ਸਰੀ ਪੁਲਸ ਨੂੰ ਇਸ ਸ਼ੱਕੀ ਵਿਅਕਤੀ ਦੀ ਭਾਲ, ਸਕੈਚ ਕੀਤਾ ਜਾਰੀ

ਸਰੀ— ਕੈਨੇਡਾ ਦੇ ਸ਼ਹਿਰ ਸਰੀ 'ਚ ਪੁਲਸ ਨੇ ਇਕ ਸ਼ੱਕੀ ਦੋਸ਼ੀ ਵਿਅਕਤੀ ਦਾ ਸਕੈਚ ਜਾਰੀ ਕੀਤਾ ਹੈ। ਪੁਲਸ ਨੂੰ ਉਕਤ ਵਿਅਕਤੀ ਦੀ ਭਾਲ ਹੈ, ਜਿਸ ਨੇ 14 ਮਈ  ਨੂੰ ਇਕ ਸਕੂਲ ਨੇੜਿਓਂ ਇਕ ਛੋਟੇ ਬੱਚੇ ਨੂੰ ਆਪਣੀ ਕਾਰ 'ਚ ਬਿਠਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਇਹ ਘਟਨਾ 8600 ਬਾਲਕ 162 ਸਟਰੀਟ 'ਚ ਸਥਿਤ ਫੋਰਸਟ ਰੋਡ ਐਲੀਮੈਟਰੀ ਸਕੂਲ ਦੇ ਨੇੜੇ ਵਾਪਰੀ। 
ਸਰੀ ਕੈਨੇਡੀਅਨ ਪੁਲਸ ਨੇ ਸ਼ੱਕੀ ਦਾ ਸਕੈਚ ਜਾਰੀ ਕੀਤਾ। ਉਨ੍ਹਾਂ ਸ਼ੱਕੀ ਬਾਰੇ ਦੱਸਦੇ ਹੋਏ ਕਿਹਾ ਕਿ ਉਹ ਸਾਊਥ ਏਸ਼ੀਅਨ ਮੂਲ ਦਾ ਲੱਗਦਾ ਹੈ। ਉਸ ਦੀ ਉਮਰ 40 ਸਾਲ ਦਰਮਿਆਨ ਜਾਂ ਇਸ ਤੋਂ ਘੱਟ ਦੱਸੀ ਜਾ ਰਹੀ ਹੈ। ਉਸ ਦੀ ਕੱਟੀ ਹੋਈ ਦਾੜ੍ਹੀ ਅਤੇ ਕੁਝ ਸਫੈਦ ਵਾਲ ਹਨ। ਉਕਤ ਦੋਸ਼ੀ ਨੇ ਨੀਲੇ ਰੰਗ ਦੀ ਦਸਤਾਰ ਬੰਨ੍ਹੀ ਹੋਈ ਹੈ। 
ਮੰਨਿਆ ਜਾ ਰਿਹਾ ਹੈ ਕਿ ਉਹ ਹੀ ਕਾਰ ਦਾ ਡਰਾਈਵਰ ਸੀ ਅਤੇ ਉਸ ਨੇ ਬੱਚੇ ਨੂੰ ਕਾਰ 'ਚ ਬਿਠਾਉਣ ਲਈ ਉਸ ਨੂੰ ਮਨਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਸਰੀ ਪੁਲਸ ਨੇ ਇਸ ਘਟਨਾ ਦੇ ਸੰਬੰਧ ਵਿਚ ਮਦਦ ਦੀ ਅਪੀਲ ਕੀਤੀ ਹੈ, ਪੁਲਸ ਦਾ ਕਹਿਣਾ ਹੈ ਕਿ ਜਿਸ ਕਿਸੇ ਨੂੰ ਵੀ ਇਸ ਸ਼ੱਕੀ ਬਾਰੇ ਪਤਾ ਲੱਗੇ ਉਹ ਸਾਡੇ ਨਾਲ ਸੰਪਰਕ ਕਾਇਮ ਕਰਨ।