ਮਹਾਕੁੰਭ 2025 : ਰੇਲਵੇ ਚਲਾਏਗਾ 3,000 ਸਪੈਸ਼ਲ ਟਰੇਨਾਂ, ਸੁਰੱਖਿਆ ਅਤੇ ਸਹੂਲਤਾਂ ਦੇ ਪੁਖਤਾ ਪ੍ਰਬੰਧ
Tuesday, Dec 31, 2024 - 05:43 PM (IST)
ਨੈਸ਼ਨਲ ਡੈਸਕ- ਯੂਪੀ ਦੇ ਪ੍ਰਯਾਗਰਾਜ ਵਿੱਚ ਮਹਾਕੁੰਭ 2025 ਦੌਰਾਨ ਭਾਰੀ ਭੀੜ ਨੂੰ ਦੇਖਦੇ ਹੋਏ ਭਾਰਤੀ ਰੇਲਵੇ ਨੇ ਵਿਸ਼ੇਸ਼ ਤਿਆਰੀਆਂ ਕੀਤੀਆਂ ਹਨ। ਉੱਤਰੀ ਮੱਧ ਰੇਲਵੇ ਦੇ ਜਨਰਲ ਮੈਨੇਜਰ ਉਪੇਂਦਰ ਚੰਦਰ ਜੋਸ਼ੀ ਨੇ ਸੋਮਵਾਰ ਨੂੰ ਦੱਸਿਆ ਕਿ ਮੇਲੇ ਲਈ 3,000 ਵਿਸ਼ੇਸ਼ ਰੇਲ ਗੱਡੀਆਂ ਚਲਾਈਆਂ ਜਾਣਗੀਆਂ। ਇਨ੍ਹਾਂ 'ਚੋਂ 560 ਟਰੇਨਾਂ ਰਿੰਗ ਰੇਲ ਰੂਟ 'ਤੇ ਸੰਚਾਲਿਤ ਹੋਣਗੀਆਂ।
560 ਟਿਕਟਿੰਗ ਪੁਆਇੰਟਾਂ 'ਤੇ ਪ੍ਰਤੀ ਦਿਨ 10 ਲੱਖ ਟਿਕਟਾਂ
ਪ੍ਰਯਾਗਰਾਜ ਅਤੇ ਆਲੇ-ਦੁਆਲੇ ਦੇ ਨੌ ਰੇਲਵੇ ਸਟੇਸ਼ਨਾਂ ਪ੍ਰਯਾਗਰਾਜ ਜੰਕਸ਼ਨ ਸੂਬੇਦਾਰਗੰਜ, ਨੈਨੀ, ਪ੍ਰਯਾਗਰਾਜ ਛਵੀਕੀ, ਪ੍ਰਯਾਗ ਜੰਕਸ਼ਨ, ਫਾਫਾਮਉ, ਪ੍ਰਯਾਗਰਾਜ ਰਾਮਬਾਗ, ਪ੍ਰਯਾਗਰਾਜ ਸੰਗਮ ਅਤੇ ਝੂੰਸੀ ਦੇ ਨਾਲ ਮੇਲੇ ਦੇ ਖੇਤਰ ਵਿੱਚ 560 ਟਿਕਟਿੰਗ ਪੁਆਇੰਟ ਬਣਾਏ ਜਾ ਰਹੇ ਹਨ। ਇਨ੍ਹਾਂ ਕਾਊਂਟਰਾਂ ਤੋਂ ਰੋਜ਼ਾਨਾ 10 ਲੱਖ ਟਿਕਟਾਂ ਜਾਰੀ ਕੀਤੀਆਂ ਜਾਣਗੀਆਂ। ਯਾਤਰੀਆਂ ਦੀ ਸਹੂਲਤ ਲਈ ਰੇਲਵੇ ਨੇ 15 ਦਿਨ ਪਹਿਲਾਂ ਟਿਕਟ ਬੁਕਿੰਗ ਦੀ ਸੁਵਿਧਾ ਸ਼ੁਰੂ ਕਰ ਦਿੱਤੀ ਹੈ।
ਰਿੰਗ ਰੇਲ ਰੂਟ ਤਿਆਰ
ਮਹਾਂ ਕੁੰਭ ਮੇਲੇ ਲਈ ਵਿਸ਼ੇਸ਼ ਰਿੰਗ ਰੇਲ ਰੂਟ ਤਿਆਰ ਕੀਤੇ ਗਏ ਹਨ। ਇਨ੍ਹਾਂ ਰੂਟਾਂ ਵਿੱਚ ਪ੍ਰਯਾਗਰਾਜ-ਅਯੁੱਧਿਆ-ਵਾਰਾਨਸੀ-ਪ੍ਰਯਾਗਰਾਜ, ਪ੍ਰਯਾਗਰਾਜ-ਸੰਗਮ ਪ੍ਰਯਾਗ-ਜੌਨਪੁਰ-ਪ੍ਰਯਾਗ-ਪ੍ਰਯਾਗਰਾਜ, ਗੋਵਿੰਦਪੁਰੀ-ਪ੍ਰਯਾਗਰਾਜ-ਚਿੱਤਰਕੂਟ-ਗੋਵਿੰਦਪੁਰੀ ਅਤੇ ਝਾਂਸੀ-ਗੋਵਿੰਦਪੁਰੀ-ਪ੍ਰਯਾਗਰਾਜ-ਮਾਨਿਕਪੁਰ-ਚਿੱਤਰਕੋਟ-ਸ਼ਾਮਲ ਹਨ।
ਮੇਲੇ ਦੌਰਾਨ ਸੁਰੱਖਿਆ ਲਈ 18,000 ਤੋਂ ਵੱਧ ਰੇਲਵੇ ਪ੍ਰੋਟੈਕਸ਼ਨ ਫੋਰਸ (ਆਰ.ਪੀ.ਐੱਫ.) ਅਤੇ ਰਾਜ ਰੇਲਵੇ ਪੁਲਸ ਦੇ ਜਵਾਨ ਤਾਇਨਾਤ ਕੀਤੇ ਜਾਣਗੇ। ਪ੍ਰਯਾਗਰਾਜ ਜੰਕਸ਼ਨ 'ਤੇ, ਸ਼ਹਿਰ ਵਾਲੇ ਪਾਸੇ ਤੋਂ ਪ੍ਰਵੇਸ਼ ਕਰਨ ਅਤੇ ਸਿਵਲ ਲਾਈਨ ਵਾਲੇ ਪਾਸੇ ਤੋਂ ਬਾਹਰ ਨਿਕਲਣ ਲਈ ਪ੍ਰਬੰਧ ਕੀਤੇ ਜਾਣਗੇ। ਪ੍ਰਯਾਗਰਾਜ ਜੰਕਸ਼ਨ 'ਤੇ ਛੇ ਬਿਸਤਰਿਆਂ ਵਾਲਾ ਨਿਗਰਾਨ ਕਮਰਾ ਵੀ ਸਥਾਪਿਤ ਕੀਤਾ ਗਿਆ ਹੈ। ਇਸ ਵਿੱਚ ਆਕਸੀਜਨ ਸਿਲੰਡਰ, ਕੰਸੈਂਟਰੇਟਰ, ਈਸੀਜੀ ਮਸ਼ੀਨ, ਗਲੂਕੋਮੀਟਰ, ਨੈਬੂਲਾਈਜ਼ਰ ਅਤੇ ਸਟ੍ਰੈਚਰ ਵਰਗੀਆਂ ਮੈਡੀਕਲ ਸਹੂਲਤਾਂ ਮੁਹੱਈਆ ਕਰਵਾਈਆਂ ਗਈਆਂ ਹਨ।
ਸੁਰੱਖਿਆ ਲਈ ਆਧੁਨਿਕ ਤਕਨੀਕ ਦੀ ਵਰਤੋਂ
ਮੇਲੇ ਵਿੱਚ ਯਾਤਰੀਆਂ ਦੀ ਸੁਰੱਖਿਆ ਲਈ 1,186 ਸੀਸੀਟੀਵੀ ਕੈਮਰੇ ਲਗਾਏ ਜਾਣਗੇ, ਜਿਨ੍ਹਾਂ ਵਿੱਚੋਂ 116 ਕੈਮਰੇ ਏਆਈ ਆਧਾਰਿਤ ਚਿਹਰੇ ਦੀ ਪਛਾਣ ਪ੍ਰਣਾਲੀ ਨਾਲ ਲੈਸ ਹਨ, ਜੋ ਕਿਸੇ ਵੀ ਸਮਾਜ ਵਿਰੋਧੀ ਅਨਸਰ ਦੀ ਪਛਾਣ ਕਰ ਸਕਣਗੇ। ਰੇਲਵੇ ਇਹ ਯਕੀਨੀ ਬਣਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਕਿ ਯਾਤਰੀ ਮਹਾਕੁੰਭ 2025 ਵਿੱਚ ਸੁਰੱਖਿਅਤ, ਸੁਵਿਧਾਜਨਕ ਅਤੇ ਸੰਗਠਿਤ ਯਾਤਰਾ ਦਾ ਅਨੁਭਵ ਕਰ ਸਕਣ।
