ਧਰਨੇ ''ਤੇ ਬੈਠੇ ਵਿਜੇ ਕੁਮਾਰ ਦੀ ਹਾਲਤ ਵਿਗੜੀ

ਮੋਹਾਲੀ (ਨਿਆਮੀਆਂ) - ਸੋਹਾਣਾ ਪਾਣੀ ਦੀ ਟੈਂਕੀ 'ਤੇ ਧਰਨੇ 'ਤੇ ਬੈਠੇ ਬੀ. ਐੱਡ ਟੈੱਟ ਤੇ ਸਬਜੈਕਟ ਟੈਸਟ ਪਾਸ ਬੇਰੁਜ਼ਗਾਰ ਅਧਿਆਪਕਾਂ ਦਾ ਧਰਨਾ ਅੱਜ 23ਵੇਂ ਦਿਨ ਵਿਚ ਦਾਖਲ ਹੋ ਗਿਆ ਹੈ। ਇਨ੍ਹਾਂ ਬੇਰੁਜ਼ਗਾਰ ਅਧਿਆਪਕਾਂ ਨੇ ਅੱਜ ਰੋਸ ਪ੍ਰਗਟਾਉਂਦਿਆਂ ਸਰਕਾਰ ਖਿਲਾਫ ਨਾਅਰੇਬਾਜ਼ੀ ਕੀਤੀ। ਯੂਨੀਅਨ ਆਗੂ ਪ੍ਰਧਾਨ ਪੂਨਮ ਰਾਣੀ, ਰਾਜਪਾਲ, ਤੇਜਿੰਦਰ ਅਪਰਾ, ਬਲਦੇਵ ਸਿੰਘ ਤੇ ਰਾਜਵੰਤ ਕੌਰ ਨੇ ਕਿਹਾ ਕਿ 7 ਜੁਲਾਈ ਨੂੰ ਯੂਨੀਅਨ ਦੀ ਸਿੱਖਿਆ ਵਿਭਾਗ ਦੇ ਅਧਿਕਾਰੀਆਂ ਨਾਲ ਪੈਨਲ ਮੀਟਿੰਗ ਹੈ, ਜਿਸ ਵਿਚ ਉਨ੍ਹਾਂ ਦੀਆਂ ਮੰਗਾਂ ਮੰਨੀਆਂ ਜਾਣ ਦਾ ਭਰੋਸਾ ਹੈ ਪਰ ਜੇਕਰ ਉਨ੍ਹਾਂ ਦੇ ਰੁਜ਼ਗਾਰ ਦੀ ਮੰਗ ਨਾ ਮੰਨੀ ਗਈ ਤਾਂ ਉਹ ਸੰਘਰਸ਼ ਨੂੰ ਹੋਰ ਤੇਜ਼ ਕਰਨਗੇ। ਯੂਨੀਅਨ ਆਗੂ ਮੈਡਮ ਮਨਦੀਪ ਕੌਰ, ਜੈਸਮੀਨ ਸੰਗਰੂਰ, ਬਲਜਿੰਦਰ ਕੌਰ ਦਸੂਹਾ, ਗੁਰਪ੍ਰੀਤ ਕੌਰ ਪਟਿਆਲਾ ਤੇ ਨੀਰੂ ਬਾਲਾ ਨੇ ਕਿਹਾ ਕਿ ਅਸੀਂ ਰੁਜ਼ਗਾਰ ਲੈਣ ਲਈ ਕੋਈ ਵੀ ਕੁਰਬਾਨੀ ਕਰਨ ਨੂੰ ਤਿਆਰ ਹਾਂ ਪਰ ਹੁਣ ਖਾਲੀ ਹੱਥ ਵਾਪਸ ਨਹੀਂ ਮੁੜਾਂਗੇ।
ਉਧਰ 23 ਦਿਨਾਂ ਤੋਂ ਟੈਂਕੀ ਦੇ ਉਪਰ ਚੜ੍ਹੇ ਵਿਜੇ ਕੁਮਾਰ ਨਾਭਾ ਦੀ ਹਾਲਤ ਅੱਜ ਕਾਫੀ ਵਿਗੜ ਗਈ ਕਿਉਂਕਿ ਰਾਤ ਖਰਾਬ ਮੌਸਮ ਦੇ ਦੌਰਾਨ ਉਸ 'ਤੇ ਮੀਂਹ ਪੈਣ ਕਾਰਨ ਨਿਮੋਨੀਆ ਦੀ ਸ਼ਿਕਾਇਤ ਹੋ ਗਈ। ਮੌਕੇ 'ਤੇ ਕੋਈ ਡਾਕਟਰੀ ਸਹਾਇਤਾ ਉਪਲਬਧ ਨਾ ਹੋਣ ਕਾਰਨ ਬੇਰੁਜ਼ਗਾਰ ਅਧਿਆਪਕਾਂ ਨੇ ਪ੍ਰਸ਼ਾਸਨ ਖਿਲਾਫ ਨਾਅਰੇਬਾਜ਼ੀ ਕਰਕੇ ਆਪਣਾ ਗੁੱਸਾ ਕੱਢਿਆ।
ਇਸ ਮੌਕੇ ਯਾਦਵਿੰਦਰ ਸਿੰਘ ਲਾਲੀ, ਮਹਿੰਦਰ ਸਿੰਘ, ਹਰਦਮ ਸਿੰਘ, ਬਖਸ਼ਿਸ਼ ਸਿੰਘ, ਰਾਜਿੰਦਰ ਕੌਰ, ਅਜੇ ਕੁਮਾਰ, ਰਾਜੇਸ਼ ਮਾਨਸਾ, ਕਮਲਜੀਤ ਖੰਨਾ, ਸੋਨੀਆ ਅੰਮ੍ਰਿਤਸਰ, ਲਖਵਿੰਦਰ ਦਿੜ੍ਹਬਾ, ਰਾਣਾ ਧੀਮਾਨ, ਨੀਰਜ ਸੈਣੀ, ਪਵਨ ਪਠਾਨਕੋਟ, ਆਰਤੀ ਫਿਲੌਰ, ਮਨਜੀਤ ਕੌਰ, ਮੁਕੇਸ਼ ਬਠਿੰਡਾ ਸਣੇ ਵੱਡੀ ਗਿਣਤੀ ਵਿਚ ਅਧਿਆਪਕ ਹਾਜ਼ਰ ਸਨ।