‘ਦੇਸ਼ ’ਚ ਜਬਰਨ ਵਸੂਲੀ ਗਿਰੋਹਾਂ ਦੀ’ ਸਰਗਰਮੀ ਕਾਰਨ ਆਮ ਲੋਕ ਦਹਿਸ਼ਤ ’ਚ!

ਰਾਜਧਾਨੀ ਦਿੱਲੀ ਸਮੇਤ ਦੇਸ਼ ਦੇ ਅਨੇਕਾਂ ਹਿੱਸਿਆਂ ’ਚ ਗੈਂਗਸਟਰਾਂ ਅਤੇ ਉਨ੍ਹਾਂ ਦੇ ਗੁਰਗਿਆਂ ਦੇ ‘ਜਬਰਨ ਵਸੂਲੀ ਗਿਰੋਹ’ (ਰੰਗਦਾਰੀ ਮੰਗਣ ਵਾਲੇ) ਸਰਗਰਮ ਹਨ, ਜੋ ਮੰਗੀ ਗਈ ਰਕਮ ਨਾ ਮਿਲਣ ’ਤੇ ਹੱਤਿਆ ਤੱਕ ਕਰਨ ਤੋਂ ਗੁਰੇਜ਼ ਨਹੀਂ ਕਰਦੇ।

ਇਹ ਗਿਰੋਹ ਮੁੱਖ ਤੌਰ ’ਤੇ ਵਪਾਰੀਆਂ ਅਤੇ ਆਮ ਲੋਕਾਂ ਤੱਕ ਨੂੰ ਕਿਸੇ ਨਾ ਕਿਸੇ ਬਹਾਨੇ ਨਿਸ਼ਾਨਾ ਬਣਾ ਕੇ ਬਲੈਕਮੇਲ ਕਰ ਰਹੇ ਹਨ, ਜਿਨ੍ਹਾਂ ਦੀਅਾਂ ਇਸੇ ਸਾਲ ਦੀਆਂ ਪਿਛਲੇ 5 ਮਹੀਨਿਆਂ ਦੀਆਂ ਘਟਨਾਵਾਂ ਹੇਠਾਂ ਦਰਜ ਹਨ :

* 16 ਫਰਵਰੀ ਨੂੰ ‘ਗੋਰਖਪੁਰ’ (ਉੱਤਰ ਪ੍ਰਦੇਸ਼) ’ਚ ‘ਪੰਕਜ ਦੀਕਸ਼ਿਤ’ ਨਾਂ ਦੇ ਇਕ ਡਾਕਟਰ ਨੂੰ ਗੈਰ-ਸਮਾਜਿਕ ਅਨਸਰਾਂ ਵੱਲੋਂ 15 ਲੱਖ ਰੁਪਏ ਰੰਗਦਾਰੀ ਦੇਣ ਦਾ ਸੁਨੇਹਾ ਮਿਲਣ ਅਤੇ ਰੰਗਦਾਰੀ ਨਾ ਦੇਣ ’ਤੇ ਉਸਦੇ ਹੋਟਲ ਤੇ ਪੂਰੇ ਪਰਿਵਾਰ ਨੂੰ ਖ਼ਤਮ ਕਰ ਦੇਣ ਦੀ ਧਮਕੀ ਮਿਲਣ ’ਤੇ ਪੂਰਾ ਪਰਿਵਾਰ ਦਹਿਸ਼ਤ ’ਚ ਆ ਗਿਆ।

