ਜਲਦੀ ਚਿਖਾ ''ਚੋਂ ਕੱਢੇ ਅੱਧ-ਸੜੇ ਅੰਗ, ਖੌਪੜੀ ''ਚ ਪਕਾਏ ਚੌਲ, ਸ਼ਮਸ਼ਾਨ ਘਾਟ ''ਚੋਂ ਤਾਂਤਰਿਕ ਗ੍ਰਿਫਤਾਰ

ਮੇਰਠ: ਉੱਤਰ ਪ੍ਰਦੇਸ਼ ਦੇ ਮੁਡਾਲੀ ਥਾਣਾ ਖੇਤਰ ਅਧੀਨ ਪੈਂਦੇ ਅਜਰਾੜਾ ਪਿੰਡ ਦੇ ਸ਼ਮਸ਼ਾਨ ਘਾਟ 'ਤੇ ਸ਼ੁੱਕਰਵਾਰ ਰਾਤ ਨੂੰ ਤਿੰਨ ਲੋਕਾਂ ਨੂੰ ਤੰਤਰ ਕਿਰਿਆ ਕਰਦੇ ਹੋਏ ਅਤੇ ਜਲਦੀ ਚਿਤਾ ਵਿੱਚੋਂ ਅੱਧ-ਸੜੇ ਲਾਸ਼ ਦੇ ਅੰਗ ਕੱਢਦੇ ਹੋਏ ਰੰਗੇ ਹੱਥੀਂ ਫੜਿਆ ਗਿਆ ਹੈ। ਇਹ ਸ਼ਮਸ਼ਾਨ ਘਾਟ ਪਿੰਡ ਤੋਂ ਲਗਭਗ 2 ਕਿਲੋਮੀਟਰ ਦੂਰ ਸਥਿਤ ਹੈ। ਮੌਕੇ 'ਤੇ ਦੇਖਿਆ ਗਿਆ ਕਿ ਮੁਲਜ਼ਮਾਂ ਨੇ ਮ੍ਰਿਤਕ ਦੀ ਖੋਪੜੀ ਵੱਖਰੀ ਰੱਖੀ ਹੋਈ ਸੀ। ਇੰਨਾ ਹੀ ਨਹੀਂ, ਉਹ ਨੇੜੇ ਹੀ ਮਿੱਟੀ ਦੇ ਇੱਕ ਬਰਤਨ (ਮਟਕਾ) ਵਿੱਚ ਚਿਤਾ ਦੀ ਅੱਗ ਦੀ ਗਰਮੀ 'ਤੇ ਚੌਲ ਵੀ ਪਕਾ ਰਹੇ ਸਨ। ਪਿੰਡ ਵਾਸੀਆਂ ਨੇ ਸ਼ੱਕ ਜਤਾਇਆ ਕਿ ਇਹ ਸਾਰਾ ਕੰਮ ਤਾਂਤਰਿਕ ਕਿਰਿਆ ਲਈ ਕੀਤਾ ਜਾ ਰਿਹਾ ਸੀ।

ਇਹ ਮਾਮਲਾ ਮੁਡਾਲੀ ਥਾਣਾ ਖੇਤਰ ਦੇ ਅਜਰਾੜਾ ਪਿੰਡ ਵਿੱਚ ਸ਼ੁੱਕਰਵਾਰ ਰਾਤ ਦਾ ਹੈ। ਇਸੇ ਪਿੰਡ ਦੇ ਰਹਿਣ ਵਾਲੇ ਗਜੇਂਦਰ (32) ਪੁੱਤਰ ਬੀਰਪਾਲ ਦਾ ਅੰਤਿਮ ਸੰਸਕਾਰ ਰਾਤ ਕਰੀਬ 8 ਵਜੇ ਕੀਤਾ ਗਿਆ ਸੀ। ਗਜੇਂਦਰ, ਜੋ ਖਜੂਰੀ ਇਲਾਕੇ ਵਿੱਚ ਹੇਅਰ ਸੈਲੂਨ ਚਲਾਉਂਦੇ ਸਨ, ਦੀ ਕੁਝ ਦਿਨ ਪਹਿਲਾਂ ਕੁਝ ਨੌਜਵਾਨਾਂ ਨਾਲ ਵਿਵਾਦ ਤੋਂ ਬਾਅਦ ਹੱਤਿਆ ਕਰ ਦਿੱਤੀ ਗਈ ਸੀ।

