ਦੁਨੀਆ 'ਤੇ ਹੋਈ ਕਰਾਊਡ ਸਟ੍ਰਾਈਕ! ਰੱਦ ਹੋਈਆਂ ਹਜ਼ਾਰਾਂ ਫਲਾਈਟਾਂ, ਠੱਪ ਹੋਏ ਬਾਜ਼ਾਰ

ਨਵੀਂ ਦਿੱਲੀ : ਦੁਨੀਆ ਭਰ ਦੇ ਪ੍ਰਮੁੱਖ ਬੈਂਕਾਂ, ਮੀਡੀਆ ਆਊਟਲੇਟਾਂ ਅਤੇ ਏਅਰਲਾਈਨਾਂ ਨੇ ਆਈਟੀ ਸੇਵਾਵਾਂ ਦੇ ਵੱਡੇ ਪੱਧਰ 'ਤੇ ਵਿਘਨ ਦੀ ਸ਼ਿਕਾਇਤ ਕੀਤੀ ਹੈ, ਜਿਸ ਕਾਰਨ ਉਨ੍ਹਾਂ ਦੀਆਂ ਸੇਵਾਵਾਂ ਪ੍ਰਭਾਵਿਤ ਹੋਈਆਂ ਹਨ। ਆਈਟੀ ਸੇਵਾਵਾਂ ਵਿੱਚ ਇਸ ਰੁਕਾਵਟ ਦੇ ਕਾਰਨ ਬਾਰੇ ਤਸਵੀਰ ਅਜੇ ਸਪੱਸ਼ਟ ਨਹੀਂ ਹੈ, ਪਰ ਇਸ ਤੋਂ ਪ੍ਰਭਾਵਿਤ ਕਈ ਅਦਾਰਿਆਂ ਨੇ ਇਸਦੇ ਲਈ ਮਾਈਕ੍ਰੋਸਾਫਟ ਪੀਸੀ ਆਪਰੇਟਿੰਗ ਸਿਸਟਮ ਵਿੱਚ ਗੜਬੜ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ।
ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਮਾਈਕ੍ਰੋਸਾਫਟ 365 ਦੇ ਅਧਿਕਾਰਤ ਹੈਂਡਲ ਦੁਆਰਾ ਜਾਰੀ ਕੀਤੇ ਗਏ ਇਕ ਸਰਵਿਸ ਅਪਡੇਟ ਵਿਚ ਕਿਹਾ ਗਿਆ ਹੈ ਕਿ ਅਸੀਂ ਮਾਈਕਰੋਸਾਫਟ 365 ਦੀਆਂ ਵੱਖ-ਵੱਖ ਐਪਜ਼ ਤੇ ਸਰਵਿਸਜ਼ ਦੀ ਵਰਤੋਂ ਕਰਨ ਵਾਲੇ ਯੂਜ਼ਰਜ਼ ਨੂੰ ਹੋ ਰਹੀ ਪਰੇਸ਼ਾਨੀ ਦੀ ਜਾਂਚ ਕਰ ਰਹੇ ਹਾਂ।

ਹਾਲਾਂਕਿ, ਮਾਈਕ੍ਰੋਸਾਫਟ ਦੇ ਬੁਲਾਰੇ ਨੇ ਸ਼ੁੱਕਰਵਾਰ ਨੂੰ ਇਕ ਨਿਊਜ਼ ਏਜੰਸੀ ਨੂੰ ਦੱਸਿਆ ਕਿ ਕੁਝ ਘੰਟੇ ਪਹਿਲਾਂ ਵਿਘਨ ਪਾਉਣ ਵਾਲੀਆਂ ਜ਼ਿਆਦਾਤਰ ਆਈਟੀ ਸੇਵਾਵਾਂ ਨੂੰ ਬਹਾਲ ਕਰ ਦਿੱਤਾ ਗਿਆ ਹੈ। ਇਸ ਆਈਟੀ ਸੰਕਟ ਨਾਲ ਆਸਟ੍ਰੇਲੀਆ ਖਾਸ ਤੌਰ 'ਤੇ ਪ੍ਰਭਾਵਿਤ ਹੋਇਆ ਹੈ। ਦੇਸ਼ ਦੇ ਗ੍ਰਹਿ ਮੰਤਰਾਲੇ ਦੇ ਬੁਲਾਰੇ ਨੇ ਕਿਹਾ ਕਿ ਇਹ ਆਈਟੀ ਸੰਕਟ ਇੱਕ ਸਾਈਬਰ ਸੁਰੱਖਿਆ ਫਰਮ ਨਾਲ ਸਬੰਧਤ ਹੈ। ਜਦੋਂ ਕਿ ਆਸਟ੍ਰੇਲੀਆ ਦੀ ਸਾਈਬਰ ਸੁਰੱਖਿਆ 'ਤੇ ਨਜ਼ਰ ਰੱਖਣ ਵਾਲੀ ਸਰਕਾਰੀ ਏਜੰਸੀ ਦਾ ਕਹਿਣਾ ਹੈ ਕਿ ਕਿਸੇ ਸਾਈਬਰ ਹਮਲੇ ਦੀ ਕੋਈ ਸੰਭਾਵਨਾ ਨਹੀਂ ਹੈ।

ਕੀ ਹਨ ਤਾਜ਼ਾ ਹਾਲਾਤ

ਕੰਪਿਊਟਰ ਸਿਸਟਮ ਵਿਚ ਇੱਕ ਵੱਡੀ ਸਮੱਸਿਆ ਨੇ ਦੁਨੀਆ ਭਰ ਵਿਚ ਆਵਾਜਾਈ, ਪ੍ਰਸਾਰਣ, ਹਸਪਤਾਲ ਅਤੇ ਹੋਰ ਖੇਤਰਾਂ ਵਿੱਚ ਸੇਵਾਵਾਂ ਵਿੱਚ ਵਿਘਨ ਪਾਇਆ ਹੈ। ਦੁਨੀਆ ਭਰ ਵਿਚ ਕਈ ਉਡਾਣਾਂ ਨੂੰ ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਕਈ ਉਡਾਣਾਂ ਦਾ ਸਮਾਂ ਬਦਲ ਦਿੱਤਾ ਗਿਆ ਹੈ। ਅਮਰੀਕੀ ਰਾਜ ਅਲਾਸਕਾ ਨੇ ਕਿਹਾ ਹੈ ਕਿ ਉਸ ਦਾ ਐਮਰਜੈਂਸੀ ਸੇਵਾਵਾਂ ਦਾ ਨੈੱਟਵਰਕ ਵੀ ਪ੍ਰਭਾਵਿਤ ਹੋਇਆ ਹੈ। ਭਾਰਤ ਦੇ ਹਵਾਈ ਅੱਡਿਆਂ 'ਤੇ ਸੇਵਾਵਾਂ ਵੀ ਪ੍ਰਭਾਵਿਤ ਹੋਈਆਂ ਹਨ। ਦਿੱਲੀ ਏਅਰਪੋਰਟ 'ਤੇ ਵਾਈਟ ਬੋਰਡ 'ਤੇ ਫਲਾਈਟ ਗੇਟਾਂ ਦੀ ਜਾਣਕਾਰੀ ਹੱਥ ਨਾਲ ਲਿਖੀ ਜਾ ਰਹੀ ਹੈ। ਪੈਰਿਸ ਓਲੰਪਿਕ ਦਾ ਆਈਟੀ ਸਿਸਟਮ ਵੀ ਪ੍ਰਭਾਵਿਤ ਹੋਇਆ ਹੈ। ਉਥੇ ਹੀ ਇਸ ਦੇ ਜਵਾਬ ਵਿਚ ਸਾਈਬਰ ਸਟ੍ਰਾਈਕ ਦਾ ਕਹਿਣਾ ਹੈ ਕਿ ਸਮੱਸਿਆ ਦੀ ਜੜ੍ਹ ਲੱਭੀ ਗਈ ਹੈ ਅਤੇ ਹੱਲ ਕਰ ਲਿਆ ਗਿਆ ਹੈ। ਅਮਰੀਕਨ ਏਅਰਲਾਈਨਜ਼ ਦਾ ਕਹਿਣਾ ਹੈ ਕਿ ਸਮੱਸਿਆ ਦਾ ਕਾਰਨ ਸਾਈਬਰ ਸੁਰੱਖਿਆ ਫਰਮ CrowdStrike ਹੈ। 

