ਇੰਪੈਕਟ ਖਿਡਾਰੀ ਨਿਯਮ ਨੇ ਖੇਡ ਦਾ ਸੰਤੁਲਨ ਵਿਗਾੜਿਆ : ਵਿਰਾਟ ਕੋਹਲੀ

ਬੈਂਗਲੁਰੂ, (ਭਾਸ਼ਾ)- ਕਪਤਾਨ ਰੋਹਿਤ ਸ਼ਰਮਾ ਨਾਲ ਸਹਿਮਤ ਹੁੰਦੇ ਹੋਏ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ ਇੰਪੈਕਟ ਖਿਡਾਰੀ ਨਿਯਮ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਇਹ ਖੇਡ ਦੇ ਸੰਤੁਲਨ ਨੂੰ ਵਿਗਾੜ ਰਿਹਾ ਹੈ। ਆਈਪੀਐੱਲ ਦੇ ਪਿਛਲੇ ਸੀਜ਼ਨ ਤੋਂ ਹੀ ਪਾਰੀ ਦੇ ਵਿਚਕਾਰ ਬਦਲਵੇਂ ਖਿਡਾਰੀਆਂ ਨੂੰ ਫੀਲਡਿੰਗ ਕਰਨ ਦਾ ਨਿਯਮ ਸ਼ੁਰੂ ਹੋ ਗਿਆ ਹੈ, ਜਿਸ 'ਤੇ ਰੋਹਿਤ ਨੇ ਵੀ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ। 

ਹੁਣ ਕੋਹਲੀ ਨੇ ਜੀਓ ਸਿਨੇਮਾ ਨੂੰ ਕਿਹਾ, “ਮੈਂ ਰੋਹਿਤ ਦਾ ਸਮਰਥਨ ਕਰਦਾ ਹਾਂ। ਮਨੋਰੰਜਨ ਖੇਡ ਦਾ ਇੱਕ ਪਹਿਲੂ ਹੈ ਪਰ ਇੱਕ ਸੰਤੁਲਨ ਹੋਣਾ ਚਾਹੀਦਾ ਹੈ। ਇਸ ਨਾਲ ਖੇਡ ਦਾ ਸੰਤੁਲਨ ਵਿਗੜਿਆ ਹੈ ਅਤੇ ਬਹੁਤ ਸਾਰੇ ਲੋਕ ਅਜਿਹਾ ਮਹਿਸੂਸ ਕਰਦੇ ਹਨ, ਸਿਰਫ ਮੈਂ ਹੀ ਨਹੀਂ।'' ਰੋਹਿਤ ਨੇ ਪੋਡਕਾਸਟ 'ਚ ਕਿਹਾ, ''ਮੈਂ ਇਸ ਨਿਯਮ ਦਾ ਪ੍ਰਸ਼ੰਸਕ ਨਹੀਂ ਹਾਂ। ਇਸ ਦਾ ਹਰਫਨਮੌਲਾ ਖਿਡਾਰੀਆਂ 'ਤੇ ਬੁਰਾ ਪ੍ਰਭਾਵ ਪਵੇਗਾ। ਕ੍ਰਿਕਟ 11 ਖਿਡਾਰੀਆਂ ਦੀ ਖੇਡ ਹੈ, 12 ਨਹੀਂ।'' ਆਈਪੀਐੱਲ ਦੇ ਇਸ ਸੀਜ਼ਨ 'ਚ ਅੱਠ ਵਾਰ 250 ਦੌੜਾਂ ਤੋਂ ਵੱਧ ਦਾ ਸਕੋਰ ਬਣਿਆ ਅਤੇ ਕੋਹਲੀ ਗੇਂਦਬਾਜ਼ਾਂ ਦੇ ਦਰਦ ਨੂੰ ਸਮਝਦੇ ਹਨ। ਉਸ ਨੇ ਕਿਹਾ, 'ਗੇਂਦਬਾਜ਼ ਹੈਰਾਨ ਹਨ ਕਿ ਕੀ ਕੀਤਾ ਜਾਵੇ। ਮੈਂ ਅਜਿਹੀ ਸਥਿਤੀ ਕਦੇ ਨਹੀਂ ਦੇਖੀ ਜਦੋਂ ਗੇਂਦਬਾਜ਼ ਸੋਚਦੇ ਹਨ ਕਿ ਉਹ ਹਰ ਗੇਂਦ 'ਤੇ ਚਾਰ ਜਾਂ ਛੇ ਦੌੜਾਂ ਦੇਣਗੇ। ਹਰ ਟੀਮ 'ਚ ਬੁਮਰਾਹ ਜਾਂ ਰਾਸ਼ਿਦ ਖਾਨ ਨਹੀਂ ਹੁੰਦੇ।'' 

ਉਸ ਨੇ ਕਿਹਾ, ''ਇਕ ਵਾਧੂ ਬੱਲੇਬਾਜ਼ ਦੇ ਕਾਰਨ ਮੈਂ ਪਾਵਰਪਲੇ 'ਚ 200 ਤੋਂ ਜ਼ਿਆਦਾ ਦੇ ਸਟ੍ਰਾਈਕ ਰੇਟ ਨਾਲ ਖੇਡ ਰਿਹਾ ਹਾਂ ਕਿਉਂਕਿ ਮੈਨੂੰ ਪਤਾ ਹੈ ਕਿ ਅੱਠਵੇਂ ਨੰਬਰ 'ਤੇ ਵੀ ਇਕ ਬੱਲੇਬਾਜ਼ ਹੈ। ਮੇਰਾ ਮੰਨਣਾ ਹੈ ਕਿ ਚੋਟੀ ਦੇ ਪੱਧਰ 'ਤੇ ਕ੍ਰਿਕਟ 'ਚ ਇਸ ਤਰ੍ਹਾਂ ਦਾ ਦਬਦਬਾ ਨਹੀਂ ਹੋਣਾ ਚਾਹੀਦਾ। ਬੀਸੀਸੀਆਈ ਦੇ ਸਕੱਤਰ ਜੈ ਸ਼ਾਹ ਨੇ ਕਿਹਾ ਸੀ ਕਿ ਇਹ ਨਿਯਮ ਇੱਕ ਤਜਰਬੇ ਵਜੋਂ ਲਾਗੂ ਕੀਤਾ ਗਿਆ ਹੈ ਤਾਂ ਜੋ ਇੱਕ ਮੈਚ ਵਿੱਚ ਦੋ ਭਾਰਤੀ ਖਿਡਾਰੀਆਂ ਨੂੰ ਮੌਕਾ ਮਿਲ ਸਕੇ। ਕੋਹਲੀ ਨੇ ਕਿਹਾ, "ਮੈਨੂੰ ਯਕੀਨ ਹੈ ਕਿ ਜੈ ਭਾਈ ਨੇ ਕਿਹਾ ਹੈ ਕਿ ਉਹ ਇਸ ਦੀ ਸਮੀਖਿਆ ਕਰਨਗੇ ਅਤੇ ਮੈਨੂੰ ਯਕੀਨ ਹੈ ਕਿ ਅਜਿਹੇ ਸਿੱਟੇ 'ਤੇ ਪਹੁੰਚੇਗਾ ਕਿ ਖੇਡ ਵਿੱਚ ਸੰਤੁਲਨ ਬਣਾਇਆ ਜਾ ਸਕੇ।" ਕ੍ਰਿਕਟ 'ਚ ਸਿਰਫ ਚੌਕੇ ਅਤੇ ਛੱਕੇ ਹੀ ਰੋਮਾਂਚਕ ਨਹੀਂ ਹਨ। 160 ਦਾ ਸਕੋਰ ਬਣਾ ਕੇ ਜਿੱਤਣਾ ਵੀ ਰੋਮਾਂਚਕ ਹੈ।