ਸਿੱਖਿਆ ਤੇ ਖੇਡ ਵਿਭਾਗ ਦੀ ਉਦਾਸੀਨਤਾ ਕਾਰਨ ਕਿਵੇਂ ਤਿਆਰ ਹੋਣਗੇ ਰਾਸ਼ਟਰੀ ਤੇ ਅੰਤਰਰਾਸ਼ਟਰੀ ਪੱਧਰ ਦੇ ਖਿਡਾਰੀ

ਗੁਰਦਾਸਪੁਰ,   (ਵਿਨੋਦ)-  ਸਾਰੇ ਪੰਜਾਬ ’ਚ ਇਸ ਸਮੇਂ ਨਸ਼ਿਅਾਂ  ਵਿਰੁੱਧ ਨੌਜਵਾਨਾਂ ਨੂੰ ਜਾਗਰੂਕ ਕਰਨ  ਲਈ ਕਈ ਤਰ੍ਹਾਂ ਦੇ ਪ੍ਰੋਗਰਾਮ ਚਲਾਏ ਜਾ ਰਹੇ ਹਨ ਅਤੇ ਸਰਕਾਰ ਵੀ ਨਸ਼ਿਆਂ ਦੇ ਖਾਤਮੇ  ਲਈ ਪੂਰਾ ਜ਼ੋਰ ਲਾ ਰਹੀ ਹੈ ਪਰ  ਨੌਜਵਾਨਾਂ ਨੂੰ ਨਸ਼ਿਆਂ ਤੋਂ ਦੂਰ ਰੱਖਣ ਲਈ ਖੇਡਾਂ ਨੂੰ ਉਤਸ਼ਾਹਿਤ ਕੀਤਾ ਜਾਣਾ ਜ਼ਰੂਰੀ ਹੈ। ਜਦੋਂ ਨੌਜਵਾਨ ਵਰਗ ਖੇਡਾਂ  ਵੱਲ ਆਕਰਸ਼ਿਤ ਹੁੰਦਾ ਹੈ ਤਾਂ ਨਿਸ਼ਚਿਤ ਰੂਪ ਵਿਚ ਉਹ ਨਸ਼ਿਅਾਂ ਤੋਂ ਦੂਰ ਹੋ ਸਕਦਾ ਹੈ ਪਰ ਜ਼ਿਲਾ ਗੁਰਦਾਸਪੁਰ ’ਚ ਅਜਿਹਾ ਕੁਝ ਵੇਖਣ ਨੂੰ ਨਹੀਂ ਮਿਲ ਰਿਹਾ। ਕੇਵਲ ਨਸ਼ਿਅਾਂ  ਵਿਰੁੱਧ ਸੈਮੀਨਾਰ ਕਰਨ, ਨਸ਼ਾ ਕਰਨ ਵਾਲਿਅਾਂ ਨੂੰ ਫਡ਼ਨ, ਉਨ੍ਹਾਂ ਦਾ ਇਲਾਜ ਕਰਵਾਉਣ ਨਾਲ ਇਹ ਸਮੱਸਿਆ ਹੱਲ ਹੋਣ ਵਾਲੀ ਨਹੀਂ ਹੈ। 
 ਜ਼ਿਲਾ ਗੁਰਦਾਸਪੁਰ ਕਦੇ  ਵਧੀਆ ਪਹਿਲਵਾਨ, ਰਾਸ਼ਟਰੀ ਤੇ ਅੰਤਰਰਾਸ਼ਟਰੀ ਪੱਧਰ ਦੇ ਜੂਡੋ ਖਿਡਾਰੀ ਤਿਆਰ ਕਰਨ ਲਈ ਮਸ਼ਹੂਰ ਸੀ ਪਰ ਸਮੇਂ ਦੇ ਨਾਲ ਗੁਰਦਾਸਪੁਰ ’ਚ ਖੇਡਾਂ ਦਾ ਪੱਧਰ ਦਿਨ ਪ੍ਰਤੀਦਿਨ ਡਿੱਗਦਾ ਜਾ ਰਿਹਾ ਹੈ ਜਿਨ੍ਹਾਂ ਸਿੱਖਿਆ ਸੰਸਥਾਵਾਂ  ਕੋਲ ਖੇਡ ਮੈਦਾਨ ਹੈ, ਉਥੇ ਖੇਡ ਅਧਿਆਪਕ ਨਹੀਂ ਹਨ ਅਤੇ ਜਿਨ੍ਹਾਂ ਸਕੂਲਾਂ ’ਚ ਖੇਡ ਅਧਿਆਪਕ ਹਨ, ਉਥੇ ਖੇਡ ਮੈਦਾਨ ਨਹੀਂ ਹੈ। ਇਸ ਤਰ੍ਹਾਂ ਜ਼ਿਲਾ ਪ੍ਰਸ਼ਾਸਨ ਤੇ ਸਿੱਖਿਆ ਵਿਭਾਗ ਦੀ ਉਦਾਸੀਨਤਾ ਨਾਲ ਗੁਰਦਾਸਪੁਰ ਦਾ ਨਾਂ ਖੇਡ ਜਗਤ ਵਿਚ ਫਿੱਕਾ ਹੁੰਦਾ ਜਾ ਰਿਹਾ ਹੈ।
