CSK ਨੇ ਬੱਲੇਬਾਜ਼ੀ ਕੋਚ ਮਾਈਕ ਹਸੀ ਨੂੰ ਅਹੁਦੇ ਤੋਂ ਹਟਾਇਆ; ਜੇਮਜ਼ ਫ਼ੋਸਟਰ ਦਾ ਭਵਿੱਖ ਵੀ ਅਨਿਸ਼ਚਿਤ

ਚੇਨੱਈ : ਚੇਨੱਈ ਸੁਪਰ ਕਿੰਗਜ਼ (CSK) ਪ੍ਰਬੰਧਕਾਂ ਨੇ 2027 ਸੀਜ਼ਨ ਤੋਂ ਪਹਿਲਾਂ ਟੀਮ ਵਿੱਚ ਕੀਤੇ ਜਾ ਰਹੇ ਵੱਡੇ ਬਦਲਾਅ (ਰੀਸਟ੍ਰਕਚਰਿੰਗ) ਤਹਿਤ ਆਪਣੇ ਬੱਲੇਬਾਜ਼ੀ ਕੋਚ ਅਤੇ ਆਸਟ੍ਰੇਲੀਆਈ ਦਿੱਗਜ ਮਾਈਕ ਹਸੀ ਨੂੰ ਕੋਚਿੰਗ ਟੀਮ ਤੋਂ ਹਟਾਉਣ ਦਾ ਫੈਸਲਾ ਕੀਤਾ ਹੈ। 'ਮਿਸਟਰ ਕ੍ਰਿਕਟ' ਦੇ ਨਾਂ ਨਾਲ ਜਾਣੇ ਜਾਂਦੇ ਹਸੀ ਨੇ ਖਿਡਾਰੀ ਵਜੋਂ 6 ਸਾਲ ਬਿਤਾਉਣ ਤੋਂ ਬਾਅਦ ਪਿਛਲੇ 8 ਸਾਲਾਂ ਤੋਂ ਸੀ.ਐੱਸ.ਕੇ. ਦੇ ਬੱਲੇਬਾਜ਼ੀ ਕੋਚ ਵਜੋਂ ਸੇਵਾਵਾਂ ਨਿਭਾਈਆਂ ਸਨ। ਟੀਮ ਵਿੱਚ ਇਸ ਬਦਲਾਅ ਦੇ ਹਿੱਸੇ ਵਜੋਂ ਮੁੱਖ ਕੋਚ ਸਟੀਫਨ ਫਲੇਮਿੰਗ ਦੀ ਜਗ੍ਹਾ ਜ਼ਹੀਰ ਖਾਨ ਨੂੰ ਨਿਯੁਕਤ ਕੀਤਾ ਗਿਆ ਹੈ, ਜਦਕਿ ਸਾਬਕਾ ਗੇਂਦਬਾਜ਼ੀ ਕੋਚ ਐਰਿਕ ਸਿਮੰਸ ਦੀ ਜਗ੍ਹਾ ਮੋਹਿਤ ਸ਼ਰਮਾ ਨੂੰ ਲਿਆਂਦਾ ਗਿਆ ਹੈ। ਇਸ ਤੋਂ ਇਲਾਵਾ ਫੀਲਡਿੰਗ ਕੋਚ ਜੇਮਜ਼ ਫ਼ੋਸਟਰ ਦਾ ਭਵਿੱਖ ਵੀ ਅਨਿਸ਼ਚਿਤ ਬਣਿਆ ਹੋਇਆ ਹੈ ਅਤੇ ਉਨ੍ਹਾਂ ਦੇ ਕਾਰਜਕਾਲ ਨੂੰ ਵਧਾਉਣ 'ਤੇ ਫਿਲਹਾਲ ਰੋਕ ਲਗਾ ਦਿੱਤੀ ਗਈ ਹੈ।

ਕਪਤਾਨ ਰੁਤੂਰਾਜ ਗਾਇਕਵਾੜ ਨਾਲ ਚੰਗੇ ਪੇਸ਼ੇਵਰ ਸਬੰਧ ਹੋਣ ਦੇ ਬਾਵਜੂਦ ਹਸੀ ਨੂੰ ਫ੍ਰੈਂਚਾਈਜ਼ੀ ਦੁਆਰਾ ਕੀਤੇ ਜਾ ਰਹੇ ਇਨ੍ਹਾਂ ਵੱਡੇ ਬਦਲਾਅ ਕਾਰਨ ਬਾਹਰ ਕੀਤਾ ਗਿਆ ਹੈ, ਪਰ ਰਿਪੋਰਟਾਂ ਅਨੁਸਾਰ ਉਹ ਹੋਰ ਆਈ.ਪੀ.ਐੱਲ. ਟੀਮਾਂ ਦੇ ਸੰਪਰਕ ਵਿੱਚ ਹਨ। ਫ੍ਰੈਂਚਾਈਜ਼ੀ ਵਿੱਚ ਜ਼ਹੀਰ ਖਾਨ ਅਤੇ ਮੋਹਿਤ ਸ਼ਰਮਾ ਦੀਆਂ ਨਵੀਆਂ ਨਿਯੁਕਤੀਆਂ ਵਿੱਚ ਐੱਮ.ਐੱਸ. ਧੋਨੀ ਦਾ ਵੱਡਾ ਪ੍ਰਭਾਵ ਦੇਖਣ ਨੂੰ ਮਿਲ ਰਿਹਾ ਹੈ। ਸੀ.ਐੱਸ.ਕੇ. ਦੇ ਸੂਤਰਾਂ ਅਨੁਸਾਰ ਬਾਕੀ ਕੋਚਿੰਗ ਅਹੁਦਿਆਂ ਬਾਰੇ ਅੰਤਿਮ ਫੈਸਲਾ ਮਾਲਕਣ ਰੂਪਾ ਗੁਰੂਨਾਥ ਦੇ ਦੱਖਣੀ ਅਫ਼ਰੀਕਾ ਤੋਂ ਭਾਰਤ ਪਰਤਣ ਤੋਂ ਬਾਅਦ ਧੋਨੀ ਅਤੇ ਜ਼ਹੀਰ ਨਾਲ ਚਰਚਾ ਕਰਕੇ ਲਿਆ ਜਾਵੇਗਾ।