ਖ਼ਰਾਬ ਪ੍ਰਦਰਸ਼ਨ ਕਾਰਨ ਬਰਮਿੰਘਮ ਫੀਨਿਕਸ ਨੇ ਸ਼ੇਨ ਬੌਂਡ ਨੂੰ ਮੁੱਖ ਕੋਚ ਦੇ ਅਹੁਦੇ ਤੋਂ ਹਟਾਇਆ

ਲੰਡਨ : 'ਦ ਹੰਡਰੇਡ' ਟੂਰਨਾਮੈਂਟ ਵਿੱਚ ਪੁਰਸ਼ ਟੀਮ ਦੇ ਖ਼ਰਾਬ ਪ੍ਰਦਰਸ਼ਨ ਤੋਂ ਬਾਅਦ ਬਰਮਿੰਘਮ ਫੀਨਿਕਸ ਨੇ ਮੁੱਖ ਕੋਚ ਸ਼ੇਨ ਬੌਂਡ ਨੂੰ ਉਨ੍ਹਾਂ ਦੇ ਦੋ ਸਾਲ ਦੇ ਸਮਝੌਤੇ ਦੇ ਵਿਚਕਾਰ ਹੀ ਅਹੁਦੇ ਤੋਂ ਹਟਾ ਦਿੱਤਾ ਹੈ। ਬੌਂਡ ਨੂੰ ਪਿਛਲੇ ਸਾਲ ਨਵੰਬਰ ਵਿੱਚ ਮੁੱਖ ਕੋਚ ਨਿਯੁਕਤ ਕੀਤਾ ਗਿਆ ਸੀ ਅਤੇ ਉਨ੍ਹਾਂ ਦਾ ਸਮਝੌਤਾ 2027 ਸੀਜ਼ਨ ਦੇ ਅੰਤ ਤੱਕ ਚੱਲਣਾ ਸੀ। ਹਾਲਾਂਕਿ, 'ਦ ਹੰਡਰੇਡ' ਦੇ ਇਸ ਸੀਜ਼ਨ ਵਿੱਚ ਟੀਮ ਨੇ ਪਹਿਲਾ ਮੈਚ ਜਿੱਤਣ ਤੋਂ ਬਾਅਦ ਲਗਾਤਾਰ ਸੱਤ ਮੈਚ ਹਾਰੇ, ਜਿਸ ਕਾਰਨ ਟੀਮ ਅੰਕ ਸੂਚੀ ਵਿੱਚ ਸਭ ਤੋਂ ਹੇਠਲੇ ਪਾਏਦਾਨ 'ਤੇ ਰਹੀ। ਇਸ ਤੋਂ ਬਾਅਦ ਫ੍ਰੈਂਚਾਈਜ਼ੀ ਪ੍ਰਬੰਧਕਾਂ ਨੇ ਬਦਲਾਅ ਕਰਨ ਦਾ ਫੈਸਲਾ ਕੀਤਾ। ਸ਼ੇਨ ਬੌਂਡ ਨੇ ਬੁੱਧਵਾਰ ਨੂੰ ਆਪਣੇ ਹਟਣ ਦੀ ਪੁਸ਼ਟੀ ਕਰਦਿਆਂ ਨਿਰਾਸ਼ਾ ਜ਼ਾਹਰ ਕੀਤੀ, ਪਰ ਮੰਨਿਆ ਕਿ ਟੀਮ ਦੇ ਨਤੀਜੇ ਚੰਗੇ ਨਹੀਂ ਰਹੇ।