 ਹਰ ਮਹੀਨੇ ਵਿਦਿਆਰਥੀਅਾਂ ਤੋਂ ਵਸੂਲਿਅਾ ਜਾਂਦੈ ਲੱਖਾਂ ਦਾ ਚੰਦਾ
ਜ਼ਿਲਾ ਗੁਰਦਾਸਪੁਰ ਵਿਚ ਸਾਰੇ ਸਰਕਾਰੀ ਸਕੂਲਾਂ ਵਿਚ ਨੌਵੀਂ ਤੇ ਦਸਵੀਂ ਕਲਾਸ ਵਿਚ ਸਿੱਖਿਆ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਤੋਂ ਪ੍ਰਤੀ ਮਹੀਨਾ 15 ਰੁਪਏ ਅਤੇ ਗਿਆਰ੍ਹਵੀਂ ਤੇ ਬਾਰ੍ਹਵੀਂ ਕਲਾਸ ਦੇ ਵਿਦਿਆਰਥੀਆਂ ਤੋਂ ਪ੍ਰਤੀ ਵਿਦਿਆਰਥੀ 20 ਰੁਪਏ ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਦੇ ਨਾਂ ’ਤੇ ਇਕੱਠਾ ਕੀਤਾ ਜਾਂਦਾ ਹੈ। ਇਸੇ ਤਰ੍ਹਾਂ ਪ੍ਰਾਈਵੇਟ ਸਕੂਲਾਂ ’ਚ ਵੀ ਹਰ ਸਾਲ ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਦੇ ਨਾਂ ’ਤੇ ਕਰੋਡ਼ਾਂ ਰੁਪਏ ਇਕੱਠੇ ਕੀਤੇ ਜਾਂਦੇ ਹਨ ਜਦਕਿ ਇਸ ਤੋਂ ਇਲਾਵਾ ਕੇਂਦਰੀ ਖੇਡ ਮੰਤਰਾਲੇ, ਪੰਜਾਬ ਦੇ  ਖੇਡ ਵਿਭਾਗ ਸਮੇਤ ਵਿਧਾਇਕਾਂ  ਤੋਂ ਵੀ ਲੱਖਾਂ ਰੁਪਏ ਖੇਡਾਂ ਨੂੰ ਉਤਸ਼ਾਹਿਤ ਕਰਨ  ਲਈ ਮਿਲ ਜਾਂਦਾ ਹੈ। ਸਕੂਲਾਂ ’ਚ ਜੋ ਰਾਸ਼ੀ ਵਿਦਿਆਰਥੀਆਂ ਤੋਂ ਇਕੱਠੀ ਕੀਤੀ ਹੁੰਦੀ ਹੈ, ਉਸ ਦਾ 85 ਫੀਸਦੀ ਹਿੱਸਾ ਜ਼ਿਲਾ ਸਿੱਖਿਆ ਅਧਿਕਾਰੀ ਦਫ਼ਤਰ ਵਿਚ ਜਮ੍ਹਾ ਹੋ ਜਾਂਦਾ ਹੈ ਜਦਕਿ 15 ਫੀਸਦੀ ਸਕੂਲ ਦੇ ਕੋਲ ਰਹਿੰਦਾ ਹੈ। ਇਸੇ ਤਰ੍ਹਾਂ ਕਰੋਡ਼ਾਂ ਰੁਪਏ  ਜ਼ਿਲਾ ਸਿੱਖਿਆ ਅਧਿਕਾਰੀ ਕੋਲ ਹਰ ਸਾਲ ਜਮ੍ਹਾ ਹੁੰਦੇ ਹਨ।
