B'Day Spl : ਸੁਗੰਧਾ ਮਿਸ਼ਰਾ ਨੂੰ ਬਚਪਨ ਤੋਂ ਹੀ ਮਿਲੀ ਸੰਗੀਤ ਦੀ ਸੌਗਾਤ, ਜਾਣੋ ਜ਼ਿੰਦਗੀ ਦੇ ਅਹਿਮ ਕਿੱਸੇ
05/23/2024 10:29:00 AM
ਮੁੰਬਈ (ਬਿਊਰੋ): ਸੁੰਗਧਾ ਮਿਸ਼ਰਾ ਦੇ ਜੀਵਨ 'ਚ ਸੰਗੀਤ ਤੋਂ ਇਲਾਵਾ ਕਿਸੇ ਹੋਰ ਚੀਜ਼ ਲਈ ਕਦੇ ਵੀ ਜਗ੍ਹਾ ਨਹੀਂ ਸੀ, ਪਰ ਕਾਲਜ ਇੱਕ ਅਜਿਹਾ ਸੰਸਾਰ ਹੈ ਜੋ ਨਾ ਸਿਰਫ਼ ਤੁਹਾਨੂੰ ਆਪਣੇ ਨਾਲ ਆਹਮੋ-ਸਾਹਮਣੇ ਕਰਦਾ ਹੈ, ਸਗੋਂ ਤੁਹਾਡੀ ਕਾਬਲੀਅਤ ਨੂੰ ਵੀ ਦੁਨੀਆਂ ਦੇ ਸਾਹਮਣੇ ਲਿਆਉਂਦਾ ਹੈ। ਸੁਗੰਧਾ ਮਿਸ਼ਰਾ ਨਾਲ ਵੀ ਕੁਝ ਅਜਿਹਾ ਹੀ ਹੋਇਆ। ਸੁਗੰਧਾ ਗਾਇਕਾ, 23 ਮਈ 1988 ਨੂੰ ਜਲੰਧਰ, ਪੰਜਾਬ ਵਿੱਚ ਪੈਦਾ ਹੋਈ, ਇੱਕ ਐਕਟਰ ਦੇ ਨਾਲ-ਨਾਲ ਇੱਕ ਸਟੈਂਡਅੱਪ ਕਾਮੇਡੀਅਨ ਵੀ ਹੈ। ਬਹੁ-ਪ੍ਰਤਿਭਾਸ਼ਾਲੀ ਅਦਾਕਾਰਾ ਵਜੋਂ ਮਸ਼ਹੂਰ ਸੁਗੰਧਾ ਨੇ ਕਈ ਹੋਰ ਮਾਧਿਅਮਾਂ 'ਚ ਵੀ ਆਪਣਾ ਹੁਨਰ ਦਿਖਾਇਆ ਹੈ।
ਦੱਸ ਦਈਏ ਕਿ ਸੁਗੰਧਾ ਹੁਣ ਇੱਕ ਅਦਾਕਾਰਾ ਅਤੇ ਕਾਮੇਡੀਅਨ ਵਜੋਂ ਪੂਰੀ ਦੁਨੀਆਂ 'ਚ ਆਪਣਾ ਨਾਮ ਚਮਕਾ ਚੁੱਕੀ ਹੈ ਪਰ ਉਹ ਬਚਪਨ ਤੋਂ ਹੀ ਸੰਗੀਤ ਨਾਲ ਜੁੜੀ ਹੋਈ ਹੈ। ਉਹ ਸੰਗੀਤ ਨਾਲ ਜੁੜੇ ਵੱਕਾਰੀ ਇੰਦੌਰ ਘਰਾਣੇ ਨਾਲ ਸਬੰਧਤ ਹੈ ਅਤੇ ਉਹ ਸੰਗੀਤ ਵਿੱਚ ਆਪਣਾ ਕਰੀਅਰ ਬਣਾਉਣ ਵਾਲੇ ਆਪਣੇ ਪਰਿਵਾਰ ਦੀ ਚੌਥੀ ਪੀੜ੍ਹੀ ਹੈ। ਅਦਾਕਾਰਾ ਨੇ ਆਪਣੇ ਦਾਦਾ ਜੀ ਤੋਂ ਸੰਗੀਤ ਦੀ ਸਿੱਖਿਆ ਲਈ ਸੀ। ਉਸਨੇ 'ਸਾਰੇਗਾਮਾਪਾ ਸਿੰਗਿੰਗ ਸੁਪਰਸਟਾਰ' ਨਾਮ ਦੇ ਰਿਐਲਿਟੀ ਸ਼ੋਅ ਵਿੱਚ ਹਿੱਸਾ ਲਿਆ ਅਤੇ ਤੀਜੀ ਰਨਰ ਅੱਪ ਬਣੀ। ਉਸ ਨੇ ਕਈ ਸ਼ੋਅ ਹੋਸਟ ਵੀ ਕੀਤੇ ਹਨ ਅਤੇ ਕਈ ਫਿਲਮਾਂ ਨੂੰ ਆਪਣੀ ਆਵਾਜ਼ ਨਾਲ ਸਜਾਇਆ ਹੈ।
ਦੱਸਣਯੋਗ ਹੈ ਕਿ ਸੁਗੰਧਾ ਨੂੰ 'ਦਿ ਗ੍ਰੇਟ ਇੰਡੀਅਨ ਲਾਫਟਰ ਚੈਲੇਂਜ' ਦੇ ਆਡੀਸ਼ਨ 'ਚ ਚੁਣਿਆ ਗਿਆ ਸੀ, ਜਿਸ ਤੋਂ ਬਾਅਦ ਉਹ ਸਟੈਂਡ ਅੱਪ ਕਾਮੇਡੀਅਨ ਬਣ ਗਈ ਸੀ। ਦਰਅਸਲ, ਉਹ ਆਪਣੇ ਕਾਮੇਡੀਅਨ ਬਣਨ ਦਾ ਸਿਹਰਾ ਕਪਿਲ ਸ਼ਰਮਾ ਨੂੰ ਦਿੰਦੀ ਹੈ, ਜਿਸ ਦਾ ਜ਼ਿਕਰ ਉਸਨੇ 2014 ਵਿੱਚ ਦਿੱਤੇ ਇੱਕ ਇੰਟਰਵਿਊ ਵਿੱਚ ਵੀ ਕੀਤਾ ਸੀ। ਸੁਗੰਧਾ ਨੇ ਦੱਸਿਆ ਸੀ ਕਿ ਉਹ ਅਤੇ ਕਪਿਲ ਸ਼ਰਮਾ ਇੱਕੋ ਕਾਲਜ ਦੇ ਸਨ ਅਤੇ ਉਨ੍ਹਾਂ ਵਿੱਚ ਸਿਰਫ਼ ਇੱਕ ਬੈਚ ਦਾ ਫ਼ਰਕ ਸੀ। ਦੋਵੇਂ ਮਿਲ ਕੇ ਕਾਲਜ ਦੇ ਯੁਵਕ ਮੇਲਿਆਂ ਦਾ ਆਯੋਜਨ ਕਰਦੇ ਸਨ। ਜਦੋਂ ਕਪਿਲ ਥੀਏਟਰ ਜਾਂਦੇ ਸਨ ਤਾਂ ਸੁਗੰਧਾ ਗਾਇਕੀ ਦਾ ਜ਼ਿੰਮਾ ਲੈਂਦੀ ਸੀ। ਉਸ ਦੌਰਾਨ ਜਦੋਂ 'ਦਿ ਗ੍ਰੇਟ ਇੰਡੀਅਨ ਲਾਫਟਰ ਚੈਲੇਂਜ' ਲਈ ਆਡੀਸ਼ਨ ਹੋਇਆ ਤਾਂ ਰਾਜਬੀਰ ਕੌਰ ਅਤੇ ਭਾਰਤੀ ਦੇ ਨਾਲ ਸੁਗੰਧਾ ਮਿਸ਼ਰਾ ਨੂੰ ਵੀ ਚੁਣਿਆ ਗਿਆ।
