ਧਰਤੀ ਘੁੰਮਦੀ ਹੀ ਰਹੇ
11/20/2017 2:13:47 PM
ਨਦੀਆਂ ਦਾ ਵਹਾਅ
ਵੇਖਦਿਆਂ-ਵੇਖਦਿਆਂ ਹੀ
ਐਨਾਂ ਸ਼ੂਕਵਾਂ ਹੋ ਗਿਆ ਹੈ
ਕਿ ਪੁਲਾਂ ਨੂੰ ਵੀ
ਵਹਾ ਲੈ ਗਿਆ ਹੈ!
ਸ਼ਾਲਾ . . .
ਫਿਰ ਵੀ
ਪਾਣੀ ਸਲਾਮਤ ਰਹਿਣ;
ਪਾਣੀ ਵਹਿੰਦੇ ਹੀ ਰਹਿਣ!
ਸੂਰਜ ਦੀਆਂ ਤਪਸ਼ਾਂ
ਵੇਖਦਿਆਂ-ਵੇਖਦਿਆਂ ਹੀ
ਐਨੀਆਂ ਤੇਜ਼ ਹੋ ਗਈਆਂ ਨੇ
ਕਿ ਦੁਪਹਿਰਾਂ ਹੁਣ
ਸਿਰਾਂ 'ਤੇ ਤਾਂਡਵ
ਨੱਚਣ ਲੱਗੀਆਂ ਨੇ
ਸ਼ਾਲਾ . . .
ਫਿਰ ਵੀ
ਦੁਪਹਿਰਾਂ ਪ੍ਰਹੁਣਾ ਬਣ ਆਉਦੀਆਂ ਰਹਿਣ;
ਫੇਰਾ ਪਾਉਦੀਆਂ ਹੀ ਰਹਿਣ।
ਰੁਮਕਦੀਆਂ ਹਵਾਵਾਂ
ਵੇਖਦਿਆਂ-ਵੇਖਦਿਆਂ ਹੀ
ਝੱਖੜ ਬਣ ਗਈਆਂ ਨੇ
ਫੁੱਲਾਂ ਦੀਆਂ ਮਹਿਕਾਂ ਨੂੰ
ਉਡਾ ਲੈ ਗਈਆਂ
ਸ਼ਾਲਾ . . .
ਫਿਰ ਵੀ
ਹਵਾਵਾਂ ਰੁਮਕਦੀਆਂ ਹੀ ਰਹਿਣ;
ਹਵਾਵਾਂ ਵਗਦੀਆਂ ਹੀ ਰਹਿਣ।
ਧਰਤੀ ਦੇ ਘੁੰਮਣ 'ਤੇ
ਕਿਸੇ ਨੂੰ ਵੀ
ਘੁੰਮਣ-ਘੇਰੀਆਂ ਤਾਂ
. . . ਨਹੀਂ ਆਉਦੀਆਂ
ਪਰ ਇਨ੍ਹਾਂ ਘੁੰਮਣ-ਘੇਰੀਆਂ
ਬਹੁਤੀ ਦੁਨੀਆਂ ਨੂੰ
ਚੱਕਰਾਂ ਵਿੱਚ ਪਾਇਆ ਹੈ।
ਇਹ ਚੱਕਰ
ਸਮਝਾਂ ਦੀ ਉਂਗਲ ਫੜ੍ਹ
ਆਪੇ ਥੰਮ੍ਹ ਜਾਵਣਗੇ. . .
ਪਰ. . . ਸ਼ਾਲਾ. . .
ਇਹ ਧਰਤੀ ਘੁੰਮਦੀ ਹੀ ਰਹੇ;
ਦੁਨੀਆਂ ਚਲਦੀ ਹੀ ਰਹੇ।
ਸ਼ਾਲਾ...
ਪਾਣੀ ਵਗਦੇ ਹੀ ਰਹਿਣ... ...
ਧੁੱਪਾਂ ਖਿੜ੍ਹਦੀਆਂ ਹੀ ਰਹਿਣ... ...
ਹਵਾਵਾਂ ਰੁਮਕਦੀਆਂ ਹੀ ਰਹਿਣ... ...
ਧਰਤੀ ਘੁੰਮਦੀ ਹੀ ਰਹੇ... ...
ਗਗਨਦੀਪ ਸਿੰਘ ਸੰਧੂ
(+917589431402)