* 4 ਅਪ੍ਰੈਲ ਨੂੰ ‘ਖਰਗੋਨ’ (ਮੱਧ ਪ੍ਰਦੇਸ਼) ’ਚ ਇਕ ਕਾਟਨ ਵਪਾਰੀ ਦੇ ਘਰ ’ਤੇ ਅੰਨ੍ਹੇਵਾਹ ਗੋਲੀਬਾਰੀ ਕਰ ਕੇ ‘ਲਾਰੈਂਸ ਬਿਸ਼ਨੋਈ ਗੈਂਗ’ ਦੇ ਨਾਂ ’ਤੇ 10 ਕਰੋੜ ਰੁਪਏ ਦੀ ਰੰਗਦਾਰੀ ਮੰਗੀ ਗਈ ਅਤੇ ਮੰਗ ਪੂਰੀ ਨਾ ਕਰਨ ’ਤੇ ਹੈਂਡ ਗ੍ਰੇਨੇਡ ਨਾਲ ਹਮਲਾ ਕਰਨ ਦੀ ਧਮਕੀ ਦੇਣ ਦੇ ਮਾਮਲੇ ’ਚ ਪੁਲਸ ਨੇ ਕੇਸ ਦਰਜ ਕੀਤਾ।

* 18 ਮਈ ਨੂੰ ‘ਬੋਕਾਰੋ’ (ਝਾਰਖੰਡ) ’ਚ ਰੰਗਦਾਰੀ ਦੀ ਮੰਗ ਦੇ ਕਾਰਨ ‘ਜੈਰਾਮ ਪ੍ਰਸਾਦ’ ਨਾਂ ਦੇ ਵਿਅਕਤੀ ਦੀ ਕੁਝ ਲੋਕਾਂ ਨੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ।

* 29 ਮਈ ਨੂੰ ‘ਗਾਜ਼ੀਪੁਰ’ (ਉੱਤਰ ਪ੍ਰਦੇਸ਼) ’ਚ ਹੋਟਲ ਕਾਰੋਬਾਰੀ ‘ਆਲੋਕ ਰਾਏ’ ਵੱਲੋਂ ਰੰਗਦਾਰੀ ਦੇਣ ਤੋਂ ਇਨਕਾਰ ਕਰਨ ’ਤੇ ਸਥਾਨਕ ‘ਕਟਰਾ ਗੈਂਗ’ ਦੇ ਮੈਂਬਰਾਂ ਨੇ ਉਨ੍ਹਾਂ ਦੇ ਬੇਟੇ ‘ਵਿਨੀਤ ਰਾਏ’ ਦੀ ਹੱਤਿਆ ਕਰ ਦਿੱਤੀ। ਉੱਤਰ ਪ੍ਰਦੇਸ਼ ਪੁਲਸ ਨੇ ਬਾਅਦ ’ਚ ਐਨਕਾਊਂਟਰ ’ਚ ਉਕਤ ਕਾਂਡ ਦੇ ਮੁੱਖ ਦੋਸ਼ੀ ‘ਕਮਲੇਸ਼’ ਨੂੰ ਢੇਰ ਕਰ ਦਿੱਤਾ ।

* 2 ਜੂਨ ਨੂੰ ‘ਮੁੰਗੇਰ’ (ਬਿਹਾਰ) ’ਚ ਅਪਰਾਧੀਆਂ ਨੇ ਰੰਗਦਾਰੀ ਨਾ ਦੇਣ ’ਤੇ ਖੇਤ ’ਚ ਸੁੱਤੇ ਪਏ ਕਿਸਾਨ ‘ਮਨਸੂਰੀ ਯਾਦਵ’ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਜ਼ਿਕਰਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਉਕਤ ਬਦਮਾਸ਼ਾਂ ਨੇ ‘ਮਨਸੂਰੀ ਯਾਦਵ’ ਤੋਂ ਰੰਗਦਾਰੀ ਦੀ ਮੰਗ ਕੀਤੀ ਸੀ ਅਤੇ ਨਾ ਦੇਣ ’ਤੇ ਜਾਨੋਂ ਮਾਰ ਦੇਣ ਦੀ ਧਮਕੀ ਦਿੱਤੀ ਸੀ।

* 3 ਜੂਨ ਨੂੰ ‘ਗੁਰੂਗ੍ਰਾਮ’ ਪੁਲਸ ਨੇ ਰੰਗਦਾਰੀ ਲਈ ਲੋਕਾਂ ਦਾ ਅਗਵਾ ਕਰਨ ਵਾਲੇ ‘ਨਿਤਿਨ’ ਨੂੰ ਐਨਕਾਊਂਟਰ ’ਚ ਜ਼ਖ਼ਮੀ ਕਰ ਕੇ ਗ੍ਰਿਫ਼ਤਾਰ ਕੀਤਾ।

