ਕੁੱਲ ਪ੍ਰਤੱਖ ਟੈਕਸ ਕੁਲੈਕਸ਼ਨ 26 ਫੀਸਦੀ ਵਧ ਕੇ 13.63 ਲੱਖ ਕਰੋੜ ਰੁਪਏ ਤੱਕ ਪਹੁੰਚਿਆ

ਨਵੀਂ ਦਿੱਲੀ- ਅਰਥਵਿਵਸਥਾ ਦੇ ਮੋਰਚੇ 'ਤੇ ਚੰਗੀ ਖ਼ਬਰ ਹੈ। ਕੋਰੋਨਾ ਮਹਾਮਾਰੀ ਤੋਂ ਬਾਅਦ ਦੇਸ਼ ਦੀ ਅਰਥਵਿਵਸਥਾ ਮੁੜ ਪਟਰੀ 'ਤੇ ਆ ਰਹੀ ਹੈ। ਮੌਜੂਦਾ ਵਿੱਤੀ ਸਾਲ 'ਚ ਹੁਣ ਤੱਕ ਕੁੱਲ ਪ੍ਰਤੱਖ ਟੈਕਸ ਕੁਲੈਕਸ਼ਨ 26 ਫੀਸਦੀ ਵਧ ਕੇ 13.63 ਲੱਖ ਕਰੋੜ ਰੁਪਏ ਤੋਂ ਜ਼ਿਆਦਾ ਹੋ ਗਿਆ ਹੈ। ਪਿਛਲੇ ਸਾਲ ਦੀ ਇਸ ਮਿਆਦ 'ਚ ਇਹ 10.83 ਲੱਖ ਕਰੋੜ ਰੁਪਏ (10.83 ਲੱਖ ਕਰੋੜ ਰੁਪਏ) ਰਹੀ ਸੀ।
ਵਿੱਤ ਮੰਤਰਾਲੇ ਨੇ ਐਤਵਾਰ ਨੂੰ ਜਾਰੀ ਇਕ ਬਿਆਨ 'ਚ ਕਿਹਾ ਕਿ ਵਿੱਤੀ ਸਾਲ 2022-23 'ਚ ਕੁੱਲ ਪ੍ਰਤੱਖ ਟੈਕਸ ਸੰਗ੍ਰਹਿ ਸਾਲਾਨਾ ਆਧਾਰ 'ਤੇ 26 ਫੀਸਦੀ ਵਧ ਕੇ 13,63,649 ਕਰੋੜ ਰੁਪਏ (13.63 ਲੱਖ ਕਰੋੜ) ਤੋਂ ਜ਼ਿਆਦਾ ਰਿਹਾ। ਇਹ ਵਾਧੇ 'ਚ ਮੁੱਖ ਤੌਰ 'ਤੇ ਸਰੋਤ 'ਤੇ ਟੈਕਸ ਕਟੌਤੀ (ਟੀ.ਡੀ.ਐੱਸ) ਅਤੇ ਕਾਰਪੋਰੇਟ ਐਡਵਾਂਸ ਟੈਕਸ ਸੰਗ੍ਰਹਿ ਦੇ ਬਿਹਤਰ ਪ੍ਰਦਰਸ਼ਨ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ ਹੈ।
ਮੰਤਰਾਲੇ ਦੇ ਅਨੁਸਾਰ, ਆਮਦਨ ਕਰ ਵਿਭਾਗ ਦੁਆਰਾ ਰਿਫੰਡ ਦੇ ਸਮਾਯੋਜਨ ਤੋਂ ਬਾਅਦ ਚਾਲੂ ਵਿੱਤੀ ਸਾਲ 'ਚ ਹੁਣ ਤੱਕ ਸ਼ੁੱਧ ਸਿੱਧਾ ਟੈਕਸ ਸੰਗ੍ਰਹਿ 11.35 ਲੱਖ ਕਰੋੜ ਰੁਪਏ ਰਿਹਾ। ਇਸ 'ਚ ਨਿੱਜੀ ਅਤੇ ਕਾਰਪੋਰੇਟ ਟੈਕਸ ਸ਼ਾਮਲ ਹਨ। ਇਹ ਕੇਂਦਰੀ ਬਜਟ 'ਚ ਪੂਰੇ ਸਾਲ ਲਈ ਤੈਅ ਕੀਤੇ ਗਏ ਟੀਚੇ ਦਾ ਲਗਭਗ 80 ਫੀਸਦੀ ਹੈ। ਵਿੱਤੀ ਸਾਲ 2022-23 ਲਈ ਸਿੱਧੇ ਟੈਕਸ ਸੰਗ੍ਰਹਿ ਦਾ ਬਜਟ ਅਨੁਮਾਨ 14.20 ਲੱਖ ਕਰੋੜ ਰੁਪਏ ਰੱਖਿਆ ਗਿਆ ਹੈ।
ਵਿੱਤ ਮੰਤਰਾਲੇ ਨੇ ਕਿਹਾ ਕਿ ਕੇਂਦਰੀ ਪ੍ਰਤੱਖ ਟੈਕਸ ਬੋਰਡ (ਸੀ.ਬੀ.ਡੀ.ਟੀ.) ਨੇ 17 ਦਸੰਬਰ, 2022 ਤੱਕ 2.28 ਲੱਖ ਕਰੋੜ ਰੁਪਏ ਦੇ ਰਿਫੰਡ ਜਾਰੀ ਕੀਤੇ ਹਨ, ਜੋ ਇਕ ਸਾਲ ਪਹਿਲਾਂ ਨਾਲੋਂ 68 ਫੀਸਦੀ ਵੱਧ ਹੈ। ਬਿਆਨ ਦੇ ਅਨੁਸਾਰ, 13,63,649 ਕਰੋੜ ਰੁਪਏ ਦੇ ਕੁੱਲ ਸੰਗ੍ਰਹਿ 'ਚ 7.25 ਲੱਖ ਕਰੋੜ ਰੁਪਏ ਦਾ ਕਾਰਪੋਰੇਟ ਟੈਕਸ ਅਤੇ 6.35 ਲੱਖ ਕਰੋੜ ਰੁਪਏ ਦਾ ਨਿੱਜੀ ਆਮਦਨ ਕਰ (ਪੀ.ਆਈ.ਟੀ) ਸ਼ਾਮਲ ਹੈ। ਕੁੱਲ ਡਾਇਰੈਕਟ ਟੈਕਸ ਕਲੈਕਸ਼ਨ 'ਚ 5.21 ਲੱਖ ਕਰੋੜ ਰੁਪਏ ਦਾ ਐਡਵਾਂਸ ਟੈਕਸ ਕਲੈਕਸ਼ਨ, 6.44 ਲੱਖ ਕਰੋੜ ਰੁਪਏ ਦਾ ਟੀ.ਡੀ.ਐੱਸ ਅਤੇ 1.40 ਲੱਖ ਕਰੋੜ ਰੁਪਏ ਦਾ ਸਵੈ-ਮੁਲਾਂਕਣ ਟੈਕਸ ਸ਼ਾਮਲ ਹੈ।