ਨਿਸ਼ਾਨੇਬਾਜ਼ਾਂ ਨੇ ਚੋਟੀ ਦੇ ਰਾਈਫਲ ਕੋਚ ’ਤੇ ਬੰਦੂਕ ਨਾਲ ਛੇੜਛਾੜ ਦਾ ਦੋਸ਼ ਲਗਾਇਆ

ਨਵੀਂ ਦਿੱਲੀ- ਇਕ ਨਾਮਵਰ ਰਾਸ਼ਟਰੀ ਕੋਚ ’ਤੇ ਕੁਝ ਨਿਸ਼ਾਨੇਬਾਜ਼ਾਂ ਦੇ ਮਾਪਿਆਂ ਨੇ ਉਨ੍ਹਾਂ ਦੇ ਬੱਚਿਆਂ ਦੀਆਂ ਰਾਈਫਲਾਂ ਨਾਲ ਛੇੜਛਾੜ ਕਰਨ ਦਾ ਦੋਸ਼ ਲਗਾਇਆ ਹੈ, ਜਿਸ ਨੂੰ ਰਾਸ਼ਟਰੀ ਮਹਾਸੰਘ ਨੇ ਨਕਾਰ ਦਿੱਤਾ ਹੈ। ਕਥਿਤ ਤੌਰ ’ਤੇ ਪ੍ਰਭਾਵਿਤ ਨਿਸ਼ਾਨੇਬਾਜ਼ਾਂ ’ਚੋਂ ਇਕ ਦੇ ਮਾਤਾ-ਪਿਤਾ ਨੇ ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ ’ਤੇ ਮੰਗਲਵਾਰ ਨੂੰ ਦੱਸਿਆ ਕਿ ਕੋਚ ਨੇ ਉਨ੍ਹਾਂ ਦੇ ਬੇਟੇ ਦੀ ਰਾਈਫਲ ਨਾਲ ਛੇੜਛਾੜ ਕੀਤੀ ਸੀ, ਜਿਸ ਨਾਲ ਉਨ੍ਹਾਂ ਨੂੰ ਨਵਾਂ ਉਪਕਰਣ ਖਰੀਦਣ ਲਈ ਮਜਬੂਰ ਕੀਤਾ ਗਿਆ ਸੀ। ਹਾਲਾਂਕਿ ਉਨ੍ਹਾਂ ਨੇ ਕੋਚ ਦੀ ਪਛਾਣ ਦੱਸਣ ਤੋਂ ਵੀ ਇਨਕਾਰ ਕਰ ਦਿੱਤਾ।
ਸ਼ੂਟਰ ਦੇ ਪਿਤਾ ਨੇ ਕਿਹਾ, ‘‘ਕੋਚ ਨੇ ਮੇਰੇ ਬੇਟੇ ਦੀ ਬੰਦੂਕ ਨੂੰ ਨੁਕਸਾਨ ਪਹੁੰਚਾਇਆ, ਇਸ ਲਈ ਸਾਨੂੰ ਨਵੀਂ ਬੰਦੂਕ ਖਰੀਦਣੀ ਪਈ। ਵਿਸ਼ਵ ਕੱਪ ਤੋਂ ਇਕ ਦਿਨ ਪਹਿਲਾਂ ਕੋਈ ਕੋਚ ਨਿਸ਼ਾਨੇਬਾਜ਼ ਦੀ ਇਜਾਜ਼ਤ ਤੋਂ ਬਿਨਾਂ ਬੰਦੂਕ ਵਿਚ ਅਜਿਹੇ ਬਦਲਾਅ ਕਿਵੇਂ ਕਰ ਸਕਦਾ ਹੈ?’’