* 17 ਜੂਨ ਨੂੰ ‘ਪਾਨੀਪਤ’ (ਹਰਿਆਣਾ) ਤੋਂ ਇਕ 12 ਸਾਲਾ ਬੱਚੇ ਨੂੰ ਅਗਵਾ ਕਰ ਕੇ 1.5 ਕਰੋੜ ਰੁਪਏ ਰੰਗਦਾਰੀ ਮੰਗਣ ਦੇ ਸਿਲਸਿਲੇ ’ਚ ਪੁਲਸ ਨੇ ਇਕ ਔਰਤ ਸਮੇਤ 3 ਦੋਸ਼ੀਆਂ ਨੂੰ ‘ਰੋਹਤਕ’ ਤੋਂ ਗ੍ਰਿਫ਼ਤਾਰ ਕਰਨ ਦੇ ਨਾਲ ਹੀ ਬੱਚੇ ਨੂੰ ਵੀ ਉਨ੍ਹਾਂ ਦੇ ਕਬਜ਼ੇ ਵਿਚੋਂ ਛੁਡਵਾਇਆ।

* 26 ਜੂਨ ਨੂੰ ‘ਅਸੰਧ’ (ਹਰਿਆਣਾ) ’ਚ ਇਕ ਮਠਿਆਈ ਦੀ ਦੁਕਾਨ ਦੇ ਮਾਲਕ ਤੋਂ 1 ਕਰੋੜ ਰੁਪਏ ਦੀ ਰੰਗਦਾਰੀ ਮੰਗਣ ਅਤੇ ਮੰਗ ਪੂਰੀ ਨਾ ਕਰਨ ’ਤੇ ਗੋਲੀ ਮਾਰਨ ਦੀ ਧਮਕੀ ਦੇਣ ਦੇ ਸਿਲਸਿਲੇ ’ਚ ਪੁਲਸ ਨੇ ਕੇਸ ਦਰਜ ਕੀਤਾ।

* 29 ਜੂਨ ਨੂੰ ‘ਸਾਕਚੀ’ (ਜਮਸ਼ੇਦਪੁਰ, ਝਾਰਖੰਡ) ’ਚ ਇਕ ਨੌਜਵਾਨ ਨੇ ਇਕ ਦੁਕਾਨਦਾਰ ਵੱਲੋਂ ਰੰਗਦਾਰੀ ਦੇਣ ਤੋਂ ਇਨਕਾਰ ਕਰਨ ’ਤੇ ਚਾਕੂਆਂ ਨਾਲ ਵਾਰ ਕਰ ਕੇ ਉਸਨੂੰ ਜ਼ਖ਼ਮੀ ਕਰ ਦਿੱਤਾ।

* 10 ਜੁਲਾਈ ਨੂੰ ‘ਜਲੰਧਰ’ (ਪੰਜਾਬ) ’ਚ ਇਕ ਫਾਇਨਾਂਸਰ ਨੂੰ ਰਸਤੇ ’ਚ ਰੋਕ ਕੇ ਅਤੇ ਹਥਿਆਰ ਦਿਖਾ ਕੇ ਉਸ ਤੋਂ ਫਿਰੌਤੀ ਮੰਗਣ ਅਤੇ ਵਿਦੇਸ਼ੀ ਨੰਬਰਾਂ ਤੋਂ ਫ਼ੋਨ ਕਰਵਾ ਕੇ ਉਸਨੂੰ ਸ਼ਿਕਾਇਤ ਵਾਪਸ ਲੈਣ ਲਈ ਧਮਕਾਉਣ ਦੇ ਮਾਮਲੇ ’ਚ ਪੁਲਸ ਨੇ 5 ਲੋਕਾਂ ਵਿਰੁੱਧ ਕੇਸ ਦਰਜ ਕੀਤਾ।

