ਭਾਰਤੀ ਪਹਿਲਵਾਨ ਸੁਮਿਤ ਨੂੰ ਫਾਈਨਲ 'ਚ ਮਿਲੀ ਬਾਈ, ਮਿਲਿਆ ਸੋਨ ਤਮਗਾ

ਗੋਲਡ ਕੋਸਟ, (ਬਿਊਰੋ)— ਕਾਮਨਵੈਲਥ ਗੇਮਸ 2018 ਵਿੱਚ ਭਾਰਤੀ ਪਹਿਲਵਾਨ ਸੁਮਿਤ ਨੇ 125 ਕਿਲੋਗ੍ਰਾਮ ਵਰਗ ਵਿੱਚ ਸੋਨ ਤਮਗਾ ਜਿੱਤ ਲਿਆ ਹੈ । ਸੁਮਿਤ ਨੂੰ ਫਾਈਨਲ ਮੁਕਾਬਲੇ ਵਿੱਚ ਨਾਈਜੀਰੀਆ ਦੇ ਸਿਨੀ ਬੋਲਟਿਕ ਨੇ ਟੱਕਰ ਦੇਣੀ ਸੀ । ਪਰ ਐਨ ਮੌਕੇ 'ਤੇ ਬੋਲਟਿਕ ਨੇ ਸੱਟ  ਦੇ ਕਾਰਨ ਮੈਚ ਲੜਨ ਤੋਂ ਮਨ੍ਹਾ ਕਰ ਦਿੱਤਾ। ਇਸ ਤਰ੍ਹਾਂ ਬਿਨਾਂ ਫਾਈਨਲ ਖੇਡੇ ਹੀ ਸੁਮਿਤ ਨੇ ਸੋਨ ਤਮਗੇ ਉੱਤੇ ਕਬਜ਼ਾ ਜਮਾ ਲਿਆ । ਸੋਨ ਤਮਗਾ ਜਿੱਤਦੇ ਹੀ ਸੁਮਿਤ ਨੇ ਆਪਣੇ ਮੋਡਿਆਂ ਉੱਤੇ ਇੰਡੀਅਨ ਫਲੈਗ ਰੱਖਿਆ ਅਤੇ ਗਰਾਉਂਡ ਦਾ ਚੱਕਰ ਲਗਾਉਂਦੇ ਹੋਏ ਦਰਸ਼ਕਾਂ ਦੀ ਪ੍ਰਸ਼ੰਸਾ ਸਵੀਕਾਰ ਕੀਤੀ । 

ਇਸ ਤੋਂ ਪਹਿਲਾਂ ਗੇਮਸ ਦੀ ਸ਼ੁਰੂਆਤ ਵਿੱਚ ਸੁਮਿਤ ਦਾ ਮੁਕਾਬਲਾ ਕੈਮਰੂਨ ਦੇ ਪਹਿਲਵਾਨ ਕਲਾਉਡ ਕਿਊਮੇਨ ਨਾਲ ਸੀ । ਪਰ ਐਨ ਮੌਕੇ 'ਤੇ ਕਲਾਉਡ ਮੁਕਾਬਲੇ ਤੋਂ ਪਿੱਛੇ ਹੱਟ ਗਏ ।  ਇਸਦਾ ਫਾਇਦਾ ਚੁੱਕ ਸੁਮਿਤ ਸੈਮੀਫਾਈਨਲ ਵਿੱਚ ਪਹੁੰਚ ਗਏ ਜਿੱਥੇ ਉਨ੍ਹਾਂ ਦਾ ਸਾਹਮਣਾ ਪਾਕਿਸਤਾਨ ਦੇ ਤਾਇਬ ਰਾਜਾ ਨਾਲ ਹੋਣਾ ਸੀ । ਉਮੀਦ ਮੁਤਾਬਕ ਹੀ ਪਹਿਲੇ ਹੀ ਰਾਉਂਡ ਵਿੱਚ ਦੋਨਾਂ ਵਿਚਾਲੇ ਸਖਤ ਮੁਕਾਬਲਾ ਦੇਖਣ ਨੂੰ ਮਿਲਿਆ । ਤਾਇਬ 125 ਕਿਲੋਗ੍ਰਾਮ  ਵਰਗ ਵਿੱਚ ਗੋਲਡ ਦੇ ਸਭ ਤੋਂ ਤਗੜੇ ਉਮੀਦਵਾਰਾਂ ਵਿੱਚੋਂ ਇੱਕ ਸਨ ।  

ਪਹਿਲੇ ਰਾਉਂਡ ਵਿੱਚ ਸੁਮਿਤ ਨੇ ਵੀ ਚੰਗੀ ਖੇਡ ਦਿਖਾਉਂਦੇ ਹੋਏ ਲੀਡ 3-2 ਦੀ ਕਰ ਲਈ ।  ਇਸਦੇ ਬਾਅਦ ਦੋਨਾਂ ਪਹਿਲਵਾਨਾਂ ਨੇ ਕੁਝ ਚੰਗੇ ਦਾਅ ਖੇਡੇ । ਪਰ ਫਿਰ ਅਚਾਨਕ ਸੁਮਿਤ ਪਾਕਿਸਤਾਨ ਦੇ ਪਹਿਲਵਾਨ ਉੱਤੇ ਹਾਵੀ ਹੁੰਦੇ ਨਜ਼ਰ ਆਏ । ਤਾਬੜਤੋੜ ਅੰਕ ਪ੍ਰਾਪਤ ਕਰਨ ਦੇ ਚਲਦੇ ਜਦੋਂ ਉਨ੍ਹਾਂ ਦੀ ਲੀਡ 10-4 ਤੱਕ ਪਹੁੰਚੀ ਤਾਂ ਰੈਫਰੀ ਨੇ ਵੀ ਉਨ੍ਹਾਂ ਨੂੰ ਤੁਰੰਤ ਜੇਤੂ ਐਲਾਨ ਦਿੱਤਾ।