ਸ਼ਰਾਬ ਪੀਣ ਤੋਂ ਰੋਕਣ ’ਤੇ ਪਤੀ ਨੇ ਪਤਨੀ ਨੂੰ ਮਾਰੀ ਗੋਲੀ

ਪਟਿਆਲਾ,   (ਬਲਜਿੰਦਰ)-  ਸ਼ਹਿਰ ਦੇ ਜਗਤਾਰ ਨਗਰ ਵਿਚ ਜਦੋਂ ਪਤਨੀ ਨੇ ਪਤੀ ਨੂੰ ਸ਼ਰਾਬ ਪੀਣ ਤੋਂ ਰੋਕਿਆ ਤਾਂ ਉਸ ਨੇ ਆਪਣੀ ਲਾਇਸੰਸੀ ਰਾਈਫਲ ਨਾਲ ਪਤਨੀ ਦਾ ਕਤਲ ਕਰ ਦਿੱਤਾ। ਇਸ ਮਾਮਲੇ ਵਿਚ ਥਾਣਾ ਅਰਬਨ ਅਸਟੇਟ ਦੀ ਪੁਲਸ ਨੇ ਦੀਦਾਰ ਸਿੰਘ ਪੁੱਤਰ ਨਰਾਤਾ ਸਿੰਘ ਵਾਸੀ ਜਗਤਾਰ ਨਗਰ ਪਟਿਆਲਾ  ਖਿਲਾਫ 302 ਆਈ. ਪੀ. ਸੀ. ਅਤੇ ਆਰਮਜ਼ ਐਕਟ ਤਹਿਤ ਕੇਸ ਦਰਜ ਕਰ ਲਿਆ ਹੈ। ਪੁਲਸ ਵੱਲੋਂ ਦੀਦਾਰ ਦੇ ਪੁੱਤਰ ਸ਼ਰਨਜੀਤ ਸਿੰਘ ਵਾਸੀ ਜਗਤਾਰ ਨਗਰ ਦੀ ਸ਼ਿਕਾਇਤ ਦੇ ਅਾਧਾਰ ’ਤੇ ਕੇਸ ਦਰਜ ਕੀਤਾ ਹੈ।  ਸ਼ਰਨਜੀਤ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ 15 ਅਗਸਤ ਨੂੰ ਉਸ ਦਾ ਪਿਤਾ ਦੀਦਾਰ ਸਿੰਘ ਸਵੇਰ ਤੋਂ ਸ਼ਰਾਬ ਪੀ ਰਿਹਾ ਸੀ। ਜਦੋਂ ਉਸ ਦੀ ਮਾਤਾ ਪਰਮਜੀਤ ਕੌਰ ਉਮਰ 50 ਸਾਲ ਨੇ ਰੋਕਿਆ ਤਾਂ ਦੋਵਾਂ ਵਿਚਕਾਰ ਬਹਿਸਬਾਜ਼ੀ ਹੋ ਗਈ। ਇਸ ਬਹਿਸਬਾਜ਼ੀ ਤੋਂ ਖਫਾ ਹੋ ਕੇ ਉਸ ਦੇ ਪਿਤਾ ਦੀਦਾਰ ਨੇ ਆਪਣੀ ਲਾਇਸੰਸੀ 12 ਬੋਰ ਦੀ ਰਾਈਫਲ ਕੱਢ ਕੇ ਉਸ ਦੀ ਮਾਤਾ ’ਤੇ ਫਾਇਰ ਕਰ ਦਿੱਤਾ। ਉਸ ਦੀ ਮਾਤਾ ਦੇ ਨਾ ਲੱਗਾ ਤਾਂ ਉਸ ਨੇ ਇਕ ਹੋਰ ਫਾਇਰ ਕਰ ਦਿੱਤਾ ਜੋ ਕਿ ਪਰਮਜੀਤ ਕੌਰ ਦੇ ਸਿੱਧਾ ਲੱਗਾ ਅਤੇ ਉਸ ਦੀ ਮੌਕੇ ’ਤੇ ਮੌਤ ਹੋ ਗਈ।