ਰਾਤ 11 ਵਜੇ ਦੇ ਆਸਪਾਸ ਜੰਗਲ ਵਿੱਚ ਨਲਕੂਪ ਚਲਾਉਣ ਗਏ ਕੁਝ ਲੋਕਾਂ ਦੀ ਨਜ਼ਰ ਚਿਤਾ ਦੇ ਕੋਲ ਅਜੀਬ ਹਰਕਤਾਂ 'ਤੇ ਪਈ। ਉਨ੍ਹਾਂ ਨੇ ਦੇਖਿਆ ਕਿ ਕੁਝ ਲੋਕ ਲਾਸ਼ ਤੋਂ ਅੱਧ-ਸੜੇ ਅੰਗ ਕੱਢ ਰਹੇ ਸਨ। ਉਨ੍ਹਾਂ ਤੁਰੰਤ ਪਿੰਡ ਵਿੱਚ ਸੂਚਨਾ ਪਹੁੰਚਾਈ। ਮ੍ਰਿਤਕ ਦੇ ਪਰਿਵਾਰਕ ਮੈਂਬਰ ਅਤੇ ਕਈ ਪਿੰਡ ਵਾਸੀ ਤੁਰੰਤ ਸ਼ਮਸ਼ਾਨ ਘਾਟ ਪਹੁੰਚੇ। ਗੁੱਸੇ ਵਿੱਚ ਆਏ ਲੋਕਾਂ ਨੇ ਤਿੰਨਾਂ ਮੁਲਜ਼ਮਾਂ ਨੂੰ ਫੜ ਲਿਆ ਅਤੇ ਉਨ੍ਹਾਂ ਦੀ ਜ਼ਬਰਦਸਤ ਕੁੱਟਮਾਰ ਕੀਤੀ। ਇਸ ਦੌਰਾਨ ਇੱਕ ਮੁਲਜ਼ਮ ਕਿਸੇ ਤਰ੍ਹਾਂ ਉਥੋਂ ਭੱਜ ਨਿਕਲਿਆ।

ਤਾਂਤਰਿਕ ਸਿੱਧੀ ਲਈ ਖੌਪੜੀ 'ਚ ਪਕਾਏ ਚੌਲ

ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਫੜਿਆ ਗਿਆ ਮੁੱਖ ਮੁਲਜ਼ਮ, ਜੋ ਕਿ ਪਿੰਡ ਤੋਂ ਬਾਹਰ ਦਾ ਹੈ, ਦਾ ਨਾਮ ਬਲਬੀਰ ਜਾਂ ਬਲਜੀਤ ਹੈ। ਇਹ ਮੁਲਜ਼ਮ ਲੰਬੇ ਸਮੇਂ ਤੋਂ ਤੰਤਰ ਕਿਰਿਆ ਕਰਦਾ ਰਿਹਾ ਹੈ। ਪਿੰਡ ਵਾਸੀ ਪੱਪੂ ਦਾ ਕਹਿਣਾ ਹੈ ਕਿ ਇਹ ਦਾਅਵਾ ਕੀਤਾ ਜਾਂਦਾ ਹੈ ਕਿ ਚਿਤਾ ਦੀ ਅੱਗ ਵਿੱਚ ਪਕਾਏ ਚੌਲ ਖਾਣ ਨਾਲ ਤਾਂਤਰਿਕ ਸਿੱਧੀ ਪ੍ਰਾਪਤ ਹੁੰਦੀ ਹੈ। ਪਿੰਡ ਵਾਸੀਆਂ ਨੇ ਇਹ ਵੀ ਸ਼ੱਕ ਜਤਾਇਆ ਹੈ ਕਿ ਪਿਛਲੇ ਕੁਝ ਦਿਨਾਂ ਵਿੱਚ ਪਿੰਡ ਦੇ ਕਬਰਿਸਤਾਨ ਵਿੱਚ ਦੱਬੇ ਗਏ ਕਈ ਬੱਚਿਆਂ ਦੀਆਂ ਕਬਰਾਂ ਖੁਲ੍ਹੀਆਂ ਮਿਲੀਆਂ ਸਨ ਅਤੇ ਉਨ੍ਹਾਂ ਦੀਆਂ ਲਾਸ਼ਾਂ ਵੀ ਗਾਇਬ ਸਨ। ਪਹਿਲਾਂ ਲੋਕਾਂ ਨੇ ਇਸ ਨੂੰ ਕਿਸੇ ਜਾਨਵਰ ਦਾ ਕੰਮ ਸਮਝਿਆ ਸੀ, ਪਰ ਹੁਣ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਇਹ ਕਬਰਾਂ ਵੀ ਤਾਂਤਰਿਕ ਬਲਜੀਤ ਨੇ ਹੀ ਤੰਤਰ ਕਿਰਿਆ ਲਈ ਪੱਟੀਆਂ ਹੋਣਗੀਆਂ।

