ਉਧਾਰ ਸ਼ਰਾਬ ਨਾ ਦੇਣ ’ਤੇ ਠੇਕੇ ਦੇ ਕਰਿੰਦਿਆਂ ਦੀ ਕੁੱਟਮਾਰ, ਠੇਕੇ ਦੀ ਕੀਤੀ ਭੰਨਤੋੜ

ਮਲੋਟ (ਸ਼ਾਮ ਜੁਨੇਜਾ) : ਥਾਣਾ ਕਿੱਲਿਆਵਾਲੀ ਵਿਖੇ ਪੈਂਦੇ ਪਿੰਡ ਭੁੱਲਰਵਾਲਾ ਵਿਖੇ ਉਧਾਰ ਨਾ ਦੇਣ ਕਰਕੇ ਸ਼ਰਾਬ ਦੇ ਠੇਕੇ ਦੇ ਕਰਿੰਦਿਆਂ ਦੀ ਕੁੱਟਮਾਰ ਕੀਤੀ ਅਤੇ ਨਕਦੀ ਖੋਹ ਕੇ ਫਰਾਰ ਹੋ ਗਏ। ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਅਰਵਿੰਦ ਕੁਮਾਰ ਪੁੱਤਰ ਰਾਮਜੀਤ ਵਾਸੀ ਉਤਰ ਪ੍ਰਦੇਸ਼ ਨੇ ਦੱਸਿਆ ਕਿ ਉਹ ਸ਼ਿਵ ਲਾਲ ਐਂਡ ਕੰਪਨੀ ਦੇ ਪਿੰਡ ਭੁੱਲਰਵਾਲਾ ਠੇਕੇ ਤੇ ਸੇਲਜ਼ਮੈਨ ਹੈ। ਸ਼ਨੀਵਾਰ ਰਾਤ ਨੂੰ 8 ਵਜੇ ਰਾਮ ਪ੍ਰਤਾਪ ਪੁੱਤਰ ਲੀਲੂ ਰਾਮ ਨਵਦੀਪ ਸਿੰਘ ਪੁੱਤਰ ਬਲਕਰਨ ਸਿੰਘ, ਗੁਰਵਿੰਦਰ ਸਿੰਘ ਉਰਫ ਢਈਆਂ ਪੁੱਤਰ ਭੋਲਾ ਸਿੰਘ ਅਤੇ ਹਰਪਿੰਦਰ ਸਿੰਘ ਪੁੱਤਰ ਮਿਲਖਾ ਸਿੰਘ ਵੱਲੋਂ ਠੇਕੇ ’ਤੇ ਆਏ ਅਤੇ ਉਧਾਰ ਸ਼ਰਾਬ ਦੀ ਮੰਗ ਕੀਤੀ। ਮੁਦਈ ਅਨੁਸਾਰ ਉਨ੍ਹਾਂ ਨੇ ਸ਼ਰਾਬ ਉਧਾਰ ਦੇਣ ਤੋਂ ਨਾਂਹ ਕਰ ਦਿੱਤੀ। ਜਿਸ ਕਰਕੇ ਉਕਤ ਵਿਅਕਤੀਆਂ ਨੇ ਠੇਕੇ ਅੰਦਰ ਦਾਖਿਲ ਹੋਕੇ ਭੰਨ ਤੋੜ ਸ਼ੁਰੂ ਕਰ ਦਿੱਤੀ। 

ਉਕਤ ਵਿਅਕਤੀਆਂ ਨੇ ਰਾਡ ਡੰਡਿਆਂ ਨਾਲ ਉਸ ਉਪਰ ਅਤੇ ਉਸਦੇ ਸਾਥੀ ਸੰਨੀ ਯਾਦਵ ਉਪਰ ਹਮਲਾ ਕਰ ਦਿੱਤਾ। ਇਸ ਤੋਂ ਇਲਾਵਾ ਗੱਲੇ ਵਿਚ ਪਿਆ ਕਰੀਬ 33-34 ਹਜ਼ਾਰ ਰੁਪਏ ਕੈਸ਼ ਲੈ ਗਏ। ਇਸ ਮੌਕੇ ਠੇਕੇ ਤੋਂ ਕੈਸ਼ ਲੈਣ ਵਾਲੀ ਪਾਰਟੀ ਦੇ ਗੁਰਪ੍ਰੀਤ ਸਿੰਘ ਪੁੱਤਰ ਸੁਖਦੇਵ ਸਿੰਘ ਵਾਸੀ ਕੁੰਡਲ ਅਤੇ ਨੈਬ ਸਿੰਘ ਪੁੱਤਰ ਗੁਰਮੇਲ ਸਿੰਘ ਮੌਕੇ ’ਤੇ ਆ ਗਏ ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਹਸਪਤਾਲ ਪਹੁੰਚਾਇਆ। ਇਸ ਮਾਮਲੇ ਵਿਚ ਲੰਬੀ ਥਾਣੇ ਦੀ ਪੁਲਸ ਨੇ ਉਕਤ ਚਾਰਾਂ ਵਿਅਕਤੀਆਂ ਵਿਰੁੱਧ ਠੇਕੇ ਅੰਦਰ ਦਾਖਿਲ ਹੋਕੇ ਕੁੱਟਮਾਰ ਕਰਨ, ਨਕਦੀ ਖੋਹਣ, ਭੰਨਤੋੜ ਕਰਨ ਤੇ ਧਮਕੀਆਂ ਦੇਣ ਦੇ ਦੋਸ਼ਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ।