‘ਰੇਲਗੱਡੀਆਂ ’ਚ ਅਪਰਾਧ’ ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾਵੇ!

ਦੇਸ਼ ਦੀ ‘ਜੀਵਨ ਰੇਖਾ’ ਕਹਾਉਣ ਵਾਲੀਆਂ ਭਾਰਤੀ ਰੇਲਾਂ ’ਚ ਚੋਰੀ, ਹੱਤਿਆ ਅਤੇ ਜਬਰ-ਜ਼ਨਾਹ ਵਰਗੀਆਂ ਘਟਨਾਵਾਂ ਜਾਰੀ ਰਹਿਣ ਕਾਰਨ ਇਨ੍ਹਾਂ ’ਚ ਆਮ ਆਦਮੀ ਲਈ ਸਫ਼ਰ ਕਰਨਾ ਔਖਾ ਹੁੰਦਾ ਜਾ ਰਿਹਾ ਹੈ, ਜਿਨ੍ਹਾਂ ਦੀਆਂ ਇਸੇ ਸਾਲ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :

* 11 ਜਨਵਰੀ ਨੂੰ ਮੁੰਬਈ ਦੀ ਇਕ ਲੋਕਲ ਟ੍ਰੇਨ ’ਚ ਇਕ ਯਾਤਰੀ ਨੇ ਹਿੰਦੀ ’ਚ ਗੱਲ ਕਰ ਰਹੇ ਸਹਿ-ਯਾਤਰੀਆਂ ਨੂੰ ਜ਼ਬਰਦਸਤੀ ਮਰਾਠੀ ਬੋਲਣ ਲਈ ਮਜਬੂਰ ਕੀਤਾ ਅਤੇ ਮਨ੍ਹਾ ਕਰਨ ’ਤੇ ਉਨ੍ਹਾਂ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਅਤੇ ਅਪਸ਼ਬਦ ਕਹੇ।

* 24 ਜਨਵਰੀ ਨੂੰ ‘ਠਾਣੇ-ਡੋਂਬੀਵਲੀ ਲੋਕਲ ਟ੍ਰੇਨ’ ’ਚ ਭੀੜ ਕਾਰਨ ਸੀਟ ਨਾ ਮਿਲਣ ਕਰਕੇ ਹੋਏ ਵਿਵਾਦ ’ਚ 2 ਮਹਿਲਾ ਯਾਤਰੀਆਂ ਨੇ ਇਕ-ਦੂਜੀ ਦੇ ਵਾਲ ਖਿੱਚੇ ਅਤੇ ਆਪਸ ’ਚ ਜੰਮ ਕੇ ਲੱਤਾਂ-ਮੁੱਕੇ ਵਰ੍ਹਾਏ।

* 8 ਫਰਵਰੀ ਨੂੰ ਮੁੰਬਈ ਦੇ ਘਾਟਕੋਪਰ ਸਟੇਸ਼ਨ ’ਤੇ ਇਕ ਲੋਕਲ ਟ੍ਰੇਨ ਦੇ ਲੇਡੀਜ਼ ਕੋਚ ’ਚ ਇਕ ਮਰਦ ਬੁਰਕਾ ਪਹਿਨ ਕੇ ਵੜ ਗਿਆ ਅਤੇ ਮਹਿਲਾ ਯਾਤਰੀਆਂ ਨਾਲ ਛੇੜਛਾੜ ਕਰਨ ਦੀ ਕੋਸ਼ਿਸ਼ ਕੀਤੀ।

* 11 ਫਰਵਰੀ ਨੂੰ ‘ਭੋਪਾਲ’ (ਮੱਧ ਪ੍ਰਦੇਸ਼) ’ਚ ਜੀ. ਟੀ. ਐਕਸਪ੍ਰੈੱਸ ’ਚ ‘ਬੀਨਾ’ ਅਤੇ ‘ਵਿਦਿਸ਼ਾ’ ਸਟੇਸ਼ਨਾਂ ਵਿਚਾਲੇ 2-3 ਵੇਟਰਾਂ ਵਲੋਂ ਇਕ ਯਾਤਰੀ ਨੂੰ ਬੇਰਹਿਮੀ ਨਾਲ ਕੁੱਟਦੇ ਹੋਏ ਘਸੀਟ ਕੇ ਪੈਂਟਰੀ ਕਾਰ ’ਚ ਲੈ ਜਾਣ ਦੀ ਵੀਡੀਓ ਵਾਇਰਲ ਹੋਈ।