 ਕਿੱਥੇ-ਕਿੱਥੇ ਖਰਚ ਕਰਨਾ ਹੁੰਦੈ ਇਹ ਪੈਸਾ
 ਹਰੇਕ ਜ਼ਿਲਾ ਸਿੱਖਿਆ ਅਧਿਕਾਰੀ ਇਹ ਰਾਸ਼ੀ ਜ਼ਿਲਾ ਪੱਧਰ ਦੇ ਟੂਰਨਾਮੈਂਟ ਕਰਵਾਉਣ, ਖਿਡਾਰੀਆਂ ਨੂੰ ਸਨਮਾਨਤ ਕਰਨ ਦੇ ਪ੍ਰੋਗਰਾਮਾਂ, ਖਿਡਾਰੀਆਂ ਦੇ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ ’ਤੇ ਖੇਡੇ ਜਾਣ ’ਤੇ ਉਨ੍ਹਾਂ ਨੂੰ ਕਿਰਾਇਆ ਆਦਿ ਦੇਣ ਅਤੇ ਜ਼ੋਨਲ ਪੱਧਰ ਦੀਅਾਂ ਖੇਡਾਂ ਵਿਚ ਖਿਡਾਰੀਆਂ ਨੂੰ ਮਿਲਣ ਵਾਲੀ ਡਾਈਟ ਆਦਿ ਉਪਰ ਖਰਚ ਕਰਦਾ ਹੈ।
 ਇਸੇ ਤਰ੍ਹਾਂ ਸਕੂਲਾਂ  ਕੋਲ ਜੋ 15 ਫੀਸਦੀ ਪੈਸਾ ਬਚਦਾ ਹੈ, ਉਹ ਸਕੂਲ ਖੇਡਾਂ ਦਾ ਸਾਮਾਨ ਖਰੀਦਣ ਅਤੇ ਜ਼ਿਲਾ ਪੱਧਰ ਦੇ ਟੂਰਨਾਮੈਂਟ ਆਦਿ ’ਤੇ ਖਰਚ ਕਰਦੇ ਹਨ, ਜਿਸ ਵਿਚ ਬੱਚਿਅਾਂ ਦੀ 20 ਰੁਪਏ ਤੋਂ ਲੈ ਕੇ 40 ਰੁਪਏ ਤੱਕ ਡਾਈਟ ਆਦਿ ਵੀ ਸ਼ਾਮਲ ਹੈ।
 ਪਿੰਡਾਂ ’ਚ ਬਣੇ ਜ਼ਿਆਦਾਤਰ ਇਨਡੋਰ ਸਟੇਡੀਅਮ ਹੋਏ ਖੰਡਰ
  ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਲਈ ਸਾਲ 1997 ਵਿਚ ਪੰਜਾਬ ਸਰਕਾਰ ਨੇ ਪਿੰਡ ’ਚ ਇਨਡੋਰ ਸਟੇਡੀਅਮ ਬਣਾਏ ਸਨ ਪਰ ਅੱਜ ਹਾਲਾਤ ਇਹ ਹਨ ਕਿ ਲਗਭਗ ਸਾਰੇ ਇਨਡੋਰ ਸਟੇਡੀਅਮ ਖੰਡਰ ਦਾ ਰੂਪ ਧਾਰਨ ਕਰ ਚੁੱਕੇ ਹਨ। ਪਿੰਡ ਜਫ਼ਰਵਾਲ, ਜਾਗੋਵਾਲ ਬੇਟ, ਗੁਰਦਾਸਪੁਰ ਵਿਚ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਲਡ਼ਕੀਅਾਂ ’ਚ ਬਣੇ ਇਨਡੋਰ ਸਟੇਡੀਅਮ ਦੀ ਹਾਲਤ ਅਜਿਹੀ ਹੈ ਕਿ ਇਹ ਸਟੇਡੀਅਮ ਕਿਸੇ ਕੰਮ ਨਹੀਂ ਆ ਰਹੇ  ਅਤੇ ਸਿੱਖਿਆ ਵਿਭਾਗ ਦੇ ਨਾਂ ’ਤੇ ਕਲੰਕ ਸਿੱਧ ਹੋ ਰਹੇ ਹਨ  ਜਦਕਿ ਸਾਲ 1997 ਵਿਚ ਕਰੋਡ਼ਾਂ ਰੁਪਏ ਖਰਚ ਕਰ ਕੇ ਮੰਡੀਕਰਨ ਬੋਰਡ ਨੇ ਪੂਰੇ ਪੰਜਾਬ ’ਚ ਪਿੰਡਾਂ ਤੇ ਸ਼ਹਿਰਾਂ ’ਚ ਇਹ ਸਟੇਡੀਅਮ ਬਣਾਏ ਸਨ। ਇਸੇ ਤਰ੍ਹਾਂ ਗੁਰਦਾਸਪੁਰ ਵਿਚ ਸਰਕਾਰੀ ਕਾਲਜ ਦਾ ਸਟੇਡੀਅਮ ਵੀ ਬਹੁਤ ਬੁਰੀ ਹਾਲਤ ਵਿਚ ਹੈ ਅਤੇ ਖੇਡ ਪ੍ਰੇਮੀਅਾਂ ਵੱਲੋਂ ਸਿੱਖਿਆ ਵਿਭਾਗ ਦੀ ਇਸ ਉਦਾਸੀਨਤਾ ’ਤੇ ਕਈ ਤਰ੍ਹਾਂ ਦੇ ਸਵਾਲ ਉਠਾਏ ਜਾ ਰਹੇ ਹਨ। 
 ਸਕੂਲ ਪੱਧਰ ਤੱਕ ਸੀਮਤ ਰਹਿ ਗਈਆਂ ਹਨ ਖੇਡਾਂ
  ਜ਼ਿਲੇ  ਦੇ ਸਕੂਲਾਂ ’ਚ ਨਾ ਤਾਂ ਖੇਡਾਂ ’ਚ ਸੁਧਾਰ ਹੋਇਆ ਹੈ ਅਤੇ ਨਾ ਹੀ ਨੌਜਵਾਨਾਂ ਨੂੰ ਖੇਡਾਂ ਵੱਲ ਸਿੱਖਿਆ ਵਿਭਾਗ ਅਤੇ ਜ਼ਿਲਾ ਪ੍ਰਸ਼ਾਸਨ ਆਕਰਸ਼ਿਤ ਕਰ ਸਕਿਆ ਹੈ। ਖੇਡਾਂ ਕੇਵਲ ਸਕੂਲ ਪੱਧਰ ਤੱਕ ਹੀ ਸੀਮਤ ਹੋ ਕੇ ਰਹਿ ਗਈਅਾਂ ਹਨ। ਜਿਮਨਾਸਟਿਕ, ਜੂਡੋ ਤੇ ਰੈਸਲਿੰਗ ਆਦਿ ਦੇ ਕਈ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਖਿਡਾਰੀ ਆਪਣੇ ਸਰਟੀਫਿਕੇਟ ਤੇ ਮੈਡਲ ਲੈ ਕੇ ਨੌਕਰੀ  ਲਈ ਦਰ-ਦਰ ਭਟਕ ਰਹੇ ਹਨ, ਜਿਸ ਕਾਰਨ ਖੇਡਾਂ ਵੱਲ ਨੌਜਵਾਨਾਂ ਦਾ ਆਕਰਸ਼ਨ ਘੱਟ ਹੁੰਦਾ ਜਾ ਰਿਹਾ ਹੈ।
 ਬੀਤੇ ਦੋ ਸਾਲਾਂ ਤੋਂ ਜ਼ਿਲੇ ਵਿਚ ਇਕ ਵੀ ਖੇਡ ਸਮਾਗਮ ਨਹੀਂ ਹੋਇਆ
