ਬਰੇਲੀ ’ਚ ਮੰਤਰੀ ਦੇ ਡਰਾਈਵਰ ਦਾ ਸਰੀਰ  ਫੰਦੇ ''ਤੇ ਲਟਕਦਾ ਮਿਲਿਆ

ਬਰੇਲੀ - ਬਰੇਲੀ ਜ਼ਿਲੇ ਦੇ ਸਿਵਿਲ ਲਾਈਨਸ ’ਚ ਸਥਿਤ ਲੋਕ ਨਿਰਮਾਣ ਵਿਭਾਗ (ਪੀ.ਡਬਲਯੂ.ਡੀ.) ਦੇ ਅਤਿਥੀ ਘਰ ’ਚ ਸੂਬਾ ਸਰਕਾਰ ਦੇ ਪਸ਼ੂਧਨ ਮੰਤਰੀ ਦੇ ਕਥਿਤ ਡਰਾਈਵਰ ਦਾ ਸਰੀਰ ਐਤਵਾਰ ਨੂੰ ਫਾਂਸੀ ਦੇ ਫੰਦੇ 'ਤੇ ਲਟਕਦਾ ਮਿਲਿਆ। ਪੁਲਸ ਨੇ ਇਹ ਜਾਣਕਾਰੀ ਦਿੱਤੀ। ਪੁਲਿਸ ਨੇ ਦੱਸਿਆ ਕਿ ਪਸ਼ੂਧਨ ਮੰਤਰੀ ਧਰਮਪਾਲ ਸਿੰਘ ਦੇ ਡਰਾਈਵਰ ਰਾਜਵੀਰ (46) ਨੇ ਕਥਿਤ ਤੌਰ ’ਤੇ ਖੁਦਕੁਸ਼ੀ ਕਰ ਲਈ। ਰਾਜਵੀਰ ਦਾ ਸਰੀਰ ਫੰਦੇ 'ਤੇ ਲਟਕ ਰਿਹਾ ਸੀ ਅਤੇ ਉਸ ਦੇ ਕੰਨਾਂ ’ਚ ਹੇਡਫੋਨ ਲਗਿਆ ਹੋਇਆ ਸੀ। ਕੋਤਵਾਲੀ ਪੁਲਸ ਨੇ ਸਰੀਰ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ। ਕੋਤਵਾਲੀ ਦੇ ਇੰਸਪੈਕਟਰ (ਐੱਸ.ਐੱਚ.ਓ.) ਦਿਨੇਸ਼ ਸ਼ਰਮਾ ਨੇ ਦੱਸਿਆ ਕਿ ਰਾਜਵੀਰ ਸਿੰਘ ਬਾਰਾਬੰਕੀ ਜ਼ਿਲੇ ਦਾ ਵਾਸੀ ਸੀ ਅਤੇ ਉਹ ਉੱਤਰ ਪ੍ਰਦੇਸ਼ ਸਰਕਾਰ ’ਚ ਪਸ਼ੂਧਨ ਅਤੇ ਦੁਗਧ ਵਿਕਾਸ ਮੰਤਰੀ ਧਰਮਪਾਲ ਸਿੰਘ ਦਾ ਡਰਾਈਵਰ ਸੀ।