ਦੁਨੀਆ ਭਰ ਵਿਚ ਐਮਰਜੈਂਸੀ ਸੇਵਾਵਾਂ ਹੋਈਆਂ ਪ੍ਰਭਾਵਿਤ
ਆਸਟ੍ਰੇਲੀਆ ਦੀ ਸਾਈਬਰ ਸੁਰੱਖਿਆ ਨਿਗਰਾਨੀ ਏਜੰਸੀ ਵੱਲੋਂ ਜਾਰੀ ਬਿਆਨ 'ਚ ਕਿਹਾ ਗਿਆ ਹੈ ਕਿ ਸਾਡੇ ਕੋਲ ਫਿਲਹਾਲ ਜਾਣਕਾਰੀ ਹੈ ਕਿ ਥਰਡ ਪਾਰਟੀ ਸਾਫਟਵੇਅਰ ਪਲੇਟਫਾਰਮਸ 'ਚ ਤਕਨੀਕੀ ਸਮੱਸਿਆ ਕਾਰਨ ਉਨ੍ਹਾਂ ਦੀ ਵਰਤੋਂ ਕਰਨ ਵਾਲੀਆਂ ਕੰਪਨੀਆਂ 'ਤੇ ਅਸਰ ਪਿਆ ਹੈ। ਦੂਜੇ ਪਾਸੇ ਅਲਾਸਕਾ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ 911 ਅਤੇ ਗੈਰ-ਐਮਰਜੈਂਸੀ ਸੇਵਾਵਾਂ ਨਾਲ ਸਬੰਧਤ ਕਾਲ ਸੈਂਟਰ ਠੀਕ ਤਰ੍ਹਾਂ ਕੰਮ ਨਹੀਂ ਕਰ ਰਹੇ ਸਨ। ਦੁਨੀਆ ਭਰ ਦੀਆਂ ਕਈ ਏਅਰਲਾਈਨਾਂ ਨੂੰ ਆਪਣੀਆਂ ਉਡਾਣਾਂ ਰੋਕਣੀਆਂ ਪਈਆਂ ਹਨ ਅਤੇ ਕਈ ਉਡਾਣਾਂ ਦੇਰੀ ਨਾਲ ਚੱਲ ਰਹੀਆਂ ਹਨ। ਅਮਰੀਕੀ ਰਾਜ ਅਲਾਸਕਾ ਨੇ ਚੇਤਾਵਨੀ ਦਿੱਤੀ ਹੈ ਕਿ ਆਈਟੀ ਸੇਵਾਵਾਂ ਵਿੱਚ ਵਿਘਨ ਨੇ ਉਸ ਦੀਆਂ ਐਮਰਜੈਂਸੀ ਸੇਵਾਵਾਂ ਨੂੰ ਪ੍ਰਭਾਵਿਤ ਕੀਤਾ ਹੈ। ਆਸਟ੍ਰੇਲੀਆ ਵਿੱਚ ਸੁਪਰਮਾਰਕੀਟਜ਼ ਬੰਦ ਹਨ ਅਤੇ ਕਈ ਦੇਸ਼ਾਂ ਵਿੱਚ ਮੀਡੀਆ ਆਊਟਲੇਟ ਸਿਸਟਮ ਫੇਲ੍ਹ ਹੋਣ ਕਾਰਨ ਲੋਕਾਂ ਤੱਕ ਜਾਣਕਾਰੀ ਪਹੁੰਚਾਉਣ ਲਈ ਸੰਘਰਸ਼ ਕਰ ਰਹੇ ਹਨ। ਸਥਿਤੀ ਦੀ ਗੰਭੀਰਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਸਕਾਈ ਨਿਊਜ਼ ਨੂੰ ਬ੍ਰਿਟੇਨ ਵਿਚ ਥੋੜ੍ਹੇ ਸਮੇਂ ਲਈ ਆਪਣਾ ਪ੍ਰਸਾਰਣ ਬੰਦ ਕਰਨਾ ਪਿਆ।

ਭਾਰਤ 'ਚ ਏਅਰਲਾਈਨਾਂ ਦੇ ਕੰਮਕਾਜ 'ਚ ਪਈ ਰੁਕਾਵਟ
ਭਾਰਤ ਵਿਚ ਆਈਟੀ ਸੇਵਾਵਾਂ ਵਿਚ ਵੀ ਵਿਘਨ ਪਿਆ ਹੈ। ਦੇਸ਼ ਦੇ ਕਈ ਹਵਾਈ ਅੱਡਿਆਂ ਨੇ ਇਸ ਬਾਰੇ ਯਾਤਰੀਆਂ ਨੂੰ ਚੇਤਾਵਨੀ ਦਿੰਦੇ ਹੋਏ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਭਾਰਤ ਦੇ ਆਈਟੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਕਿਹਾ ਕਿ ਸਾਡਾ ਮੰਤਰਾਲਾ ਗਲੋਬਲ ਆਈਟੀ ਆਊਟੇਜ ਨੂੰ ਲੈ ਕੇ ਮਾਈਕ੍ਰੋਸਾਫਟ ਦੇ ਸੰਪਰਕ ਵਿਚ ਹੈ। ਕਾਰਨ ਦੀ ਪਛਾਣ ਕਰ ਲਈ ਗਈ ਹੈ ਅਤੇ ਇਸ ਨਾਲ ਨਜਿੱਠਣ ਲਈ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ। CERT (ਭਾਰਤੀ ਕੰਪਿਊਟਰ ਐਮਰਜੈਂਸੀ ਰਿਸਪਾਂਸ ਟੀਮ) ਇੱਕ ਤਕਨੀਕੀ ਸਲਾਹ ਜਾਰੀ ਕਰ ਰਿਹਾ ਹੈ। ਭਾਰਤ ਦਾ NIC ਨੈੱਟਵਰਕ ਇਸ ਆਊਟੇਜ ਤੋਂ ਪ੍ਰਭਾਵਿਤ ਨਹੀਂ ਹੈ।
CERT ਨੇ ਆਪਣੇ ਬਿਆਨ ਵਿੱਚ ਕਿਹਾ ਹੈ ਕਿ ਆਊਟੇਜ ਦਾ ਕਾਰਨ ਸਾਈਬਰ ਸੁਰੱਖਿਆ ਕੰਪਨੀ CrowdStrike ਦੁਆਰਾ ਜਾਰੀ ਕੀਤਾ ਗਿਆ ਇੱਕ ਅਪਡੇਟ ਹੈ। ਇਹ ਗੱਲ ਕੰਪਨੀ ਦੀ ਟੀਮ ਨੂੰ ਦੱਸ ਦਿੱਤੀ ਗਈ ਹੈ। ਫਿਰ ਵੀ, ਜੇਕਰ ਹੋਸਟ ਕੰਪਿਊਟਰ ਕਰੈਸ਼ ਹੋ ਜਾਂਦਾ ਹੈ ਤਾਂ ਉਹ ਵਿੰਡੋਜ਼ ਰਿਕਵਰੀ ਮੋਡ ਜਾਂ ਸੇਫ ਮੋਡ ਵਿਚ ਬੂਟ ਕਰਨ ਦੀ ਕੋਸ਼ਿਸ਼ ਕਰ ਸਕਦੇ ਹਨ। 
ਉਥੇ ਹੀ ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਚੈਕ-ਇਨ ਲਈ ਵਰਤੇ ਜਾਣ ਵਾਲੇ ਸਾਰੇ ਟਰਮੀਨਲ ਬੰਦ ਹਨ। ਹਵਾਈ ਅੱਡੇ 'ਤੇ ਪਹੁੰਚਣ ਵਾਲੇ ਲੋਕਾਂ ਨੂੰ ਖਾਲੀ ਬੋਰਡਿੰਗ ਪਾਸ ਦਿੱਤੇ ਗਏ, ਜਿਸ 'ਤੇ ਉਨ੍ਹਾਂ ਨੂੰ ਪੈੱਨ ਨਾਲ ਜਾਣਕਾਰੀ ਲਿਖਣ ਲਈ ਕਿਹਾ ਗਿਆ। ਇਸ ਤਰ੍ਹਾਂ ਪੈੱਨ ਨਾਲ ਬੈਗੇਜ ਟੈਗਸ ਵਿੱਚ ਵੀ ਜਾਣਕਾਰੀ ਭਰੀ ਜਾਂਦੀ ਸੀ। ਏਅਰਪੋਰਟ ਵੱਲੋਂ ਐਕਸ 'ਤੇ ਲਿਖਿਆ ਗਿਆ ਕਿ ਗਲੋਬਲ ਆਈਟੀ ਮੁੱਦਿਆਂ ਦੇ ਕਾਰਨ ਦਿੱਲੀ ਹਵਾਈ ਅੱਡੇ 'ਤੇ ਕੁਝ ਸੇਵਾਵਾਂ ਅਸਥਾਈ ਤੌਰ 'ਤੇ ਰੁਕੀਆਂ ਹਨ। ਅਸੀਂ ਸੇਵਾਵਾਂ ਵਿੱਚ ਵਿਘਨ ਦੇ ਪ੍ਰਭਾਵ ਨੂੰ ਘੱਟ ਕਰਨ ਲਈ ਯਤਨ ਕਰ ਰਹੇ ਹਾਂ। ਯਾਤਰੀਆਂ ਨੂੰ ਉਨ੍ਹਾਂ ਦੀਆਂ ਏਅਰਲਾਈਨਾਂ ਨਾਲ ਸੰਪਰਕ ਕਰਨ ਦੀ ਬੇਨਤੀ ਕੀਤੀ ਜਾਂਦੀ ਹੈ। ਅਸੁਵਿਧਾ ਲਈ ਮੁਆਫੀ ਚਾਹੁੰਦੇ ਹਾਂ।
ਮੁੰਬਈ ਦੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਅੰਤਰਰਾਸ਼ਟਰੀ ਹਵਾਈ ਅੱਡੇ ਨੇ ਵੀ ਯਾਤਰੀਆਂ ਲਈ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਏਅਰਪੋਰਟ ਨੇ ਟਵਿੱਟਰ 'ਤੇ ਲਿਖਿਆ ਕਿ ਗਲੋਬਲ ਆਈਟੀ ਮੁੱਦਿਆਂ ਦੇ ਕਾਰਨ, ਕੁਝ ਸੰਚਾਲਨ ਵਿੱਚ ਵਿਘਨ ਪਿਆ ਹੈ। ਇਸ ਸਮੇਂ ਦੌਰਾਨ, ਬੁਕਿੰਗ, ਚੈੱਕ-ਇਨ ਅਤੇ ਬੋਰਡਿੰਗ ਪਾਸ ਪ੍ਰਦਾਨ ਕਰਨ ਵਰਗੀਆਂ ਸੇਵਾਵਾਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਕਿਰਪਾ ਕਰਕੇ ਸਬੰਧਤ ਏਅਰਲਾਈਨ ਨਾਲ ਸੰਪਰਕ ਕਰੋ। ਭਾਰਤ ਦੀਆਂ ਲਗਭਗ ਸਾਰੀਆਂ ਵੱਡੀਆਂ ਏਅਰਲਾਈਨਾਂ ਨੇ X 'ਤੇ ਇਸ ਬਾਰੇ ਜਾਣਕਾਰੀ ਦਿੱਤੀ ਹੈ।

ਭਾਰਤੀ ਏਅਰਲਾਈਨਜ਼ ਨੇ ਕੀ ਕਿਹਾ?
