52 ਕਰੋੜ ’ਚ ਵਿਕਿਆ 60 ਕਰੋੜ ਸਾਲ ਪੁਰਾਣਾ ਡਾਇਨਾਸੌਰ ਦਾ ਪਿੰਜਰ

ਪੈਰਿਸ– ਕੁਝ ਸਾਲ ਪਹਿਲਾਂ ਦੁਨੀਆ ਦੇ ਹੁਣ ਤੱਕ ਦੇ ਸਭ ਤੋਂ ਵੱਡੇ ਟ੍ਰਾਈਸੇਰਾਟੋਪਸ ਫਾਸਿਲ ਦੀ ਖੋਜ ਕੀਤੀ ਗਈ ਸੀ। 66 ਮਿਲੀਅਨ ਸਾਲ ਪੁਰਾਣੇ ਇਸ ਵਿਸ਼ਾਲ ਪਿੰਜਰ ਦਾ ਨਾਂ ‘ਬਿਗ ਜੌਨ’ ਰੱਖਿਆ ਗਿਆ ਸੀ। ਇਕ ਨਿਲਾਮੀ ਵਿੱਚ ਇਹ ਫਾਸਿਲ 6.6 ਮਿਲੀਅਨ ਯੂਰੋ ਯਾਨੀ ਕਰੀਬ 52 ਕਰੋੜ ਰੁਪਏ ਵਿੱਚ ਵਿਕਿਆ ਹੈ।
ਵੀਰਵਾਰ ਦੁਪਹਿਰ ਨੂੰ ਪੈਰਿਸ ਦੇ ਡਰੌਟ ਨਿਲਾਮੀ ਘਰ ਵਿੱਚ ਬਿਗ ਜੌਨ ਦੇ ਜੀਵਾਸ਼ਮ, ਉਲਕਾਪਿੰਡਾਂ ਅਤੇ ਹੋਰ ਕੁਦਰਤੀ ਇਤਿਹਾਸ ਦੀਆਂ ਕਲਾਕ੍ਰਿਤੀਆਂ ਦਾ ਖਜ਼ਾਨਾ ਨਿਲਾਮੀ ਲਈ ਰੱਖਿਆ ਗਿਆ ਸੀ। ਇਸ ਪਿੰਜਰ ਦੀ ਖੋਜ ਪਹਿਲੀ ਵਾਰ ਭੂ-ਵਿਗਿਆਨੀ ਵਾਲਟਰ ਡਬਲਯੂ. ਸਟੀਨ ਬਿਲ ਨੇ 2014 ਵਿੱਚ ਕੀਤੀ ਸੀ। ਮੰਨਿਆ ਜਾਂਦਾ ਹੈ ਕਿ ਡਾਇਨਾਸੌਰ ਲਾਰਾਮੀਡੀਆ ਵਿੱਚ ਰਹਿੰਦਾ ਸੀ, ਜੋ ਇੱਕ ਵਿਸ਼ਾਲ, ਪ੍ਰਾਚੀਨ ਮਹਾਦੀਪ ਹੈ, ਜੋ ਅੱਜ ਅਲਾਸਕਾ ਅਤੇ ਮੈਕਸੀਕੋ ਦੇ ਵਿਚਕਾਰ ਫੈਲਿਆ ਹੋਇਆ ਹੈ। ਖੁਦਾਈ ਤੋਂ ਬਾਅਦ, ਡਾਇਨਾਸੌਰ ਦੇ ਅਵਸ਼ੇਸ਼ਾਂ ਨੂੰ ਇਟਲੀ ਵਿਚ ਰੱਖਿਆ ਗਿਆ ਅਤੇ ਫਿਰ ਜੋੜ ਕੇ ਦੇਖਿਆ ਗਿਆ। ਇਸ ਨਾਲ ਪੁਰਾਤੱਤਵ-ਵਿਗਿਆਨੀਆਂ ਲਈ ਇਸ ਦਾ ਅਸਲੀ ਆਕਾਰ ਦੇਖਣਾ ਆਸਾਨ ਹੋ ਗਿਆ।

ਨਿਲਾਮੀ ਨਾਲ ਨਮੂਨੇ ਗੁਆ ਦਿੰਦਾ ਵਿਗਿਆਨ
ਮਾਹਿਰਾਂ ਨੇ ਵੀ ਅਜਿਹੀਆਂ ਨਿਲਾਮੀ ’ਤੇ ਚਿੰਤਾ ਪ੍ਰਗਟਾਈ ਹੈ। ਇਕ ਨਿਲਾਮੀ ਘਰ ਨੇ ਕਿਹਾ ਕਿ ਨਿੱਜੀ ਹੱਥਾਂ ਨੂੰ ਜੀਵਾਸ਼ਮ ਦੇ ਨਮੂਨੇ ਵੇਚਣ ਨਾਲ ਸੰਭਾਵੀ ਤੌਰ ’ਤੇ ਉਹ ਵਿਗਿਆਨ ਲਈ ‘ਗੁੰਮ’ ਹੋ ਜਾਂਦੇ ਹਨ। ਨਿਜੀ ਮਲਕੀਅਤ ਵਾਲੇ ਨਮੂਨਿਆਂ ਵਿੱਚ ਮੌਜੂਦ ਜਾਣਕਾਰੀ ਤੱਕ ਭਵਿੱਖ ਦੀ ਪਹੁੰਚ ਦੀ ਗਰੰਟੀ ਨਹੀਂ ਦਿੱਤੀ ਜਾ ਸਕਦੀ, ਜਿਸ ਨਾਲ ਵਿਗਿਆਨਕ ਦਾਅਵਿਆਂ ਦੀ ਪੁਸ਼ਟੀ ਕਰਨਾ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ।

60 ਪ੍ਰਤੀਸ਼ਤ ਤੋਂ ਵੱਧ ਪਿੰਜਰ ਪੂਰਾ
ਬਿੱਗ ਜੌਨ ਦੀ ਖੋਪੜੀ 9 ਫੁੱਟ ਲੰਬੀ ਅਤੇ ਸਾਢੇ 6 ਫੁੱਟ ਚੌੜੀ ਹੈ। ਡਾਇਨਾਸੌਰ ਦਾ ਪਿੰਜਰ 60 ਪ੍ਰਤੀਸ਼ਤ ਤੋਂ ਵੱਧ ਪੂਰਾ ਹੈ। ਬ੍ਰਿਟੇਨ ਦੇ ਨੈਚੁਰਲ ਹਿਸਟਰੀ ਮਿਊਜ਼ੀਅਮ ਦੇ ਅਨੁਸਾਰ, ਟ੍ਰਾਈਸੇਰਾਟੋਪਸ ਦੀ ਖੋਪੜੀ ਇੱਕ ‘ਵਿਕਾਸਵਾਦੀ ਜਿੱਤ’ ਹੈ ਅਤੇ ਸਾਰੇ ਧਰਤੀ ਦੇ ਜਾਨਵਰਾਂ ਨਾਲੋਂ ‘ਸਭ ਤੋਂ ਵੱਖਰੀ’ ਹੈ। ਹਾਲਾਂਕਿ ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਡਾਇਨਾਸੌਰ ਦਾ ਪਿੰਜਰ ਇੰਨਾ ਮਹਿੰਗਾ ਵਿਕਿਆ ਹੋਵੇ। ਇਸ ਤੋਂ ਪਹਿਲਾਂ ਸਤੰਬਰ 2020 ਵਿੱਚ ‘ਸਟੈਨ’ ਨਾਮ ਦੇ ਇੱਕ ਟਾਇਰਨੋਸੋਰਸ ਰੇਕਸ ਦਾ ਪਿੰਜਰ 31.8 ਮਿਲੀਅਨ ਡਾਲਰ ਵਿੱਚ ਵੇਚਿਆ ਗਿਆ ਸੀ।