ਪੁਲਸ ਨੇ 2 ਨੂੰ ਕੀਤਾ ਗ੍ਰਿਫ਼ਤਾਰ, ਜੇਲ੍ਹ ਭੇਜਿਆ

ਘਟਨਾ ਦੀ ਸੂਚਨਾ ਮਿਲਣ 'ਤੇ ਪੁਲਸ ਮੌਕੇ 'ਤੇ ਪਹੁੰਚੀ ਅਤੇ ਕਿਸੇ ਤਰ੍ਹਾਂ ਲੋਕਾਂ ਨੂੰ ਸ਼ਾਂਤ ਕਰਵਾ ਕੇ ਦੋਸ਼ੀਆਂ ਨੂੰ ਭੀੜ ਤੋਂ ਛੁਡਾ ਕੇ ਥਾਣੇ ਲੈ ਆਈ। ਮ੍ਰਿਤਕ ਗਜੇਂਦਰ ਦੇ ਭਰਾ ਸੁੰਦਰ ਨੇ ਮੁਲਜ਼ਮ ਬਲਜੀਤ ਅਤੇ ਦੋ ਅਣਪਛਾਤੇ ਲੋਕਾਂ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਹੈ। ਐੱਸ. ਪੀ. ਦੇਹਾਤ ਅਭਿਜੀਤ ਕੁਮਾਰ ਨੇ ਦੱਸਿਆ ਕਿ ਲਾਸ਼ ਨਾਲ ਛੇੜਛਾੜ ਕਰਨ ਦੀ ਸੂਚਨਾ ਮਿਲੀ ਸੀ, ਜਿਸ ਤੋਂ ਬਾਅਦ ਪੁਲਿਸ ਨੇ ਉੱਥੋਂ ਦੋ ਮੁਲਜ਼ਮਾਂ ਬਲਜੀਤ ਅਤੇ ਇਮਰਾਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।

ਦੋਵਾਂ ਖ਼ਿਲਾਫ਼ ਮੁਕੱਦਮਾ ਦਰਜ ਕਰਕੇ ਉਨ੍ਹਾਂ ਨੂੰ ਜੇਲ੍ਹ ਭੇਜ ਦਿੱਤਾ ਗਿਆ ਹੈ। ਮੁਡਾਲੀ ਥਾਣਾ ਮੁਖੀ ਰਾਮ ਗੋਪਾਲ ਸਿੰਘ ਨੇ ਦੱਸਿਆ ਕਿ ਫੜੇ ਗਏ ਮੁਲਜ਼ਮਾਂ ਤੋਂ ਪੁੱਛਗਿੱਛ ਜਾਰੀ ਹੈ ਅਤੇ ਜਾਂਚ ਦੇ ਆਧਾਰ 'ਤੇ ਅੱਗੇ ਦੀ ਕਾਰਵਾਈ ਕੀਤੀ ਜਾਵੇਗੀ। ਪੁਲਸ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਚੌਲ ਤਾਂ ਚਿਤਾ ਦੀ ਅੱਗ 'ਤੇ ਰੱਖੇ ਮਟਕੇ ਵਿੱਚ ਪੱਕ ਰਹੇ ਸਨ, ਪਰ ਖੋਪੜੀ ਵਿੱਚ ਚੌਲ ਬਣਾਉਣ ਦੀ ਗੱਲ ਸਾਹਮਣੇ ਨਹੀਂ ਆਈ ਹੈ।