ਪੈਰਿਸ ਓਲੰਪਿਕ ਦੇ ਦੂਜੇ ਦੌਰ ''ਚ ਜੋਕੋਵਿਚ ਅਤੇ ਨਡਾਲ ਹੋ ਸਕਦੇ ਨੇ ਆਹਮੋ-ਸਾਹਮਣੇ
Thursday, Jul 25, 2024 - 05:50 PM (IST)
ਪੈਰਿਸ, (ਭਾਸ਼ਾ) : ਚੋਟੀ ਦਾ ਦਰਜਾ ਪ੍ਰਾਪਤ ਨੋਵਾਕ ਜੋਕੋਵਿਚ ਪੈਰਿਸ ਓਲੰਪਿਕ ਖੇਡਾਂ ਦੇ ਪੁਰਸ਼ ਸਿੰਗਲ ਟੈਨਿਸ ਮੁਕਾਬਲੇ ਦੇ ਦੂਜੇ ਦੌਰ ਵਿੱਚ ਆਪਣੇ ਕੱਟੜ ਵਿਰੋਧੀ ਰਾਫੇਲ ਨਡਾਲ ਨਾਲ ਭਿੜ ਸਕਦੇ ਹਨ। ਵੀਰਵਾਰ ਨੂੰ ਜਾਰੀ ਡਰਾਅ ਮੁਤਾਬਕ ਜੋਕੋਵਿਚ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਆਸਟ੍ਰੇਲੀਆ ਦੇ ਮੈਥਿਊ ਐਬਡੇਨ ਦੇ ਖਿਲਾਫ ਕਰਨਗੇ ਜਦਕਿ ਨਡਾਲ ਦਾ ਸਾਹਮਣਾ ਹੰਗਰੀ ਦੇ ਮਾਰਟਨ ਫੁਕੋਵਿਕਸ ਨਾਲ ਹੋਵੇਗਾ। ਇਹ ਮੈਚ ਜਿੱਤਣ ਵਾਲੇ ਖਿਡਾਰੀ ਦੂਜੇ ਗੇੜ ਵਿੱਚ ਆਹਮੋ-ਸਾਹਮਣੇ ਹੋਣਗੇ।
ਓਲੰਪਿਕ ਦੇ ਟੈਨਿਸ ਮੁਕਾਬਲੇ ਉਸੇ ਸਥਾਨ 'ਤੇ ਖੇਡੇ ਜਾਣਗੇ ਜਿੱਥੇ ਫ੍ਰੈਂਚ ਓਪਨ ਆਯੋਜਿਤ ਕੀਤਾ ਗਿਆ ਹੈ। ਨਡਾਲ ਨੇ ਫਰੈਂਚ ਓਪਨ ਵਿੱਚ ਆਪਣੇ 22 ਗ੍ਰੈਂਡ ਸਲੈਮ ਵਿੱਚੋਂ 14 ਖਿਤਾਬ ਜਿੱਤੇ ਹਨ। ਉਸਨੇ 2008 ਵਿੱਚ ਬੀਜਿੰਗ ਵਿੱਚ ਸਿੰਗਲਜ਼ ਵਿੱਚ ਅਤੇ 2016 ਵਿੱਚ ਰੀਓ ਵਿੱਚ ਮਾਰਕ ਲੋਪੇਜ਼ ਨਾਲ ਡਬਲਜ਼ ਵਰਗ ਵਿੱਚ ਸੋਨ ਤਗਮਾ ਜਿੱਤਿਆ ਸੀ। ਫਰੈਂਚ ਓਪਨ ਚੈਂਪੀਅਨ ਕਾਰਲੋਸ ਅਲਕਾਰਜ਼ ਦਾ ਸਾਹਮਣਾ ਪਹਿਲੇ ਦੌਰ 'ਚ ਲੇਬਨਾਨ ਦੇ ਖਿਡਾਰੀ ਹੈਦੀ ਹਬੀਬ ਨਾਲ ਹੋਵੇਗਾ।
ਮਹਿਲਾ ਵਰਗ 'ਚ ਚੋਟੀ ਦਾ ਦਰਜਾ ਪ੍ਰਾਪਤ ਪੋਲੈਂਡ ਦੀ ਇਗਾ ਸਵਿਤੇਕ ਦਾ ਸਾਹਮਣਾ ਪਹਿਲੇ ਦੌਰ 'ਚ ਰੋਮਾਨੀਆ ਦੀ ਇਰੀਨਾ ਕੈਮੇਲਾ ਬੇਗੂ ਨਾਲ ਹੋਵੇਗਾ ਜਦਕਿ ਦੂਜਾ ਦਰਜਾ ਪ੍ਰਾਪਤ ਅਮਰੀਕਾ ਦੀ ਕੋਕੋ ਗਫ ਆਸਟ੍ਰੇਲੀਆ ਦੀ ਅਜਲਾ ਟੋਮਲਜਾਨੋਵਿਚ ਨਾਲ ਭਿੜੇਗੀ।
