ਗੁਜਰਾਤ ''ਚ ਜਨਮੇ ਧਾਕੜ Cricketer ਨੇ ਸਾਰੇ ਫਾਰਮੈਟਾਂ ਤੋਂ ਸੰਨਿਆਸ ਲੈਣ ਦਾ ਕਰ ''ਤਾ ਐਲਾਨ !

ਸਪੋਰਟਸ ਡੈਸਕ : ਨਿਊਜ਼ੀਲੈਂਡ ਦੇ ਸਾਬਕਾ ਸਲਾਮੀ ਬੱਲੇਬਾਜ਼ ਤੇ ਭਾਰਤੀ ਮੂਲ ਦੇ ਕ੍ਰਿਕਟਰ ਜੀਤ ਰਾਵਲ ਨੇ 2026-27 ਦੇ ਘਰੇਲੂ ਸੀਜ਼ਨ ਤੋਂ ਠੀਕ ਪਹਿਲਾਂ ਪ੍ਰੋਫੈਸ਼ਨਲ ਕ੍ਰਿਕਟ ਦੇ ਸਾਰੇ ਫਾਰਮੈਟਾਂ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। 38 ਸਾਲਾ ਖੱਬੇ ਹੱਥ ਦੇ ਇਸ ਬੱਲੇਬਾਜ਼ ਨੇ 2016 ਤੋਂ 2020 ਦਰਮਿਆਨ ਨਿਊਜ਼ੀਲੈਂਡ ਦੀ ਰਾਸ਼ਟਰੀ ਟੀਮ ਲਈ 24 ਟੈਸਟ ਮੈਚ ਖੇਡੇ ਹਨ।
 ਗੁਜਰਾਤ ਵਿੱਚ ਜਨਮੇ ਜੀਤ ਰਾਵਲ ਨੇ ਅਹਿਮਦਾਬਾਦ ਦੇ ਵਿਦਿਆਨਗਰ ਸਕੂਲ ਵਿੱਚ ਭਾਰਤ ਦੇ ਸਾਬਕਾ ਵਿਕਟਕੀਪਰ-ਬੱਲੇਬਾਜ਼ ਪਾਰਥਿਵ ਪਟੇਲ ਨਾਲ ਪੜ੍ਹਾਈ ਕੀਤੀ ਸੀ, ਜਿੱਥੇ ਉਹ ਪਾਰਥਿਵ ਦੇ ਓਪਨਿੰਗ ਪਾਰਟਨਰ ਹੁੰਦੇ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਦਾ ਪਰਿਵਾਰ ਨਿਊਜ਼ੀਲੈਂਡ ਦੇ ਆਕਲੈਂਡ ਸ਼ਹਿਰ ਵਿੱਚ ਵੱਸ ਗਿਆ। ਉੱਥੇ ਉਨ੍ਹਾਂ ਨੇ ਨਿਊਜ਼ੀਲੈਂਡ ਅੰਡਰ-19 ਟੀਮ ਰਾਹੀਂ ਆਪਣੀ ਪਛਾਣ ਬਣਾਈ ਅਤੇ ਦਸੰਬਰ 2008 ਵਿੱਚ ਵੈਸਟਇੰਡੀਜ਼ ਵਿਰੁੱਧ ਆਕਲੈਂਡ ਵੱਲੋਂ ਫਰਸਟ-ਕਲਾਸ ਡੈਬਿਊ ਕੀਤਾ।
ਜੀਤ ਰਾਵਲ ਨੇ ਸਾਲ 2016 ਵਿੱਚ ਕ੍ਰਾਈਸਟਚਰਚ ਵਿਖੇ ਪਾਕਿਸਤਾਨ ਵਿਰੁੱਧ ਆਪਣਾ ਟੈਸਟ ਡੈਬਿਊ ਕੀਤਾ ਸੀ। ਆਪਣੇ 24 ਟੈਸਟ ਮੈਚਾਂ ਵਿੱਚ ਉਨ੍ਹਾਂ ਨੇ 1 ਸੈਂਕੜਾ ਅਤੇ 7 ਅਰਧ-ਸੈਂਕੜੇ ਲਗਾਏ। ਉਹ ਸਾਲ 2021 ਵਿੱਚ ਭਾਰਤ ਨੂੰ ਹਰਾ ਕੇ ਪਹਿਲਾ ਵਰਲਡ ਟੈਸਟ ਚੈਂਪੀਅਨਸ਼ਿਪ (WTC) ਖਿਤਾਬ ਜਿੱਤਣ ਵਾਲੀ ਨਿਊਜ਼ੀਲੈਂਡ ਟੀਮ ਦਾ ਹਿੱਸਾ ਵੀ ਸਨ।
