੍ਹਾਂ ਨੇ ਫਿਲਮ ਦੇ ਇੱਕ ਵੱਡੇ ਰਾਜ਼ ਤੋਂ ਪਰਦਾ ਚੁੱਕਿਆ ਹੈ।
ਰਮੇਸ਼ ਸਿੱਪੀ ਨੇ ਖੁਲਾਸਾ ਕੀਤਾ ਹੈ ਕਿ ਫਿਲਮ ਦੇ ਸਭ ਤੋਂ ਆਈਕਾਨਿਕ ਸੀਨ, ਯਾਨੀ ਕਿ ਪਾਣੀ ਦੀ ਟੈਂਕੀ ਵਾਲੇ ਸੀਨ ਲਈ, ਮਰਹੂਮ ਅਦਾਕਾਰ ਧਰਮਿੰਦਰ ਨੇ ਅਸਲ ਵਿੱਚ ਥੋੜ੍ਹੀ ਜਿਹੀ ਸ਼ਰਾਬ ਪੀਤੀ ਹੋਈ ਸੀ।
ਪਿਆਰ ਦੇ ਇਜ਼ਹਾਰ ਲਈ ਚੁਣੀ 'ਮੈਥਡ ਐਕਟਿੰਗ'
ਰਮੇਸ਼ ਸਿੱਪੀ ਨੇ ਦੱਸਿਆ ਕਿ ਧਰਮਿੰਦਰ ਨੇ ਅਜਿਹਾ ਇਸ ਲਈ ਕੀਤਾ ਸੀ ਤਾਂ ਜੋ ਉਹ ਟੈਂਕੀ 'ਤੇ ਖੜ੍ਹੇ ਹੋ ਕੇ ਹੇਮਾ ਮਾਲਿਨੀ ਲਈ ਆਪਣੇ ਸੱਚੇ ਪਿਆਰ ਦਾ ਇਜ਼ਹਾਰ ਸਹੀ ਢੰਗ ਨਾਲ ਕਰ ਸਕਣ। ਸਿੱਪੀ ਨੇ ਇੱਕ ਇੰਟਰਵਿਊ ਦੌਰਾਨ ਦੱਸਿਆ, "ਟੈਂਕੀ ਵਾਲੇ ਸੀਨ ਲਈ ਧਰਮਿੰਦਰ ਉਸ ਦਿਨ ਪੂਰੀ ਤਰ੍ਹਾਂ ਮੂਡ ਵਿੱਚ ਸਨ। ਉਨ੍ਹਾਂ ਨੇ ਕੁਝ ਪੈਗ ਪੀ ਰੱਖੇ ਸਨ"। ਉਨ੍ਹਾਂ ਨੇ ਕਿਹਾ ਕਿ ਇਹ ਸਾਫ਼ ਦਿਖਾਈ ਦੇ ਰਿਹਾ ਸੀ, ਕਿਉਂਕਿ ਧਰਮਿੰਦਰ ਟੈਂਕੀ 'ਤੇ ਚੜ੍ਹਦੇ-ਉਤਰਦੇ ਹਲਕੀ ਹਿਚਕੋਲੇ ਖਾ ਰਹੇ ਸਨ। ਨਿਰਦੇਸ਼ਕ ਨੇ ਕਿਹਾ ਕਿ ਜਦੋਂ ਉਹ ਖੁਦ ਧਰਮਿੰਦਰ ਦੇ ਪਿੱਛੇ ਟੈਂਕੀ 'ਤੇ ਚੜ੍ਹੇ ਤਾਂ ਧਰਮਿੰਦਰ ਨੇ ਕਿਹਾ ਕਿ 'ਕੁਝ ਨਹੀਂ ਹੋਵੇਗਾ, ਸਭ ਐਕਟਿੰਗ ਹੈ'। ਸਿੱਪੀ ਨੇ ਧਰਮਿੰਦਰ ਨੂੰ ਸੀਨ ਲਈ ਪੂਰੀ ਖੁੱਲ੍ਹ ਦਿੱਤੀ ਸੀ, ਕਿਉਂਕਿ ਇਹ ਉਨ੍ਹਾਂ ਦਾ ਸਾਰਿਆਂ ਦੇ ਸਾਹਮਣੇ ਪਿਆਰ ਦਾ ਇਜ਼ਹਾਰ ਸੀ।
ਉਹ ਆਪਣੀ ਮੁਹੱਬਤ ਕੁਰਬਾਨ ਕਰਨ ਲਈ ਵੀ ਤਿਆਰ ਸਨ, ਤਾਂ ਜੋ 'ਮੌਸੀ ਜੀ' ਵੀ ਮੰਨ ਜਾਣ।
ਰਮੇਸ਼ ਸਿੱਪੀ ਅਨੁਸਾਰ, ਧਰਮਿੰਦਰ ਨੇ ਮੈਥਡ ਐਕਟਿੰਗ ਦਾ ਰਾਹ ਇਸ ਲਈ ਚੁਣਿਆ ਤਾਂ ਜੋ ਉਹ ਹੇਮਾ ਮਾਲਿਨੀ ਲਈ ਆਪਣੇ ਸੱਚੇ ਪਿਆਰ ਨੂੰ ਸਵੀਕਾਰ ਕਰ ਸਕਣ। ਉਨ੍ਹਾਂ ਨੇ ਇਹ ਵੀ ਮੰਨਿਆ ਕਿ ਅਸਲ ਰੋਮਾਂਸ ਸਕ੍ਰੀਨ 'ਤੇ ਸਹੀ ਝਲਕਦਾ ਹੈ ਅਤੇ ਉਨ੍ਹਾਂ ਦਾ ਸੱਚਾ ਪਿਆਰ ਫਿਲਮ ਲਈ ਫਾਇਦੇਮੰਦ ਸਾਬਤ ਹੋਇਆ। ਦੱਸ ਦੇਈਏ ਕਿ ਧਰਮਿੰਦਰ ਅਤੇ ਹੇਮਾ ਮਾਲਿਨੀ ਦਾ ਪਿਆਰ ਇਸ ਫਿਲਮ ਦੌਰਾਨ ਵਧਿਆ ਅਤੇ ਉਨ੍ਹਾਂ ਨੇ 1980 ਵਿੱਚ ਵਿਆਹ ਕਰ ਲਿਆ, ਹਾਲਾਂਕਿ ਧਰਮਿੰਦਰ ਉਸ ਸਮੇਂ ਪਹਿਲਾਂ ਹੀ ਵਿਆਹੇ ਹੋਏ ਸਨ। ਧਰਮਿੰਦਰ ਦਾ ਦਿਹਾਂਤ ਹਾਲ ਹੀ ਵਿੱਚ 24 ਨਵੰਬਰ 2025 ਨੂੰ ਹੋਇਆ ਸੀ।