ਕੋਰੋਨਾ ਦੌਰਾਨ ਟਲਿਆ ਸੀ ਵਿਆਹ, ਵੈਡਿੰਗ ਸਟੋਰ ਦਾ ਮਾਲਕ ਹੁਣ ਵਿਆਜ ਸਣੇ ਵਾਪਸ ਕਰੇਗਾ 1.95 ਲੱਖ ਰੁਪਏ

ਚੰਡੀਗੜ੍ਹ- ਕੋਰੋਨਾ ਕਾਲ ਦੌਰਾਨ ਦੇਸ਼ ਭਰ 'ਚ ਕਈ ਪਾਬੰਦੀਆਂ ਲਗਾਈਆਂ ਗਈਆਂ ਸਨ, ਜਿਸ ਕਾਰਨ ਪੰਜਾਬ ਦੇ ਮੋਹਾਲੀ ਜ਼ਿਲ੍ਹੇ ਦੇ ਜ਼ੀਰਕਪੁਰ ਦੀ ਰਹਿਣ ਵਾਲੀ ਇਕ ਕੁੜੀ ਨੂੰ ਆਪਣੇ ਵਿਆਹ ਦੀ ਤਾਰੀਖ਼ ਟਾਲਣੀ ਪਈ ਸੀ। ਦਰਅਸਲ ਕੁੜੀ ਨੇ ਵਿਆਹ ਦੇ ਆਯੋਜਨ ਲਈ ਮਨੀਮਾਜਰਾ ਸਥਿਤ ਮਨਸਾ ਦੇਵੀ ਵੈਡਿੰਗ ਸਟੋਰ ਦੇ ਪ੍ਰਬੰਧਕ ਨੂੰ 1.95 ਲੱਖ ਰੁਪਏ ਐਡਵਾਂਸ ਦਿੱਤੇ ਸਨ। ਸਪਨਾ ਰਾਣੀ (30) ਨੇ ਇਹ ਰਕਮ ਆਪਣੇ ਲਈ ਲਹਿੰਗਾ, ਆਪਣੇ ਮੰਗੇਤਰ ਲਈ ਸ਼ੇਰਵਾਨੀ ਅਤੇ ਵਿਆਹ ਦੀਆਂ ਸਾਰੀਆਂ ਤਿਆਰੀਆਂ ਲਈ ਵਿਆਹ ਦੇ ਸਟੋਰ ਤੋਂ ਅਦਾ ਕੀਤੀ ਸੀ।

ਵੈਡਿੰਗ ਸਟੋਰ ਦੇ ਮਾਲਕ ਹਰਮੋਹਿੰਦਰ ਵੱਲੋਂ ਰਕਮ ਵਾਪਸ ਨਾ ਕਰਨ 'ਤੇ ਕੁੜੀ ਨੇ ਉਸ ਦੇ ਖ਼ਿਲਾਫ਼ ਉਪਭੋਗਤਾ ਵਿਵਾਦ ਨਿਵਾਰਣ ਕਮਿਸ਼ਨ ਕੋਲ ਸ਼ਿਕਾਇਤ ਕੀਤੀ। ਕਮਿਸ਼ਨ ਨੇ ਸਟੋਰ ਮਾਲਕ ਨੂੰ ਇਕ ਲੱਖ 95 ਹਜ਼ਾਰ ਰੁਪਏ ਸਲਾਨਾ 10 ਫ਼ੀਸਦੀ ਵਿਆਜ ਨਾਲ ਵਾਪਸ ਕਰਨ ਦੇ ਹੁਕਮ ਦਿੱਤਾ ਹੈ। ਉਥੇ ਹੀ ਸ਼ਿਕਾਇਤ ਕਰਤਾ ਨੂੰ ਹੋਈ ਮਾਨਸਿਕ ਪਰੇਸ਼ਾਨੀ ਲਈ 15 ਹਜ਼ਾਰ ਰੁਪਏ ਦਾ ਮੁਆਵਜ਼ਾ ਵੀ ਦੇਣਾ ਹੋਵੇਗਾ। 

ਇਹ ਵੀ ਪੜ੍ਹੋ : ਕਾਂਗਰਸ ਤੇ 'ਆਪ' ਦੇ ਗਠਜੋੜ ਨੂੰ ਲੈ ਕੇ ਰਾਜਾ ਵੜਿੰਗ ਦਾ ਵੱਡਾ ਬਿਆਨ, ਸੁਖਬੀਰ ਦੀ ਮੁਆਫ਼ੀ 'ਤੇ ਵੀ ਸੁਣੋ ਕੀ ਬੋਲੇ

26 ਅਪ੍ਰੈਲ 2021 ਨੂੰ ਤੈਅ ਹੋਇਆ ਸੀ ਵਿਆਹ
ਕਮਿਸ਼ਨ ਨੂੰ ਦਿੱਤੀ ਆਪਣੀ ਸ਼ਿਕਾਇਤ ਵਿੱਚ ਕੁੜੀ ਨੇ ਦੱਸਿਆ ਕਿ ਉਸ ਦਾ ਵਿਆਹ 26 ਅਪ੍ਰੈਲ 2021 ਨੂੰ ਤੈਅ ਹੋਇਆ ਸੀ। ਇਸ ਦੇ ਲਈ ਉਸ ਨੇ 19 ਫਰਵਰੀ 2021 ਨੂੰ ਮਨਸਾ ਦੇਵੀ ਵੈਡਿੰਗ ਸਟੋਰ ਤੋਂ 10,000 ਰੁਪਏ ਦਾ ਲਹਿੰਗਾ ਬੁੱਕ ਕਰਵਾਇਆ ਸੀ, ਜਿਸ ਲਈ ਉਸ ਨੇ 5,000 ਰੁਪਏ ਐਡਵਾਂਸ ਦੇ ਦਿੱਤੇ ਸਨ। ਉਥੇ ਹੀ ਮੰਗੇਤਰ ਲਈ 10,000 ਰੁਪਏ ਦੇ ਕੇ ਸ਼ੇਰਵਾਨੀ ਬੁੱਕ ਕਰਵਾਈ ਗਈ ਸੀ। ਇਸ ਤੋਂ ਇਲਾਵਾ ਸ਼ਿਕਾਇਤਕਰਤਾ ਨੇ ਵਿਆਹ ਲਈ ਕੈਟਰਿੰਗ, ਫੋਟੋਗ੍ਰਾਫ਼ਰ, ਸਜਾਵਟ, ਡੀਜੇ ਸਮੇਤ 500 ਲੋਕਾਂ ਦੇ ਖਾਣ-ਪੀਣ ਦਾ ਪ੍ਰਬੰਧ ਕਰਨ ਲਈ 5,47,000 ਰੁਪਏ ਵਿੱਚ ਵਿਆਹ ਦਾ ਸਟੋਰ ਖ਼ੁਦ ਬੁੱਕ ਕਰਵਾਇਆ ਸੀ। 8 ਮਾਰਚ 2021 ਨੂੰ 95 ਹਜ਼ਾਰ ਰੁਪਏ ਐਡਵਾਂਸ ਵਿੱਚ ਦਿੱਤੇ। ਵਿਆਹ ਲਈ ਸੈਕਟਰ-28 ਦਾ ਕਮਿਊਨਿਟੀ ਸੈਂਟਰ ਬੁੱਕ ਕੀਤਾ ਗਿਆ ਸੀ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਕੋਰੋਨਾ ਕਾਰਨ ਉਸ ਨੂੰ ਆਪਣੇ ਵਿਆਹ ਦੀ ਤਾਰੀਖ਼ ਮੁਲਤਵੀ ਕਰਨੀ ਪਈ। ਉਸ ਨੇ ਮਾਰਚ 2021 ਵਿੱਚ ਵਿਆਹ ਦੇ ਸਟੋਰ ਦੇ ਮਾਲਕ ਨਾਲ ਸੰਪਰਕ ਕੀਤਾ ਅਤੇ ਬੁਕਿੰਗ ਰੱਦ ਕਰਨ ਅਤੇ ਕੁੱਲ 95 ਹਜ਼ਾਰ ਰੁਪਏ ਦੀ ਰਕਮ ਵਾਪਸ ਕਰਨ ਦੀ ਬੇਨਤੀ ਕੀਤੀ।

ਵੈਡਿੰਗ ਸਟੋਰ ਮਾਲਕ ਨੇ ਉਨ੍ਹਾਂ ਨੂੰ ਭਰੋਸਾ ਦਿੱਤਾ ਕਿ ਉਹ ਰਕਮ ਦੇਵੇਗਾ ਜਾਂ ਪ੍ਰਸ਼ਾਸਨ ਦੇ ਤੈਅ ਨਿਯਮਾਂ ਦੇ ਤਹਿਤ ਵਿਆਹ ਲਈ 200 ਲੋਕਾਂ ਦੀ ਵਿਵਸਥਾ ਕਰਨਗੇ। ਇਸ 'ਤੇ ਸ਼ਿਕਾਇਤ ਕਰਤਾ ਨੇ ਉਸ ਨੂੰ ਇਕ ਲੱਖ ਰੁਪਏ ਦਿੱਤੇ।  ਅਪ੍ਰੈਲ 2021 ਵਿੱਚ ਕੋਰੋਨਾ ਦੀ ਦੂਜੀ ਲਹਿਰ ਕਾਰਨ, ਪ੍ਰਸ਼ਾਸਨ ਨੇ ਸ਼ਹਿਰ ਵਿੱਚ ਕਰਫਿਊ/ਲਾਕਡਾਊਨ ਲਗਾ ਦਿੱਤਾ ਸੀ। ਸ਼ਿਕਾਇਤਕਰਤਾ ਨੇ ਵਿਆਹ ਦੇ ਸਟੋਰ ਨੂੰ ਵਿਆਹ ਦੀ ਬੁਕਿੰਗ ਰੱਦ ਕਰਨ ਅਤੇ ਸਾਰੀ ਰਕਮ ਵਾਪਸ ਕਰਨ ਲਈ ਕਿਹਾ। ਇਸ ਦੇ ਬਾਵਜੂਦ ਸਟੋਰ ਮਾਲਕ ਨੇ ਮਾਮਲਾ ਪੈਂਡਿੰਗ ਰੱਖਿਆ ਅਤੇ ਫਿਰ ਰਕਮ ਵਾਪਸ ਕਰਨ ਤੋਂ ਇਨਕਾਰ ਕਰ ਦਿੱਤਾ।

ਸ਼ਿਕਾਇਤਕਰਤਾ ਨੇ 18 ਜੂਨ 2021 ਨੂੰ ਪੁਲਸ ਨੂੰ ਸ਼ਿਕਾਇਤ ਕੀਤੀ ਪਰ ਕੋਈ ਫਾਇਦਾ ਨਹੀਂ ਹੋਇਆ। ਇਸ ਤੋਂ ਬਾਅਦ ਮਾਮਲੇ ਦੀ ਸ਼ਿਕਾਇਤ ਕਮਿਸ਼ਨ ਨੂੰ ਕੀਤੀ ਗਈ। ਮਨਸਾ ਦੇਵੀ ਵੈਡਿੰਗ ਸਟੋਰ ਦੀ ਤਰਫ਼ੋਂ ਕੋਈ ਵੀ ਕਮਿਸ਼ਨ ਅੱਗੇ ਪੇਸ਼ ਨਹੀਂ ਹੋਇਆ, ਜਿਸ ’ਤੇ ਕਮਿਸ਼ਨ ਨੇ ਇਸ ਨੂੰ ਸਾਬਕਾ ਧਿਰ ਕਰਾਰ ਦਿੰਦਿਆਂ ਸ਼ਿਕਾਇਤਕਰਤਾ ਦੇ ਹੱਕ ਵਿੱਚ ਫ਼ੈਸਲਾ ਸੁਣਾਇਆ ਹੈ।

ਇਹ ਵੀ ਪੜ੍ਹੋ : ਸੰਵਿਧਾਨ ’ਚ ਨਹੀਂ ਹੈ ਡਿਪਟੀ CM ਅਹੁਦੇ ਦਾ ਜ਼ਿਕਰ ਪਰ ਸਿਆਸੀ ਪਾਰਟੀਆਂ ਨੂੰ ਖੂਬ ‘ਸੂਟ’ ਕਰ ਰਿਹਾ ਹੈ ਇਹ ਅਹੁਦਾ

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।