ਰਿਹਾਇਸ਼ੀ ਇਲਾਕੇ ’ਚ ਜਾਨਵਰਾਂ ਦੀ ਮੰਡੀ ਤੇ ਮੀਟ ਦੀਆਂ ਦੁਕਾਨਾਂ ਤੋਂ ਭੜਕੇ ਲੋਕ

ਲੁਧਿਆਣਾ (ਜ. ਬ.)-ਰਿਹਾਇਸ਼ੀ ਇਲਾਕੇ ’ਚ ਨਾਜਾਇਜ਼ ਢੰਗ ਨਾਲ ਜਾਨਵਰਾਂ ਨੂੰ ਕੱਟੇ ਜਾਣ ਦੀ ਚੱਲ ਰਹੀ ਮੰਡੀ ਵਜੋਂ ਭੜਕੇ ਲੋਕਾਂ ਨੇ ਰੋਸ ਮੁਜ਼ਾਹਰਾ ਕੀਤਾ। ਪਰਮਜੀਤ ਪੰਮਾ, ਸੁਸ਼ਮਾ ਰਾਣੀ, ਪਰਮਜੀਤ ਕੌਰ, ਕੁਲਵੰਤ ਸਿੰਘ, ਅਮਰਜੀਤ ਹੀਰਾ ਤੇ ਹੋਰਨਾਂ ਨੇ ਕਿਹਾ ਕਿ ਗੁਰਮੇਲ ਪਾਰਕ ਟਿੱਬਾ ਰੋਡ ਇਲਾਕੇ ’ਚ ਕਾਫੀ ਸਮੇਂ ਤੋਂ ਜਾਨਵਰਾਂ ਨੂੰ ਕੱਟੇ ਜਾਣ ਦੀ ਨਾਜਾਇਜ਼ ਮੰਡੀ ਚੱਲ ਰਹੀ ਹੈ। ਇਲਾਕੇ ਦੇ ਲੋਕ ਇਸ ਕਾਰਨ ਬਹੁਤ ਪ੍ਰੇਸ਼ਾਨ ਹਨ। ਰਿਹਾਇਸ਼ੀ ਇਲਾਕੇ ’ਚ ਮੁਰਗਾ ਮੰਡੀ, ਮੀਟ ਦੀਆਂ ਦੁਕਾਨਾਂ ਸ਼ਰੇਆਮ ਚੱਲ ਰਹੀਆਂ ਹਨ। ਨਾਲ ਹੀ ਕਈ ਸਕੂਲ ਹਨ। ਇਸ ਰਸਤੇ ਤੋਂ ਸਕੂਲੀ ਬੱਚਿਆਂ ਦਾ ਲੰਘਣਾ ਲੱਗਾ ਰਹਿੰਦਾ ਹੈ। ਕੱਟੇ ਜਾਣ ਵਾਲੇ ਜਾਨਵਰਾਂ ਦੀ ਫੈਲੀ ਗੰਦਗੀ ਕਾਰਨ ਇਲਾਕੇ ਦੇ ਲੋਕਾਂ ਦਾ ਜਿਊਣਾ ਮੁਹਾਲ ਹੋ ਗਿਆ ਹੈ। ਇਲਾਕੇ ’ਚ ਬੀਮਾਰੀਆਂ ਫੈਲ ਰਹੀਆਂ ਹਨ, ਜਦਕਿ ਵਿਭਾਗ ਕੁੰਭਕਰਨੀ ਨੀਂਦ ਸੁੱਤਾ ਪਿਆ ਹੈ। ਸ਼ਿਕਾਇਤ ਦੇਣ ’ਤੇ ਵੀ ਕਾਰਵਾਈ ਨਹੀਂ ਕੀਤੀ ਜਾ ਰਹੀ।