ਘਰੋਂ ਤੋਂ ਖੇਡਣ ਲਈ ਗਿਆ ਮੁੰਡਾ ਲਾਪਤਾ

ਕੁਰਾਲੀ (ਬਠਲਾ) : ਸ਼ਹਿਰ ਦੇ ਵਾਰਡ ਨੰਬਰ-4 ਦਾ 10 ਸਾਲਾ ਮੁੰਡਾ ਅਚਾਨਕ ਲਾਪਤਾ ਹੋ ਗਿਆ। ਇਸ ਸਬੰਧੀ ਪੁਲਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ। ਲਾਪਤਾ ਮੁੰਡੇ ਦੀ ਮਾਂ ਨੀਲਮ ਰਾਣੀ ਨੇ ਸਥਾਨਕ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੱਸਿਆ ਕਿ ਉਸ ਦਾ ਪੁੱਤਰ ਜਤਿਨ ਰਾਣਾ ਸਵੇਰੇ 7 ਵਜੇ ਆਪਣੇ ਦੋਸਤਾਂ ਨਾਲ ਖੇਡਣ ਗਿਆ ਸੀ ਪਰ ਵਾਪਸ ਨਹੀਂ ਆਇਆ।

ਉਸ ਨੇ ਦੱਸਿਆ ਕਿ ਜਦੋਂ ਕਈ ਘੰਟੇ ਬਾਅਦ ਵੀ ਜਤਿਨ ਘਰ ਨਹੀਂ ਪਰਤਿਆ ਤਾਂ ਉਸ ਨੇ ਉਸ ਦੀ ਭਾਲ ਸ਼ੁਰੂ ਕਰ ਦਿੱਤੀ ਅਤੇ ਉਸ ਦੇ ਦੋਸਤਾਂ ਤੋਂ ਵੀ ਜਾਣਕਾਰੀ ਲਈ ਪਰ ਜਤਿਨ ਕਿਧਰੇ ਨਹੀਂ ਮਿਲਿਆ। ਪੁਲਸ ਨੇ ਮੁੰਡੇ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।