* 15 ਫਰਵਰੀ ਨੂੰ ਅਹਿਮਦਾਬਾਦ-ਗੋਰਖਪੁਰ ਐਕਸਪ੍ਰੈੱਸ ’ਚ ਸਫ਼ਰ ਕਰ ਰਹੀ ਇਕ ਐੱਨ. ਸੀ. ਸੀ. ਕੈਡੇਟ ਮੁਟਿਆਰ ਸਟੇਸ਼ਨ ’ਤੇ ਭੀੜ ਕਾਰਨ ਟਿਕਟ ਨਹੀਂ ਲੈ ਸਕੀ ਅਤੇ ਏ. ਸੀ. ਕੋਚ ’ਚ ਚੜ੍ਹ ਗਈ। ਉਸ ਨੂੰ ਸੀਟ ਦਿਵਾਉਣ ਦਾ ਝਾਂਸਾ ਦੇ ਕੇ ਇਕ ਟੀ. ਟੀ. ਨੇ ਕੈਬਿਨ ’ਚ ਲੈ ਜਾ ਕੇ ਉਸ ਨਾਲ ਜਬਰ-ਜ਼ਨਾਹ ਕਰ ਦਿੱਤਾ ਅਤੇ ‘ਦੇਵਰੀਆ’ ’ਚ ਟ੍ਰੇਨ ਤੋਂ ਉਤਰ ਕੇ ਫ਼ਰਾਰ ਹੋ ਗਿਆ।

* 6 ਮਾਰਚ ਨੂੰ ਹੋਲੀ ਦੇ ਤਿਉਹਾਰ ਦੌਰਾਨ ਖਰੂਦੀਆਂ ਨੇ ਬਿਹਾਰ ’ਚ ਹੌਲੀ ਰਫਤਾਰ ਨਾਲ ਚੱਲ ਰਹੀ ਇਕ ਪੈਸੰਜਰ ਟ੍ਰੇਨ ’ਤੇ ਚਿੱਕੜ, ਰੰਗ ਅਤੇ ਗੋਹਾ ਸੁੱਟਿਆ, ਜਿਸ ਨਾਲ ਖਿੜਕੀ ਕੋਲ ਬੈਠੇ ਯਾਤਰੀਆਂ ’ਚ ਦਹਿਸ਼ਤ ਫੈਲ ਗਈ।

* 13 ਮਾਰਚ ਨੂੰ ਪਟਨਾ ਜਾ ਰਹੀ ਬਿਹਾਰ ਰੂਟ ਦੀ ਇਕ ਟ੍ਰੇਨ ਦੇ ਜਨਰਲ ਕੋਚ ’ਚ ਸੀਟ ਨੂੰ ਲੈ ਕੇ ਇਕ ਮਹਿਲਾ ਅਤੇ ਨੌਜਵਾਨ ਵਿਚਾਲੇ ਹਿੰਸਕ ਝੜਪ ਹੋਈ। ਮਹਿਲਾ ਨੇ ਨੌਜਵਾਨ ਨੂੰ ਚੱਪਲ ਦਿਖਾ ਕੇ ਗਾਲ੍ਹਾਂ ਕੱਢੀਆਂ, ਜਿਸ ਤੋਂ ਬਾਅਦ ਨੌਜਵਾਨ ਨੇ ਮਹਿਲਾ ਨੂੰ ਚੱਲਦੀ ਟ੍ਰੇਨ ’ਚ ਕਈ ਥੱਪੜ ਜੜ ਦਿੱਤੇ।

* 19 ਮਾਰਚ ਨੂੰ ‘ਆਲਾ ਹਜ਼ਰਤ ਐਕਸਪ੍ਰੈੱਸ ਟ੍ਰੇਨ’ ’ਚ ਗਲਤੀ ਨਾਲ ਸਲੀਪਰ ਕੋਚ ’ਚ ਸਫ਼ਰ ਕਰ ਰਹੀ ਇਕ ਮਹਿਲਾ ਯਾਤਰੀ ਨਾਲ ਟੀ. ਟੀ. ਈ. ‘ਦਵਾਰਕਾ ਸ਼ਰਮਾ’ ਵਲੋਂ ਬਦਸਲੂਕੀ ਅਤੇ ਉਸ ’ਤੇ ਹਮਲਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ।

* 27 ਅਪ੍ਰੈਲ ਨੂੰ ‘ਬਰੇਲੀ’ (ਉੱਤਰ ਪ੍ਰਦੇਸ਼) ਤੋਂ ਰਿਸ਼ੀਕੇਸ਼-ਮੁਜ਼ੱਫਰਪੁਰ ਵਿਸ਼ੇਸ਼ ਟ੍ਰੇਨ ’ਚ ਸਫ਼ਰ ਕਰ ਰਹੇ ਬਿਹਾਰ ਦੇ ਰਹਿਣ ਵਾਲੇ ਮੌਲਵੀ ਤੌਸੀਫ਼ ਰਜ਼ਾ ਦੀ ਲਾਸ਼ ਪਾਲਪੁਰ ਰੇਲਵੇ ਕ੍ਰਾਸਿੰਗ ਦੇ ਟ੍ਰੈਕ ਦੇ ਨੇੜੇ ਪਈ ਮਿਲੀ।