 ਨਿਊਜ਼ੀਲੈਂਡ ਦੇ ਘਰੇਲੂ ਕ੍ਰਿਕਟ ਵਿੱਚ ਰਾਵਲ ਦੀ ਗਿਣਤੀ ਸਭ ਤੋਂ ਭਰੋਸੇਮੰਦ ਬੱਲੇਬਾਜ਼ਾਂ ਵਿੱਚ ਹੁੰਦੀ ਹੈ। ਉਨ੍ਹਾਂ ਨੇ ਆਪਣੀਆਂ 292 ਫਰਸਟ-ਕਲਾਸ ਪਾਰੀਆਂ ਵਿੱਚੋਂ 285 ਵਾਰ ਓਪਨਰ ਵਜੋਂ ਬੱਲੇਬਾਜ਼ੀ ਕੀਤੀ ਅਤੇ 37.36 ਦੀ ਔਸਤ ਨਾਲ 10,127 ਦੌੜਾਂ ਬਣਾਈਆਂ, ਜਿਸ ਵਿੱਚ 23 ਸੈਂਕੜੇ ਸ਼ਾਮਲ ਹਨ। ਦਸੰਬਰ 2025 ਵਿੱਚ ਉਹ ਫਰਸਟ-ਕਲਾਸ ਕ੍ਰਿਕਟ ਵਿੱਚ 10,000 ਰਨ ਪੂਰੇ ਕਰਨ ਵਾਲੇ ਨਿਊਜ਼ੀਲੈਂਡ ਦੇ 30ਵੇਂ ਬੱਲੇਬਾਜ਼ ਬਣੇ ਸਨ। ਉਨ੍ਹਾਂ ਨੇ ਪਲੰਕੇਟ ਸ਼ੀਲਡ ਵਿੱਚ 8,662 ਰਨ ਬਣਾਏ ਹਨ। ਕਪਤਾਨ ਵਜੋਂ ਉਨ੍ਹਾਂ ਨੇ 2024-25 ਸੀਜ਼ਨ ਵਿੱਚ ਨੌਰਦਰਨ ਡਿਸਟ੍ਰਿਕਟਸ ਟੀਮ ਨੂੰ ਪਲੰਕੇਟ ਸ਼ੀਲਡ ਦਾ ਖਿਤਾਬ ਦਿਵਾਇਆ ਸੀ।
 ਸੰਨਿਆਸ ਦਾ ਐਲਾਨ ਕਰਦਿਆਂ ਰਾਵਲ ਨੇ ਕਿਹਾ ਕਿ ਬਲੈਕ ਕੈਪਸ ਲਈ ਖੇਡਣਾ ਉਨ੍ਹਾਂ ਦਾ ਅਤੇ ਉਨ੍ਹਾਂ ਦੇ ਪਿਤਾ ਦਾ ਬਚਪਨ ਦਾ ਸੁਪਨਾ ਸੀ, ਜਿਸ ਨੂੰ ਪੂਰਾ ਕਰਨ ਲਈ ਉਨ੍ਹਾਂ ਦੇ ਪਿਤਾ ਪੂਰੇ ਪਰਿਵਾਰ ਨਾਲ ਨਿਊਜ਼ੀਲੈਂਡ ਆਏ ਸਨ। ਕ੍ਰਿਕਟ ਮੈਦਾਨ ਤੋਂ ਅਲਵਿਦਾ ਲੈਣ ਤੋਂ ਬਾਅਦ ਹੁਣ ਉਹ ਇੱਕ ਆਡਿਟਿੰਗ ਫਰਮ ਵਿੱਚ ਚਾਰਟਰਡ ਅਕਾਊਂਟੈਂਟ (CA) ਵਜੋਂ ਆਪਣੀ ਫੁੱਲ-ਟਾਈਮ ਪਾਰੀ ਸ਼ੁਰੂ ਕਰਨਗੇ।
 

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇

https://whatsapp.com/channel/0029Va94hsaHAdNVur4L170e