ਸ਼ਰਮਾ ਨੇ ਦੱਸਿਆ ਕਿ ਰਾਜਵੀਰ ਸਿੰਘ ਸ਼ਨੀਵਾਰ ਨੂੰ ਬਰੇਲੀ ਦੇ ਪੀ.ਡਬਲਯੂ.ਡੀ ਅਤਿਥੀ ਘਰ ’ਚ ਰਹਿ ਰਿਹਾ ਸੀ ਅਤੇ ਉਸ ਨੇ ਰਾਤ ਨੂੰ ਫਾਂਸੀ ਲਗਾ ਕੇ ਖੁਦਕੁਸ਼ੀ ਕਰ ਲਈ। ਸ਼ਰਮਾ ਨੇ ਕਿਹਾ ਕਿ ਰਾਜਵੀਰ ਦੇ ਪਰਿਵਾਰਕ ਮੈਂਬਰਾਂ ਨੂੰ ਘਟਨਾ ਦੀ ਸੂਚਨਾ ਦੇ ਦਿੱਤੀ ਗਈ ਹੈ। ਉਨ੍ਹਾਂ ਨੇ ਕਿਹਾ ਕਿ ਐਤਵਾਰ ਨੂੰ ਉਸ ਨੂੰ ਕਈ ਫੋਨ ਕੀਤੇ ਗਏ ਪਰ ਉਸ ਨੇ  ਕਿਸੇ ਵੀ ਕਾਲ ਦਾ ਜਵਾਬ ਨਹੀਂ ਦਿੱਤਾ ਅਤੇ ਜਦੋਂ ਮੰਤਰੀ ਦੇ ਗਨਰ ਉੱਥੇ ਪੁੱਜੇ ਤਾਂ ਦਰਵਾਜ਼ਾ ਅੰਦਰੋਂ ਬੰਦ ਸੀ। ਇਸ ਤੋਂ ਬਾਅਦ ਦਰਵਾਜ਼ਾ ਤੋੜਿਆ ਗਿਆ ਤਾਂ ਉੱਥੇ ਰਾਜਵੀਰ ਦਾ ਸਰੀਰ ਮਿਲਿਆ ਜਿਸਦੇ ਕੰਨਾਂ ’ਚ ਹੇਡਫੋਨ ਲਗਿਆ ਹੋਇਆ ਸੀ ਅਤੇ ਮੋਬਾਈਲ ਜੇਬ ’ਚ ਸੀ।

ਐੱਸ.ਐੱਚ.ਓ. ਨੇ ਕਿਹਾ ਕਿ ਮੋਬਾਈਲ 'ਲਾਕ' ਹੋਣ ਕਾਰਨ ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਉਹ ਕਿਸ ਨਾਲ ਗੱਲ ਕਰ ਰਿਹਾ ਸੀ, ਪਰ ਅੰਦਾਜ਼ਾ ਹੈ ਕਿ ਉਸ ਨੇ ਗੱਲ ਕਰਦਿਆਂ ਹੀ ਫਾਂਸੀ ਲਗਾ ਕੇ ਖੁਦਕੁਸ਼ੀ ਕਰ ਲਈ। ਉਨ੍ਹਾਂ ਨੇ ਕਿਹਾ ਕਿ ਪੁਲਸ ਇਸ ਗੱਲ ਦਾ ਪਤਾ ਲਗਾਉਣ ਲਈ ਉਸਦੇ 'ਕਾਲ ਰਿਕਾਰਡ' ਮੰਗਵਾ ਰਹੀ ਹੈ ਕਿ ਉਹ ਕਿਸ ਨਾਲ ਗੱਲ ਕਰ ਰਿਹਾ ਸੀ। ਧਰਮਪਾਲ ਸਿੰਘ ਬਰੇਲੀ ਜ਼ਿਲੇ ਦੇ ਆਵਲਾ ਵਿਧਾਨ ਸਭਾ ਖੇਤਰ ਤੋਂ ਭਾਰਤੀਆ ਜਨਤਾ ਪਾਰਟੀ ਦੇ ਵਿਧਾਇਕ ਹਨ ਅਤੇ ਸ਼ਨੀਵਾਰ ਅਤੇ ਐਤਵਾਰ ਨੂੰ ਉਹ ਆਮ ਤੌਰ 'ਤੇ ਖੇਤਰ ਦੇ ਦੌਰੇ 'ਤੇ ਰਹਿੰਦੇ ਹਨ। ਪੁਲਸ ਨੇ ਦੱਸਿਆ ਕਿ ਘਟਨਾ ਦੇ ਸਮੇਂ ਉਹ ਕਿਸੇ ਹੋਰ ਜਗ੍ਹਾ ’ਤੇ ਸੀ।