  ਬੀਤੇ ਦੋ ਸਾਲਾਂ ਵਿਚ ਇਕ ਵੀ ਅਜਿਹਾ ਪ੍ਰੋਗਰਾਮ ਜ਼ਿਲਾ ਗੁਰਦਾਸਪੁਰ ਵਿਚ ਆਯੋਜਿਤ ਨਹੀਂ ਕੀਤਾ ਗਿਆ, ਜਿਸ ਵਿਚ ਖਿਡਾਰੀਆਂ ਨੂੰ ਸਨਮਾਨਤ ਕੀਤਾ ਗਿਆ ਹੋਵੇ। ਇਸ ਕਾਰਨ ਸਿੱਖਿਆ ਵਿਭਾਗ ਤੇ ਗਠਿਤ ਟੂਰਨਾਮੈਂਟ ਕਮੇਟੀ ’ਤੇ ਕਈ ਤਰ੍ਹਾਂ ਦੇ ਸਵਾਲ ਉੱਠ ਰਹੇ ਹਨ। 
ਜਾਣਕਾਰੀ ਅਨੁਸਾਰ ਜ਼ਿਲਾ ਟੂਰਨਾਮੈਂਟ ਕਮੇਟੀ ਨੇ ਖਿਡਾਰੀਅਾਂ ਨੂੰ ਸਨਮਾਨਤ ਕਰਨ ਲਈ ਦੋ ਸਾਲ ਪਹਿਲਾਂ 196 ਟਰੈਕ ਸੂਟ ਖਰੀਦੇ ਸਨ। ਇਹ ਟਰੈਕ ਸੂਟ ਇਨ੍ਹਾਂ ਖਿਡਾਰੀਆਂ ਨੂੰ ਦਿੱਤੇ ਜਾਣੇ ਸਨ ਜਿਨ੍ਹਾਂ ਨੇ ਖੇਡਾਂ ’ਚ ਵਿਸ਼ੇਸ਼ ਨਾਂ ਪ੍ਰਾਪਤ ਕੀਤਾ ਸੀ ਪਰ ਇਹ ਸੂਟ ਕਿੱਥੇ ਗਏ ਜਾਂ ਕਿੱਥੇ ਪਏ ਹਨ, ਇਸ ਦੀ ਕਿਸੇ ਨੂੰ ਜਾਣਕਾਰੀ ਨਹੀਂ। ਜੇ ਖਿਡਾਰੀਆਂ ਨੂੰ ਇਹ ਟਰੈਕ ਸੂਟ ਦੇਣੇ ਹੀ ਨਹੀਂ ਸਨ ਤਾਂ ਇਹ ਸਾਮਾਨ ਖਰੀਦ ਕਿਉਂ ਕੀਤਾ ਗਿਆ।
ਖਿਡਾਰੀਆਂ ਦੀ ਅਣਦੇਖੀ ਕਾਰਨ ਖਿਡਾਰੀ ਦੂਜੇ ਜ਼ਿਲਿਆਂ ਵੱਲ ਰੁੱਖ ਕਰ ਰਹੇ ਹਨ : ਕੋਚ
  ਜ਼ਿਲਾ ਗੁਰਦਾਸਪੁਰ ਵਿਚ ਵੱਡੀ ਗਿਣਤੀ ਵਿਚ ਅੰਤਰਰਾਸ਼ਟਰੀ ਤੇ ਰਾਸ਼ਟਰ ਪੱਧਰ ਦੇ ਜੂਡੋ ਖਿਡਾਰੀ ਤਿਆਰ ਕਰਨ ਵਾਲੇ  ਯੂਨੀਅਨ ਨੇਤਾ ਅਮਰਜੀਤ ਸ਼ਾਸਤਰੀ ਨਾਲ ਜਦੋਂ ਖੇਡਾਂ ਸਬੰਧੀ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਗੁਰਦਾਸਪੁਰ ਵਿਚ ਖੇਡਾਂ ਦੀ ਸਥਿਤੀ ਬਹੁਤ ਖਰਾਬ ਹੈ। ਜੋ ਖੇਡ ਟੂਰਨਾਮੈਂਟ ਕਮੇਟੀ ਬਣਾਈ ਜਾਂਦੀ ਹੈ, ਉਸ ਵਿਚ ਜ਼ਿਆਦਾਤਰ ਉਹ ਅਧਿਆਪਕ ਸ਼ਾਮਲ ਕੀਤੇ ਜਾਂਦੇ ਹਨ, ਜਿਨ੍ਹਾਂ ਦਾ ਖੇਡਾਂ ਨਾਲ ਕੋਈ ਸਬੰਧ ਨਹੀਂ ਹੁੰਦਾ। ਇਹ ਕਮੇਟੀ  ਸਿਰਫ ਨਾਂ ਦੀ ਰਹਿ ਗਈ ਹੈ। ਖੇਡਾਂ ਸਬੰਧੀ ਕੋਈ ਠੋਸ ਯੋਜਨਾ ਵੀ ਪੰਜਾਬ ’ਚ ਨਹੀਂ ਹੈ ਕਿਉਂਕਿ ਇਕ ਤਾਂ ਜੂਨ ਮਹੀਨੇ ਤੱਕ ਸਕੂਲਾਂ ’ਚ ਦਾਖ਼ਲਾ ਆਦਿ ਦਾ ਕੰਮ ਹੀ ਪੂਰਾ ਹੁੰਦਾ ਹੈ। ਉਸ ਤੋਂ ਬਾਅਦ ਜੁਲਾਈ ਤੇ ਅਗਸਤ ਮਹੀਨੇ  ਖੇਡਾਂ  ਲਈ ਵਧੀਆ ਮੰਨੇ ਜਾਂਦੇ ਹਨ ਪਰ ਇਨ੍ਹਾਂ ਮਹੀਨਿਅਾਂ ਵਿਚ ਸਿੱਖਿਆ ਵੱਲ ਵਿਸ਼ੇਸ਼ ਧਿਆਨ ਦੀ ਜ਼ਰੂਰਤ ਹੁੰਦੀ ਹੈ ਅਤੇ ਖੇਡਾਂ ਵੱਲ ਫਿਰ ਧਿਆਨ ਨਹੀਂ ਦਿੱਤਾ ਜਾਂਦਾ। 
 ਸ਼ਹਿਰਾਂ ਦੇ ਆਸ-ਪਾਸ ਦੇ ਸਕੂਲਾਂ ’ਚ ਨਾ ਤਾਂ ਸਰੀਰਕ ਸਿੱਖਿਆ ਦੇ ਅਧਿਆਪਕ ਤਾਇਨਾਤ ਹਨ ਤੇ ਖੇਡ ਸਟੇਡੀਅਮ ’ਚ ਵੀ ਖੇਡਾਂ ਦੇ ਅਨੁਕੂਲ ਵਾਤਾਵਰਣ ਨਹੀਂ ਹੈ ਅਤੇ ਸਟੇਡੀਅਮ ਦੀ ਸਫਾਈ ਤੱਕ ਖਿਡਾਰੀਆਂ ਨੂੰ ਕਰਨੀ ਪੈਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਸਥਾਨਕ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਲਡ਼ਕਿਆਂ ਦਾ ਬਾਰ੍ਹਵੀਂ ਕਲਾਸ ਦਾ ਜੂਡੋ ਖਿਡਾਰੀ ਮਨਪ੍ਰੀਤ ਜੋ ਖੇਡਾਂ ਇੰਡੀਆ, ਵਿਸ਼ਵ ਸਕੂਲ ਖੇਡਾਂ ’ਚ ਤਮਗਾ ਪ੍ਰਾਪਤ ਕਰ ਚੁੱਕਾ ਹੈ, ਉਹ ਕੁਝ ਮਹੀਨੇ ਪਹਿਲਾਂ ਮਕਾਊਂ ’ਚ ਏਸ਼ੀਅਨ ਜੂਡੋ ਪ੍ਰਤੀਯੋਗਤਾ ’ਚ ਹਿੱਸਾ ਲੈਣ ਲਈ ਗਿਆ ਸੀ ਅਤੇ ਉਥੋਂ ਉਹ ਕਾਂਸੇ ਦਾ ਤਮਗਾ ਜਿੱਤ ਕੇ ਲਿਆਇਆ ਹੈ। ਜ਼ਿਲਾ ਸਿੱਖਿਆ ਵਿਭਾਗ ਤੇ ਪੰਜਾਬ ਸਰਕਾਰ ਨੇ ਉਸ ਨੂੰ ਇਕ ਪੈਸਾ ਵੀ ਨਹੀਂ ਦਿੱਤਾ, ਜਿਸ ਕਾਰਨ ਉਸ ਨੂੰ ਆਪਣੀ ਜੇਬ ’ਚੋਂ ਪੈਸੇ ਖਰਚ ਕਰ ਕੇ ਇਸ ਪ੍ਰਤੀਯੋਗਤਾ ਵਿਚ ਹਿੱਸਾ ਲੈਣ  ਲਈ ਜਾਣਾ ਪਿਆ। ਇਹੀ ਕਾਰਨ ਹੈ ਕਿ ਜ਼ਿਲਾ ਗੁਰਦਾਸਪੁਰ ਦੇ ਖਿਡਾਰੀ ਹੁਣ ਹੋਰਨਾਂ ਜ਼ਿਲਿਅਾਂ  ਵੱਲ ਰੁੱਖ ਕਰ ਰਹੇ ਹਨ। 
 
ਖੇਡਾਂ ’ਚ ਵਿਸ਼ੇਸ਼ ਰੁਚੀ ਰੱਖਣ ਵਾਲੇ ਪ੍ਰਮੁੱਖ ਨਾਗਰਿਕ
 ਗੋਲਡਨ ਸਿੱਖਿਆ ਸੰਸਥਾਵਾਂ ਦੇ ਚੇਅਰਮੈਨ ਮੋਹਿਤ ਮਹਾਜਨ, ਸੁਖਜਿੰਦਰਾ ਸਿੱਖਿਆ ਸੰਸਥਾਵਾਂ ਦੇ ਚੇਅਰਮੈਨ ਸਵਿੰਦਰ ਗਿੱਲ, ਸ਼ਿਵਾਲਿਕ ਸਿੱਖਿਆ ਸੰਸਥਾਵਾਂ ਦੇ ਚੇਅਰਮੈਨ ਡਾ. ਸਤਵਿੰਦਰ ਸੰਧੂ, ਐਜੂਕੇਸ਼ਨ ਵਰਲਡ ਦੇ ਅਨੁਜ ਮਹਾਜਨ, ਟੈਗੋਰ ਸਿੱਖਿਆ ਸੰਸਥਾਵਾਂ ਦੇ ਰਵਿੰਦਰ ਸ਼ਰਮਾ, ਗੁਰਦਾਸਪੁਰ ਪਬਲਿਕ ਸਕੂਲ ਦੀ ਪ੍ਰਿੰਸੀਪਲ ਅਰਚਨਾ ਬਹਿਲ ਆਦਿ ਨੇ ਆਪਣੀ ਪ੍ਰਤੀਕਿਰਿਆ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਨਾਲ ਸਮਾਜ ਵਿਚ ਕਈ ਤਰ੍ਹਾਂ ਦੇ ਸੁਧਾਰ ਹੋਣਗੇ ਅਤੇ ਸਾਨੂੰ ਸਾਰਿਆਂ ਨੂੰ ਸੰਗਠਿਤ ਹੋ ਕੇ ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਲਈ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਜ਼ਿਲਾ ਪ੍ਰਸ਼ਾਸਨ ਅਤੇ ਖੇਡ ਵਿਭਾਗ ਨੂੰ ਵੀ ਚਾਹੀਦਾ ਹੈ ਕਿ ਉਹ ਖੇਡਾਂ ਨੂੰ ਉਤਸ਼ਾਹਿਤ ਕਰਨ  ਲਈ ਪ੍ਰਾਈਵੇਟ ਸਿੱਖਿਆ ਸੰਸਥਾਵਾਂ ਨੂੰ ਸਹਿਯੋਗ ਕਰੇ। 
 ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾਵੇਗੀ  :  ਜ਼ਿਲਾ  ਿਸੱਖਿਆ  ਅਫਸਰ 