* 12 ਜੁਲਾਈ ਨੂੰ ‘ਜਲੰਧਰ’ (ਪੰਜਾਬ) ਸਥਿਤ ‘ਕਰਮਾ ਫੈਸ਼ਨ ਸਟੂਡੀਓ’ ਦੇ ਮਾਲਕ ਨੂੰ ਵਿਦੇਸ਼ ’ਚ ਬੈਠੇ ਗੈਂਗਸਟਰ ‘ਡੋਨੀ ਬਲ’ ਨੇ 50 ਲੱਖ ਰੁਪਏ ਫਿਰੌਤੀ ਦੇਣ ਦਾ ਸੁਨੇਹਾ ਭੇਜਿਆ ਅਤੇ ਰਕਮ ਨਾ ਦੇਣ ’ਤੇ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ।

* 12 ਜੁਲਾਈ ਨੂੰ ਹੀ ‘ਦਿੱਲੀ’ ਪੁਲਸ ਨੇ ਇਕ ਵਪਾਰੀ ਤੋਂ 5 ਕਰੋੜ ਰੁਪਏ ਰੰਗਦਾਰੀ ਮੰਗਣ ਦੇ ਮਾਮਲੇ ’ਚ ਵਿਦੇਸ਼ ’ਚ ਮੌਜੂਦ ਗੈਂਗਸਟਰ ‘ਹੈਰੀ ਬਾਕਸਰ’ ਦੇ 3 ਸ਼ੂਟਰਾਂ ‘ਸ਼ਿਵ ਗੋਵਿੰਦ’, ‘ਅਭਿਨਵ’ ਉਰਫ਼ ‘ਆਕਾਸ਼’ ਅਤੇ ‘ਵਿਵੇਕ’ ਨੂੰ ਗ੍ਰਿਫ਼ਤਾਰ ਕੀਤਾ। ਇਨ੍ਹਾਂ ਕੋਲੋਂ ਪੁਲਸ ਨੇ 3 ਅਤਿਆਧੁਨਿਕ ਪਿਸਤੌਲ, 26 ਕਾਰਤੂਸ ਅਤੇ ਮੋਬਾਈਲ ਫ਼ੋਨ ਬਰਾਮਦ ਕੀਤੇ।

ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਦੇ ਵਿਸ਼ੇ ’ਚ ਪੁਲਸ ਦਾ ਕਹਿਣਾ ਹੈ ਕਿ ਵਸੂਲੀ ਦੀ ਕਾਲ ਆਉਣ ਤੋਂ ਬਾਅਦ ਵਿਚੋਲੇ ਵੀ ਸਮਝੌਤਾ ਕਰਵਾਉਣ ਲਈ ਸਰਗਰਮ ਹੋ ਜਾਂਦੇ ਹਨ ਅਤੇ ਇਨ੍ਹਾਂ ’ਚ ਕਈ ਪੁਲਸ ਵਾਲੇ ਵੀ ਸ਼ਾਮਲ ਹਨ। ਜਬਰਨ ਵਸੂਲੀ ਕਰਨ ਵਾਲੇ ਗਿਰੋਹਾਂ ਕਾਰਨ ਲੋਕਾਂ ’ਚ ਦਹਿਸ਼ਤ ਦਾ ਮਾਹੌਲ ਹੈ। ਇਸ ਲਈ ਅਜਿਹੇ ਗਿਰੋਹਾਂ ਨੂੰ ਸਖ਼ਤੀ ਨਾਲ ਫੌਲਾਦੀ ਹੱਥਾਂ ਨਾਲ ਕੁਚਲਣ ਦੀ ਲੋੜ ਹੈ ਤਾਂ ਜੋ ਲੋਕ ਬਿਨਾਂ ਕਿਸੇ ਡਰ ਤੋਂ ਆਪਣਾ ਕਾਰੋਬਾਰ ਕਰ ਸਕਣ ਅਤੇ ਨਿਸ਼ਚਿੰਤ ਹੋ ਕੇ ਜੀਅ ਸਕਣ।

—ਵਿਜੇ ਕੁਮਾਰ