ਉਨ੍ਹਾਂ ਕਿਹਾ, ‘‘ਇਹ ਪਿਛਲੇ ਸਾਲ ਭੋਪਾਲ ’ਚ ਆਈ.ਐੱਸ.ਐੱਸ.ਐੱਫ. ਵਿਸ਼ਵ ਕੱਪ ਦੌਰਾਨ ਹੋਇਆ ਸੀ। ਅਜਿਹਾ ਉਦੋਂ ਹੁੰਦਾ ਹੈ ਜਦੋਂ ਵੀ ਇਹ ਕੋਚ ਟੀਮ ਨਾਲ ਵਿਦੇਸ਼ ਜਾਂਦਾ ਹੈ। ਕੋਚ ਦੀ ਦਲੀਲ ਹੈ ਕਿ ਤੁਹਾਨੂੰ ਪ੍ਰਯੋਗ ਕਰਨ ਦੀ ਲੋੜ ਹੈ ਪਰ ਵਿਸ਼ਵ ਕੱਪ ਤੋਂ ਇਕ ਦਿਨ ਪਹਿਲਾਂ ਤੁਸੀਂ ਕਿਸ ਤਰ੍ਹਾਂ ਦੇ ਪ੍ਰਯੋਗ ਕਰ ਰਹੇ ਹੋ।’’
ਐੱਨ. ਆਰ. ਏ. ਆਈ. ਦੇ ਜਨਰਲ ਸਕੱਤਰ ਰਾਜੀਵ ਭਾਟੀਆ ਨੇ ਹਾਲਾਂਕਿ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। ਭਾਟੀਆ ਨੇ ਕਿਹਾ, ‘‘ਮੈਨੂੰ ਕੋਈ ਪਤਾ ਨਹੀਂ ਹੈ। ਕਿਸੇ ਨੇ ਸਾਡੇ ਨਾਲ ਸੰਪਰਕ ਨਹੀਂ ਕੀਤਾ। ਸਾਡੇ ਕੋਲ ਕਿਸੇ ਨੇ ਸ਼ਿਕਾਇਤ ਦਰਜ ਨਹੀਂ ਕਰਵਾਈ ਹੈ। ਮੈਨੂੰ ਨਹੀਂ ਲੱਗਦਾ ਕਿ ਅਜਿਹਾ ਹੋਇਆ ਹੋਵੇਗਾ। ਜੇਕਰ ਅਜਿਹਾ ਹੁੰਦਾ ਤਾਂ ਗੋਲੀ ਚਲਾਉਣ ਵਾਲਿਆਂ ਨੂੰ ਖੁੱਲ੍ਹ ਕੇ ਅੱਗੇ ਆਉਣਾ ਚਾਹੀਦਾ ਸੀ। ਜਦੋਂ ਉਸ ਦੀ ਚੋਣ ਨਹੀਂ ਕੀਤੀ ਗਈ ਤਾਂ ਹੀ ਅਜਿਹੇ ਦੋਸ਼ ਕਿਉਂ ਲਾਏ ਜਾ ਰਹੇ ਹਨ? ਵਿਸ਼ਵ ਕੱਪ ਦਾ ਆਯੋਜਨ ਪਿਛਲੇ ਸਾਲ ਮਾਰਚ ਵਿਚ ਭੋਪਾਲ ’ਚ ਹੋਇਆ ਸੀ ਅਤੇ ਉਦੋਂ ਤੋਂ ਹੁਣ ਤਕ ਬਹੁਤ ਸਮਾਂ ਬੀਤ ਗਿਆ ਹੈ।’’
ਇਕ ਹੋਰ ਨਿਸ਼ਾਨੇਬਾਜ਼ ਦੇ ਪਿਤਾ ਨੇ ਦੋਸ਼ ਲਾਇਆ ਕਿ ਕੋਚ ਦਾ ਬੰਦੂਕਾਂ ਨਾਲ ਛੇੜਛਾੜ ਦਾ ਪੁਰਾਣਾ ਰਿਕਾਰਡ ਹੈ। ਉਸ ਨੇ ਕਿਹਾ, ‘‘ਮੇਰਾ ਬੇਟਾ ਵਿਸ਼ਵ ਕੱਪ ਖੇਡਣ ਗਿਆ ਸੀ ਅਤੇ ਕੋਚ ਅਤੇ ਜਿਊਰੀ (ਮੈਂਬਰਾਂ) ਨੇ ਬੰਦੂਕ ਨਾਲ ਛੇੜਛਾੜ ਕੀਤੀ। ਕੋਚ ਦਾ ਬੰਦੂਕਾਂ ਨਾਲ ਛੇੜਛਾੜ ਦਾ ਪੁਰਾਣਾ ਰਿਕਾਰਡ ਹੈ। ਅਸੀਂ ਇਸ ਨੂੰ ਐੱਨ.ਆਰ.ਏ.ਆਈ. ਦੇ ਧਿਆਨ ਵਿਚ ਨਹੀਂ ਲਿਆਂਦਾ ਕਿਉਂਕਿ ਸਾਨੂੰ ਬਦਲੇ ਦਾ ਡਰ ਹੈ।