ਫੁੱਟਬਾਲਰ ਮੌਰੋ ਦੀ ਵਿਆਹੁਤਾ ਜ਼ਿੰਦਗੀ ਖਤਰੇ ''ਚ, ਪਤਨੀ ਨੇ ਸਾੜੀ ਦੋਵਾਂ ਦੀ ਫੋਟੋ

ਜਲੰਧਰ - ਅਰਜਨਟੀਨਾ ਦੇ ਫੁੱਟਬਾਲਰ ਮੌਰੋ ਇਕਾਰਡੀ ਤੇ ਉਸ ਦੀ ਮਾਡਲ ਪਤਨੀ ਵਾਂਡਾ ਵਿਚ ਦੂਰੀਆਂ ਹੋਰ ਵਧ ਗਈਆਂ ਹਨ। ਬੀਤੇ ਦਿਨੀਂ ਖਬਰ ਆਈ ਸੀ ਕਿ ਦੋਵਾਂ ਦਾ ਰਿਸ਼ਤਾ ਠੀਕ ਨਹੀਂ ਚੱਲ ਰਿਹਾ ਹੈ। ਇਸ ਵਿਚਾਲੇ ਵਾਂਡਾ ਨੇ ਆਪਣੇ ਇੰਸਾਟਾਗ੍ਰਾਮ 'ਤੇ ਇਕ ਵੀਡੀਓ ਪੋਸਟ ਕਰ ਕੇ ਸਾਰੀ ਸਥਿਤੀ ਸਪੱਸ਼ਟ ਕਰ ਦਿੱਤੀ ਹੈ। ਉਕਤ ਵੀਡੀਓ ਵਿਚ ਵਾਂਡਾ ਮੌਰੋ ਦੇ ਨਾਲ ਵਾਲੀ ਫੋਟੋ ਸਾੜਦੀ ਹੋਈ ਦਿਸ ਰਹੀ ਹੈ। ਇਸ ਤੋਂ ਇਹ ਕਿਆਸ ਲੱਗ ਰਹੇ ਹਨ ਕਿ ਵਾਂਡਾ ਵਲੋਂ ਰਿਸ਼ਤੇ ਨੂੰ ਖਤਮ ਕਰ ਦਿੱਤਾ ਗਿਆ ਹੈ।

ਵੱਡੀ ਗੱਲ ਇਹ ਹੈ ਕਿ ਇਹ ਜੋੜਾ ਅਜੇ ਇਕ ਦਿਨ ਪਹਿਲਾਂ ਹੀ ਫੁੱਟਬਾਲ ਮੈਚ ਇਕੱਠੇ ਦੇਖਣ ਪਹੁੰਚਿਆ ਸੀ। ਦੋਵਾਂ ਦੇ ਰਿਸ਼ਤੇ ਵਿਚ ਅਚਾਨਕ ਇੰਨੀ ਵੱਡੀ ਤਰੇੜ ਕਿਵੇਂ ਆ ਗਈ, ਇਸ ਨੂੰ ਲੈ ਕੇ ਅਜੇ ਸਥਿਤੀ ਸਪੱਸ਼ਟ ਨਹੀਂ ਹੈ ਪਰ ਦੱਸਿਆ ਜਾ ਰਿਹਾ ਹੈ ਕਿ ਮੌਰੋ ਦਾ ਕਿਸੇ ਹੋਰ ਲੜਕੀ ਨਾਲ ਚੱਕਰ ਚੱਲ ਰਿਹਾ ਹੈ, ਜਿਸ ਕਾਰਨ ਵਾਂਡਾ ਬੇਹੱਦ ਨਿਰਾਸ਼ ਸੀ। ਸ਼ਾਇਦ ਇਸੇ ਕਾਰਨ ਉਸ ਨੇ ਪਤੀ ਮੌਰੋ ਨਾਲੋਂ ਰਿਸ਼ਤੇ ਤੋੜਨ ਵਿਚ ਹੀ ਭਲਾਈ ਸਮਝੀ। 

ਵਾਂਡਾ ਦਾ ਇਸ ਤੋਂ ਪਹਿਲਾਂ 2008 ਵਿਚ ਮੈਕਸੀ ਲੋਪੇਜ਼ ਨਾਲ ਵਿਆਹ ਹੋਇਆ ਸੀ। 5 ਸਾਲ ਟਿਕੇ ਇਸ ਵਿਆਹ ਦੌਰਾਨ ਵਾਂਡਾ ਨੇ ਮੈਕਸੀ ਦੇ 3 ਬੇਟਿਆਂ ਨੂੰ ਜਨਮ ਦਿੱਤਾ। 2014 ਵਿਚ ਮੌਰੇ ਨਾਲ ਵਿਆਹ ਤੋਂ ਬਾਅਦ ਉਸ ਨੇ ਦੋ ਬੇਟੀਆਂ ਨੂੰ ਜਨਮ ਦਿੱਤਾ। ਜ਼ਿਕਰਯੋਗ ਹੈ ਕਿ ਮੌਰੋ ਨੇ ਜਦੋਂ ਵਾਂਡਾ ਨਾਲ ਵਿਆਹ ਕੀਤਾ, ਉਦੋਂ ਉਸ ਦੀ ਉਮਰ ਸਿਰਫ 21 ਸਾਲ ਦੀ ਸੀ। ਵਾਂਡਾ ਪੇਸ਼ੇ ਤੋਂ ਟੀ. ਵੀ. ਹੋਸਟ ਹੈ। ਉਹ ਫੁੱਟਬਾਲ ਏਜੰਟ ਰਹਿਣ ਦੇ ਨਾਲ ਕਈ ਕੰਪਨੀਆਂ ਵਿਚ ਮਾਡਲਿੰਗ ਵੀ ਕਰ ਚੁੱਕੀ ਹੈ।