ਮਦਦ ਕਰਨ ਦੇ ਬਹਾਨੇ ਸ਼ਾਤਰ ਠੱਗ ਨੇ ਬਦਲਿਆ ATM ਕਾਰਡ! ਖਾਤੇ ''ਚੋਂ ਉਡਾਏ 1.50 ਲੱਖ

ਲੁਧਿਆਣਾ (ਰਾਜ/ਤਰੁਣ): ਧਰਮਪੁਰਾ ਇਲਾਕੇ ਵਿਚ ਮਦਦ ਕਰਨ ਦੇ ਬਹਾਨੇ ਇਕ ਸ਼ਾਤਰ ਠੱਗ ਨੇ ਇਕ ਵਿਅਕਤੀ ਦਾ ਏ.ਟੀ.ਐੱਮ. ਕਾਰਡ ਬਦਲ ਕੇ ਉਸ ਦੇ ਖਾਤੇ ਵਿਚੋਂ ਕਰੀਬ 1.50 ਲੱਖ ਰੁਪਏ ਦੀ ਨਕਦੀ ਉਡਾ ਲਈ। ਪੀੜਤ ਨੇ ਇਸ ਸਬੰਧ ਵਿਚ ਪੁਲਸ ਨੂੰ ਸ਼ਿਕਾਇਤ ਦਰਜ ਕਰਵਾਈ ਹੈ। ਇਸ ਮਾਮਲੇ ਵਿਚ ਥਾਣਾ ਦਰੇਸੀ ਦੀ ਪੁਲਸ ਨੇ ਅਣਪਛਾਤੇ 'ਤੇ ਕੇਸ ਦਰਜ ਕਰ ਲਿਆ ਹੈ। ਪੁਲਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਅਤੇ ਸੀ.ਸੀ.ਟੀ.ਵੀ. ਫੁਟੇਜ ਖੰਗਾਲ ਕੇ ਮੁਲਜ਼ਮ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਗਈ ਹੈ। 

ਸ਼ਿਕਾਇਤਕਰਤਾ ਚਰਨਜੀਤ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਦੀ ਪਤਨੀ ਮਨਜੀਤ ਕੌਰ ਦਾ ਬੈਂਕ ਆਫ ਬੜੌਦਾ (ਸ਼ਾਖਾ ਧਰਮਪੁਰਾ) ਵਿਚ ਖਾਤਾ ਹੈ। ਬੀਤੀ 29 ਮਾਰਚ ਨੂੰ ਉਹ ਆਪਣੀ ਪਤਨੀ ਦਾ ਏ.ਟੀ.ਐੱਮ. ਕਾਰਡ ਲੈ ਕੇ ਧਰਮਪੁਰਾ ਸਥਿਤ ਬੈਂਕ ਆਫ ਬੜੌਦਾ ਦੇ ਏ.ਟੀ.ਐੱਮ. ਬੂਥ 'ਤੇ ਪੈਸੇ ਕਢਵਾਉਣ ਗਿਆ ਸੀ। ਜਦੋਂ ਉਹ ਮਸ਼ੀਨ ਤੋਂ ਪੈਸੇ ਕੱਢਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਤਾਂ ਟ੍ਰਾਂਜੈਕਸ਼ਨ ਸਫਲ ਨਹੀਂ ਹੋਈ। ਇਸੇ ਦੌਰਾਨ ਉੱਥੇ ਪਹਿਲਾਂ ਤੋਂ ਹੀ ਮੌਜੂਦ ਇੱਕ ਅਣਪਛਾਤੇ ਵਿਅਕਤੀ ਨੇ ਮਦਦ ਕਰਨ ਦੀ ਪੇਸ਼ਕਸ਼ ਕੀਤੀ। ਉਸ ਵਿਅਕਤੀ ਨੇ ਬੜੀ ਚਲਾਕੀ ਨਾਲ ਧੋਖੇ ਨਾਲ ਉਸ ਦਾ ਅਸਲੀ ਏ.ਟੀ.ਐਮ. ਕਾਰਡ ਬਦਲ ਲਿਆ ਅਤੇ ਉਸ ਨੂੰ ਦੂਜਾ ਫਰਜ਼ੀ ਕਾਰਡ ਫੜਾ ਦਿੱਤਾ। ਉਸ ਨੂੰ ਠੱਗੀ ਦਾ ਅਹਿਸਾਸ ਉਦੋਂ ਹੋਇਆ ਜਦੋਂ ਉਸ ਦੇ ਮੋਬਾਈਲ 'ਤੇ ਪੈਸੇ ਕੱਟਣ ਦੇ ਮੈਸੇਜ ਆਉਣੇ ਸ਼ੁਰੂ ਹੋਏ। ਮੁਲਜ਼ਮ ਨੇ ਕਾਰਡ ਬਦਲਣ ਤੋਂ ਬਾਅਦ ਖਾਤੇ ਵਿੱਚੋਂ ਵੱਖ-ਵੱਖ ਥਾਵਾਂ ਤੋਂ ਕੁੱਲ 1 ਲੱਖ 50 ਹਜ਼ਾਰ ਰੁਪਏ ਕਢਵਾ ਲਏ।

ਏ.ਟੀ.ਐਮ. ਇਸਤੇਮਾਲ ਕਰਦੇ ਸਮੇਂ ਰੱਖੋ ਇਹ ਸਾਵਧਾਨੀਆਂ:

•    ਆਪਣਾ ਪਿਨ (PIN) ਕਿਸੇ ਨਾਲ ਸਾਂਝਾ ਨਾ ਕਰੋ।
•    ਏ.ਟੀ.ਐਮ. ਦੇ ਅੰਦਰ ਕਿਸੇ ਵੀ ਅਣਪਛਾਤੇ ਵਿਅਕਤੀ ਦੀ ਮਦਦ ਨਾ ਲਓ।
•    ਕਾਰਡ ਮਸ਼ੀਨ ਵਿਚ ਪਾਉਂਦੇ ਸਮੇਂ ਕੀ-ਪੈਡ ਨੂੰ ਦੂਜੇ ਹੱਥ ਨਾਲ ਢੱਕ ਲਓ।
•    ਟ੍ਰਾਂਜੈਕਸ਼ਨ ਪੂਰੀ ਹੋਣ ਤੋਂ ਬਾਅਦ 'Cancel' ਬਟਨ ਦਬਾਉਣਾ ਨਾ ਭੁੱਲੋ।