ਮ੍ਰਿਤਕ ਦੀ ਪਤਨੀ ਤਬੱਸੁਮ ਦਾ ਦੋਸ਼ ਹੈ ਕਿ ਉਸ ਦੇ ਪਤੀ ਦੀ ਮੌਤ ਟ੍ਰੇਨ ’ਚ ਕਈ ਲੋਕਾਂ ਵਲੋਂ ਉਸ ਦੀ ਕੁੱਟਮਾਰ ਕਰਨ ਕਾਰਨ ਹੋਈ ਅਤੇ ਦੋਸ਼ੀਆਂ ਨੇ ਕਤਲ ਨੂੰ ਹਾਦਸੇ ਦਾ ਰੂਪ ਦੇਣ ਲਈ ਉਸ ਦੀ ਲਾਸ਼ ਚੱਲਦੀ ਟ੍ਰੇਨ ਤੋਂ ਬਾਹਰ ਸੁੱਟ ਦਿੱਤੀ।

* 2 ਮਈ ਨੂੰ ਬਿਹਾਰ ’ਚ ਗਯਾ-ਪਟਨਾ ਰੇਲ ਸੈਕਸ਼ਨ ’ਚ ‘ਬੇਲਾਗੰਜ’ ਥਾਣਾ ਖੇਤਰ ’ਚ 2-3 ਨੌਜਵਾਨਾਂ ਨੇ ਇਕ ਮੁਟਿਆਰ ਨੂੰ ਵਰਗਲਾ ਕੇ ਚੇਨ ਪੁਲਿੰਗ ਕਰਕੇ ਟ੍ਰੇਨ ਤੋਂ ਹੇਠਾਂ ਉਤਾਰ ਕੇ ਉਸ ਨਾਲ ਜਬਰ-ਜ਼ਨਾਹ ਕਰ ਦਿੱਤਾ।

* 11 ਮਈ ਨੂੰ ਉੱਤਰ ਪ੍ਰਦੇਸ਼ ’ਚ ‘ਗੁਰਪ੍ਰੀਤ ਸਿੰਘ’ ਨਾਂ ਦੇ ਇਕ ਸਾਬਕਾ ਫ਼ੌਜੀ ਨੇ 26 ਘੰਟਿਆਂ ਦੇ ਅੰਦਰ 3 ਲੋਕਾਂ ਦੀ ਹੱਤਿਆ ਕਰ ਦਿੱਤੀ। 2 ਹੱਤਿਆਵਾਂ ਉਸ ਨੇ ਚੰਦੌਲੀ ਜ਼ਿਲੇ ’ਚ 2 ਵੱਖ-ਵੱਖ ਰੇਲਗੱਡੀਆਂ ’ਚ ਦਾਖ਼ਲ ਹੋ ਕੇ ਕੀਤੀਆਂ, ਜਦਕਿ ਤੀਜੀ ਘਟਨਾ ’ਚ ਉਸਨੇ ਇਕ ਹਸਪਤਾਲ ’ਚ ਇਲਾਜ ਕਰਵਾਉਣ ਦੇ ਬਹਾਨੇ ਦਾਖ਼ਲ ਹੋ ਕੇ ਇਕ ਮਹਿਲਾ ਨੂੰ ਆਪਣਾ ਸ਼ਿਕਾਰ ਬਣਾਇਆ ਜੋ ਉੱਥੇ ਇਲਾਜ ਕਰਵਾ ਰਹੀ ਸੀ।

* 11 ਮਈ ਨੂੰ ਹੀ ‘ਪਲਾਰੁਵੀ ਐਕਸਪ੍ਰੈੱਸ’ ’ਚ ਆਪਣੇ ਦਾਦੇ ਨਾਲ ਕੇਰਲਮ ਤੋਂ ਤਾਮਿਲਨਾਡੂ ’ਚ ਆਪਣੇ ਘਰ ਜਾ ਰਹੀ 6 ਸਾਲ ਦੀ ਬੱਚੀ ਦਾ ਯੌਨ ਸ਼ੋਸ਼ਣ ਕਰਨ ਦੇ ਦੋਸ਼ ’ਚ ਇਕ 40 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।

ਉਕਤ ਘਟਨਾਵਾਂ ਤੋਂ ਸਾਫ਼ ਹੈ ਕਿ ਰੇਲਗੱਡੀਆਂ ’ਚ ਗੁੰਡਾਗਰਦੀ ਕਿਸ ਕਦਰ ਵਧਦੀ ਜਾ ਰਹੀ ਹੈ। ਇਸ ਲਈ ਰੇਲ ਮੰਤਰਾਲੇ ਨੂੰ ਇਸ ਸਬੰਧ ’ਚ ਤੁਰੰਤ ਜ਼ਰੂਰੀ ਕਦਮ ਚੁੱਕ ਕੇ ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣੀ ਚਾਹੀਦੀ ਹੈ।

—ਵਿਜੇ ਕੁਮਾਰ