ਭਾਰਤ ਦੀ ਰਾਜਧਾਨੀ ਦਿੱਲੀ ਦੇ ਆਈਜੀਆਈ ਏਅਰਪੋਰਟ ਅਥਾਰਟੀ ਨੇ ਸੋਸ਼ਲ ਮੀਡੀਆ 'ਤੇ ਜਾਣਕਾਰੀ ਦਿੱਤੀ ਹੈ ਕਿ ਗਲੋਬਲ ਆਈਟੀ ਸੰਕਟ ਕਾਰਨ ਇਸ ਦੀਆਂ ਕੁਝ ਸੇਵਾਵਾਂ ਪ੍ਰਭਾਵਿਤ ਹੋਈਆਂ ਹਨ। ਬਿਆਨ ਮੁਤਾਬਕ ਏਅਰਪੋਰਟ ਪ੍ਰਸ਼ਾਸਨ ਸਾਰੇ ਭਾਈਵਾਲਾਂ ਦੇ ਸੰਪਰਕ 'ਚ ਹੈ ਤਾਂ ਜੋ ਯਾਤਰੀਆਂ ਦੀਆਂ ਮੁਸ਼ਕਲਾਂ ਨੂੰ ਘੱਟ ਕੀਤਾ ਜਾ ਸਕੇ। ਅਕਾਸਾ ਏਅਰ ਨੇ ਟਵੀਟ ਕੀਤਾ ਕਿ ਸਾਡੇ ਸੇਵਾ ਪ੍ਰਦਾਤਾਵਾਂ ਨਾਲ ਸਮੱਸਿਆਵਾਂ ਦੇ ਕਾਰਨ, ਬੁਕਿੰਗ, ਚੈੱਕ-ਇਨ ਅਤੇ ਹੋਰ ਬੁਕਿੰਗ ਸੇਵਾਵਾਂ ਸਮੇਤ ਸਾਡੀਆਂ ਕੁਝ ਔਨਲਾਈਨ ਸੇਵਾਵਾਂ ਅਸਥਾਈ ਤੌਰ 'ਤੇ ਉਪਲਬਧ ਨਹੀਂ ਹੋਣਗੀਆਂ। ਇਸ ਸਮੇਂ, ਅਸੀਂ ਇੱਥੇ ਮੈਨੂਅਲ ਚੈੱਕ-ਇਨ ਅਤੇ ਬੋਰਡਿੰਗ ਪ੍ਰਕਿਰਿਆਵਾਂ ਦਾ ਪਾਲਣ ਕਰ ਰਹੇ ਹਾਂ। ਅਸੀਂ ਯਾਤਰੀਆਂ ਨੂੰ ਬੇਨਤੀ ਕਰ ਰਹੇ ਹਾਂ ਕਿ ਉਹ ਜਲਦੀ ਏਅਰਪੋਰਟ ਪਹੁੰਚਣ ਅਤੇ ਚੈੱਕ-ਇਨ ਕਰ ਲੈਣ। ਏਅਰ ਇੰਡੀਆ ਨੇ ਵੀ ਸੰਕਟ ਬਾਰੇ ਟਵੀਟ ਕੀਤਾ ਹੈ ਕਿ ਮਾਈਕ੍ਰੋਸਾਫਟ ਸਰਵਰ ਆਊਟੇਜ ਕਾਰਨ ਸਾਡੇ ਸਿਸਟਮ ਅਸਥਾਈ ਤੌਰ 'ਤੇ ਪ੍ਰਭਾਵਿਤ ਹੋਏ ਹਨ ਅਤੇ ਯਾਤਰੀਆਂ ਨੂੰ ਹੋਣ ਵਾਲੀ ਅਸੁਵਿਧਾ ਲਈ ਸਾਨੂੰ ਅਫਸੋਸ ਹੈ। ਇੰਡੀਗੋ ਏਅਰਲਾਈਨਜ਼ ਨੇ ਟਵੀਟ ਕੀਤਾ ਹੈ ਕਿ ਮਾਈਕ੍ਰੋਸਾਫਟ ਦੇ ਸਰਵਰ 'ਚ ਗੜਬੜੀ ਕਾਰਨ ਹਵਾਈ ਅੱਡੇ 'ਤੇ ਯਾਤਰੀਆਂ ਦਾ ਇੰਤਜ਼ਾਰ ਦਾ ਸਮਾਂ ਲੰਬਾ ਹੋ ਗਿਆ ਹੈ। ਸਪਾਈਸ ਜੈੱਟ ਨੇ ਇਹ ਵੀ ਕਿਹਾ ਹੈ ਕਿ ਉਸ ਨੂੰ ਆਪਣੇ ਜਹਾਜ਼ਾਂ ਦੀ ਅਪਡੇਟ ਦੇਣ 'ਚ ਦਿੱਕਤ ਆ ਰਹੀ ਹੈ।

ਕੀ ਹੈ CrowdStrike?

ਜਗਬਾਣੀ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕਰ ਰਿਹਾ ਕਿ ਦੁਨੀਆ ਭਰ ਵਿਚ ਆਈਟੀ ਆਊਟੇਜ ਦਾ ਕਾਰਨ ਕੀ ਹੈ। ਪਰ ਅਮਰੀਕੀ ਏਅਰਲਾਈਨ ਨੇ ਇਸ ਦੇ ਲਈ CrowdStrike ਨਾਂ ਦੀ ਸਾਈਬਰ ਸੁਰੱਖਿਆ ਕੰਪਨੀ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਹੁਣ ਸਵਿਟਜ਼ਰਲੈਂਡ ਦੀ ਸਾਈਬਰ ਸੁਰੱਖਿਆ ਏਜੰਸੀ ਨੇ ਵੀ ਇਸ ਫਰਮ 'ਤੇ ਉਂਗਲ ਚੁੱਕੀ ਹੈ। CrowdStrike ਇੱਕ ਸਾਈਬਰ ਸੁਰੱਖਿਆ ਕੰਪਨੀ ਹੈ ਜਿਸਦੀ ਸਥਾਪਨਾ ਸਾਲ 2011 ਵਿੱਚ ਕੀਤੀ ਗਈ ਸੀ। CrowdStrike ਦੁਨੀਆ ਭਰ ਦੀਆਂ ਵੱਡੀਆਂ ਕੰਪਨੀਆਂ ਅਤੇ ਹਾਰਡਵੇਅਰ ਨੂੰ ਸਾਈਬਰ ਹਮਲਿਆਂ ਤੋਂ ਬਚਾਉਣ ਲਈ ਕੰਮ ਕਰਦਾ ਹੈ।
ਇਹ ਕੰਪਨੀ ਐਂਡਪੁਆਇੰਟ ਸੁਰੱਖਿਆ ਵਿੱਚ ਮੁਹਾਰਤ ਰੱਖਦੀ ਹੈ ਅਤੇ ਕਾਰਪੋਰੇਟ ਨੈੱਟਵਰਕਾਂ, ਜਿਵੇਂ ਕਿ ਫ਼ੋਨ ਅਤੇ ਲੈਪਟਾਪ ਆਦਿ ਨਾਲ ਜੁੜੇ ਡੀਵਾਈਸਾਂ ਨੂੰ ਵਾਇਰਸ ਜਾਂ ਮਾਲਵੇਅਰ ਤੋਂ ਬਚਾਉਣ ਲਈ ਕੰਮ ਕਰਦੀ ਹੈ। ਇਹ ਉਹਨਾਂ ਕੰਪਨੀਆਂ ਨੂੰ ਵੀ ਸੁਰੱਖਿਆ ਪ੍ਰਦਾਨ ਕਰਦਾ ਹੈ ਜੋ ਕਲਾਉਡ ਨੈੱਟਵਰਕ 'ਤੇ ਕੰਮ ਕਰਦੀਆਂ ਹਨ। ਇਹ ਉਨ੍ਹਾਂ ਕੰਪਨੀਆਂ ਦੇ ਡੇਟਾ ਨੂੰ ਸੁਰੱਖਿਅਤ ਕਰਦੇ ਕਰਦੀ ਹੈ ਜੋ ਇਸ ਨੂੰ ਆਪਣੀ ਆਪਣੇ ਸਰਵਰ 'ਤੇ ਸੁਰੱਖਿਅਤ ਰੱਖਣ ਨਾਲ ਕਲਾਉਡ ਪ੍ਰਦਾਤਾਵਾਂ ਵਿਚ ਟਰਾਂਸਫਰ ਹੋ ਗਏ ਹਨ। ਟੈਕਸਾਸ-ਅਧਾਰਤ ਫਰਮ ਦੀ ਸਥਾਪਨਾ ਉਦਮੀ ਜਾਰਜ ਕੁਰਟਜ਼ ਅਤੇ ਦਮਿੱਤਰੀ ਅਲਪੇਰੋਵਿਚ ਦੁਆਰਾ ਕੀਤੀ ਗਈ ਸੀ। ਕੰਪਨੀ ਨੂੰ 2019 ਤੋਂ ਟੈਕ-ਹੈਵੀ ਨੈਸਡੈਕ ਸਟਾਕ ਐਕਸਚੇਂਜ 'ਤੇ ਸੂਚੀਬੱਧ ਕੀਤਾ ਗਿਆ ਸੀ। ਆਪਣੀ ਸ਼ੁਰੂਆਤ ਤੋਂ ਬਾਅਦ, ਕੰਪਨੀ ਨੇ ਸਾਈਬਰ ਹਮਲਿਆਂ ਦੀ ਜਾਂਚ ਵਿਚ ਮਦਦ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ।

2016 ਵਿਚ ਇਸ ਕੰਪਨੀ ਨੂੰ ਯੂਐੱਸ ਡੈਮੋਕਰੇਟਿਕ ਨੈਸ਼ਨਲ ਕਮੇਟੀ ਨੇ ਆਪਣੇ ਕੰਪਿਊਟਰ ਨੈਟਵਰਕ ਵਿਚ ਸੰਨ੍ਹ ਦੀ ਜਾਂਚ ਕਰਨ ਲਈ ਬੁਲਾਇਆ। ਸਾਈਬਰ ਸਟ੍ਰਾਈਕ ਦੇ ਸਹਿ-ਸੰਸਥਾਪਕ ਜਾਰਜ ਕਰਟਜ਼ ਨੇ ਟਵਿੱਟਰ 'ਤੇ ਜਾਰੀ ਕੀਤੇ ਗਏ ਇਕ ਬਿਆਨ ਵਿਚ ਕਿਹਾ ਕਿ ਕ੍ਰਾਊਡਸਟ੍ਰਾਈਕ ਵਿੰਡੋਜ਼ ਹੋਸਟਾਂ 'ਤੇ ਲੱਭੀਆਂ ਗਈਆਂ ਖਾਮੀਆਂ ਤੋਂ ਪ੍ਰਭਾਵਿਤ ਗਾਹਕਾਂ ਦੇ ਨਾਲ ਸਰਗਰਮੀ ਨਾਲ ਕੰਮ ਕਰ ਰਹੀ ਹੈ ਤੇ ਹੱਲ ਲੱਭਿਆ ਗਿਆ ਹੈ। ਅਸੀਂ ਗਾਹਕਾਂ ਨੂੰ ਅੱਪਡੇਟ ਲਈ ਸਹਾਇਤਾ ਪੋਰਟਲ 'ਤੇ ਜਾਣ ਦੀ ਅਪੀਲ ਕਰਦੇ ਹਾਂ। ਅਸੀਂ ਆਪਣੀ ਵੈੱਬਸਾਈਟ 'ਤੇ ਚੱਲ ਰਹੇ ਅੱਪਡੇਟ ਪ੍ਰਦਾਨ ਕਰਨਾ ਜਾਰੀ ਰੱਖਾਂਗੇ। ਅਸੀਂ ਸਿਫ਼ਾਰਿਸ਼ ਕਰਦੇ ਹਾਂ ਕਿ ਕੰਪਨੀਆਂ ਇਹ ਯਕੀਨੀ ਬਣਾਉਣ ਕਿ ਉਹ ਅਧਿਕਾਰਤ ਚੈਨਲਾਂ ਰਾਹੀਂ CrowdStrike ਦੇ ਪ੍ਰਤੀਨਿਧਾਂ ਦੇ ਸੰਪਰਕ ਵਿੱਚ ਰਹਿਣ। CrowdStrike ਟੀਮ ਗਾਹਕ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਪੂਰੀ ਤਰ੍ਹਾਂ ਸਰਗਰਮ ਹੈ।