ਪੰਜਾਬ ਪੁੱਜਾ Team India ਦਾ 'ਗੱਬਰ', ਬੱਚਿਆਂ ਨਾਲ ਖੇਡੀ ਕ੍ਰਿਕਟ
Monday, Dec 15, 2025 - 05:11 PM (IST)
ਮੋਗਾ (ਕਸ਼ਿਸ਼)- ਮੋਗਾ ਦੇ ਬੀਬੀਐਸ ਗਰੁੱਪ ਆਫ਼ ਸਕੂਲਜ਼ ਨੇ 18ਵੀਆਂ ਬੀਬੀਐਸ ਖੇਡਾਂ ਲਈ ਇੱਕ ਇਨਾਮ ਵੰਡ ਸਮਾਰੋਹ ਦਾ ਆਯੋਜਨ ਕੀਤਾ। ਇਸ ਸਮਾਰੋਹ 'ਚ ਭਾਰਤੀ ਕ੍ਰਿਕਟ ਟੀਮ ਦੇ 'ਗੱਬਰ' ਭਾਵ ਸ਼ਿਖਰ ਧਵਨ ਨੇ ਵਿਸ਼ੇਸ਼ ਤੌਰ 'ਤੇ ਸ਼ਿਰਕਤ ਕੀਤੀ ਅਤੇ ਬੱਚਿਆਂ ਨੂੰ ਉਤਸ਼ਾਹਿਤ ਕੀਤਾ। ਇਨ੍ਹਾਂ ਖੇਡਾਂ ਦਾ ਮੁੱਖ ਉਦੇਸ਼ ਬੱਚਿਆਂ ਦੀ ਪੜ੍ਹਾਈ ਦੇ ਨਾਲ-ਨਾਲ ਉਨ੍ਹਾਂ ਦੀਆਂ ਸਰੀਰਕ ਯੋਗਤਾਵਾਂ ਨੂੰ ਮਜ਼ਬੂਤ ਕਰਨਾ ਹੈ। ਇਸ ਮੌਕੇ 'ਤੇ ਸ਼ੇਖਰ ਧਵਨ ਨੇ ਮਸ਼ਾਲ ਜਗਾ ਕੇ ਖੇਡਾਂ ਦੀ ਸ਼ੁਰੂਆਤ ਕੀਤੀ। ਬੱਚਿਆਂ ਨੇ ਪੂਰਾ ਦਿਨ ਚੱਲੀਆਂ ਖੇਡਾਂ ਦਾ ਪੂਰਾ ਆਨੰਦ ਮਾਣਿਆ। ਸ਼ਿਖਰ ਧਵਨ ਨੇ ਛੋਟੇ ਬੱਚਿਆਂ ਨਾਲ ਕ੍ਰਿਕਟ ਵੀ ਖੇਡੀ। ਲੋਕ ਧਵਨ ਨੂੰ ਕ੍ਰਿਕਟ ਖੇਡਦਾ ਦੇਖ ਬਹੁਤ ਉਤਸ਼ਾਹਤ ਸਨ।
ਬੀਬੀਐੱਸ ਗਰੁੱਪ ਆਫ ਸਕੂਲਜ਼ ਦੇ ਚੇਅਰਮੈਨ ਸੰਜੀਵ ਸੈਣੀ ਨੇ ਕਿਹਾ ਕਿ ਬੱਚਿਆਂ ਨੂੰ ਪੜ੍ਹਾਈ ਦੇ ਨਾਲ-ਨਾਲ ਖੇਡਾਂ ਖੇਡਣ ਲਈ ਉਤਸ਼ਾਹਿਤ ਕੀਤਾ ਜਾਣਾ ਚਾਹੀਦਾ ਹੈ। ਬੱਚਿਆਂ ਨੂੰ ਖੇਡਾਂ ਨਾਲ ਜੋੜਨਾ ਮਹੱਤਵਪੂਰਨ ਹੈ ਤਾਂ ਜੋ ਉਹ ਬੁਰਾਈਆਂ ਤੋਂ ਦੂਰ ਰਹਿਣ ਅਤੇ ਖੇਡਾਂ ਨਾਲ ਵੱਡੇ ਹੋਣ। ਸ਼ਿਖਰ ਧਵਨ ਨੂੰ ਭਾਰਤੀ ਕ੍ਰਿਕਟ 'ਚ ਦਿੱਤੇ ਉਨ੍ਹਾਂ ਦੇ ਮਹੱਤਵਪੂਰਨ ਯੋਗਦਾਨ ਲਈ ਜਾਣਿਆ ਜਾਂਦਾ ਹੈ। ਉਨ੍ਹਾਂ ਟੈਸਟ, ਵਨਡੇ ਤੇ ਟੀ20 ਕ੍ਰਿਕਟ 'ਚ ਭਾਰਤ ਲਈ ਕਈ ਯਾਦਗਾਰ ਪਾਰੀਆਂ ਖੇਡੀਆਂ। ਇਸ ਤੋਂ ਇਲਾਵਾ ਉਨ੍ਹਾਂ ਆਈਪੀਐੱਲ 'ਚ ਪੰਜਾਬ ਕਿੰਗਜ਼ ਲਈ ਕਪਤਾਨੀ ਵੀ ਕੀਤੀ ਹੈ।