ਇਸ ਸਬੰਧੀ ਜਦੋਂ ਜ਼ਿਲਾ ਸਿੱਖਿਆ ਅਫਸਰ ਸੈਕੰਡਰੀ ਗੁਰਦਾਸਪੁਰ ਰਾਕੇਸ਼ ਬਾਲਾ ਨਾਲ  ਗੱਲ ਕੀਤੀ  ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਇਸੇ ਸਾਲ ਜ਼ਿਲਾ ਸਿੱਖਿਆ ਅਧਿਕਾਰੀ ਦੇ ਰੂਪ ’ਚ ਅਹੁਦਾ ਸੰਭਾਲਿਆ ਹੈ। ਪਿਛਲੇ ਸਾਲ ਖਿਡਾਰੀਆਂ ਨੂੰ ਸਨਮਾਨਤ ਕਰਨ ਦਾ ਸਮਾਗਮ ਆਯੋਜਿਤ ਨਹੀਂ ਕੀਤਾ ਗਿਆ ਸੀ ਪਰ ਇਸ ਸਾਲ ਇਹ ਸਮਾਗਮ ਜ਼ਰੂਰ ਆਯੋਜਿਤ ਕੀਤਾ ਜਾਵੇਗਾ। ਖੇਡਾਂ ਨੂੰ ਉਤਸ਼ਾਹਿਤ ਕਰਨ  ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾਵੇਗੀ ਅਤੇ ਜ਼ਿਲਾ ਟੂਰਨਾਮੈਂਟ ਕਮੇਟੀ ਨੂੰ ਸਰਗਰਮ ਕੀਤਾ ਜਾਵੇਗਾ। 
 ਮਕਾਊਂ ’ਚ ਏਸ਼ੀਅਨ ਜੂਡੋ ਪ੍ਰਤੀਯੋਗਤਾ ਵਿਚੋਂ ਕਾਂਸੇ ਦਾ ਤਮਗਾ ਜਿੱਤ ਕੇ ਲਿਆਉਣ ਵਾਲੇ ਖਿਡਾਰੀ ਮਨਪ੍ਰੀਤ ਨੂੰ ਕੋਈ ਆਰਥਕ ਮਦਦ ਨਾ ਦੇਣ ਸਬੰਧੀ ਉਨ੍ਹਾਂ  ਕਿਹਾ ਕਿ ਇਸ ਬਾਰੇ ਮੈਂ ਤਾਂ ਉੱਚ ਅਧਿਕਾਰੀਅਾਂ ਨੂੰ ਇਸ ਦੇ ਪ੍ਰਾਰਥਨਾ ਪੱਤਰ ਦੀ ਕਾਪੀ ਮਨਜ਼ੂਰ ਕਰ ਕੇ ਭੇਜ ਦਿੱਤੀ ਸੀ ਪਰ ਪੰਜਾਬ ਸਰਕਾਰ ਤੋਂ ਹੀ ਕੋਈ ਜਵਾਬ ਨਹੀਂ ਆਇਆ। ਪੇਂਡੂ ਖੇਤਰਾਂ ਸਮੇਤ ਸ਼ਹਿਰਾਂ ’ਚ ਬਣੇ ਇਨਡੋਰ ਸਟੇਡੀਅਮ ਦੀ ਬੁਰੀ ਹਾਲਤ ਸਬੰਧੀ ਉਨ੍ਹਾਂ ਕਿਹਾ ਕਿ ਇਸਦੀ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ ਹੈ ਅਤੇ ਹੁਣ ਮਾਮਲਾ ਧਿਆਨ ’ਚ ਆ ਗਿਆ ਹੈ । ਜਲਦੀ ਇਸ ਸਬੰਧੀ ਰਿਪੋਰਟ ਤਿਆਰ ਕਰ ਕੇ ਕਾਰਵਾਈ ਕੀਤੀ ਜਾਵੇਗੀ।